1 Maa wọ ode nnwẹr s'ache p'efonamma ch'Adam.

Masẹ wa Ubinọkpaabyi usi ayokhanạng, usi bẹ akhera ẹma oyeni. 2 Wa usi bẹ ujunung ọttạra ikwanạng, odo bẹ, oyeri bẹ bẹ́, Ayokhanạng.

3 Wa Adam kk'icho arạbh asajạnẹ ukuma jobh urukha, bạrasẹ n'ofhonu ujunungnwa kw'okher ẹma oyeni, ukpuẹ-ẹ Sẹt. 4 Masẹ Adam kk'Sẹt ofhona, wa ọbạra uruk icho nnọhna mfa, ọbạra ofhon ajunung ọttạra ipanạng adwạkh-ọdwạk. 5 Phyi-phyibh, wa Adam urukhu icho nnọhna mfa ukuma arạbh asajạnẹ ukuma jobh, bạrasẹ n'ope.

6 Masẹ Sẹt kk'icho arạbh asen ukuma asen urukha, ofhonu Ẹnọs. 7 Masẹ Sẹt kk'Ẹnọs ofhona, wa ọbạra uruk icho nnọhna mfa ukuma asenọfa, ọbạra ofhon ajunung ọttạra ipanạng adwạkh-ọdwạk. 8 Phyi-phyibh wa Sẹt urukhu icho nnọhna mfa ukuma arạbh asen ukuma jobh-kamfa, bạrasẹ n'ope.

9 Masẹ Ẹnọs kk'icho arạbh annebung ukuma jobh urukha, ofhonu Kenan. 10 Masẹ kk'Kenan ofhona, wa ọbạra uruk icho nnọhna mfa ukuma chi, ọbạra ofhon ajunung ọttạra ipanạng adwạkh-ọdwạk. 11 Phyi-phyibh wa Ẹnọs urukhu icho nnọhna mfa ukuma arạbh asen ukuma asen, bạrasẹ n'ope.

12 Masẹ Kenan okke icho arạbh attaan ukuma jobh, ofhonu Mahalalẹl. 13 Masẹ kk'Mahalalẹl ofhona, wa ọbạra uruk icho nnọhna mfa ukuma arạbh afa, ọbạra ofhon ajunung ọttạra ipanạng adwạkh-ọdwạk. 14 Phyi-phyibh wa Kenan urukhu icho nnọhna mfa ukuma arạbh asen ukuma jobh, bạrasẹ n'ope.

15 Masẹ Mahalalẹl okke acho arạbh attaan ukuma asen, ofhonu Jarẹd. 16 Masẹ Mahalalẹl kk'Jarẹd ofhona, wa ọbạra uruk icho nnọhna mfa ukuma ẹrạbh ukuma jobh, ọbạra ofhon ajunung ọttạra ipanạng adwạkh-ọdwạk. 17 Phyi-phyibh wa Mahalalẹl urukhu icho nnọhna mfa ukuma arạbh annebung ukuma chi, bạrasẹ n'ope.

18 Masẹ Jarẹd kk'icho arạbh asenọttaan ukuma ifa ukkia, ofhonu Ẹnọk. 19 Masẹ Jarẹd kk'Ẹnọk ofhona, ọbạra uruk icho nnọhna mfa, ọbạra ofhon ajunung ọttạra ipanạng adwạkh-ọdwạk. 20 Phyi-phyibh wa Jarẹd urukhu icho nnọhna mfa ukuma arạbh asenọttaan ukuma ifa, bạrasẹ n'ope.

21 Masẹ Ẹnọk kk'icho arạbh attaan ukuma asen ukkia, ofhonu Mẹtusẹla. 22 Masẹ kk'Mẹtusẹla ofhona, Ẹnọk ofon ororo ọtwạn Ubinọkpaabyi abẹ k'icho arạbh chi adwạkh-ọdwạk, ọbạra ofhon ajunung ọttạra ipanạng adwạkh-ọdwạk. 23 Phyi-phyibh wa Ẹnọk urukhu icho arạbh chikhanttaan ukuma asen. 24 Wa Ẹnọk ofon ororo ọtwạn Ubinọkpaabyi abẹ, osenga ma, Ubinọkpaabyi ọtạkh-ẹ utima ofona.

25 Masẹ Mẹtusẹla kk'icho arạbh sọwạnọ ukuma asenọfa urukha, ofhonu Lamẹk. 26 Masẹ kk'Lamẹk ofhona, wa Mẹtusẹla ọbạra uruk icho ẹnọhna ukuma arạbh chi ukuma arạbh annebung ukuma ifa, ọbạra ofhon ajunung ọttạra ipanạng adwạkh-ọdwạk. 27 Phyi-phyibh wa Mẹtusẹla urukhu icho nnọhna mfa ukuma arạbh asenọttaan ukuma sọwạnọ, bạrasẹ n'ope.

28 Masẹ Lamẹk okke icho arạbh sọwạnọ ukuma ifa, ofhonu ujunungnwa, 29 ukpuẹ-ẹ Noa. Lamẹk ukwu oben bẹ́, "Nnwa nwa m'ofokhu mạna nttem k'ọtọhm famạna, ọttạra k'irem samạna s'ibin k'isisek s'Ọvaar Ubinọkpaabyi kk'ẹmma-ọraakha." 30 Masẹ Lamẹk kk'Noa ofhona, wa ọbạra uruk icho ẹnọhna ukuma arạbh sọwạnọ ukuma chi, ọbạra ofhon ajunung ọttạra ipanạng adwạkh-ọdwạk. 31 Phyi-phyibh wa Lamẹk urukhu icho ẹnọhna ukuma arạbh chikhanttaan ukuma chikhamfa, bạrasẹ n'ope.

32 Masẹ Noa kk'icho ẹnọhna ukuma arạbh asen ukkia, ofhonu ajunungva attaan p'ade: Shẹm, ọttạra Ham, ọttạra Japhẹt.