1 Josẹph otto ọkpẹkhẹ apfura p'otte, ọgạma, ọbạra ọbaakh-ẹ. 2 Ma wọ Josẹph ọtọhnọ akkeri-akhạmakhạma p'atọhmnạng pẹ bẹ́, abẹ adira apfura p'otte kwẹ Jekọb ata aye, abẹ abạra akkeri wẹ, ọfha awẹ nạngẹ ọdọhkhọ. 3 Wa abẹ aye wẹ k'iwu arạbh afa ator k'oche kw'ẹmmaana ch'apfura-yiye ede k'Ijip. Wa anạng p'Ijip atim nkwuna k'iwu arạbh attaan ukuma jobh.

4 Masẹ iwu nnọ s'nkwuna kk'ittonga, Josẹph oben ajukwa p'Phero bẹ́, "De kk'ọphyaam nkhaama k'abạnga k'ititikha, akkaan-m akpaak Phero bẹ́, 5 Wa otte kwaam usi-m ntạkha echekha s'oben-m bẹ́, ‘Ebowu chaam nạngka efora, de mbe maa mpe, sọhng ata annọhng-m k'epekwur ch'ntumu k'Kenaan nchok amma oyeni.’ Ma wọ, tte nta nnọhnga otte kwaam, de kk'ẹ nnọhnga, m'nkwun-ukwuna e."

6 Ma wọ Phero oben-ẹ bẹ́, "Ọma sọhng ata annọhnga atte, ator k'echekha ch'uwa kk'ọ usia atạkha."

7 Mạnna wọ Josẹph ubin osenga ọta otte nạnnọhnga. Wa atọhmnạng p'Phero phyi-phyibh, ọttạra adennạng p'ọvaardimpa kw'Phero, ọttạra adennạng p'Ijip bẹ wạạm, 8 akwu attạra k'ẹchọhmfhạr ch'Josẹph phyibh, ọttạra ivotte pẹ, ọttạra anạng p'ẹchọhmfhạr ch'otte Jekọb, atwạnọ Josẹph abẹ. Wa iva mạnkkeni ọttạra itirakpo bọ n'arikhi kha Goshẹn. 9 Wa ijaar sididen s'nnyạnyaang n'itwạr, ọttạra ayaar-nnyạnyaang, abạra atwạn abẹ. Wa ikhana nnọ ikhangkẹ isaabh-ọsaabh.

10 Masẹ abẹ akpir k'ibyi sabẹ n'aninga akhaan abarli-mạma k'Atad, k'Jọrdan ukhubha, abẹ agạma abomạng k'erạng-k'ẹrạng ọttạra ottempyibh. Ma ibyi nnọ rạnẹ ẹrọ s'uwa Josẹph utim nkwuna s'obo kw'otte k'iwu isenọfa. 11 Wa anạng p'Kenaan p'arukhu ma ibyi nnọ sabẹ n'akhaan abarli-mạma k'Atad, p'ase oche kw'Josẹph usi obo kw'otte, ayeri ibyi nnọ s'ibaang Jọrdan bẹ́, Abẹl-Mizrayim, aben bẹ́, "Anạng p'Ijip aning k'nkwuna k'obo!"

12 Ma wọ wa iva p'Jekọb asi oche kw'otte kk'bẹ ọtọhna. 13 Wa abẹ adir apfura p'otte afona k'isek s'Kenaan, ata annọhnga k'ọmma kw'ẹtakpa kw'uning k'Makpẹla, ọbaanga Mamrẹ. Wa Abraham kk'ọmma ngwọ kw'ẹtakpa odebha ọttạra owonu kw'uning ma, k'mbọhk s'Ẹphrọn kw'ubin Het, utima usi innọhng-apfura. 14 Masẹ Josẹph kk'otte ọnnọhnga, ẹma ọttạra ivotte pẹ, ọttạra anạng p'akhubhu bẹ obo phyibh, akpa nnạm abhạna k'Ijip.

15 Masẹ abẹ kk'obo akwuna, ivotte p'Josẹph atin bẹ́ otte kwabẹ dạkhẹ k'akpen kóde, abẹ n'abạbhọ abẹma oyeni bẹ́, "De Josẹph n'obe maa chemma oben bẹ́ utwukha ipyibha chidede ch'kk'ẹ ansia mo?" 16 Ma wọ abẹ atọhmọ ẹkkaabha anạng Josẹph bẹ́, "Wa atte ọnạngẹ mạna ntọhna bạrasẹ n'ope e: 17 Wa obeni bẹ́, ‘Abạnga akpaak Josẹph bẹ́ amma mbeni bẹ́ ubina ọnạng mpyibha sidede s'abạnga kk'ẹ asi e.’ Ma o, anchin-ọ-uchini, bẹ́ abina ma anạng mpyibha s'atọhmnạng p'Ubinọkpaabyi kw'uwa atte kwọ okpobh." Masẹ ẹkkaabha njọ etto Josẹph k'itọhng o, Josẹph ọgạma.

18 Ma wọ ivotte afon ata akhebh-ẹ, atto abạmọ ma isisek, agạma mmạng ma akhẹ ititikha, aben bẹ́, "Amạna mba ande abira pọ e."

19 Okhenka, Josẹph oben bẹ bẹ́, "Tte nạngẹ bạnga ojor. Amma wọ nde Ubinọkpaabyi o? 20 Wa abạnga akkẹ bẹ́ abạnga asi-m igbaan, okhenka, wa Ubinọkpaabyi utim ẹkka ọkkachẹ otte udik ngwọ ọbọhk bẹ́ akwẹ ode, ọfha ọkkaana akpen p'anạng-saabhada, oche kw'akwẹ ode maa. 21 Ma o, tte nạng bạnga ojor. Amma m'nkkeri bạnga okkeri, oseng k'iva pabạnga." Josẹph ofon ororo ọnạng ivotte pẹ ottembạr, ọbạra ọkpaak bẹ idik s'ottem-fokhu.

22 Wa Josẹph ọttạra ẹchọhmfhạr ch'otte k'ubungu afon ororo aruk k'Ijip. Wa Josẹph urukhu icho arạbh asen ukuma jobh, 23 tạrr ose iva p'iva p'Ephraim. Wa Josẹph ọbạra utin bẹ́, iva p'abin k'ntaak s'Makir, kw'ode nnwa kw'Manasẹ, abạra ade iva pẹ.

24 Wa Josẹph ọkpaakhẹ ivotte pẹ bẹ́, "Ebowu chaam nạngka efora e, okhenka, de mbe maa mpe, Ubinọkpaabyi m'ochok echekha chẹ ochok bẹ́, utima bạnga ubina maa isisek nna, ọta ọnạng bạnga isisek s'uwa ochekhi bẹ́, m'ọnạng Abraham, ọttạra Isaak, ọttạra Jekọb." 25 Ma wọ Josẹph usi ivotte pẹ, p'ade iva p'Israẹl atạkha echekha k'ititikha sẹ, aben bẹ́, "K'udik ọkka, Ubinọkpaabyi m'ọnạng bạnga ẹkkaana ọnạng, oyonga abạnga m'adira akhạbhọ paam maa isek nna atima afona."

26 Ma wọ wa Josẹph ope s'ode icho arạbh asen ukuma jobh. Masẹ abẹ kk'apfura pẹ ayia, abẹ adira wẹ age k'Ikwukwur k'Ijip.