1 Maa wọ ode ache p'ajunungva p'Israẹl, kw'ọbạra okpena Jekọb, p'uwa afon k'Ijip, ọnạng-ọnạng ọttạra ẹchọhmfhạr chẹ phyibh. 2 Wa abẹ ade: Reubẹn, ọttạra Simeọn, ọttạra Lẹvi, ọttạra Juda, 3 ọttạra Isaka, ọttạra Zẹbulun, ọttạra Bẹnjamin, 4 ọttạra Dan, ọttạra Naphtali, ọttạra Gad, ọttạra Ashẹr. 5 Josẹph ẹma wa, uchi eden uruk k'Ijip. Phyi-phyibh wa efonamma ch'Jekọb ede anạng-nạbh attaan ukuma jobh p'uwa utim ofona k'Ijip.

6 Wa Josẹph ọttạra efonamma chẹ phyibh, ọttạra ọgbọ mvọ phyibh akwu ape. 7 Okhenka, efonamma ch'Jekọb n'ẹbhạkhẹ efhon ayok tạrr achẹ ẹsaabh, ẹbạra ikwu ẹbạr, ẹnyaamẹ ifu isisek nnọ bẹ ttạbh.

8 Wa ọvaarnạng ọbhakwẹ kw'nạn Josẹph osong ọdạbhẹ Ijip. 9 Wa obeni anạng pẹ bẹ́, "Akker o! Anạng mba p'Israẹl kk'asaabha kidaam-kidaam, abạra akhaama ẹfa ayọhnga mạna. 10 Akwu antima ekkoji ankuma bẹ ọsaabh mva o, deja, de ekpong ebe ma etto, abẹ m'attạra awawunanạng pamạna arima mạna abẹ, bạrasẹ abẹ arạbh arik mạna isek."

11 Ma wọ anạng p'Ijip arengi akker-atọhmnạng p'abin Ijip, ọfha abẹ anạng efhonfhạr ch'Israẹl ọtọhm f'irem abe asi. Anạng p'Israẹl asi ifhon-diden s'Pitọm, ọttạra Rameses masẹ ọkhaanga-chọhm anạng ọvaar Phero. 12 Okhenka, oche ngwọ kw'anạng p'Ijip ado anạng p'Israẹl irem nạnạng, mạnna wọ kw'anạng p'Israẹl n'asaabh afona, abạra ado anyaam-ọnyaamẹ tạrr ojora ọnwa anạng p'Ijip. 13 Ma wọ anạng p'Ijip n'ado anạng p'Israẹl irem sisi. 14 Abẹ akwu asi akpen agbẹrẹ anạng p'Israẹl, ukwuru itọhm-kpọhkha s'idọhngọ bhạbhạkhẹ, ọttạra f'ata bạbạnga, ọttạra iwonu-tọhm k'ukhira-k'ukhira. Chibhi s'anạng p'Israẹl asi itọhm-kpọhkha anạng bẹ, anạng p'Ijip bẹ ikwosi násia.

15 Ma wọ ọvaarnạng kw'Ijip obeni ipanạng p'n'atik aHiburu-panạng ọmaan, p'akpen Shiphra, ọttạra Pua bẹ́, 16 "Okpe kw'abạnga m'atik aHiburu-panạng ọmaan, abạnga atạkha okpe akkeri k'ọmaanpa, de ode ujunungnwa, afhẹ-ẹ. Okhenka, de ode ọkwanạng-nwa, attẹ-ẹ ọbọhk uruk akpen." 17 Okhenka, s'atik-ipanạng-ọmaan mbọ akhaam ojora f'Ubinọkpaabyi, abẹ ntọhna s'ọvaarnạng kw'Ijip nátạkha. Abẹ atte ajunungva ọbọhk aruk akpen. 18 Ma wọ ọvaarnạng kw'Ijip oyeri atik-ipanạng-ọmaan mbọ ọbạbh bẹ bẹ́, "Ukwuru yạn kw'abạnga asi udik demakwẹ ngwa? Oseng yạn kw'abạnga n'atte ajunungva ọbọhk arukh o?" 19 Atik-ipanạng-ọmaan mbọ abhina Phero bẹ́, "AHiburu-panạng masẹ ipanạng p'Ijip nádia e. Abẹ bạra abạr ettem k'ọmaan. Ọmaan fabẹ ofor oseng eden, bạrasẹ atik-ipanạng-ọmaan ata akpira, abẹ kk'amaana." 20 Ma wọ Ubinọkpaabyi usi ọphyaam ọnạng ipanạng mbọ p'n'atik anạng ọmaan, anạng p'Israẹl afona ororo asaabh, abạra akhaama ẹfa. 21 Ubinọkpaabyi ọnạngẹ atik-ipanạng-ọmaan mbọ ichọhmfhạr s'ide sabẹ, ukwuru sabẹ akhaam ojora f'Ubinọkpaabyi.

22 Ma wọ, Phero ọnạngẹ anạng pẹ phyibh ẹfa bẹ́, "Ujunungnwa kw'uHiburu-kwanạng kwidede m'ọmaan, atạkh-ẹ abhạrẹ k'ọraanga kw'Nile, akhenka, atte ọkwanạng-nwa kwidede ọbọhk uruk akpen."