1 Ma wọ, Ọvaar Ubinọkpaabyi obeni Mosẹs bẹ́, "Sọhng khebha Phero, khiri kk'ettem chẹ, ọttạra nttem s'ajukwa pẹ nsia bẹ, asẹ ibạr mororo. Ọfha osenga ma, nsi ikkukkonadik saam ma abẹ ukwung, 2 ọfha kwạna atek iva pọ, ọttạra iva p'iva pọ, oche kw'nsi anạng p'Ijip irem, ọttạra ikkukkonadik s'nsi kabẹ k'ititikha, ọfha abạnga abạra asonga bẹ, amma wọ nde Ovaar Ubinọkpaabyi."

3 Ma wọ, Mosẹs ọttạra Aarọn afon akhebha Phero, akpaakh-ẹ bẹ́, "Ọvaar Ubinọkpaabyi kw'ode Ubinọkpaabyi kw'aHiburu, obeni bẹ́, ‘M'ubhir ukpira yạn, brasẹ asạkha ifor sọ anạng-m o? Tte anạng paam ọbọhk abẹ afona, ọfha abẹ ata akpobh-m khadẹ. 4 Ode afhumu bẹ́, anạng paam ọbọhk mátte abẹ afona, uphyini, m'ntọhm agwurub hebhe kakhọ k'ofhon. 5 Agwurubhebhe mbọ m'abubha isisek phyibh tạrr ọnạng dạkhẹ isisek móse. Apyẹ m'ẹbạra ikhibhi ekpo py'uwa arạngtava akhibhi arik, ọttạra ichi chidede ch'emeni k'iwonu sabạnga. 6 Apyẹ m'ẹbạra ifu k'ichọhm sọ, ọttạra k'ichọhm s'ajukwa pọ, ọttạra k'ichọhm s'anạng p'Ijip phyibh. Akwẹ m'ode udik kw'ab'atte, ọttạra ab'atte p'ab'atte pọ, nạn tạm násia, tạma s'ofhon kw'Ijip obobe ọmmaana, tạrr ukpira mantọmma.’ " Ma wọ, Mosẹs ubin urik Phero.

7 Ajukwa mbọ n'abạbh Phero bẹ́, "M'ubhir ukpira yạn brasẹ ujunung nwa ukuma mạna k'ọmaphyaangẹ gige o? Tte bẹ ọbọhk abẹ afona, ọfha abẹ at'akpobha Ubinọkpaabyi, kw'ode Ọvaar Ubinọkpaabyi kwabẹ khadẹ o. Node bẹ́, ọma tạm násia bẹ́, Ijip n'uning k'irem o?" 8 Ma wọ, Phero ọtọhmọ abẹ ayeri Mosẹs ọttạra Aarọn akpa nnạm, oben bẹ bẹ́, "Abạnga asọhng ata akpobha Ọvaar Ubinọkpaabyi, kw'ode Ubinọkpaabyi kwabạnga. Ma, bạng anạng bọ m'afona?"

9 Mosẹs ubhina bẹ́, "Amạna mba phyibh m'anfon-ofona, asạk-ọsạkha abạr-ọbạr, oseng ajunungva ọttạra apanạngva, ọttạra itirakpo py'amạna, ukwuru bẹ́, m'ansi erobha ch'ikpukpobha annạng Ọvaar Ubinokpaabyi kwamạna."

10 Okhenka, Phero n'obeni bẹ bẹ́, "Abạnga akkẹ bẹ́, Ọvaar Ubinọkpaabyi m'uninga bạnga abẹ, de ntte bạnga ọbọhk abạnga afona, ipanạng ọttạra iva pabạnga abẹ? Kk'aam ọttaana bẹ́, abạnga akhạm iphyibha. 11 Mesese! Tte ajunung mạnkkeni afona ata akpobha Ọvaar Ubinọkpaabyi, ọgba udik kw'abạnga n'aphyem kẹnạma gwọ ma." Ma o, abẹ akhubh Mosẹs ọttạra Aarọn k'ititikha s'Phero.

12 Ma wọ, Ọvaar Ubinọkpaabyi obeni Mosẹs bẹ́, "Dira ọbọhk kwọ tena k'Ijip, ọfha agwurubhebhe atạkha ibyi sidede, ẹbạra ikhibhi ọttọhk fidede f'omeni k'iwonu, ọttạra ọttọhk fidede f'arạngtava akhibhi arik."

13 Mạnna wọ, Mosẹs udir uchikwura kwẹ otena k'Ijip, Ọvaar Ubinọkpaabyi usi ọbhẹrẹ ọtạma k'ukhubha kw'okpebhadudon n'uyin, uguma ọbaabha ofhon ma iwu njọ k'ubungu. Masẹ iwu n'echobh o, ọbhẹrẹ nwọ kk'agwurubhebhe utima ukwu, 14 apyẹ ẹnyaamẹ ẹbaabha Ijip k'ọsaabh. S'akwẹ obeb'ode, nkwuru s'agwurubhebhe tạmạnuttia k'Ijip, akwẹ dạk m'ọbạra otto tạrr ọyagbin ọvọhkhọ. 15 Agwurubhebhe mbọ ibubh isisek phyibh tạrr asẹ ipy'irungu bẹ́ kkạạng. Apyẹ ichi ọtọhk fidede f'arạngtava akhibhi arik: tạma k'ekpo py'n'emen k'iwonu, tạrr ukpira k'achidwuk. Wa ichi jạnẹ-jạnẹ, ọttạra isạsaarẹ rạnẹ-rạnẹ, s'isen-oseni dạk kíde k'isek s'Ijip. 16 Phero udwukh-udwukha oyeri Mosẹs ọttạra Aarọn, oben bẹ bẹ́, "Amma kk'ipyibha nsia k'ititikha s'Ọvaar Ubinọkpaabyi, kw'ode Ubinọkpaabyi kwọ, ọttạra k'ititikha sọ. 17 Totokhạn, bina ma nạng-m mpyibha saam eden nja, abạra ase njọhm anạng Ọvaar Ubinọkpaabyi, kw'ode Ubinọkpaabyi kwọ, ọfha ọrạbh mạna ma nkwuru nna."

18 Mosẹs ubina urik Phero ọta ose njọhm ọnạng Ọvaar Ubinọkpaabyi.

19 Ọvaar Ubinọkpaabyi ọbhạkhe ọbhẹrẹ nwọ otena k'ukhubha kw'ọchọhkha-dudon n'udimi, uguma agwurubhebhe mbọ phyibh ọbhạrẹ k'Ẹraanga-khora. Ugwurubhebhe wạnọ-wạnọ dạk núrikha k'Ijip. 20 Okhenka, Ọvaar Ubinọkpaabyi usi Phero ofona ororo ọbạr ettem, ufhum bẹ́, otte anạng p'Israẹl ọbọhk abẹ afona.

21 Ma wọ, Ọvaar Ubinọkpaabyi obeni Mosẹs bẹ́, "Dira ọbọhk kwọ tena k'ọrạngkpankpa, ọfha urungubạnga uyin ubhubha Ijip phyibh." 22 Mosẹs udira ọbọhk kwẹ otena k'ọrạngkpakpa, urungubạnga nwa kw'upyi bẹ, kkạng, ububha Ijip phyibh k'iwu mạnna itaan. 23 Ọnạng wạnọ-wạnọ kw'ose oyok, brasẹ n'ubin urik ibyi sẹ ma iwu nnọ ittaan, kode. Chibhi s'ode oche ngwọ, anạng p'Israẹl akhaam ọyaanttaana k'ibyi sidede sabẹ arukhu.

24 Ma wọ, Phero oyeri Mosẹs ọttạra Aarọn oben bẹ bẹ́, "Abạnga asọhng ata akpobha Ọvaar Ubinọkpaabyi. Ipanạng ọttạra iva pabạnga akke-okke atwạn bạnga abẹ, akhenka atte itirakpo p'abạnga ọbọhk ininga ma."

25 Okhenka, Mosẹs ọbẹ, "Oyonga m'atte mạna ọbọhk anta anfọhnọ nja, ambạra anta ansi nnạnga ikkạmasẹ annạng Ọvaar Ubinọkpaabyi, kw'ode Ubinọkpaabyi kwamạna. 26 Oseng itirakpo pyamạna m'ẹgba ẹtwạn mạna abẹ efona, vạnọ-vạnọ mámbina annik, ukwuru bẹ́, m'antima byạnọ annạng Ọvaar Ubinọkpaabyi, kw'ode Ubinọkpaabyi kwamạna ikpukpobha. Oyonga de kk'amkpira kha brasẹ n'ansong ọttọhk f'm'antima annạng Ọvaar Ubinọkpaabyi ikpukpobha."

27 Okhenka ode bẹ́, Ọvaar Ubinọkpaabyi ofon ororo usi Phero odo ettem ọbạr-ọbạr, ifor núdia bẹ, otte anạng p'Israẹl ọbọhk abẹ afona. 28 Ma wọ, Phero n'obeni Mosẹs bẹ́, "Bin-m k'ititikha! Dạk káyoma bẹ́, abe-m k'ititikha o! Iwu ch'abạra ase adạkhẹ ititikha saam, m'ape-ope." 29 Mosẹs ubhin-ẹ bẹ́, "A o! Tte akwẹ ode oche kw'abeni, amma k'ititikha sọ dạk mạ́mbe e."