1 Masẹ anạng p'Israel ase bẹ́, Mosẹs k'okponga oseng eden k'okpecho, abẹ ata akhạbha Aarọn age k'ngekha aben bẹ́, "Khiri kha, kwu asi akha nạng mạna p'm'atima mạna eden. De n'ode oyoyaanẹ nwọ Mosẹs kw'utim mạna ubina k'Ijip, s'kk'ittia ikhebh-ẹ kha kánsong e."

2 Ma wọ Aarọn ubhin bẹ bẹ́, "Abạnga awạra akkạra py'gol py'ipanạng pabạnga, ọttạra py'iva pabạnga, ajunungva ọttạra apanạngva, akken-m." 3 Ma wọ anạng mbọ phyibh awạra akkạra pyabẹ akkena Aarọn. 4 Ọtạkha ekpo py'abẹ kk'ẹ akkena, udwuk ọkpata kw'okher ọbhaamnwa, utima ọttọhm-ttọhk usi awẹ ọkwọhnga. Ma wọ, abẹ abeni bẹ́, "Israẹl o, akkeri ọkha fabạnga ma f'utim bạnga ubina k'Ijip-e."

5 Masẹ Aarọn ose udik ngwa, usi ijabyi ma ititikha s'ọbhaam-nwa nwọ, owon ẹmạng bẹ́, "Uphyini m'ansi erobha annạng Ọvaar Ubinọkpaabyi-e." 6 Ma wọ iwu echobh ma, anạng mbọ agim-ugim aphyạbha, ata afọhnọ ẹja ch'nnạnga ikkạmasẹ, abẹ abạra atima nnạnga s'ẹgbạkha akwu. Abẹ abina ma, abẹ ata aninga ẹyạr achi, abạra agwo, bạra abẹ n'abin atạma isaasadik sisi.

7 Ma wọ, Ọvaar Ubinọkpaabyi obeni Mosẹs bẹ́, "Sạkha, khiri anạng pọ p'atim abina k'Ijip kk'akhibha. 8 Abẹ kk'idwudwukha atima akpa nnạm avạra ntọhna s'nnạng bẹ, abẹ kk'ọkpata-nwa abạra adwukha kw'ode masẹ ọbhaam-nwa. Abẹ kk'ncho atwunga anạng-ẹ, abẹ kk'ẹja abạra afọhna anạng-ẹ, abẹ aben bẹ́, ‘Israẹl o, akkeri ọkha fabạnga ma f'utim bạnga ubina k'Ijip e.’

9 "Ọvaar Ubinọkpaabyi oben Mosẹs bẹ́, "Amma kk'anạng mba nsia phyibh, abẹ ade anạng p'akhaam ẹgaga e. 10 M'atte-m ọbọhk nkhọhkha bẹ ottemkạm kwaam, ọfha mbạra ndimi bẹ. Ma wọ m'nsi-ọ ẹkhạma chididen."

11 Okhenka, Mosẹs ophyemi Ọvaar Ubinọkpaabyi, kw'ode Ubinọkpaabyi kwẹ ọphyaam, oben bẹ́, "O Ọvaar Ubinọkpaabyi, ode yạn kw'n'akhaam ottemkạm anạng pọ abẹ, p'ọma oyeni atim ẹfa chididen, ọttạra ekhema abina k'Ijip o? 12 Ukwuru yạn kw'anạng p'Ijip n'abạra aben bẹ́, ‘Wa, ọkhaam ẹkka-pyibha otena bẹ abẹ, ẹgwọ usi utima bẹ ubina k'Ijip ukwu ọfhọ ma akpecho mba, ọfha osenga ma udimi bẹ woowong ma ọyagbin?’ Yaanga ottemkạm kwọ jẹ, adiri ettem, anạng pọ ipyibha kási. 13 Jima atọhmnạng pọ Abraham, ọttạra Isaak, ọttạra Jekọb, p'ọma oyeni atim ifor sọ achekhi anạng bẹ bẹ́, ‘Amma m'nsi iva p'iva pabạnga asaabh masẹ ndudoru s'ọrạngkpaang, mbạra nnạng iva p'iva pabạnga isisek nna phyibh s'nchekhi nnạng bẹ. Asẹ m'ibạra ide okhebh pfabẹ tạrr ipimmanitor.’ "

14 Ma wọ, Ọvaar Ubinọkpaabyi udiri ettem, ipyibha ch'uwa ọkhạmọ bẹ́, usi anạng pẹ, dạk núsia.

15 Mosẹs ọbhạkhẹ nnạm ọsạkha k'okpecho, utima atakpa afa k'mbọhk sẹ, p'abẹ akkẹre k'nnyina k'nnạm mfa, k'ititikha ọttạra k'nnạm. 16 Wa atakpa mbọ ade ọbọhktọhm f'Ubinọkpaabyi, ọkkẹra kw'uning ma atakpa mbọ ode ọkkẹra kw'Ubinọkpaabyi.

17 Masẹ Joshua ọbhaang mmạng s'anạng n'awuru, ọben Mosẹs bẹ́, "Kkọhm oche kw'akpong-mạng n'atto kha ibyibhingasẹ."

18 Mosẹs ubhina bẹ́,

"Ẹmạng ch'ekhema sạng ma,

ebomạng sạng ma,

ẹmạng ch'ọkkọhna jọ n'ntera mmaanga."

19 Masẹ Mosẹs oseng ofora ibyibhingasẹ, n'ose ọkha f'abẹ agwa masẹ ọbhaam-nwa, ọttạra utubha, ettem ipyibh-ẹ, ọbhạrẹ atakpa p'utim k'mbọhk, ọvọhkhọ pyẹ k'abuma-k'abuma ma ekpecho-rin. 20 Ọbạra ọtạkha ọkha mvọ f'abẹ kk'asia ọbhaabh k'ekpon; brasẹ n'ọtạk pfẹ okhok tạrr apfẹ ọpẹre, ọtạkha abubuma mbọ uttumu k'asi, ọkwa anạng p'Israẹl agwo pyẹ.

21 Mosẹs oben Aarọn bẹ, "Anạng mba asi-ọ mbạng kw'atim bẹ asi ipyibha ch'ebeng ma o?"

22 Aarọn ubhina bẹ́, "Aro kwaam, totokhạn, nạng-ọ ọdwạkhọ, ọma asong oche ma kw'idik-tạma n'idaak anạng mba sisi. 23 Abẹma bọ aben-m bẹ́, ‘Si akha nạng mạna p'm'atima mạna eden. De n'ode oyoyanẹ nwọ Mosẹs kw'utim mạna ubina k'Ijip, kw'kk'utia okhebh-ẹ kha kánsong e.’ 24 Ma wọ mbeni bẹ bẹ́, ‘Ọnạng kwidede kw'ọkhaam akkạra p'gol, tte ọwạra.’ Ma wọ abẹ awạra anạng-m, ndira pyẹ nge k'ekpon. Ma wọ ọkha mvama uyin e!"

25 Mosẹs ukwu ose bẹ́, anạng mbọ n'asi idindingi-dik, ọttạra bẹ́, Aarọn kk'bẹ ọbọhk uttia abẹ attena aseng eden, tạrr akwẹ n'ode ọsamma-dik ọnạng awawunanạng pabẹ. 26 Ma wọ Mosẹs obe k'ẹbaakhama k'ibyibhingasẹ oben bẹ́, "Ọnạng kwidede kw'obe Ọvaar Ubinọkpaabyi abẹ, tte ukwu otor-m." Ma wọ aLẹvi phyibh ammunu ator-ẹ.

27 Mosẹs oben bẹ bẹ́, "Ọvaar Ubinọkpaabyi, kw'ode Ubinọkpaabyi kw'Israẹl obeni bẹ́, ‘Tte ọnạng-ọnạng ọkpa ọkkangkkang-kkro kwẹ k'irin, osenga ofona ororo, ọkpa nnạm-nnạm ma ibyibhingasẹ, tạma k'echo jạnẹ kpira k'echo njọkha. Tte ọnạng-ọnạng ọfhọ nwọkka kwẹ, ọttạra oyok-ikhaana kwẹ, ọttạra oyok-ọbaanga kwẹ.’ " 28 ALẹvi asi oche kw'Mosẹs obeni bẹ, anạng nnọhna nsenọfa ukuma arạbh jobh bọ ape ma iwu njọ.

29 Ma wọ, Mosẹs obeni bẹ bẹ́, "Chemma, Ọvaar Ubinọkpaabyi kk'bạnga otekha, ukwuru s'abạnga nạn iva ọttạra ivotte pabạnga nájọkha, ẹma kk'bạnga udia ma iwu ch'chemma."

30 Masẹ iwu echobh, Mosẹs oben anạng mbọ bẹ́, "Abạnga kk'ipyibha chididen asia. Okhenka, amma m'nta k'Ọvaar Ubinọkpaabyi, nudusi m'nsi efokhu ch'm'ekpobhu mpyibha sabạnga." 31 Ma wọ, Mosẹs ọkpa nnạm k'Ọvaar Ubinọkpaabyi, oben bẹ́, "Ipyibha ch'anạng mba asi kk'ẹbạra e! Abẹ kk'gol atima agwa akha anạng abẹma oyeni. 32 Totokhạn, khenka bina nạng mpyibha sabẹ, de nạn bẹ mábina anạng, pfhura eche chaam k'nnwẹr s'kk'akkẹra."

33 Ọvaar Ubinọkpaabyi ọpọhna Mosẹs bẹ́, "Ọnạng kwidede kw'usi-m ipyibha wọ m'mpfhura eche chẹ k'nnwẹr saam. 34 Sọhng mantọmma, ata atima anạng mbọ eden afona k'ibyi s'wạra mkpaakh-ọ, itọhmọ saam m'ichi bạnga eden. Okhenka, de ukpir k'okpe kw'm'nnạng bẹ irem, amma m'nnạng bẹ irem k'mpyibha sabẹ."

35 Ma wọ Ọvaar Ubinọkpaabyi ọtọhmọ ọkhạkạmọ ọnạng anạng mbọ, ukwuru usisi kwabẹ, ọttạra ọkha mvọ f'okher ọbhaam-nwa kw'Aarọn kk'udwukha.