1 Wa Bẹzalẹl utim ichi ch'akasiya usi Ikwukwur s'Echekha. Adum pẹ ade ntwạkhọ nttaan ọmaana akpamma sọwạnọ, ẹkpa chẹ ede ntwạkhọ mfa ọmaana akpamma attaan, ebe chẹ ede ntwạkhọ mfa ọmaana akpamma attaan. 2 Utima gol ọkkọkka ọfhạrọ sẹ k'ẹtaanga ọttạra k'iyaan, ọbạra ọbạnga gol ọbaak sẹ ọbaabh-ọbaabha. 3 Utima gol usi ariringi annebung, oge k'mfhok s'ikwukwur nnọ, ariringi afa k'ukhubha gwạnọ, afa k'ukhubha ngwọkha. 4 Utima ichi ch'akasiya usi nsemachi, ọbạra utima gol ọfhạrọ sẹ. 5 Oge nsemachi nnọ k'ariringi p'aning k'akhaan-ọkhaan p'ikwukwur nnọ, ọfha abẹ n'avạkha ma adira sẹ. 6 Utima gol ọkkọkka usi ikwukwurkpa ch'efokhu, ch'adum pẹ ade ntwạkhọ nttaan ọmaana akpamma sọwạnọ, ẹkpa chẹ ede ntwạkhọ mfa ọmaana akpamma attaan. 7 Ma wọ utim gol udwuk achẹrubim ochok k'ikpicho kw'ikwukwurkpa njọ. 8 Usi ochẹrub wạnọ ochok k'echo jạnẹ, ọbạra usi ọdwạkh-ọdwạk ochok k'echo njọkha; usi apyẹ ede ukhira gwạnọ ọttạra ikwukwurkpa ch'efokhu. 9 Wa achẹrubim mbọ ammaam abạbaang pabẹ k'ẹrạng abubha ma ikwukwurkpa njọ ch'efokhu. Acherubim mbọ aning akkeri ayok ititikha ma ikwukwurkpa njọ k'ẹrạng.

10 Abe atim mkpaakha s'akasiya asi okpokkro nwọ. Adum pẹ ade ntwạkhọ nttaan, ẹkpa chẹ ede, ebe chẹ ede ntwạkhọ nttaan. 11 Abe atim okpokhagọgọ ọkkọkka afhạrọ okpokro nwọ, abẹ abạra abạnga okpokhagọgọ afhạrọ ammakpa phyibh. 12 K'ọkhaan-ọkhaan abẹ age ammakpa akpira masẹ ẹbọhkpattem, abẹ abạnga okpokhagọgọ atim afhạrọ. 13 Abẹ arạbha gol atima asi ariringi annebung p'okpokkro nwọ, adạbh k'mfok nnebung s'okpokro nwọ uning. 14 Ariringi mbọma aning abaanga ammakpabem, ọfha abẹ avạkha nsemachi nnọ sabẹ m'atima m'atima adira okpokkro nwọ. 15 Wa abẹ atim mkpaakha s'akasiya asi nsemachi sabẹ m'atima adira okpokkro nwọ, abẹ atima adạkhẹ gol afhạrọ se.

16 Wa abẹ abạra atima gol ọkkọkka asi ekpo py'ining ma okpokro nwọ, masẹ agbangbang p'agbẹrẹ-ọgbẹrẹ, ọttạra p'edong-odong, ọttạra nsibin, ọttạra akpobhumbọhk py'abẹ n'atima abyenga atwuk p'ẹjafọhna.

17 Abẹ adwuk okpokhagọgọ ọkkọkka atima asi ẹnạnna ch'uttukkạng, abẹ abạra asi ẹyạr ọttạra nchi sẹ; ọttạra akkọbh p'ayoyo, ọttạra agbạk, ọttạra ayoyo p'ade ukhira gwạnọ. 18 Etukkạng-chi njọ ẹkhaam abọkha asajạnẹ, k'akhaan-akhaan pẹ afa, attaan aning k'ukhubha gwạnọ, attaan aninga k'ukhubha ngwọkha.

19 Ma k'abọhkha mbọ, ẹbọkha chidede ẹkhaam nkọbh kw'okheri ayoyo p'ichi cha almọnd, attaan k'ebọkha jạnẹ, attaan k'ẹbọhkha njọkha. Abẹ ade ochegwạnọ ma abọkha mbọ asajạnẹ phyibh. 20 Itukkạng-chi njọ wa ẹkhaam akkọbh annebung p'ade masẹ agbo, ọtạra agbo p'kk'ammaama, ọttạra ayoyo p'almọnd. 21 Ogbo wạnọ uning k'isekhisek kw'abọhkha afa p'abin k'itukkạng-chi njọ. Ogbo nwọkha uninga k'isekhisek kw'abọhkha mbọkha afa. Ogbo kw'ottong attaan uning k'abọhkha p'attong attaan, p'asi abọhkha asajạnẹ phyi-phyibh. 22 Wa abẹ atim gol adwuk agbo ọttạra abọhkha p'ade ukhira gwạnọ ọttạra itukkạng-chi njọ ch'abẹ atim gol ọkkọkka adwuk.

23 Abẹ atim gol ọkkọkka asi attukkạng asenọfa, ọttạra afamgba p'atukkạng-dikhi kpạ-kpaara, ọttạra akoriya, ọttạra nsengakpa. 24 Abẹ atim talẹn wạnọ kw'gol ọkkọkka asi itukkạng-chi njọ, ọttạra ekpo pyẹ phyi-phyibh.

25 Wa abẹ atim mkpaakha s'akasiya asi ijabyi s'insẹns. Ebe ọttạra ẹkpa chẹ ade obengana; adum pẹ ade ẹtwạkhọ jạnẹ ọmaana ibhaakha, ẹkpa chẹ ede ẹtwạkhọ jạnẹ ọmaana ibhaakha, ebe chẹ ede ntwạkhọ nttaan. Abẹ atima ichi njọ jạnẹ asi abhik pẹ.

26 Abẹ atim gol ọkkọkka afhạrọ eche-cho ọttạra k'ukhubha kwidede, abẹ atima adạkhẹ gol abạnga ammakpabem abaabha sẹ phyibh. 27 Wa abẹ atim gol asi ariringi afa ma ammakpabem, afa k'ukhubha gwạnọ, afa k'ukhubha ngwọkha, ọfha abẹ n'avạkha adira sẹ. 28 Abẹ atim ichi ch'akasiya asi nsemachi, abẹ atima gol afhạrọ sẹ.

29 Abẹ abạra asi ana p'awurada p'abẹ n'abyenga ọnạng k'echo, ọttạra insẹns ọkkakwẹ kw'orebhi iruk, kw'ode ọbọhktọhm f'ọnạng kw'n'usi ana.