1 "Ma wọ, wa Ọvaar Ubinọkpaabyi kk'Bẹzalẹl ọttạra Oholiyab, ọttạra ommengkka-nạng kwidede emmengkka ọttạra esonga ch'ọtọhm fidede f'ibyi s'awurada sisi ọnạnga. Anạng mbọ bọ m'asi ọtọhm mvọ ator k'oche kw'Ọvaar Ubinọkpaabyi kk'bẹ ọtọhna."

2 Ma wọ Mosẹs oyeri Bẹzalẹl ọttạra Oholiyab, ọttạra ammengkka-nạng phyi-phyibh p'Ọvaar Ubinọkpaabyi kk'itina ọnạnga, ọttạra anạng p'ubin bẹ k'nttem bẹ́, abẹ akwu asi ọtọhm mvọ. 3 Wa abẹ atạk nnạnga phyibh s'anạng p'Israẹl kk'atima akwu k'mbọhk s'Mosẹs, ọfha abẹ atima asi ọtọhm f'ibyi s'awurada. Wa k'ekpebhawu chidede, anạng mbọ afon ororo atima nnạnga s'ibin bẹ k'nttem akwu. 4 Ma wọ, ammengkka-nạng mbọ phyibh p'n'asi ọtọhm mvọ f'ọchọhm kw'awurada abin arik itọhm sabẹ, 5 akwu aben Mosẹs bẹ́, "Ẹtọhmkpo py'nạng kk'anạnga ma, kk'ẹsaabha ẹyọhnga ọtọhm f'Ọvaar Ubinọkpaabyi ọtọhnọ mạna bẹ́, ansi e."

6 Ma wọ Mosẹs ọnạngẹ ẹfa, abẹ awon ẹmạng k'ibyibhingasẹ bẹ́ wạmm, aben bẹ́, "Tte ujunung kwidede, oseng ikwanạng, ukuma ẹnạnga chidede nạnạng ch'eten k'ọchọhm kw'awurada sisi." Osenga ma, n'ọkpa bẹ bẹ́, abẹ nạngẹ adạkhẹ ẹtọhmkpo atim akwu, 7 ukwuru bẹ́, ekpo py'abẹ kk'atima akwu kk'ẹsaabha ẹyọhnga itọhm phyibh sabẹ m'asi.

8 Ammengkka phyi-phyibh k'ikhaana s'atọhmnạng mbọ atim ọvạra f'ẹchọhmma jobh f'abẹ atim ndikhi ikkasẹ sabẹ ayokh-oyok asi. Wa abẹ atim ndikhi s'ide blu, ọttạra s'ikhoru ichicho, ọttạra s'ide isisẹ, asi ibyirukhasẹ nnọ, abẹ attạra achẹrubim ma. 9 Ọvạra mvọ phyibh f'ẹchọhmma ode obengana, adum ade ntwạkhọ arạbh afa ukuma mfa, ẹkpa ede ntwạkhọ nsajạnẹ. 10 Abẹ atạk ọvạra osen atọhnga ibyi rạnẹ, abẹ atạkha adạkhẹ mvọkha osen asi ukhira ngwọ gwạnọ. 11 Ma wọ, abẹ asi ager p'ade blu k'ammakpa p'ivạra s'ẹchọhmma njọ jạnẹ ch'abẹ kk'atọhnga, abẹ asi adạkhẹ ukhira ngwọ gwạnọ k'ivạra nnọkha sabẹ kk'atọhnga. 12 Abẹ asi ager arạbh afa ukuma jobh akpạna k'ivạra s'ẹchọhmma nnọ rạnẹ sabẹ kk'atọhnga, abẹ akpạna adạkhẹ ager arạbh afa ukuma jobh k'ivạra s'ẹchọhmma nnọkha sabẹ kk'atọhnga. 13 Ma wọ, abẹ atim gol asi mkpạkha arạbh afa ukuma jobh, atima avạkha ọvạra mvọ ọfa f'abẹ kk'atọhnga ibyi rạnẹ, ọfha ibyirukhasẹ nnọ ide rạnẹ.

14 Abẹ atim avu-phyạbha asi ọvạra f'ẹchọhmma jobhkawạnọ, abubha k'ẹrạng-ẹrạng kw'ibyirukhasẹ. 15 Ọvạra f'ẹchọhmma mvọ jobhkawạnọ phyi-phyibh ode obengana, adum ade ntwạkhọ ẹrạbh afa ukuma nsen, ẹkpa ede ntwạkhọ nsajạnẹ. 16 Abẹ atạk ọvạra f'ẹchọhmma osen atọhnga ibyi rạnẹ, abẹ atạkha adạkhẹ mvọkha ọsajạnẹ atọhnga ibyi rạnẹ. 17 Ma wọ, abẹ asi ager arạbh afa ukuma jobh akpạna k'ivạra s'ẹchọhmma njọ jạnẹ ch'abẹ kk'atọhnga, abẹ akpạna adạkhẹ ager arạbh afa ukuma jobh k'ivạra s'ẹchọhmma nnọkha sabẹ kk'atọhnga. 18 Ma wọ abẹ atim brons asi mkpạkha arạbh afa ukuma jobh atima avạkha ukkira ngwọ, k'ibyi rạnẹ. 19 Ma wọ abẹ atim atenkpa p'arạkhạmaan p'abẹ afokhu asi-khora abubha ukkira ngwọ, bạrasẹ abẹ atima adạkhẹ atenkpa p'mvu abubha k'ẹrạng-ẹrạng.

20 Abẹ atim ichi ch'akasiya asi nsemachi s'ibe obe k'ibyirukhasẹ nnọ. 21 Adum p'esemachi chidede ede ntwạkhọ chi, ẹkpa chẹ ede ẹtwạkhọ ọmaana ibhaakha, 22 abẹ abạra asi acho afa p'ade obengana, abạra akkeri ayok ititikha. Wa abẹ abạra asi nsemachi phyi-phyibh s'ibyirukhasẹ nnọ ukhira ngwọ gwạnọ. 23 Abẹ asi nsemachi ẹrạbh s'ikkeri k'ẹrạkh-ẹrạkha kw'ibyirukhasẹ s'Ubinọkpaabyi, 24 wa abẹ abạra atima silva asi nnạna arạbh afa age k'isekhisek kwabẹ, esemachi chidede ẹkhaam nnạna mfa, echo chidede k'ẹnạna chẹ. 25 K'ibir-ibir kw'ibyirukhasẹ nnọ, abẹ asi nsemachi ẹrạbh, 26 ọttạra nnạna s'silva arạbh afa, nnạna mfa k'isekhisek kw'esemachi chidede. 27 K'nnạm-nnạm kw'ibyirukhasẹ, k'ukhubha kw'ududon n'udimi, abẹ asi nsemachi nsajạnẹ, 28 ọttạra nsemachi mfa k'nnwyạnga s'nnạm-nnạm kw'ibyirukhasẹ nnọ. 29 Ma nnwyạnga nnọ mfa, abẹ agbạk nsemachi s'ikher ayok ọgbạkha, tạma k'isekhisek tạrr ukpira k'ẹrạng-ẹrạng; abẹ age sẹ k'uriringi wạno. 30 Ma wọ, wa ode nsemachi nsenọttaan, ọttạra nnạna s'silva chikawạnọ, nnạna mfa k'esemachi jạnẹ.

31 Abẹ atim ichi ch'akasiya asi nsemachi, abe atima nsen asi ammakhubh k'ukhubha gwạnọ kw'ibyirukhasẹ nnọ, 32 nsen k'ukhubha ngwọkha, nsen k'mkpọmmachi s'ammakhubh p'ukhubha kw'ududon n'udimi k'ibyirukhasẹ nnọ. 33 Abẹ asi esemachi k'ottemkwẹ tạma k'echo jạnẹ tạạr ẹvạkha k'echo njọkha k'ottemkwẹ kw'mkpọmmachi. 34 Abẹ atim gol afhạrọ mkpọmmachi nnọ, abạra atima gol asi ariringi p'avạk nsemachi nnọ. Bạra abẹ n'atim gol afhạrọ sẹ phyibh.

35 Abẹ atim ndikhi s'ide blu, ọttạra s'ikhor-ichicho, ọttạra s'ikhor-isisẹ, ọttạra ndikhi ọkkọkka sabẹ ayokh-oyok ma ivạra s'ẹchọhmma nnọ, ọttạra k'achẹrubim p'ommengkka-nạng usi. 36 Abẹ atim ichi ch'akasiya asi mkpọmmachi s'ivạra s'ẹchọhmma nnọ, abẹ atima gol afhạrọ sẹ. Abẹ atima gol asi mkpạkha s'mkpọmmachi nnọ, abẹ atima gol afhạrọ sẹ, abẹ abạra atima silva asi nnạna sabẹ. 37 Abẹ atim ndikhi s'ide blu, ọttạra s'ikhor-ichicho, ọttạra s'ikhor-isisẹ, ọttạra ndikhi ọkkọkka sabẹ ayokh-oyok, f'ode ọbọhktọhm f'odokh-ọvạra. 38 Wa abẹ abạra asi mkpọmmachi nsen ọttạra mkpạkha sabẹ. Abẹ atima gol afhạrọ acho p'mkpọmmachi nnọ, ọttạra avạrakpa pabẹ, abẹ atima adạkhẹ brons asi nnạna nsen sabẹ.