1 Wa Ọvaar Ubinọkpaabyi obeni Mosẹs bẹ́, 2 "Tte ujunung-nwa kwidede kw'uchi eden ọmmaana ọbọhk, anạng-m. Ocheden-nwa kw'ifhạr sidede k'ikhaana s'anạng p'Israẹl, ode oyokhanạng o, ọbạra ode eten o, ode kwaam."

3 Ma wọ Mosẹs obeni anạng mbọ bẹ́, "Abạnga ajima iwu nja, iwu ch'uwa abạnga abin k'Ijip, k'ofhon kw'ibira, ukwuru bẹ́, Ọvaar Ubinọkpaabyi utim ẹfa chẹ ọrạbha bạnga ma. Abạnga ọttọhk f'abẹ age yist káchi o. 4 Chemma, ma ophye kw'Abib ẹwọ kw'abạnga n'abina. 5 Okpe kw'Ọvaar Ubinọkpaabyi m'utima bạnga ukpira k'isek s'aKenaan, ọttạra s'aHet, ọttara s'aAmọr, ọttạra s'aHiv, ọttạra s'aJẹbus, isek s'uwa ochekhi ọnạng ab'atte pabạnga bẹ, m'ọnạng bạnga, isek ikkasẹ s'abasi ọttạra ana p'ọkhọhn, ọttạra ekpo tutubh, abạnga m'asi erobha nja ma ophye nwa. 6 K'iwu isenọfa, abạnga m'achi brẹd kw'abẹ nạn yist nágia. Ottong iwu isenọfa, abạnga asi erobha anạng Ọvaar Ubinọkpaabyi. 7 Abạnga achi brẹd kw'abẹ nạn yist nágia ma iwu nnọ isenọfa. Tte ọttọhk fidede f'abẹ age yist nạngẹ bạnga fạfor ofor. Tte abẹ nạngẹ yist sise ase k'nnem sabạnga. 8 Ma iwu njọ, akpaak iva p'abạnga bẹ́, ‘Nsi oche ngwọ ukwuru udik kw'uwa Ọvaar Ubinọkpaabyi usi ọnạng-m masẹ mbin k'Ijip.’ 9 Erobha nja ede masẹ ẹkhọhkha ch'age k'ọbọhk, abạra abbẹ k'ititikhattem sọ, atima ajima bẹ, inyina ch'Ọvaar Ubinọkpaabyi m'ininga k'ẹmma chọ, ukwuru s'uwa Ọvaar Ubinọkpaabyi utim-ọ ubina k'Ijip k'ẹfa chẹ chididen. 10 Abạnga m'achok erobha nja k'okpe kwẹ, k'cho kwidede.

11 "Masẹ Ọvaar Ubinọkpaabyi m'utima bạnga ukpira k'isisek s'aKenaan, oche kw'uwa ọtạk echekha ọnạng bạnga ọttạra ab'atte pabạnga. 12 Abạnga atạkha achedenva k'ifhạr sidede anạng masẹ ẹnạnga anang, Ọvaar Ubinọkpaabyi. Achedenva p'adim py'itirakpo pyabạnga ade p'Ọvaar Ubinọkpaabyi. 13 Abạnga atima ọrạkhạmaan-nwa abhek ocheden-nwa kw'ẹnyạnyaang chabạnga, okhenka, ode nạm abhek, bhạnga chẹ ikhukhora. Abạnga abhek acheden-junungva pabạnga phyibh.

14 "De kwạna iva pabạnga abạbh bạnga bẹ́, ‘Erobha nja iyini yạn o?’ Abạnga atek bẹ bẹ́, ‘Wa Ubinọkpaabyi utim ẹfa chẹ chididen ọrạbha mạna k'ibira ch'ofhon kw'Ijip. 15 Ukwuru ottembạr kw'ọvaar Phero wa nạn ochera bẹ́, otte mạna ọbọhk amfona, wa Ubinọkpaabyi ọfhọ acheden-junungva p'anạng p'Ijip, ọttạra p'itirakpo pyabẹ phyip. Ẹgwọ usi ntim achedendim p'nten samạna, nfọhnọ ẹja nnạng Ubinọkpaabyi, ọfha mmek acheden-junungva paam phyibh. 16 Ma wọ m'ode masẹ ẹkhọhkha ch'akpa k'ọbọhk ọttạra k'ititikhattem sọ bẹ, wa Ubinọkpaabyi utim ẹfa chẹ ch'ididen ọrạbha mạna k'ibira ch'anạng p'Ijip."

17 Masẹ wa Phero n'otte anạng p'Israẹl ọbọhk abẹ afona, wa Ubinọkpaabyi bẹ nútima osenga k'ẹkhạma ch'aPhilistiya, kw'eden ikhum-ukhuma, s'uwa Ubinọkpaabyi ọkkẹ bẹ́, "De abẹ attạm ekpong achẹ k'eden, abẹ akkokke afhona nttem sabẹ, arạbh akpa nnạm k'Ijip." 18 Osenga ma, wa Ọvaar Ubinọkpaabyi utima bẹ osenga k'ibyi s'anạngn'nárukha, s'ikkeri ititikha k'Ẹraanga-khora. Wa anạng p'Israẹl ado ifor s'ekpong atima abina k'Ijip. 19 Wa Mosẹs okpokhu akhạbhọ p'Josẹph, ukwuru s'uwa Josẹph kk'iva p'Jekọb usia abẹ atạkha echekha. Ẹma Josẹph wa kk'obena bẹ́, "K'udik ọkka, Ubinọkpaabyi m'ọkkaana bạnga ọkkaana e. De kk'obenga, oyonga abạnga atima akhạbhọ paam abina ma ibyi nna." 20 Masẹ abẹ abin k'Sukọt, abẹ ata abhing k'Ẹtam, k'ọkhaan-ọkhaan kw'ibyi s'anạngn'nárukha. 21 Wa Ubinọkpaabyi utim ebona ch'ebe udumudum uchi bẹ eden k'ẹya, ọbạra utima ekpon ch'ebe udumudum ọnạng bẹ ọyanttaana k'irungu, ọfha abẹ akkokke asi osenga ngwọ k'ẹya ọttạra k'irungu. 22 Wa ebona njọ ch'ebe udumudum k'ẹya, ọttạra ekpon njọ ch'ebe udumudum k'irungu, apyẹ ibyi sabẹ abe k'ititikha s'anạng p'Israẹl, nábina arik.