1 "Tima ichọhmma-vạra jobh sabẹ atim ọvạra ọkkọkka ayok, ọttạra ndikhi s'ide blu, ọttạra s'ikhoru ichicho, ọttạra s'ikhoru isisẹ, ọttạra achẹrubim p'ommengkka-nạng usi, asi ibyirukhasẹ nnọ. 2 Ọvạra mvọ phyibh m'ode obengana, adum pabẹ m'ade ntwạkhọ arạbh afa ukuma mfa, ẹkpa chabẹ m'ede ntwạkhọ nsajạnẹ. 3 Tạkha ọvạra osen bọhra rạnẹ, abạra abọhra mvọkha osen ukhira ngwọ gwạnọ. 4 Si ager p'ade blu age k'ammakpa p'ivạra nnọ rạnẹ s'abọhr, abạra asi ukhira ngwọ gwạnọ k'nnọkha. 5 Si ager arạbh afa ukuma jobh age k'ichọmma-vạra rạnẹ, abạra asi ager arạbh-afa ukuma jobh age k'ivạra nnọkha. Tte ager mbọ akkeri ayok ititikha. 6 Ma wọ, m'atima gol asi mkpạkha arạbh afa ukuma jobh s'm'ivạkha ọvạra mvọ atima k'ibyi rạnẹ, ọfha ibyirukhasẹ nnọ ide ibyi rạnẹ.

7 "Tima avu-phyạbha si nchọmmavạra jobhkawạnọ, s'm'ide ikkira s'm'ibubha ibyirukhasẹ nnọ. 8 Tte ọvạra mvọ jobhkawunọ ode obengana. Tte afhẹ ode ntwạkhọ ẹrạbh ukuma nsen k'adum pẹ, ọttạra ntwạkhọ nsajạnẹ k'ẹkpa chẹ. 9 Bọhra ọvạra mvọ osen atima asi rạnẹ, abạra abọhra mvọkha ọsajạnẹ atima asi rạnẹ. Nwyạnga ivạra nnọma s'ọvạra ọsajạnẹ nden mfa k'ẹchọhmma k'ibyirukhasẹ nnọ. 10 Si ager arạbh-afa ukuma jobh age k'ivạra rạnẹ s'abọhr, abạra age ager arạbh afa ukuma jobh k'ivạra nnọkha rạnẹ s'abọhr. 11 M'atima brons asi mkpạkha arạbh-afa ukuma jobh, age pyẹ k'ager mbọ, atima atọhnga ivạra nnọ, ọfha ẹvạkha ukkira ngwọ k'ibyi rạnẹ. 12 De n'ode k'adum p'attạr-ọttạra ma ọvạra f'ẹchọhmma f'ukkhira ngwọ, ikpokha s'ivạra s'ibekh-obek m'ilẹbhẹ ibubha k'ẹpannạm ch'ibyirukhasẹ nnọ. 13 Adum p'ivạra s'ukkira nwọ m'ide ẹtwạkhọ jạnẹ ọmaana ikpokha k'ukhubha gwạnọ, ẹtwạkhọ jạnẹ ọmaana ikpokha k'ukhubha gwọkha. S'ibekh-obek m'ilẹbhẹ k'ukhubha kwidede, ọfha ibubha ibyirukhasẹ nnọ. 14 Tima atenkpa p'arạkhạmaan p'abẹ afokhu asi-khora bubha ukkira ngwọ, abạra atạkha atenkpa p'mvu abubha atenkpa p'arạkhạmaan mbọ k'erạng-ẹrạng.

15 "Tima mkpaakha s'akasiya asi mkpọmmachi s'ibobe k'ibyirukhasẹ nnọ. 16 Tte ẹkpọmmachi chidede ede ntwạkhọ chi k'adum, ọttạra ntwạkhọ mfa ọmaana akpamma attaan k'ẹkpa chẹ, 17 ọttạra mfok mfa s'ide obengana, ibạra ikkeri ayok ititikha. Si mkpọmmachi nnọ phyi-phyibh s'ibyirukhasẹ m'ide ukhira ngwọ gwạnọ. 18 Si mkpọmmachi ẹrạbh k'ẹrạkh-ẹrạkha kw'ibyirukhasẹ nnọ, 19 abạra atima asilva asi nnạna arạbh afa age k'isekhisek kw'mkpọmmachi nnọ, nnạna mfa k'ẹkpọmmachi chidede, ẹnạna jạnẹ k'echo jạnẹ. 20 K'ukhubha kw'ibir-ibira kw'ibyirukhasẹ nnọ, si mkpọmmachi ẹrạbh, 21 ọttạra nnạna arạbh-afa s'asilva, nnạna mfa k'ẹkpọmmachi chidede. 22 Si mkpọmmachi nsajạnẹ k'ibyirukhasẹ nnọ tena k'ukhubha kw'ududon n'udimi, 23 abạra asi mkpọmmachi mfa k'nnwyạnga s'ẹrạkh-ẹrạkha s'ibyirukhasẹ nnọ. 24 M'agbạkha mkpọmmachi nnọ mfa k'nnwyạnga s'ibyirukhasẹ nnọ, tạma k'irin tạrr ukpira k'acho pabẹ. Age pyẹ k'uriringi wạnọ; mbọ afa m'ade ukhira gwạnọ. 25 Ma wọ, mkpọmmachi nnọ m'ide mkpọmmachi nsenọttaan, ọttạra nnạna chikawạnọ s'asilva, nnạna mfa k'isekhisek kw'ẹkpọmmachi jạnẹ.

26 "M'abạra atima mkpaakha s'akasiya asi nsemachi. Si nsen s'mkpọmmachi k'ukhubha gwạnọ kw'ibyirukhasẹ nnọ, 27 abạra asi nsemachi nsen k'ukhubha ngwọkha, asi nsen k'ukhubha kw'ududon n'udimi, k'nnạm-nnạm kw'ibyirukhasẹ nnọ. 28 Esemachi ch'ottemkwẹ m'ẹtạma k'echo jạnẹ ẹvạkha k'echo njọkha, k'ottemkwẹ kw'ẹkpọmmachi. 29 Tima gol afhạrọ mkpọmmachi nnọ, abạra atima gol asi ariringi, p'm'avạkha nsemachi nnọ, atima gol afhạrọ nsemachi nnọ.

30 "Mun ibyirukhasẹ nnọ tor k'oche kw'nkọkh-ọ k'okpecho.

31 "Tima ndikhi s'ide blu, ọttạra s'ikhor-ichicho, ọttạra s'ikhor-isisẹ, ọttạra ndikhi ikkasẹ sabẹ ayokh-oyok, ọttạra achẹrubim p'ommengkka-nạng usi. 32 Rena sẹ k'mkpạkha s'gol k'mkpọmmachi nnọ nnebung s'mkpaakha s'akasiya, atima gol afhạrọ sẹ, atạkha abera k'nnạna nnebung s'asilva. 33 Rena ivạra nnọ k'mkpạkha, atạkha Ikwukwur s'Echekha achok k'nnạm-nnạm kw'ivạra nnọ. Ivạra nnọ m'ibhaangẹ Ibyi s'Awurada k'Ibyi s'Awurada p'ayọhng Awurada. 34 M'achok ikwukwurkpa ch'ephyokhu k'Ikwukwur s'Echekha, k'ibyi s'Awurada p'ayọhng Awurada. 35 Bera okpokkro k'iyaan kw'ivạra nna, k'ẹrạng-ẹrạng kw'ibyirukhasẹ nnọ, abạra achok itukkạng-chi ekkeri wẹ ititikha k'ukhubha kw'ẹrạkh-ẹrạkha.

36 "N'ode ivạra s'ẹchọhmma k'ukkira nwọ, m'atima ndikhi s'ide blu, ọttạra s'ikhor-ichicho, ọttạra s'ikhor-isisẹ, ọttạra ndikhi ikkasẹ sabẹ ayokh-oyok, f'ode ọbọhktọhm f'odokh-ọvạra. 37 M'atima gol asi mkpạkha s'ivạra nnọ, ọttạra mkpọmmachi nsen s'mkpaakha s'akasiya, atima gol afhạrọ sẹ, bạrasẹ n'atim brons adwuk nnạna nsen sabẹ.