1 "Atima mkpaakha s'akasiya asi ijabyi s'abạnga m'n'akkạmọ insẹns. 2 Si sẹ ikhaama akhubha annebung. Adum pẹ ọttạra ẹkpa chẹ m'ade obengana, kw'ode ẹtwạkhọ ọmaana ibhaakha, ebe chẹ m'ede ntwạkhọ nttaan, abhik pẹ m'abina ma ẹkpaakha njọ jạnẹ. 3 Tima gol ọkkọkka bubha ẹrang-ẹrang kwẹ, ọttạra k'akhaan-ọkhaan pẹ phyibh, ọttạra k'abhik. Abạra atima gol afhạrọ ammakpabem pẹ akhạbha. 4 Tima gol si ariringi afa, age pyẹ akkeri ayok ititikha k'ijabyi nnọ, k'isekhisek kw'ammakpabem mbọ p'gol, ọfha apyẹ ẹvạkha mkpọmmachi sabẹ m'atima adira ijabyi nnọ. 5 Tima mkpaakha s'akasiya si mkpọmmachi, atima gol afhạrọ sẹ. 6 Chok ijabyi nnọ k'ititikha s'ikwukwur s'ining k'ititikha s'Ikwukwur s'Echekha, k'ititikha s'ikwukwur-kpa ch'efokhu, ch'ining k'erạng-ẹrạng kw'Ikwukwur s'Echekha, k'ibyi s'm'nkhebh-ọ.

7 "K'ekpebhawu chidede, Aarọn ọbaan bẹ́, ọkkạmọ insẹns kw'orebhi iruk ma ijabyi nnọ k'okpe kw'm'ọta okkeri attukkạng. 8 Ọbaan bẹ́, ọbạra ọkkạmọ insẹns okpe kw'm'oyeni attukkạng k'ẹchọhkha, ọfha insẹns n'akkạmọ oche ngwọ-ngwọ k'ititikha s'Ọvaar Ubinọkpaabyi, tạrr ukpira k'igbọ s'm'ikwu k'iwu oro. 9 Abạnga insẹns ọdwạkh-ọdwạk kátima akwu ma ijabyi nna, ode ẹnạnga ẹkkạmachẹ ch'ukhira kwidede o, ọbạra ode ẹnạnga ch'agwu o, ode ch'itwuk-byenga o, abạnga ma ijabyi nnọ kási. 10 Aarọn m'usi ẹjafọhna ch'efokhu eden jạnẹ k'cho k'abhik p'ijabyi nnọ. Ọbaan bẹ́, utima isẹ s'eten usi ẹjafọhna njọ ch'efokhu ch'cho, ch'ede ẹnạnga ch'ipyibha kpukpobhu, tạrr ukpira k'igbọ s'm'ikwu k'iwu oro. Ẹjafọhna njọ m'ede awurada p'ayọhng awurada ẹnạng Ọvaar Ubinọkpaabyi."

11 Ma wọ Ọvaar Ubinọkpaabyi obeni Mosẹs bẹ́, 12 "K'okpe kw'm'atạkha ubhik kw'anạng p'Israẹl, ọbaan bẹ́, ọnạng kwidede usi ọtạbha kw'ebhekha ch'akpen pẹ ọnạng Ọvaar Ubinọkpaabyi k'okpe kw'abẹ m'abhikh-ẹ. Ma wọ, ọkhạnkhạmọ kw'm'otto okhebha bẹ k'okpe kw'm'abhik bẹ, kòde. 13 Ọnạng kwidede kw'abẹ kk'abhikha m'ọnạng shẹkẹl ibhaakha otor k'shẹkẹl kw'ọchọhm kw'awurada, kw'ọdọhbhọ ukpira Gẹra ẹrạbh. Ibhaakha nnọ s'shẹkẹl rọ ide ẹnạnga ẹnạng Ọvaar Ubinọkpaabyi. 14 Anạng mbọ phyibh p'abẹ kk'abhikha p'ade icho ẹrạbh usukuma, m'anạng Ọvaar Ubinọkpaabyi ẹnạnga. 15 Masẹ abạnga m'asi ẹnạnga ch'efokhu anạng Ọvaar Ubinọkpaabyi, tte avạvara nạngẹ anạng ayongu ibhaakha s'shẹkẹl, tte akpukpora nạngẹ abạra anạng f'ọsạkhẹ ọyọhnga ibhaakha s'shẹkẹl. 16 Tạkha ọtạbha kw'ẹjafọhna ch'efokhu k'anạng p'Israẹl, atima asi ọtọhm k'ukkira kw'etobha kw'Ọvaar Ubinọkpaabyi. Udik ngwa m'ode ijima ọnạng anạng p'Israẹl, ọbạra ode ẹjafọhna ch'efokhu ọnạng abạngama oyeni."

17 Ma wọ Ọvaar Ubinọkpaabyi obeni Mosẹs bẹ́, 18 "Tima brons si ọgbang-gbang kw'mbọhk ọttạra mfhok kpukpobhu, abạra atima brons asi ẹnạna chẹ. Ge asi ma ọgbangbang nwọ bera k'ottemkwẹ kw'ukkira kw'etobha ọttạra ijabyi. 19 Tte Aarọn ọttạra ajunungva pẹ n'atima asi p'aning ma ọgbangbang nwọ n'akpobhu mbọhk ọttạra mfhok sabẹ. 20 Okpe kwidede kw'abẹ anwa k'ukkira kw'etobha nwọ, abe m'akpobhu mbọhk ọttạra mfhok sabẹ, ọfha abe nạngẹ ape. Abẹ m'abạra asi oche ngwọ k'okpe kw'abẹ m'asenga afora ijabyi nnọ bẹ́, abẹ ata anạng Ọvaar Ubinọkpaabyi ẹnạnga ch'uchiattọhk. 21 Abẹ m'akpobhu mbọhk ọttạra mfhok sabẹ, ọfha abẹ nạngẹ ape. Inyina nja m'efona ororo ininga ẹnạng Aarọn, ọttạra ajunungva pẹ tạrr ukpira k'igbọ s'iwu oro."

22 Ma wọ Ọvaar Ubinọkpaabyi obeni Mosẹs bẹ́, 23 "Tạkha ekpo demapẹ mba py'ekpo ọkkọkka, py'n'isi ọttọhk orebh iruk masẹ ashẹkẹl ẹnọhna ukuma arạbh asen p'myrrh kw'ode asi-asi, ọttạra ashẹkẹl arạbh jobh-kamfa ukuma jobh p'sinamọn, ọttạra ashẹkẹl arạbh jobh-kamfa ukuma jobh p'kalamus, 24 ọttạra ashẹkẹl ẹnọhna ukuma arạbh asen p'kasiya. Phyi-phyibh m'ator k'ẹnạnga ch'ọchọhm kw'awurada, ọttạra ẹna-kpomma ch'ana p'oliv. 25 Tima pyẹ si ana p'ẹbọhk-nạna ch'awurada, p'arebhi iruk, f'ode ọbọhktọhm f'ọnạng kw'n'usi ekpo erebh iruk. Apyẹ m'ade ana p'ẹbọhk-nạna ch'awurada. 26 Ma wọ m'abyenga pyẹ k'ukkira kw'etobha, ọttạra k'Ikwukwur s'Echekha, 27 ọttạra k'okpokkạro, ọttạra ekpo phyibh py'ẹnạn ma, ọttạra k'itukkạng-chi, ọttạra ekpo pyẹ phyibh, ọttạra k'ijabyi s'insẹns, 28 ọttạra k'ijabyi s'ẹnạnga ẹkkạmachẹ, ọttạra ekpo pyẹ phyibh, ọttạra ọgbangbang, ọttạra ẹnạna chẹ. 29 M'asi apyẹ iwur, ẹkhaama awurada p'ayọhng awurada, fidede f'utwu pyẹ m'ọkhaama awurada.

30 "Byenga Aarọn ọttạra ajunungva pẹ ana k'echo akhaama awurada, ọfha abẹ ade afọhnẹja paam. 31 Kpaak anạng p'Israẹl bẹ́, ‘Ana mba m'ade ana paam p'ẹbọhk-nạna ch'awurada tạrr ukpira k'igbọ s'iwu oro. 32 Ọnạng ọdwạkh-ọdwạk ana mbọ k'ifor kábyenga, ana-khira mbọ kási k'eden ẹdwạkh-ọdwạk, ukwuru bẹ́, ana mbọ ade ana p'awurada. 33 Ọnạng kwidede kw'usi ana p'arebhi iruk masẹ mba, ọnang kwidede kw'ọbạra ọtạkha pyẹ obyenga ọnạng ọdwạkh-ọdwạk kw'oyongu ọfọhnẹja, ọbaan bẹ́, abẹ akhubh-ẹ k'ofhon.’ "

34 Ma wọ Ọvaar Ubinọkpaabyi obeni Mosẹs bẹ́, "Tạkha ekpo py'n'isi ọttọhk orebh iruk masẹ resin, ọttạra onicha, ọttạra galbanum, ọttạra insẹns ọkkọkka, ayoma pyẹ obengana, 35 afhunu pyẹ atima asi insẹns, ode ọbọhktọhm f'ọnạng kw'n'usi ekpo py'n'erebh iruk. Insẹns nwọ m'ode abubuma, abubuma p'ade akkapẹ, abạra akhaama awurada. 36 Tạkha byạnọ khok ẹpẹrẹ, atạkha abera k'ititikha s'Ikwukwur s'Echekha k'ukkira kw'etobha, kw'm'mkhebh-ọ. Asẹ m'ide awurada p'ayọhng awurada inạng bạnga. 37 Abạnga insẹns-khira nwọ oche ngwọ kási anạng abạngama oyeni. Abạnga atạkha wẹ masẹ ọttọhk f'awurada ọnạng Ọvaar Ubinọkpaabyi. 38 Ọnạng kwidede kw'usi insẹns demakwẹ nwa, ọfha n'ọbhaanga orebh f'iruk chẹ, ọbaan bẹ́, abẹ akhubh-ẹ k'ofhon."