1 Mosẹs oyeri etobha ch'anạng p'Israẹl phyibh, oben bẹ bẹ́, "Maa wọ ode idik s'Ọvaar Ubinọkpaabyi kk'bạnga obena bẹ́, abạnga asi: 2 Abạnga m'asi ọtọhm k'iwu isajạnẹ, okhenka, iwu ch'ettong isenọfa m'ede iwu ch'awurada, ch'ede Ẹyọhngkwokhawu ẹnạng Ọvaar Ubinọkpaabyi. Ọnạng kwidede kw'usi ọtọhm ma iwu njọ, ọbaan bẹ́, abẹ afhẹ-ẹ. 3 Abạnga ekpon k'ibyirukhasẹ sidede kámuma ma Ẹyọhngkwokhawu njọ."

4 Mosẹs ọkpaakhẹ anạng p'Israẹl phyi-phyibh bẹ, "Ma wọ ode oche kw'Ọvaar Ubinọkpaabyi kk'obena bẹ́, abạnga asi: 5 Arengi ẹnạnga k'ekpo p'abạnga akhaam, anạng Ọvaar Ubinọkpaabyi ẹnạnga. Ọnạng kwidede kw'ọdaakh-ẹ, tte utima ẹnạnga ch'gol, ọttạra ch'asilva, ọttạra ch'brons, okkena Ọvaar Ubinọkpaabyi; 6 ọttạra ndikhi s'ide blu, ọttạra ikhor-ichicho, ọttạra s'ikhor-isisẹ, ọttara ndikhi ikkasẹ sabẹ ayokh-oyok, ọttara avu-phyạbha; 7 ọttạra atenkpa p'arạkhạmaan-dim p'abẹ afokhu asi-khora, ọttạra atenkpa p'mvu, ọttạra mkpaakha s'akasiya, 8 ọttạra ana p'oliv p'ekpon eyenachẹ, ọttạra ekpo py'erebh iruk py'abẹ n'atima asi ana py'abẹ n'abyenga ọnạng k'echo, ọttạra insẹns kw'orebhi iruk; 9 ọttạra ata p'oniks, ọttạra ata adwạkh-ọdwạk p'abạnga m'akpạna k'ẹphọd, ọttạra k'ẹvạrakpa ch'ittemmạma.

10 "Tte ammenkka-nạng phyi-phyibh p'aning kabạnga k'ikhaana, ayin akwu, akwu asi ọttọhk fidede f'Ọvaar Ubinọkpaabyi kk'mạna obena bẹ́, ansi: 11 ibyirukhasẹ nnọ, ọttạra ukkira kwẹ, ọttạra ipakhọnga sẹ, ọttạra mkpaakha sẹ, ọttạra nchi s'ẹchọhmma, ọttạra nsemachi, ọttạra mkpọmmachi, ọttạra nnạna sẹ; 12 ọttạra Ikwukwur s'Echekha, ọttạra nsemachi sẹ, ọttạra ikwukwurkpa ch'efokhu, ọttạra ichọhmma-vạra s'm'ikpa sẹ ẹmaana k'ẹtaanga, 13 ọttạra okpokkro, ọttạra nsemachi sẹ, ọttạra ekpo phyi-phyibh py'ẹnạn ma, ọttạra brẹd kw'awurada, 14 ọttạra itukkạng-chi ch'ekpon yiyeni, ọttạra ekpo pyẹ, ọttạra attukkạng, ọttạra ana p'ekpon yiyeni, 15 ọttạra ijabyi s'insẹns, ọttạra nsemachi sẹ, ọttạra ana p'abẹ n'abyenga ọnạng k'echo, ọttạra insẹns kw'orebhi iruk, ọttạra ivạra s'ẹchọhmma ch'ibyirukhasẹ; 16 ọttạra ijabyi s'ẹnạnga ẹkkạmachẹ, ọttạra itegba sẹ s'brons, ọttạra nsemachi sẹ, ọttạra ekpo pyẹ phyibh, ọttạra ọgbangbang kw'brons, ọttạra ẹnạna chẹ, 17 ọttạra ọvạra f'eterttem, ọttạra mkpọmmachi, ọttạra nnạna sẹ, ọttạra ọvạra f'ọmmakhubh kw'eterttem; 18 ọttạra abhik py'ibyirukhasẹ, ọttạra p'eterttem, ọttạra ndikhi sabẹ, 19 ọttạra nnya iyokhasẹ s'ọtọhm f'ọtọhm kw'awurada, s'ide nnya s'awurada s'Aarọn kw'ode ọfọhnẹja, ọttạra nnya s'ajunungva pẹ m'age k'okpe kw'abẹ m'asi ọtọhm masẹ afọhnẹja."

20 Ma wọ, anạng p'Israẹl phyibh abin arik Mosẹs. 21 Ọnạng kwidede kw'ọdaakh-ẹ, kw'ọbạra uttum-ẹ k'ettem, utim ẹnạnga okkena Ọvaar Ubinọkpaabyi, k'oche kw'ọtọhm f'ukkhira kw'etobha, ọttạra f'nnya s'awurada m'ofona ororo. 22 Anạng phyi-phyibh, ajunung ọttạra ipanạng p'ubin bẹ k'nttem, atim ẹnya-kpo, k'ukhira-k'ukhira py'abẹ atim gol asi, py'ede abaangakpa, ọttạra akkạra py'itọhng ọttạra mbaanga s'nnọhna, ọttạra ọmaan f'ẹdwạngọ, akwu. Abẹma phyibh atim agol pabẹ akwu, masẹ ẹnạnga ch'ẹbạrẹ udik akkena Ọvaar Ubinọkpaabyi. 23 Ọnạng kwidede kw'ọkhaam ndikhi s'ide blu, ọttạra s'ikhor-ichicho, ọttạra s'ikhor-isisẹ, ode ndikhi sabẹ ayokh-oyok o, ọbạra ode avu-phyạbha o, ode atenkpa p'ẹrạkhạmaan-dim p'abẹ afokhi asi-khora o, ọbạra ode atenkpa p'mvu o, utim ukwu. 24 Ayok p'atim ẹnạnga ch'asilva, ọbạra ode ch'brons, abẹ atim akkena Ọvaar Ubinọkpaabyi. Ọnạng kwidede kw'ọkhaam mkpaakha s'akasiya, sabẹ m'akke atima asi ọtọhm fidede, ọbạra utima ukwu. 25 Ommengkka-kwanạng kwidede utim mbọhk sẹ oyok ọttọhk, utima ọttọhk f'kk'oyokha f'ode blu, ọttạra f'ode ichicho, ọttạra f'ode isisẹ, ọttạra ndikhi ikkasẹ sabẹ ayokh-oyok, ukwu. 26 Ipanạng phyibh p'ubin bẹ k'nttem, p'abạra akke emengkka ch'ekpo yuyok, ayokhu avu-phyạbha. 27 Adecho atima ata p'oniks, ọttạra ata-khira adwạkh-ọdwạk p'abẹ m'akpạna k'ẹphọd, ọttạra k'ẹvạrakpa ch'ittemmạma, akwu. 28 Abẹ abạra atima ekpo py'n'isi ọttọhk orebh iruk, ọttạra ana p'oliv p'ekpon yiyeni, ọttạra ana p'abẹ n'abyenga ọnạng k'echo, ọttạra insẹns kw'n'orebh iruk, akwu. 29 Anạng p'Israẹl phyibh, ajunung ọttạra ipanạng p'ubin bẹ k'nttem, atim nnạnga s'ibin bẹ k'nttem, akkena Ọvaar Ubinọkpaabyi, k'ọtọhm f'kk'osenga k'Mosẹs oben bẹ bẹ́, abẹ asi.

30 Ma wọ Mosẹs obeni anạng p'Israẹl bẹ́, "Akker e, Ọvaar Ubinọkpaabyi kk'Bẹzalẹl, kw'ode ujunungnwa kw'Uri, kw'ode nnwa kw'Hur, kw'ubin k'ẹkhạma ch'Juda, orenga e. 31 Ẹma Ubinọkpaabyi kk'ẹ Iguguma sẹ ọnạnga, ọttạra esonga, ọttạra ọyanttaana, ọttạra idik-songa, ọttạra emmengkka-khira chidede, 32 ọfha usi ommengkka-tọhm f'gol, ọttạra f'silva, ọttạra f'brons, 33 ọttạra bẹ́, n'ọkkẹbh ata otobha, ọttạra nchi gwạgwa, ọbạra usi ommengkka-tọhm f'emmengkka k'ukhira k'ukhira. 34 Kk'Bẹzalẹl ọttạra Oholiyab kw'ode ujunungnwa kw'Ahisamak, kw'ubin k'efona ch'Dan, itina ọnạnga bẹ́, abẹ akpebhi anạng adwạkh-ọdwạk mmengkka sabẹ. 35 Kk'bẹ emmengkka ch'ommengkka-tọhm k'ukhira k'ukhira ọnạnga, m'asẹ ammengkka, ọttạra adokh-ọvạra, ọttạra adokh-ọvạra f'ode blu, ọttạra f'okhor-ichicho, ọttạra f'okhor-isisẹ, ọttạra ndikhi ikkasẹ sabẹ ayokh-oyok, ọttara ayokh-ekpo phyi-phyibh. Abẹma mbọ phyibh m'ade abaro p'emmengkka, ọttạra abaro p'ekpo dudokhu.