1 Wa abẹ atim ndikhi s'ide blu-blu, ọttạra s'ikhoru ichicho, ọttạra s'ikhoru isisẹ, ayok nnya s'ọtọhm s'ọfọhn-ẹja k'ibyirukhasẹ s'awurada. Abẹ abạra ayok nnya s'awurada anạng Aarọn, ator k'oche kw'Ọvaar Ubinọkpaabyi kk'Mosẹs ọtọhna.

2 Wa abẹ atim ndikhi s'gol, ọttạra s'ide blu-blu, ọttạra s'ikhoru ichicho, ọttạra s'ikhoru isisẹ, ọttạra ndikhi ikkasẹ sabẹ ayokh-oyok, asi ẹphọd. 3 Abẹ adwuk agol-kpa p'awer-oweri, abạra akpaara pyẹ k'anaanga-k'anaanga, atima asi ndikhi s'ide blu-blu, ọttạra s'ikhoru ichicho, ọttạra s'ikhoru isisẹ, ọttạra ndikhi ikkasẹ sabẹ ayokh-oyok, kw'ode ọtọhmbọhk f'omengkka-nạng. 4 Wa abẹ asi avạrakpa afa k'nkkang ọkhaan-ọkhaan kw'ephọd, ọfha asẹ ivạkha ẹphọd ẹkpọhkhọ. 5 Udikhikpa kw'abẹ atim ndikhi s'gol, s'ide blu, ọttạra s'ikhoru ichicho, ọttạra s'ikhoru isisẹ, ọttạra mvạradikhi ikkasẹ sabẹ ayokh-oyok ayok, wa ode ọtọhm f'ommengkka-nạng. Wa ọbạra ode ukhira ngwọ gwạnọ ọttạra k'ẹphọd, otor k'oche kw'Ọvaar Ubinọkpaabyi kk'Mosẹs ọtọhna.

6 Abẹ abẹ ata p'oniks k'ẹnạna ch'gol, abẹ akkẹr ache p'iva p'Israẹl m'ata mbọ, masẹ ẹkhọhkha.

7 Ma wọ, abẹ akpạna ata mbọ k'mvạrakpa nnọ k'nkkang s'ẹphọd, ede masẹ ata p'ijima enạng anạng p'Israẹl, otor k'oche kw'uwa Ọvaar Ubinọkpaabyi kk'Mosẹs ọtọhna. 8 Abẹ ayokhu ẹvạrakpa ch'ittemmạma, kw'ode ọbọhktọhm f'ommengkka-nạng. Abẹ atim ndikhi s'gol, ọttạra s'ide blu, ọttạra s'ikhor ichicho, ọttạra s'ikhoru isisẹ, ọttạra ndikhi ikkasẹ sabẹ ayokh-oyok, ayok sẹ ukhira ngwọ gwạnọ oche kw'abẹ ayokhu ẹphọd. 9 Ẹkpa chẹ ọttạra adum pẹ ade obengana, adum ọttạra ẹkpa ade ẹbọhkpattem jạnẹ, de annwyạng ibyi ifa. 10 Wa abẹ abạra atạkha ata p'ajibh-ujibh, atọhn k'akpakhaana annebung. K'ocheden-kpakhaana abẹ atọhnọ ata p'ruby, ọttạra p'topaz, ọttạra bẹryl, 11 k'ọkpakhaana kw'ottong afa, abẹ atọhn ata p'tọkwois, ọttạra p'saphiya, ọttạra p'ẹmẹral; 12 k'ọkpakhaana kw'ottong attaan, abẹ atọhn ata p'jasint, ọttạra p'agate, ọttạra p'amẹtist, 13 k'ọkpakhaana kw'ottong onnebung abẹ ọta kw'krisolita, ọttạra kw'oniks, ọttạra kw'jaspa. Abẹ atim gol afhạrọ amakpa pabẹ. 14 Ata mbọ wa ade jobh-kamfa, chidede ebe k'eche ch'ujunungnwa wạnọ kw'Israẹl, chidede ebe masẹ ẹkhọhkha, ọttạra eche ch'ẹnạmma jạnẹ ch'Israẹl. 15 Abẹ atim gol ọkkọkka asi mgbakkọhbhọ sabẹ ayokh-oyok, asẹ ide masẹ idikhi. 16 Abẹ abạra atima gol asi nnạna mfa, ọttạra ariringi afa, abẹ akpạna ariringi mbọ afa k'nnwyạnga mfa s'ẹvạrakpa njọ ch'ittemmạma. 17 Abẹ akpạna mgbakkọhbhọ mvọ ọfa f'gol ma k'ariringi mbọ afa k'nnwyạnga s'ẹvạrakpa ch'ittemmạma, 18 abẹ abạra akpạna acho mbọkha afa p'mgbakkọhbhọ mvọ ọfa k'ariringi p'aning k'nkkang, k'ititikha s'ẹphọd. 19 Abẹ atim gol asi ariringi afa, abẹ akpạna k'nnwyạnga mfa s'ẹvạrakpa ch'ittemmạma, k'ẹtaanga kw'ammakpa p'aning efora ẹphọd. 20 Abẹ abạra atima gol asi ariringi afa adwạkh-ọdwạk akpạna k'ititikha kw'ẹyạr-ẹyạr kw'ẹphọd, ọbaanga ibyi sabẹ atọhng udikhikpa kw'irin. 21 Abẹ atim idikhi ch'ede blu akpạna ariringi mbọ p'ẹvạrakpa ch'ittemmạma k'ariringi p'ẹphọd. Abẹ akpa chẹ k'udikhikpa kw'irin, ọfha ẹvạrakpa njọ ch'ittemmạma nạnge ẹchaarẹ ẹrengi k'ẹphọd, otor k'oche kw'Ovaar Ubinọkpaabyi kk'Mosẹs ọtọhna. 22 Wa abẹ atim ivạra s'ide blu phyi-phyibh, ayok ọnọhma bẹ wuraam kw'ẹphọd, kw'ode ọbọhktọhm f'ommenkka-nạng, 23 ọkhaam eje k'ottemkwẹ, masẹ ẹnọhma-dwạngọ, ch'abẹ afhạrọ amma, ọfha nạngẹ ẹyaakhẹ. 24 Abẹ atim ndikhi s'ide blu, ọttạra s'ikhoru ichicho, ọttạra s'ikhoru isisẹ, ọttạra mvạradikhi ikkasẹ sabẹ ayokh-oyok, ayok apomegrenet afhạrọ abem p'ọnọhma nwọ. 25 Abe abạra atima gol ọkkakwẹ asi nganyaang akpạna abaabha ammakpabem k'ottemkwẹ kw'apomegrenet. 26 Nganyaang nnọ ọttạra apomegrenet mbọ ajek ayok k'ottemkwẹ, abaabha abem p'ọnọhma nwọ kw'ọtọhm, otor k'oche kw'Ọvaar Ubinọkpaabyi kk'Mosẹs ọtọhna. 27 Abẹ atim mvạradikhi ikkasẹ ayok Aarọn ọttạra ajunungva pẹ anọhma bẹ wuraam, kw'ode ọbọhktọhm f'ommenkka-nạng, 28 Abẹ abạra atima mvạradikhi ikkasẹ ayok ọvạra f'echo-dạdạbh, ọttạra adikhikpa p'echo, ọttạra ekpo-khuma py'ẹtaanga py'abẹ atim mvạradikhi ikkasẹ ayok. 29 Wa abẹ atim mvạradikhi ikkasẹ s'ide blu ọttạra s'ikhoru ichicho, ọttạra s'ikhoru isisẹ, ayok udikhikpa, kw'ode ọbọhktọhm f'odokhu-ọvạra, otor k'oche kw'uwa Ọvaar Ubinọkpaabyi kk'Mosẹs ọtọhna.

30 Abẹ atim gol ọkkakwẹ asi ẹchaangkpa, ch'ede ivaarkpo s'awurada, abẹ akkẹr ma masẹ ẹkhọhkha bẹ́: AWURADA AKHAAM ỌVAAR UBINỌKPAABYI. 31 Ma wọ, abẹ atạkha idikhi ch'ede blu akpạna k'ivạra s'echo-dạdạbh, ator k'oche kw'Ọvaar Ubinọkpaabyi kk'Mosẹs ọtọhna.

32 Ma wọ, wa ọtọhm fidede k'ibyirukhasẹ s'Ubinọkpaabyi, ọttạra ukkira kw'etobha ukwu ọsa. Anạng p'Israẹl asi udik kwidede ator k'ukhira kw'Ọvaar Ubinọkpaabyi kk'Mosẹs ọtọhna. 33 Ma wọ, wa abẹ adir ibyirukhasẹ nnọ akkena Mosẹs: ukkira kwẹ, ọttạra ekpo pyẹ phyibh, ọttạra mkpạkha sẹ, ọttạra nchi s'ẹchọhmma, ọttạra nsemachi, ọttạra mkpọmmachi, ọttạra arin pẹ; 34 ọttạra ẹkpa ch'atenkpa p'arạkhạmaan-dim ch'abẹ afokhu asi-khora, ọttạra ẹkpa ch'atenkpa py'mvu, ọttạra ivạra s'ẹchọhmma s'ikpa ikwukwur imaana kha ẹtaanga, 35 ọttạra Ikwukwur s'Echekha ọttra nsemachi sẹ, ọttạra ikwukwurkpa ch'ephyokhu, 36 ọttạra okpokkro, ọttạra ekpo pyẹ phyibh, ọttạra brẹd kw'awurada, 37 ọttạra itukkạng-chi ch'gol ọkkakwẹ, ọttạra attukkạng pyẹ ọttạra ekpo pyẹ phyi-phyibh, ọttạra ana p'ekpon-yiyeni, 38 ọttạra ijabyi s'gol, ọttạra ana p'abẹ n'abyenga ọnạng k'echo, ọttạra insẹns kw'orebhi iruk, ọttạra ivạra s'ẹchọhmma s'ukkira nwọ; 39 ọttạra ijabyi s'brons, ọttạra itegba s'brons, ọttạra nsemachi sẹ, ọttạra ekpo pyẹ phyibh, ọttạra ọgbang-gbang, ọttạra ẹnạna chẹ; 40 ọttạra ọvạra f'ẹchọhmma ch'eterttem, ọttạra mkpọmmachi sẹ, ọttạra nnạna, ọttạra ivạra s'ẹchọhmma ch'eterttem; ọttạra ndikhi sẹ, ọttạra abhik p'ukkira kw'eterttem, ọttạra ekpo py'ẹnnya py'ibyirukhasẹ s'Ubinọkpaabyi, kw'ode ukkira kw'etobha 41 ọttạra nnya iyokhasẹ s'ọtọhm f'ibyirukhasẹ s'awurada, ọttạra nnya s'awurada s'Aarọn kw'ode ọfọhneja, ọttạra nnya s'ajunungva pẹ, k'okpe kw'abẹ m'asi ọtọhm f'afọhnẹja. 42 Wa anạng p'Israẹl kk'ọttọhm fidede asia ator k'oche kw'Ọvaar Ubinọkpaabyi kk'Mosẹs ọtọhna. 43 Mosẹs o n'ọbaan ọtọhm mvọ phyibh ose bẹ́ abẹ kk'asia ator k'oche kw'Ọvaar Ubinọkpaabyi kk'bẹ ọtọhna. Osenga ma odo bẹ.