1 Ọvaar Ubinọkpaabyi obeni Mosẹs bẹ́, "Kkẹbh atakpa afa p'ade masẹ mbọkha p'echeden, amma m'mbạra nkkẹr idik nnọ s'uwa ining k'atakpa mbọ p'echeden p'avọhkhọ. 2 Do ifor k'ekpebha avura okpecho kw'Sinai. Khebh-m k'okpecho k'ẹrạng. 3 Tte ọnạng wạnọ wạnọ nạngẹ abọ ọtwạnọ ukwu, tte ọnạng nạngẹ k'ibyi sidede ma okpecho nwọ obe, ọbạra itirakpo byọ, tte nạngẹ asạsaarẹ ma okpecho nwọ ichi."

4 Ma wọ Mosẹs ọkkẹbh atakpa afa p'ade masẹ mbọkha p'echeden, utima pyẹ kakhẹ k'mbọhk k'ekpebha uvura okpecho kw'Sinai, oche kw'Ọvaar Ubinọkpaabyi oben-ẹ. 5 Ma wọ Ọvaar Ubinọkpaabyi ọsạk k'ebona, obe ọbaanga Mosẹs, ọnạng ẹyaakha ch'eche chẹ, ch'ede Ọvaar Ubinọkpaabyi. 6 Oseng k'ororo kw'Mosẹs, ọnạng ẹyaakha bẹ́, "Ọvaar Ubinọkpaabyi, Ọvaar Ubinọkpaabyi, ode Ubinọkpaabyi kw'ikwosi, ọttạra ọphyaam, kw'n'ọtạkha okpe brasẹ n'ọdwạkh-ẹ, kw'ọbạrẹ idạdaakha, ọttạra ichichera, 7 kw'n'ọkhọkha anạng nnọhna ibhikh-asong idạdaakha sẹ, ọbạra ubina ọnạng ọmmaana-pyibh, ọttạra ochokpọhkhọ, ọttạra ipyibha. Okhenka, ọnạng kw'iponga ipyibhi ọbọhk mótte, n'ọnạng iva pabẹ, ọttạra iva p'iva irem k'ẹkhọngkwuru ch'ab'otte, tạrr ukpira mgbọmma nttaan ọttạra nnebung."

8 Mosẹs onnemeden ọrạkha echo k'ikpukpobha. 9 Oben bẹ́, "O Ọvaar Ubinọkpaabyi, de ode bẹ́, amma kk'ọphyaam nkhaama kakhọ k'ititikha, tte ọma Ọvaar Ubinọkpaabyi atwạn mạna abẹ amfona. Ọbạra ode bẹ́, anạng mba ade anạng p'asi idikh-abhaang, bina nạng mạnna k'mpyibha s'amạna, abạra atạkha mạna masẹ anạng pọ."

10 Ma wọ, Ọvaar Ubinọkpaabyi obeni bẹ́, "Amma n'ntạkha echekha ọma abẹ. Anạng pọ phyibh m'atima achen pabẹ ase ikkukkonadik s'm'nsi, s'nạn tạm nạ́nsia k'ẹkhạma jạnẹ jạnẹ k'iyagbin phyi-phyibh. Anạng mba p'arukhu abọ m'abạra asẹ idik s'ipe bẹ ifor s'amma Ọvaar Ubinọkpaabyi m'nsi nnạng bạnga. 11 Sạkha echo nạng idik s'mben-ọ bẹ́, asi chemma. Amma m'nkhubh anạng p'Amọr, ọttạra aKenaan, aHet, aPẹriz, aHiv, ọttạra aJẹbus. 12 Akker o, abạnga nạngẹ ẹgbagba akhaam ọttạra anạng mbọ p'arukhu ma isek nnọ s'abạnga n'afona o, deja, abạnga kk'ọmma kwididen arua achok abạngama oyeni e. 13 Abạnga avọhkhọ njabyi sabẹ, ọttạra ata p'akha pabẹ, abạnga abạra avọhkhọ mkpọmmachi s'Ashẹra pabẹ 14 Abạnga ọttọhk ọdwạkh-ọdwạk kákpobha, khiri Ọvaar Ubinọkpaabyi kw'eche chẹ ede Ottemma, ode Ubinọkpaabyi kw'Ottemma.

15 "Akker o, abạnga nạngẹ ẹgbagba akhaam ọttạra anạng mbọ p'arukhu ma isek nnọ o, deja, masẹ abẹ m'asi isaasadik ọttạra akha pabẹ, bẹ́, abẹ afọhnọ nja anạng akha mbọ, abẹ m'abher bạnga obher bẹ́, abạnga ata achi ichiakpo py'abẹ atim afọhnọ nja. 16 De abạnga atạk aminava pabẹ anạng adikkobh pabạnga k'ọbada, okpe kw'aminava mbọ m'asenga ẹsasa anạng akha pabẹ, abẹ m'awọhkhọ adikkobh pabạnga ator bẹ asi ẹmmaana njọ jạnẹ.

17 "Abạnga akpatava kádwuk.

18 "Abạnga asi erobha ch'brẹd kw'abẹ nạn yist nágia k'iwu isenọfa, ator k'oche kw'kk'bạnga ntọhna. Abạnga asi oche ngwọ k'okpe kw'obaan bẹ́, abạnga asi, k'ophye kw'Abib, ukwuru bẹ́, ma ophye nwọ wọ kw'uwa abạnga abin k'Ijip.

19 "Iva p'ichedenfhạr sidede ade paam, ọttạra achedenva adimpẹ p'itirakpo phyibh, ode ọrạkhạmaan o, ọbạra ode mmaam. 20 Tima ọrạkhạmaan-nwa bhek ocheden-nwa kw'ẹnyạnyaang, okhenka, de nạn chẹ mábhek, phyạkhẹ chẹ ikhukhora. Bhek achedenva pabạnga phyibh.

"Tte ọnạng wạnọ wạnọ nạngẹ mbọhk-mbọhk ukwu obe-m k'ititikha.

21 "Abạnga asi ọtọhm k'iwu isajạnẹ, okhenka, abạnga akwokha ọyọhng k'iwu isenọfa. Ọbạra ode k'ọyabha-kpe kw'ekpo tutubh, ọttạra k'ọphyakpe, ọbaan bẹ́, abạnga akwokha ọyọhng.

22 "Abạnga asi Erobha ch'Iphya s'acheden-dwuk py'ekpo p'abạnga atubhu k'iwonu sabạnga, ọttạra Erobha ch'Iphya s'wit, ọttạra Erobha ch'Iphya s'ikpong nnạm k'cho. 23 Ọbaan bẹ́, ajunung pabạnga phyi-phyibh ayin k'ititikha s'Ọvaar Ubinọkpaabyi kw'Ẹfa, kw'ode Ubinọkpaabyi kw'Israẹl, nden nttaan k'chọ. 24 Amma m'nkhubh nkhạma k'abạnga s'ining kabạnga k'ititikha, mbạra mmaama nnem sabạnga. K'okpe kw'abạnga m'akwu k'ititikha s'Ọvaar Ubinọkpaabyi kw'ode Ubinọkpaabyi kwabạnga ma nden nnọ nttaan s'icho, ọnạng kw'm'okkeri isisek sabạnga ichen kòde.

25 "Abạnga khaam isẹ s'ibin k'ẹjafọhna ch'ibin k'ọttọhk fidede f'ọkhaam yist kánạng, abạnga kábạra achera bẹ́, eten jạnẹ jạnẹ ch'ẹjafọhna ch'Erobha ch'Pasova ininga tạrr iwu echobha.

26 "Atạkha acheden-dwuk akkapẹ k'isek sabạnga, akwu k'ọchọhm kw'Ọvaar Ubinọkpaabyi kw'ode Ubinọkpaabyi kwabạnga. Abạnga abasi p'ivu kátima awọhn uvunwa."

27 Ma wọ Ọvaar Ubinọkpaabyi obeni Mosẹs bẹ́, "Kkẹr idik nna, ukwuru bẹ́, kk'echekha ntạkha ọma amma abẹ, ọttạra anạng p'Israẹl ntor ma idik nna." 28 Wa Mosẹs uning Ọvaar Ubinọkpaabyi abẹ k'nnyawu arạbh-afa, ọttạra nnunguwu arạbh afa, uchiattọhk núchia, asi nọ́bạra ugwua. Ọkkẹrẹ idik s'Echekha ch'Nnyina Jobh ma atakpa mbọ.

29 Masẹ Mosẹs ọsạk k'okpecho kw'Sinai, ọttạra atakpa mbọ afa p'Echekha ch'Nnyina kakhẹ k'mbọhk, kósong bẹ́ ititikha sẹ n'inn-ọnna, ukwuru s'kk'idik ọkpaakha ọttạra Ọvaar Ubinọkpaabyi. 30 Okpe kw'Aarọn ọttạra anạng p'Israẹl n'ase Mosẹs, s'ititikha sẹ n'inn-ọnna, ojora bẹ bẹ́, abẹ asenga abaang-ẹ k'ifor. 31 Okhenka, Mosẹs oyeri bẹ, Aarọn ọttạra adecho phyi-phyibh p'ofhon akpa nnạm ator-ẹ, ọkpaak bẹ idik. 32 Oyongu ma, anạng p'Israẹl phyibh asenga abaang-ẹ, ọkpaak bẹ nnyina phyi-phyibh s'Ọvaar Ubinọkpaabyi kk'ẹ ọnạnga k'okpecho kw'Sinai.

33 Masẹ Mosẹs kk'bẹ idik nnọ ọkpaakha phyibh, ọtạkha ẹvạrakpa ububha ititikha sẹ. 34 Okhenka, okpe kwidede kw'Mosẹs m'uyin Ọvaar Ubinọkpaabyi k'ititikha bẹ́, ọkpaak abẹ idik, m'owonga ẹvạrakpa njọ k'ititikha. Okpe kw'm'uyin k'iyaan ukwu ọkpaak anạng p'Israẹl idik s'Ọvaar Ubinọkpaabyi kk'ẹ ọkpaakha, 35 anạng p'Israẹl ase bẹ́, ititikha sẹ n'inna bẹ́ yenga-yenga-yenga. Ma wọ, Mosẹs n'ọtạk ẹvạrakpa ububha k'ititikha tạrr ukpira k'okpe kw'm'ọbạra ọnwa kha bẹ́, ọta ọkpaak udik ọttạra Ọvaar Ubinọkpaabyi.