1 Wa Ọvaar Ubinọkpaabyi obeni Mosẹs bẹ́, "Sọhng ata akpaak Phero bẹ́, Ọvaar Ubinọkpaabyi kw'aHiburu obeni bẹ́, ‘Tte anạng paam ọbọhk abẹ afona, ọfha abẹ ata akpobh-m. 2 De afhumu bẹ́, bẹ ọbọhk mátte, afona ororo avạkha bẹ achok, 3 amma Ọvaar Ubinọkpaabyi m'nkọhkha bạnga nkwuru sididen k'itirakpo py'ining k'iwonu, py'ede: nnyạnyaang, ọttạra mmaam, ọttạra akamẹl, ọttạra adamagbudu, ọttạra arạkhạmaan, ọttạra mvu. 4 Okhenka, amma Ọvaar Ubinọkpaabyi m'nkhạmọ itirakpo p'anạng p'Israẹl ininga, k'itirakpo py'anạng p'Ijip. Utirattọhk vạnọ-vạnọ f'anang p'Israẹl mópe."

5 Ma wọ Ọvaar Ubinọkpaabyi oge okpe, oben bẹ́, "Uphyini wọ kw'amma Ọvaar Ubinọkpaabyi m'nsi udik ngwa maa isisek nna." 6 Iwu echobh ma, Ọvaar Ubinọkpaabyi usi oche kw'obeni. Itirakpo p'anạng p'Ijip epe bẹ́ phyibh, okhenka, utirattọhk vạnọ-vạnọ f'anạng p'Israẹl f'ope kòde. 7 Ma wọ Phero ọtọhmọ ajunung bạnọ bẹ́, abẹ ata adwạn udik ngwọ. Abẹ akwu ase bẹ́ akwẹ ode udik ọkka bẹ́ utirattọhk vạnọ-vạnọ f'anang p'Israẹl f'kk'upua, kòde. Okhenka, tạrr oseng ma, Phero ofon ororo ọkpọhkhọ echo, nóchera bẹ́ otte anạng p'Israẹl ọbọhk abẹ afona.

8 Ma wọ Ọvaar Ubinọkpaabyi obeni Mosẹs ọttạra Aarọn bẹ́, "Akpokhu itạtọhng-khạma k'ikwukwuru, s'm'ifu ẹbọhkpattem, tte Mosẹs ọbhạrẹ sẹ k'iyokhu, tte Phero obe ma ose. 9 Itạtọhng nnọ m'inyaamẹ, ide masẹ ebona ibubha efhonfhạr ch'Ijip phyi-phyibh, asẹ m'itima aphyi py'm'anwa abhạn ikwu. Apyẹ m'ẹmma ayokhanạng ọttạra itirakpo." 10 Ma wọ abẹ akpokhu itạtọhng-khạma k'ikwukwuru, akwu abe Phero k'ititikha. Mosẹs ọtạkha sẹ ọbhạrẹ k'iyokhu, osenga ma, ọkhạnkhạmọ kw'aphyi, abhạn apyẹ, ammun ayokhanạng ọttạra itirakpo. 11 Wa asi-nkona k'ititikha s'Mosẹs dạk kákke abe, ukwuru aphyi p'asi bẹ, ọttạra anạng p'Ijip phyibh.

12 Okhenka, Ọvaar Ubinọkpaabyi usi Phero odo ettem ọbạr-ọbạr, Mosẹs ọttạra Aarọn itọhng nọ́khọma, oche kw'Ọvaar Ubinọkpaabyi kk'Mosẹs ọkpaakha bạra.

13 Ma wọ Ọvaar Ubinọkpaabyi obeni Mosẹs bẹ́, "Sọhng ata agwunga Phero ukhubh, aben-ẹ bẹ́, ‘Ọvaar Ubinọkpaabyi, kw'ode Ubinọkpaabyi kw'aHiburu obeni bẹ́, atte anạng pẹ ọbọhk abẹ afona, ọfha abẹ ata akpobh-ẹ. 14 Nạn mạnna núdia, ẹkpa nja, m'ọtọhm ọkhạnkhạmọ khira kw'ọyọhng nwọkha ọnạng ọma, ọttạra ajukwa pọ, ọttạra anạng pọ, ọfha asonga bẹ, ọnạng kòde kw'ode masẹ akhẹ ma ọyagbin phyi-phyibh. 15 Njanna wạra kk'ọma ọttạra anạng pọ nkwuru nkhọhkha s'wạra kk'bạnga ifha, ibạra idimi bạnga ma ọyagbin. 16 Okhenka, khọ ọbọhk uttia bẹ́, aninga akpen, ọfha ase ẹfa chẹ, ọttạra bẹ́, eche chẹ efona ororo ẹnyaamẹ ẹbaabha ọyagbin. 17 Tạrr ukpira ma, atim age nkkaang bẹ́, anạng pẹ ọbọhk mátte abẹ afona. 18 Ma wo, uphyini k'okpe-demakwẹ ngwa, m'otebh arạngtava p'apyibhi ọtạm, ayọhnga arạngta p'kk'attia tạma s'Ijip obobe ọmmaana, tạrr ukpira maa. 19 Tọhm ẹkkaabha abẹ atima itirakpo pyọ, ọttạra ọttọhk fidede f'ode pfọ f'uning k'owonu, atima anwa k'ukkira, ukwuru bẹ, de arạngta mbọ atebhi, ayokhanạng ọttạra itirakpo p'nạn k'ukkira náninga, m'epe-ope.’ "

20 Ma wọ, ajukwa p'Phero p'akhaam ojora f'ọtọhnga kw'Ọvaar Ubinọkpaabyi, adwuk-udwukha ata atạkha atọhmnạng pabẹ, ọttạra itirakpo pyabẹ atima anwa k'ẹtaanga. 21 Okhenka, ayok mbọ p'akhaang ọtọhnga kw'Ọvaar Ubinọkpaabyi, atte abira pabẹ, ọttạra itirakpo pyabẹ ọbọhk k'owonu.

22 Ma wọ, Ọvaar Ubinọkpaabyi n'obeni Mosẹs bẹ́, "Nemi ọbọhk kwọ tena k'ẹrạng, ọfha arạngtava atebh ayokhanạng ọttạra itirakpo, ọttạra ọtọhk fidede f'omeni k'iwonu s'anạng p'Ijip." 23 Masẹ Mosẹs onemi uchikwura kwẹ otena k'ẹrạng, Ọvaar Ubinọkpaabyi ọtọhm ẹbhaamkpon, ọttạra arạngtava, ẹbhaamkpon ẹnnaarẹ k'isek. Ma wọ, Ọvaar Ubinọkpaabyi otebhi arạngtava k'ofhon kw'Ijip; 24 arạngtava atebh, ẹbhaamkpon ẹnnaarẹ, idimi, ẹnnaarẹ, idimi, arạngtava mbọ bọ wa, ipyibhi ọtạm ẹyọhnga p'kk'attia tạma s'IJip obobe ọmmaana tạrr, ukwu usi ofhon. 25 Arạngtava mbọ afhọ ayokhanạng ọttạra nten k'Ijip, ọttạra nchi, ọttạra ọttọhk fidede f'omeni k'iwonu. 26 Ibyi ibungusẹ s'uwa arạngtava mbọ nạnátebha ide k'Goshẹn, s'uwa anạng p'Israẹl arukhu.

27 Ma wọ Phero oyeri Mosẹs ọttạra Aarọn ọkpaak bẹ bẹ́, "Ẹkpa nja kk'ipyibha nsia, Ọvaar Ubinọkpaabyi wọ otor-otor, ipyima ede chaam ọttạra anạng paam. 28 Ase njọhm anạng Ọvaar Ubinọkpaabyi, ukuma mmaamkpon nna, ọttạra arạngtava mba, khiri asẹ kk'isaabha iseng eden. Amma m'ntte bạnga ọbọhk otte abạnga afona, dạk nọ́baana bẹ́, abạnga aninga maa afona ororo."

29 Mosẹs ubhin-ẹ bẹ́, "De kk'mbina nnik ofhon ngwa mfona, amma m'mmaama mbọhk saam nse njọhm nnạng Ọvaar Ubinọkpaabyi. Mmaamkpon m'ikumma ttạtta, arạngta m'abạra akkuma tạtebh, ma wọ, m'asonga bẹ, Ọvaar Ubinọkpaabyi wọ ọkhaam ọyagbin. 30 Okhenka, amma nsong ma bẹ́, ọma ọttạra ajukwa pọ, abạnga ojora f'Ọvaar Ubinọkpaabyi, kw'ode Ubinọkpaabyi tạm nákhaama."

31 (Wa afhufhu ọttạra abarli agba ikhibhi, s'uwa abarli kk'akhora, afhufhu abạra ayạm. 32 Okhenka, awit nákhibha, ukwuru s'uwa apyẹ nạn igima ekhor). 33 Ma wọ Mosẹs ubin urik Phero, otte ofhon ọbọhk, ọta ọmmaama mbọhk otena Ọvaar Ubinọkpaabyi ose njọhm, mmaamkpon ikuma ttạtta, arạngtava akuma ttạtto, ọrạngkpaang ọbạra ukuma tạtebh. 34 Masẹ Phero ose bẹ́, ọrạngkpaang, ọttạra arạngtava, ọttạra mmaamkpon kk'ikuma, ẹma ọttạra ajukwa pẹ abạra afona ororo akpọhkhọ echo. 35 Ma wọ Phero ofon ororo ọbạr ette. Anạng p'Israẹl ọbọhk nóchera otte abẹ afona, oche kw'uwa Ọvaar Ubinọkpaabyi kk'Mosẹs utima ọkpaak.