1 Ma wọ Ọvaar Ubinọkpaabyi obeni Mosẹs bẹ́, "Sọhng ata akpaak Phero bẹ́, ‘Amma Ọvaar Ubinọkpaabyi mbeni bẹ́, otte anạng paam ọbọhk abẹ afona ọfha abẹ akwu akpobh-m. 2 De afhumu bẹ́, bẹ ọbọhk mátte abẹ afona, m'ntọhm ayạrạbọhk k'ọsaabh abaabha ẹkhạma chọ kubungu. 3 Ayạrạbọhk m'afu k'ọraanga kw'Nile bẹ́ ttạbh. Apyẹ m'ẹnyaamẹ k'ọvaarter kwọ tạrr ukpira kakhọ-ọ k'ẹmangọ, oseng k'ibyiyimasẹ sọ, ọttạra k'ichọhm s'ajukwa pọ, tạrr oseng k'anạng pọ k'ichọhm, tạrr ukpira k'ibyi sabẹ n'asi uchiattọhk pfọ. 4 Ayạrạbọhk mbọ m'agbe araakh-ọ ọttạra anạng pọ, ọttạra ajukwa pọ.’ "

5 Ma wọ Ọvaar Ubinọkpaabyi obeni Mosẹs bẹ́, "Ben Aarọn onemi ọbọhk ngwọ kw'utim uchikwura otena k'ọraanga, ọttạra k'mmen, ọttạra k'ape, ọfha ayạrạbọhk ayin abaabha isek s'Ijip."

6 Ma wọ Aarọn onemi ọbọhk kwẹ otena k'asi p'Ijip phyi-phyibh, ayạrạbọhk ayin abaabha Ijip. 7 Okhenka, anạng mbọ p'n'asi nkkari k'Ijip abạra akwu asi ọtaanga kwabẹ, ayạrạbọhk ayin abaabha Ijip.

8 Ma wọ Phero oyeri Mosẹs ọttạra Aarọn, oben bẹ́, "Abạnga ase njọhm achini Ọvaar Ubinọkpaabyi, ọfha ọrạbha ayạrạbọhk mbọ k'ọchọhm kwaam, ọttạra k'ichọhm s'anạng paam, amma m'ntte anạng mbọ ọbọhk otte abẹ afona ata afọhnọ ẹja anạng Ọvaar Ubinọkpaabyi kwabẹ."

9 Mosẹs ọpọhna Phero bẹ́, "Amma m'ntte udik kwidede ọbọhk nnạng-ọ bẹ́, age okpe kw'm'nse njọhm k'echo chọ, ọttạra atọhmnạng pọ, ọttạra ẹchọhmfhạr chọ, ọfha ayạrạbọhk atte ẹchọhmfhạr chọ, ọttạra efhonfhạr chọ ọbọhk, arik mbyọ py'ining k'ọraanga kw'Nile."

10 Ma wọ, Phero ubhin bẹ́, "Uphyini e." Mosẹs ọbẹ́, "Tte akwẹ ode oche kw'abeni, ọfha asenga ma asonga bẹ́, ọnạng kòde kw'ode masẹ Ọvaar Ubinọkpaabyi kwamạna. 11 Ayạrạbọhk m'atte ọma ọttạra efhonfhạr chọ ọbọhk otte, m'ekhenka irik mbyọ p'ọraanga kw'Nile."

12 Masẹ Mosẹs ọttạra Aarọn abin arik Phero, Mosẹs ose njọhm, ọkpaak Ọvaar Ubinọkpaabyi udik otena k'ayạrạbọhk p'kk'ọtọhma ọnạng Phero. 13 Ma wọ, Ọvaar Ubinọkpaabyi ọbhaang njọhm s'Mosẹs, ayạrạbọhk mbọ ape k'ichọhm sabẹ, ọttạra k'eterttem, ọttạra k'iwonu sabẹ. 14 Wa abẹ atobh ayạrạbọhk mbọ k'akwung-k'akwung tạrr, iruk ch'ayạrạbọhk mbọ n'esomu ẹkhạng-ọkhạngẹ ẹbaabha ofhon phyibh. 15 Okhenka, masẹ Phero ose bẹ, ayạrạbọhk dạk kade, odo ettem ọbạr, itọhng dạk nọkhọma ọnạng Mosẹs ọttạra Aarọn, oche kw'uwa Ọvaar Ubinọkpaabyi kk'ọkpaakha bạra.

16 Ma wọ Ọvaar Ubinọkpaabyi obeni Mosẹs bẹ́, "Ben Aarọn bẹ́, onemi uchikwura kwẹ uvun k'ububuma kw'isisek s'Ijip, ọfha ububuma nwọ ọbhạkhẹ abumbunu p'm'afhu abaabha isisek s'Ijip." 17 Mosẹs ọttạra Aarọn, asi oche kw'Ọvaar Ubinọkpaabyi ọtọhnọ bẹ. Masẹ Aarọn onemi ọbọhk ọttạra uchikwura kwẹ uvun k'ububuma kw'isisek, abumbunu ayin anạna anạng k'ifor, ọttạra k'nten. Ma wọ, isisek s'Ijip phyi-phyibh ifu ọttạra abumbunu. 18 Chibhi s'abọnganạng p'Ijip akhong bẹ asi ọtaanga kwabẹ, ọfha abumbunu abạra ayin, abẹ khakke. Ma wọ, abumbunu mbọ afon ororo abubha ayokhanạng ọttạra nten.

19 Anạng mbọ p'n'asi nkkari n'abeni Phero bẹ́, "Udik ngwa k'ajaakha sạng o, ọbọhk kw'Ubinọkpaabyi ọttạr ma." Okhenka, Phero ofona ororo ọkpọhkhọ echo, itọhng nóchera bẹ́ ọkhọmọ ma idik nnọ, otor k'oche kw'uwa Ọvaar Ubinọkpaabyi kk'ọkpaakha bạra.

20 Ma wọ Ọvaar Ubinọkpaabyi obeni Mosẹs bẹ́, "Sọhng ata agwunga Phero ukhubh k'ekpekpebha bạrasẹ ọta k'ọraanga, akpaakh-ẹ bẹ́, ‘Ọvaar Ubinọkpaabyi obeni bẹ́: Tte anạng paam ọbọhk abẹ afona, ọfha abẹ akwu akpobh-m. 21 De nạn anạng paam ọbọhk nattia abẹ afona, amma m'ntọhm asạsạng k'ọsaabh nnạng ọma, ọttạra atọhmnạng pọ, ọttạra anạng pọ, ọttạra k'ichọhm sabạnga. Ichọhm s'anạng ọttạra isisek phyi-phyibh s'Ijip m'ifhu ọttạra asạsạng.

22 " ‘Okhenka, ma iwu njọ, amma m'nsi nkhạmo k'ẹkhạma ch'Goshẹn ch'anạng paam arukhu, nchok asạsạng ma m'aninga, ọfha asonga bẹ́ amma, Ọvaar Ubinọkpaabyi nning ma isisek nna. 23 Amma m'nge erem k'anạng paam ọttạra pọ. Ẹkhọhkha nja m'iyin uphyini.’ "

24 Ma wọ, Ọvaar Ubinọkpaabyi usi oche kw'ọkpaakhẹ, ọtọhm asạsạng k'ọsaabh anwa k'ọvaarter kw'Phero, ọttạra k'ichọhm s'ajukwa pẹ. Isek s'Ijip phyi-phyibh n'ide asạsạng-asạsạng.

25 Osenga ma, Phero oyeri Mosẹs ọttạra Aarọn, oben bẹ́, "Abạnga asọhng ata afọhnọ nja anạng Ubinọkpaabyi kwabạnga ma isisek nna."

26 Okhenka, Mosẹs oben bẹ́, "Mmaro, oche ngwọ nọ́baana a. Nja s'm'amfọhnọ annạng Ọvaar Ubinọkpaabyi, kw'ode Ubinọkpaabyi kwamạna, anạng p'Ijip mídaak. De amfọhnọ nja s'nạn bẹ nídaakha, abẹ mạna ata mátọhbh o? 27 Oyonga m'ambina osenga kw'iwu ittaan amfona k'ibyi s'anạng nạnárukha, ọfha anta amfọhnọ nja annạng Ọvaar Ubinọkpaabyi, kw'ode Ubinọkpaabyi kwamạna, k'oche kw'ọtọhnọ mạna."

28 Ma wọ Phero obeni bẹ́, "Amma m'ntte bạnga ọbọhk otte abạnga ata afọhnọ nja anạng Ọvaar Ubinọkpaabyi, kw'ode Ubinọkpaabyi kwabạnga k'ibyi s'anạngn'nárukha. Okhenka, nọ́baana bẹ́, abạnga afona k'ibyi s'ibhir-ubhir. Abạnga ase njọhm anạng-m."

29 Mosẹs ubhin bẹ́, "De mbin maa, m'nse njọhm ose nnạng Ọvaar Ubinọkpaabyi, uphyini, asạsạng mbọ m'atte ọma Phero, ọttạra ajukwa pọ, ọttạra anạng pọ ọbọhk otte. Nạngẹ ode bẹ́, ọma Phero m'abọhra dạkhẹ mạna, akpa anạng mbọ eden bẹ́, abẹ nạngẹ nja ata afọhnọ anạng Ọvaar Ubinọkpaabyi o."

30 Ma wọ Mosẹs ubin urik Phero, ọta ose njọhm ọnạng Ọvaar Ubinọkpaabyi. 31 Ọvaar Ubinọkpaabyi ọbhaanga njọhm nnọ s'Mosẹs ophyemi bẹ́, asạsạng mbọ atte Phero ọttạra ajukwa pẹ, ọttạra anạng pẹ ọbọhk. Ẹsạsạng jạnẹ-jạnẹ ch'ẹbạra irik kède. 32 Okhenka, Phero oyongu ma ọkpọhkhọ echo, anạng mbọ ọbọhk nóchera otte abẹ afona.