1 K'iwu mạnna jạnẹ, Mosẹs n'okkeri arạkhạmaan p'ọnyẹ kwẹ, Jẹtro. Jẹtro wọ wa ode ọfọhnẹja k'ẹkhạma ch'Midiyan. Mosẹs utim arạkhạmaan mbọ osenga ma ibyi s'owor, tạrr ukwu ukpira k'okpecho kw'Horẹb, kw'ode okpecho kw'Ubinọkpaabyi. 2 Ma wọ oseng-eden kw'Ọvaar Ubinọkpaabyi oseng k'akpondaak p'n'ayạma k'ichi, uyin Mosẹs abẹ. Wa Mosẹs odo okkeri, ose bẹ́, chibhi s'ekpon n'ẹyạma, ichi njọ nẹ́kkạma. 3 Mosẹs oben k'ettem bẹ́, "Tte ntwạkhọ mgbaara khanse, ọfha nse ọttọhk f'usi bạra ekpon n'ẹyạma ma ichi njọ, bạra achẹ n'nẹ́kkạma."

4 Masẹ Ọvaar Ubinọkpaabyi n'ose bẹ́, Mosẹs kk'osenga ọgbaara ma ọfha odo okkeri, n'oyer-ẹ k'ottemkwẹ kw'ichi njọ bẹ́, "Mosẹs! Mosẹs o!" Mosẹs ọbẹ́, "Aro, kkeri amma ma e."

5 Ubinọkpaabyi oben-ẹ bẹ́, "Dạk kásenga abaanga ma, wạra akpafhok pọ, khiri ibyi nnọ sabẹ ma, ide isisek s'awurada." 6 Ọbạra oben-ẹ bẹ́, "Amma wọ nde Ubinọkpaabyi kw'ab'atte, Abraham, ọttạra kw'Isaak, ọttạra kw'Jekọb." Ma wọ ojora ọvạk Mosẹs, udubh ititikha sẹ, s'n'nórora bẹ́, ose Ubinọkpaabyi.

7 Ma wọ, Ọvaar Ubinọkpaabyi obeni bẹ́, "K'udik ọkka, amma kk'irem s'anạng paam n'adọhbh k'Ijip nsia e. Amma kk'ẹmạng ch'ẹkkaana mmaanga ch'abẹ n'agạma, ukwuru irem s'akker-atọhmnạng n'anạng bẹ́. Irem sabẹ n'adọhbh kk'aam itwua e. 8 Ma o, amma kk'nkwua bẹ́, nkwu nkkaana, nnạbha bẹ k'mbọhk s'anạng p'Ijip, mbạra mbina bẹ abẹ ma isisek nnọma, ntima bẹ mfona k'isisek ikkasẹ s'abasi, ọttạra ana p'ọkhọhn asaabh-ọsaabh, ofhon kw'aKenaan, ọttạra aHet, ọttạra abAmọr, ọttạra aPẹriz, ọttạra aHiv, ọttạra aJẹbus. 9 K'udik ọkka, amma kk'ẹmạng ch'anạng p'Israẹl agạm mmaanga e, mbạra nse irem-demasẹ s'anạng p'Ijip n'anạng bẹ. 10 Mantọhmma, ọma sọhng. Amma n'ntọhm-ọ k'Phero bẹ́, ata atạkha anạng paam, p'Israẹl abina k'Ijip."

11 Okhenka, Mosẹs n'obeni Ubinọkpaabyi bẹ́, "Amma nde anẹ, kw'm'nta mbe Phero k'ititikha, mbạra ntima anạng p'Israẹl mbina k'Ijip?"

12 Ubinọkpaabyi n'oben-ẹ bẹ́, "Amma m'nninga abọ. Ma wọ m'ode ẹkhọhkha ẹnạng-ọ bẹ́, amma wọ ntọhm-ọ: De kk'anạng p'Israẹl atima abina k'Ijip, abạnga m'akpobha Ubinọkpaabyi maa okpecho nwa."

13 Ma wọ, Mosẹs ubhin Ubinọkpaabyi bẹ́, "Ode n'nta k'anạng p'Israẹl, mkpaak bẹ bẹ́, ‘Ubinọkpaabyi kw'ab'atte wọ ọtọhm-m k'abạnga e,’ abẹ n'abạbh-m bẹ́, ‘Ubinọkpaabyi nwọ okpen yạn?’ M'mkpaak bẹ yạn o?"

14 Ubinọkpaabyi n'ubhin Mosẹs bẹ́, "AMMA WỌ NDE NWỌ KW'NDE." Ọbạra oben bẹ́, "Kpaak anạng p'Israẹl bẹ́, AMMA WỌ NDE, wọ ọtọhm-m k'abạnga."

15 Ubinọkpaabyi ọbạra oben Mosẹs bẹ́, "Ọma m'akpaak anạng p'Israẹl bẹ́, ‘Ọvaar Ubinọkpaabyi kw'ode Ubinọkpaabyi kw'ab'atte Abraham, ọttạra Isaak, ọttạra Jekọb akpobh, wọ ọtọhm-m k'abạnga.’ Ma wọ ode eche chaam, eche ch'igbọ phyibh m'iyer-m tạrr ipimmanitor.

16 "Sọhng ata ayeri adecho p'Israẹl atobha, akpaak bẹ bẹ́, ‘Ọvaar Ubinọkpaabyi, kw'ode Ubinọkpaabyi kw'ab'atte Abraham, ọttạra Isaak, ọttạra Jekọb akpobh uyini okhebh-m, ọbẹ́, kk'okpe ntạkha nkkeri, nse oche kw'abẹ n'asi bạnga k'Ijip. 17 Amma kk'nchekha bẹ́, m'nnạbha bạnga k'irem s'Ijip, ntima bạnga mfona k'isisek ikkasẹ s'abasi, ọttạra ana p'ọkhọhn asaabh-ọsaabh s'aKenaan, ọttạra aHet, ọttạra abAmọr, ọttạra aPẹriz, ọttạra aHiv, ọttạra aJẹbus.’

18 "Adecho mbọ p'Israẹl m'akhọhmọ-ọ itọhng ọkhọmọ. Ma wọ, ọma ọttạra bẹ m'atwạn afona k'ọvaarnạng kw'Ijip ata aben-ẹ bẹ́, ‘Ọvaar Ubinọkpaabyi, kw'ode Ubinọkpaabyi kw'aHiburu kk'uyina okhebha mạna e. M'atte mạna ọbọhk ansi osenga kw'iwu ittaan amfona k'ibyi s'owor, ọfha anta anfọhnọ nja annạng Ọvaar Ubinọkpaabyi, kw'ode Ubinọkpaabyi kwamạna.’ 19 Okhenka, amma nsong ma bẹ́, ọvaarnạng kw'Ijip bạnga ọbọhk motte abạnga afona, oyonga ẹfa chididen m'ẹkwẹ-ẹ. 20 Ma wọ, m'ntima ẹfa chaam nnạng anạng p'Ijip irem, m'nsi idik s'm'ipe anạng ifor ma ikhana nnọ sabẹ. K'ekpongannạm-kpe, m'otte bạnga ọbọhk otte, abạnga afona.

21 "Amma m'mbạra nsi anạng p'Ijip asi ọphyaam anạng bạnga, ọfha masẹ abạnga m'abina osenga, abạnga nạng mbọhk-mbọhk afon. 22 Ikwanạng kwidede m'ofona k'uJip-kwanạng kw'urukhu ọbaang-ẹ, ọttạra k'uJip-kwanạng kw'urukhu k'ọchọhm kwẹ, ọbạbh-ẹ ekpo masẹ asilva ọttạra agol, ọttạra ọvạra f'ifor, f'abạnga m'age ajunungva ọttạra apanạngva pabạnga. Abạnga m'asenga ma eden njọ achi anạng p'Ijip ekpo."