1 "Tima mkpaakha s'akasiya si ijabyi s'ikhaam akhubha annebung. Ebe chẹ m'ede ntwạkhọ nnebung ọmaana ibhaakha, adum pẹ ade ntwạkhọ nsenọfa ọmaana ibhaakha, ẹkpa chẹ ede ntwạkhọ nsenọfa ọmaana ibhaakha. 2 Gwa ubhik k'nnwyạnga nnọ nnebung, ọfha abhik mbọ ọttạra ijabyi nnọ ade ọttọhk mvọ vạnọ. Atima brons afhạro ijabyi nnọ. 3 Tima brons si ẹtọhmkpo pyẹ phyibh, py'ede: ọsọhkha f'itạtọhng kpukpokhu, ọttạra asọvẹl, ọttạra akpobhu-mbọhk, ọttạra agbumu p'akhaam asa, ọttạra nsenga. 4 Tima brons si itegba, atima brons asi ibunu, abạra atima brons asi ariringi annebung p'itegba nnọ. 5 Chok itegba nnọ k'isekhisek kw'ijabyi, ọfha ibunu nnọ ininga k'ibhaang-ifa s'ijabyi. 6 Tima mkpaakha s'akasiya si nsemachi s'ijabyi nnọ, abạra atima brons afhạrọ sẹ. 7 M'anọhma nsemachi nnọ ma ariringi mbọ, ọfha asẹ ininga k'akhubha mbọ afa p'ijabyi, k'okpe kw'abẹ m'adira. 8 Tima mkpaakhakpa si ijabyi nnọ itto eje. Si ator k'oche kw'uwa nkọhkh-ọ k'okpecho.

9 "Si eterttem ch'ibyirukhasẹ nnọ. Tima ndikhi ikkasẹ sabẹ ayokh-oyok si ichọhmma-vạra s'ide ntwạkhọ arạbh asenọfa ukuma jobh k'adum, akpạna sẹ k'ẹrạkh-ẹrạkha, 10 ọttạra mkpọmmachi ẹrạbh, ọttạra nnạna s'brons ẹrạbh, ọttạra mkpạkha s'asilva, ọttạra mvạrakpa s'mkpọmmachi. 11 Ukhubha kw'ibir-ibira m'ọbạra ode ntwạkhọ arạbh asenọfa ukuma jobh, m'ọkhaama mkpọmmachi ẹrạbh, ọttạra nnạna s'brons ẹrạbh, ọttạra mkpạkha s'asilva, ọttạra mvạrakpa s'm'ikpạna k'mkpọmmachi nnọ.

12 "Ukhubha kw'eterttem njọ kw'ududon n'udimi m'ode ntwạkhọ arạbh attaan ukuma chi k'adum, ọbạra ọkhaama ichọhmma-vạra, ọttạra mkpọmmachi jobh, ọttạra nnạna jobh. 13 Ukhubha kw'ududon n'uyin, adum pẹ m'ede ntwạkhọ arạbh attaan ukuma chi. 14 Adum p'ichọhmma-vạra m'ade ntwạkhọ ẹrạbh ukuma mfa ọmaana ibhaakha, asẹ m'ikpạna k'ukhubha gwạnọ k'ọmmakhubh, m'ikhaama mkpọmmachi nttaan, ọttạra nnạna nttaan. 15 Ichọhmma-vạra s'ide ntwạkhọ ẹrạbh ukuma mfa ọmaana ibhaakha k'adum, s'ikhaam mkpọmmachi nttaan ọttạra nnạna nttaan, m'ibạra ikpạna k'ukhubha ngwọkha.

16 "K'ọmmakhubh kw'eterttem, kpạna ichọhmma-vạra s'ide ntwạkhọ ẹrạbh ukuma jobh k'adum, asẹ m'ide blu, ọttạra s'ikhor-ichicho, ọttạra s'ikhor-isisẹ, ọttạra ndikhi ikkasẹ sabẹ oyokh-oyok, f'ode ọbọhktọhm f'odokh-ọvạra, ibạra ikhaama mkpọmmachi nnebung, ọttạra nnạna nnebung. 17 Mkpọmmachi phyi-phyibh s'ibaabh eterttem njọ m'ikhaama avạrakpa p'asilva, ọttạra mkpạkha, ọttạra nnạna s'brons. 18 Eterttem njọ m'ede ntwạkhọ arạbh asenọfa ukuma jobh k'adum, ọttạra ntwạkhọ arạbh attaan ukuma chi k'ẹkpa, m'ẹkhaama ichọhmma-vạra s'ndikhi ikkasẹ sabẹ ayokh-oyok s'igoru ikpira ntwạkhọ nsenọfa ọmaana ibhaakha, ọttạra nnạna s'brons. 19 Ẹtọhmkpo phyi-phyibh py'm'atima asi ibyirukhasẹ nnọ, ọtọhm fidede f'ẹtọhmkpo mbyọ, ọttạra abhik pẹ phyibh p'ukkira, ọttạra abhik p'eterttem njọ, phyi-phyibh m'ade brons.

20 "Ben anạng p'Israẹl bẹ́, abẹ atima ana p'atto iyaan, py'abẹ amyạn k'achidwuk p'oliv py'n'ẹnạng ọyantaana, ọfha attukkạng n'ayeni k'okpe kw'idede. 21 K'ukkira kw'etobha, k'iyaan-iyaan kw'ivạra s'ining k'ititikha s'Ikwukwur s'Echekha, Aarọn ọttạra ajunungva pẹ m'ayeni attukkạng k'ititikha s'Ọvaar Ubinọkpaabyi, tạma k'ẹchọhkha tạrr iwu echobha. Ntọhna nna ide s'anạng p'Israẹl tạrr ukpira k'igbọ s'm'immaana k'iwu oro.