1 Wa Josẹph ọtọhnọ ọtọhmnạng kw'ọchọhm kwẹ bẹ́, "Yikha uchiattọhk k'ajunung mbọ k'mkpa k'oche kw'abe m'akke atọhkha, bạra ge asilva p'ọnạng-ọnạng kk'ọnạnga k'ẹmma ch'ẹkpa chẹ. 2 Atạkha nkkọbh kwaam kw'silva age k'ẹmma ch'ẹkpa ch'oyok kw'isạsạkhẹ, abạra atạkha asilva p'utim odebh uchiattọhk agẹ-ẹ ma ẹkpa." Wa ọtọhmnạng nwọ usi oche kw'Josẹph ọtọhn-ẹ.

3 Ukwu ukpira s'iwu echobh, abẹ atọhm ajunung mbọ abhạna attạra nnyạnyaang sabẹ. 4 Masẹ abẹ nạn eden-ibhir tạm náfona arik ofhon, Josẹph oben ọtọhmnạng kwẹ bẹ́, "Khubh ajunung mbọ k'eden. De akhebh bẹ, bạbh bẹ bẹ́, ‘Ode yạn kw'abạnga n'atim ipyibha atera ijibha ch'abẹ asi anạng bạnga o? 5 Ode yạn kw'abạnga afu nkkọbh kw'aro kwaam n'utima ogwo asi, kw'n'ọbạra utima ọbhạrẹ ọsẹ o? Udik kw'abạnga ayom maa bạra upyibh.’ "

6 Mase okhebh be k'eden, ọmmạnga itọhnga nnọ ọkpaak bẹ. 7 Okhenka, abẹ aben-ẹ bẹ́, "Taa, Ubinọkpaabyi káchera! Ode yạn kw'aro kwamạna ọkkẹ bẹ́ amạna mba atọhmnạng pẹ m'ankke-okke ansi udik-demakwẹ ngwọ o? 8 Anter antima asilva p'iwu nja anse k'mma s'mkpa samạna ẹtaanga, tạma k'isek s'Kenaan ankwu annik maa. Mbạng vọ n'abạra utima mạna amfu silva ọbạra ode gol k'ọchọhm kw'aro kwabạnga o? 9 De ase ọnạng k'ikhaana s'atọhmnạng pọ kw'utim nkkọbh nwọ, tte ọnạng-khira nwọ ope echomajạne, amạna mba phyibh m'ambạra ande abira p'aro kwọ."

10 Ọtọhmnạng nwọ n'obeni bẹ́, "Ọbaan ma. Tte ode oche kw'abạnga abeni. Ọnạng kwidede kw'amạna anse nkkọbh nwọ k'ẹkpa chẹ, ẹma nwọ bạra ode ubira kwaam, ma wọ m'antte ayok ọbọhk abẹ abhạna."

11 Mạnna wọ ọnạng-ọnạng ọsạk ẹkpa chẹ k'isek k'ẹbhạr-k'ẹbhạr, ọbạra ọchaarẹ ẹkpa mma chẹ. 12 Mạnna wọ ọtọhmnạng nwọ ọtạm k'mkpa s'adennạng ọfạngọ tạrr ukwu ukpira ch'oyok kw'isạsạkhẹ. N'ukwu ose nkkọbh nwọ k'ẹkpa ch'Bẹnjamin. 13 Osenga ma, ivotte n'avạk ọvạra fabẹ k'ifor ayaakhẹ, abẹ adira ntọhkha sabẹ anạna k'nnyạnyaang, abhạkhẹ echo akpa nnạm k'ofhon kw'wạra abẹ abin.

14 Wa Josẹph utim uning kha ọchọhm okpe kw'Juda ọttạra ivotte pẹ akpir. Abẹ atto afhur-ufhur ma isisek, n'agạma ma akhẹ ititikha.

15 Ma wọ Josẹph obeni bẹ bẹ́, "Bạng udik-dema gwọ kw'abạnga ayom maa? Abạnga kásong bẹ́ ọnạng masẹ akhaam n'utima ọsẹ osonga idik s'm'iyin kha iwu oro o?"

16 Juda ubhina bẹ́, "Bạng udik gwọ kw'm'ambạra amkpaak aro kwamạna o? Bạng udik gwọ kw'm'antekh-ọ o? M'amkpaakh-ẹ yạn o? M'ansenga yạn ankọhkha bẹ́, mbọhk samạna iwur-uwur ma udik ngwa o? Ubinọkpaabyi kk'mpyibha samạna ọtạkha ọjẹ k'ọyaankpa, ẹma nwọ kw'nkọbh nwọ uning k'ẹkpa chẹ, ọttạra amạna mba phyibh n'ande abira p'aro kwamạna e."

17 Okhenka, Josẹph obeni bẹ́, "Ubinọkpaabyi káchera! Bẹ́ amma nsi udik-khira ngwọ. Ọnạng nwọ kw'abẹ ase nkkọbh k'ẹkpa chẹ, ẹwọ m'ode ubira kwaam. Abạnga kha phyibh, asọhng abhạna akhebha atte kwabạnga k'idira."

18 Ma wọ Juda ofon okhebha Josẹph, oben-ẹ bẹ́, "Aro kwaam, amma nkhaam udik kw'n'mben bẹ́ mkpaak ngiọ-ọ k'itọhng. Totokhạn, nạng-ọ ọdwạkhọ otena amma ọtọhmnạng kwọ. Amma nsong kha bẹ́ ẹfa chọ ede obengana ọttạra ch'Phero oyeni ma ifor sẹ.

19 "Wa ọma aro kwaam abạbhọ amạna mba atọhmnạng pọ bẹ́, ‘Abạnga akhaam atte ọttạra nnwọkka ọdwạkh-ọdwạk kạkha?’ 20 Wa ammin-ọ bẹ́, ‘Ankhaam otte kha kw'kk'ọtạma, ambạra ankhaama nnwotte kw'otte kwamạna ofhonu k'atạm. Nnwọkka kw'abẹ ade ọkka wạnọ, kk'upua ẹma-ẹma wọ n'urikhi k'ọkka kwabẹ, ẹma ọdaakhẹ otte idik mororo.’

21 "Osenga ma, wa abeni amạna mba atọhmnạng pọ bẹ́, ‘Abạnga asọhng ata atim-ẹ akwu, ọfha ntima achen paam afa nsiẹ-ẹ.’ 22 Wa amkpaakh-ọ bẹ́, ‘Otte kwamạna móchera bẹ́ otte nnwa nwọ ọbọhk ubina urikh-ẹ e, ukwuru bẹ́ de ubin urikh-ẹ, otte m'opope e.’ 23 Okhenka, wa abeni amạna mba atọhmnạng pọ bẹ́, ‘Amma dạkhẹ bạnga ititikha saam mạ́nnạng, de abạnga nạn nnwatte kw'ode bạnga okpongannạm nátima akwu, nsẹ-ẹ.’ 24 Masẹ amkpa nnạm anta ankhebha ọtọhmnạng kwọ, kw'ode otte kwamạna, amkpaakh-ẹ oche kw'ọma aro kwaam kk'mạna akpaakha.

25 "Ma ọ, masẹ otte kwamạna obeni bẹ́, ‘Abạnga abạra asọhng ata adebh uchiattọhk-nwa.’ 26 Okhenka, wa ambeni bẹ́, ‘Amạna mánkke anta de nạnáchera bẹ́, antima nnwotte kwamạna anta. Ujunung nwọ kw'n'okpe uchiattọhk mạna ititikha mọ́nạng de nnwotte kwamạna kw'isạsạkhẹ nạn mạna abẹ nọ́twạna anta andebh uchiattọhk e.’

27 "Otte kwamạna kw'ode ọtọhmnạng kwọ obeni mạna bẹ́, ‘Abạnga asong ma bẹ́, wa ikwanạng kwaam ọmaan-m ajunungva afa. 28 Oyok wạnọ k'akpen dạk kòde. K'udik ọkka, nten kk'ẹ ichia iyaakhẹ k'akpa-k'akpa. Tạma ma kpira maa, khẹ k'ichen kạ́nse. 29 De abạnga abạra atima oyok nwa afona, ipyibha chidede ekhebh-ẹ k'eden, nnạm nọ́kpa, kw'uyini bẹ́, abạnga m'annọhng-m k'atạm ọttạra ikwosi.’

30 "Ma wọ ode bẹ́, de nnwa nwa nạn mạna abẹ nọ́twạna s'm'amkpa nnạm k'otte kwaam, kw'ode ọtọhmnạng kwọ, s'ettem che phyibh ẹkpạn ma nnwa nwọ, 31 ukwu ose bẹ́ nnwa nwọ mạna abẹ nọ́twạna, m'opope e. 32 Amma ọtọhmnạng kwọ ntạk mkparẹka k'ititikha s'otte kwaam, mben bẹ́, ‘Tte amma ntima akpen paam ntera echo chẹ, de nạn khẹ nạ́ntima nkwuna nkken-ọ!’

33 "Ma n'ode mạnna, aro kwaam, amma nchinọ-uchini, tima amma ọtọhmnạng kwọ masẹ ubira atera echo ch'nnwa nwa, ọfha atte ẹma ọbọhk ọtwạn ivotte pẹ abẹ ọbhạna. 34 Amma eden kạ́nsong ch'm'nsenga mmạna ntor otte kwamạna, de nnwa nwọ nạn abaamẹ nọ́twạna ọbhạna. Mma o! Khaam ọbọhk kátte bẹ́ nta nse ọkhạnkhạmọ kw'udik ngwa m'ọnạng otte kwaam e."