1 K'okpe kw'uwa ayokhanạng atạm sạsaabh ma ọyagbin, abẹ amaan apanạngva anạng bẹ, 2 iva p'Ubinọkpaabyi ase bẹ́, apanạngva mbọ p'ayokhanạng ajibhi iminava. Ma wọ abẹ n'atek ayok bạnọ, atạkha bẹ masẹ ipanạng pabẹ. 3 Ma wọ Ọvaar Ubinọkpaabyi obeni bẹ́, "Iguguma saam dạkhẹ oyokhanạng abẹ míninga tạrr ipimmanitor, ukwuru bẹ́, oyokhanạng ode akpakpa. Tạma mantọmma, ayokhanạng akpen dạk máruk ayongu icho arạbh asajạnẹ."

4 Ma okpe ngwọ, ọttạra kw'oyongu ma, wa aNephilim aning ma ọyagbin. Masẹ iva p'Ubinọkpaabyi ayim aminava p'ayokhanạng abẹ, aminava mbọ atim ọfhạr amaan bẹ iva. Iva mbọ wa ade afa-nạng, abẹ abạra ade ajunung p'ayini eche.

5 Ọvaar Ubinọkpaabyi ose bẹ́, ipyibha ch'ayokhanạng kk'ẹbạra eseng eden ma ọyagbin, ọttạra bẹ́, ẹkka ch'ayokhanạng phyi-phyibh ipyibh-upyibh k'okpe kwidede. 6 Akwẹ ọmma Ubinọkpaabyi k'ettem k'usisi kw'ayokhanạng p'kk'usia ma ọyagbin. 7 Ma wọ Ọvaar Ubinọkpaabyi n'obeni ẹma oyeni bẹ́, "Amma m'ndimi ayokhanạng phyi-phyibh p'kk'nyokha, ọnạng wạnọ wạnọ ma ọyagbin múrik. Amma m'mbạra ndimi nten phyibh, ọttạra ọnọhn, ọttạra ekpo phyibh py'n'ẹsenga k'isisek. Akwẹ ọmmaam k'ettem bẹ́, amma kk'bẹ nsia." 8 Okhenka, Noa ode ọnạng kw'usi ẹmmaana ch'erebhi Ọvaar Ubinọkpaabyi ettem.

9 Maa wọ ode udik otena Noa.

Wa Noa ode ọnạng kw'otor-otor, iponga-pyibha nọ́bạra ọkhaama masẹ anạng pakhẹ k'okpe. Wa Noa ọtwạnọ Ubinọkpaabyi abẹ. 10 Wa Noa ofhonu ajunungva attaan p'ade: Shẹm, ọttạra Ham, ọttạra Japhẹt.

11 Wa Ubinọkpaabyi ose bẹ́, ọyagbin kk'ukhibha, ọbạra ọbạr igbaan. 12 Ubinọkpaabyi ukwu ose oche kw'ọyagbin kk'ufhura ukpira, s'ayokhanạng phyibh k'ọyagbin kk'akpen pabẹ akhibha. 13 Ma wọ Ubinọkpaabyi obeni Noa bẹ́, "Amma kk'ẹkka nkhaama bẹ́ ndimi ayokhanạng phyibh, s'ọyagbin n'ọbạrẹ igbaan ukwuru ayokhanạng. Kker e, amma m'ndimi ayokhanạng ọttạra ọyagbin nwa bẹ́ phyibh. 14 Ọma Noa, tima mkpaakha s'ichi ch'ẹkpọhkhọ-ọkpọhkhọ mun ọkpaar kwididen nạng ọma oyeni. Si mmangọ k'ọkpaar gwọ ẹtaanga, tima ẹbanttum kpa abhaang pẹ k'ẹtaanga ọttạra k'iyaan, ọfha asi nạngẹ k'ẹtaanga anwa. 15 Maa wọ ode oche kw'm'ammun ọkpaar ngwọ: Adum pẹ m'ade ntwạkhọ enọhna ukuma arạbh afa ukuma jobh, ẹkpa chẹ m'ede ntwạkhọ arạbh attaan ukuma chi, ebe chẹ m'ede ntwạkhọ arạbh afa ukuma asen. 16 M'asi ipakhọhnga abubha kwẹ, tạma k'abem kpira k'ipakhọhnga, chok ẹbhaang ch'ede ẹtwạkhọ k'ubungu ọttạra ibhaakha. Si ọmmakhubh k'ukhubha gwạnọ k'ọkpaar ngwọ, asi nnạna nttaan, jạnẹ k'isekhisek, jạnẹ k'ottemkwẹ, njọkhạ k'ẹrạng.

17 "Kkeri, amma m'ntima asi nchi ọyagbin phyibh. Asi mbọ m'anwa akhibhi ọttọhk fidede f'urukhu akpen ma ọyagbin. Fidede f'n'ọgwạkhọ ọyọhng m'opope. 18 De n'ode ọma, amma m'nsi echekha chaam nnạng ọma ọttạra iva pọ, ọttạra ikwanạng kwọ, ọttạra ipanạng p'iva pọ; abạngama phyibh m'anwa ma ọkpaar ngwọ ẹtaanga. 19 Ọma m'atạkha akhira k'afa-k'afa p'ọttọhk fidede f'urukhu akpen, udim ọttạra ikwa, anwa k'ọkpaar ngwọ ẹtaanga, ọfha apyẹ iruk akpen ọma abẹ ma ọkpaar. 20 Akhira k'afa-k'afa p'ọnọhn fidede, ọttạra p'nten sidede, ọttạra p'ọttọhk fidede f'n'osenga k'isisek, m'ikwu etor-ọ, ọfha ininga akpen. 21 M'atobha ọttọhk fidede f'ode uchiattọhk ọnạng bạnga, f'ọbạra ode uchiattọhk ọnạng nten nnọkha phyi-phyibh, ayikha ma ọkpaar ngwọ."

22 Noa usi udik kwidede otor k'oche kw'Ubinọkpaabyi ọtọhn-ẹ.