1 K'okpe ngwọma, Juda ubina urik ivotte pẹ, ọta uruk ọttra ujunung wạnọ kw'okpen Hira, kw'ubin Adulam. 2 Ma Adulam, wọ kw'uwa Juda okhebh uminanwa wạnọ kw'ọkpen Shua kw'otte ubin Kenaan, ọtạkh-ẹ k'ọbada, ọbạra uyima abẹ. 3 Uminanwa nwọ ukwu utima ifhạr ọmaan ujunung nnwa, otte ukpuẹ-ẹ Ẹr.

4 Uminanwa nwọ ọbạra utima ifhạr, ọmaan ujunung ukpuẹ-ẹ Ọnan. 5 Okpe kw'uwa Juda uning kha Kezib, wa uminanwa nwọ ọbạra utima ifhạr, ọmaan ujunung ọdwạkh-ọdwạk, ukpiẹ-ẹ Shẹla.

6 Masẹ iva mbọ abạrẹ, otte kwabẹ, kw'ode Juda, ọtạk ikwanạng kw'okpen Tamar, ọnạng ochedennwa kwẹ, kw'ode Ẹr, k'obada.

7 Okhenka, ẹma Ẹr, kw'ode ochedennwa kw'Juda, ode ọgbannạng k'ititikha s'Ọvaar Ubinọkpaabyi, osengama, Ọvaar Ubinọkpaabyi ọtạkha akpen pẹ.

8 Masẹ Ẹr kk'upua, Juda ukwu oben Ọnan, kw'ode nnwa kwẹ, bẹ́, "Ọbaan bẹ́, asi oche kw'ẹmmaana chamạna ede, sọhng ata ayima ikwanạng kw'nnwakka abẹ, ọfha ọmaan iva ọnạng nnwakka." 9 Okhenka, masẹ Ọnan osong bẹ́, nnwa kwidede kw'm'ubina ma ntaak s'ikwanạng kw'nwọkka, kwẹ kode. Okpe kwidede kw'uyim ikwanạng kw'nwọkka abẹ, ọja adima ọbhạrẹ k'isisek, ọfha ikwanạng nwọ nạngẹ ifhạr utim ọmaan iva ọnạng nwọkka kw'kk'upua. 10 Wa udik ngwa kw'usi ma, akwẹ upyibhi k'ititikha s'Ọvaar Ubinọkpaabhyi. Osenga ma, Ọvaar Ubinọkpaabyi ọbạra ọtạkha akpen p'Ọnan.

11 Ma wọ, Juda obeni ọnyẹ kwẹ, kw'ode Tamar bẹ́, "Sọhng ata aruk k'atte k'ọchọhm masẹ opokwa, tạrr ukpira k'okpe kw'nnwa kwaam kw'ode Shẹla m'ọbạr ukpira k'oche kw'm'ọtạkha ikwanạng." Wa obeni oche ngwọ ukwuru s'ọkkẹ bẹ́, Shẹla m'ọbạra ope oche kw'ivọkka ape. Ma wọ, Tamar ọkpa nnạm k'otte k'ochọhm.

12 Ukwu ukpira k'icho ma, ikwanạng kw'Juda, kw'ode nnwa kw'Shua ukwu ope. Wa Juda utim nkwuna s'ikwanạng nwọ kwẹ tạrr asẹ isa. Ma wọ, ẹma ọttạra oyodikkobh kwẹ, Hira, kw'ubin Adulam, abin afona kha Timna, k'ibyi sabẹ n'agwu arạkhạmaan pẹ aphyạbha.

13 Masẹ abẹ akpaak-ẹ Tamar bẹ́, "Otte-ofhon-udim n'osengkha k'eden n'ukwu k'Timna bẹ́, ukwu ọgwa arạkhạmaan pẹ aphyạbha," 14 ọwạra epokwa kpo pẹ, ọtạkha ivạra s'ide ọphyọhng-ọphyọhng ububha ititikha sẹ, ọta uninga ẹyạr k'ọkkaden kw'oten k'ofhon kw'Enaim, kw'm'asenga afona k'Timna. Wa, Tama kk'osonga bẹ, chibhi s'Shẹla kk'ọbạra k'oche kw'wạra m'ọtạkhẹ k'ọbada, wa mạnna nusia.

15 Masẹ Juda ose Tamar, ọkkẹ bẹ ọsasa wọ, ukwuru s'utim ọphyọhng ububha ititikha sẹ.

16 Wa, Juda kosóng bẹ, ikwanạng kw'nnwa kwẹ wọ, n'ojek okhebh-ẹ kha eden ukhubha, oben-ẹ bẹ, "Kwu, nnyim'abọ." Ikwanạng kw'nnwa ọbạbh-ẹ bẹ́, "Manạng-m bạng de nyim-o abẹ o?"

17 Judah ubhin-ẹ bẹ́, "M'nnẹngi uvunwa k'mvu saam ntọhm nkken-ọ." Ma wọ, ikwanạng kw'nnwa n'ọbạbh-ẹ bẹ, "De n'ode oche ngwọ, m'abhikh-m ọttọhk fọ, ọfha ntima tạrr ukpira k'okpe kwa m'atọhm uvunwa nwọ akken-m."

18 Judah ọbạbh-ẹ bẹ́, "Bạng ọttọhk vọ m'mmikh-ọ ma o?" Ikwanạng kw'nnwa ubhin-ẹ bẹ́, "Ọyagba kw'age k'ẹdwạngọ kw'ọkhaam efhora chọ, ọttạra uchikwura kw'atim k'ọbọhk." Ma wọ, Juda ọwạr ọyagba kw'oge k'ẹdwạngọ, ọttạra uchikwura kw'utim k'ọbọhk ọnạng ikwanạng kw'nnwa kwẹ brasẹ n'ocher uyim'abẹ, okponga ma, utima ifhạr.

19 Masẹ Tama ubin ma, ofona ọta ofhona ekpo py'wạra oge, ọtạkha adạkhẹ epokwa-vạra pfẹ oge.

20 Masẹ Juda n'ọtọhmọ oyodikkobh, Hira, kw'ubin Adulam, bẹ́, okkena ikwanạng nwọ uvunwa kw'm'utima obhek ekpo pyẹ k'ikwanạng nwọ k'mbọhk, wa Hira ọta ukpira ma ibyi nnọ, dạkhẹ ikwanạng nwọ nusia. 21 Ma wọ, Hira n'ọbạbhọ ajunung bạnọ p'ofhon ngwọ bẹ́, "Ọsasa-kwanạng nwọ kw'wạra uning ma ọkkaden kw'Enayim ọkhaan-ọkhaan kẹnwạn?"

Abẹ abhin-ẹ bẹ́, "Ọsasa-kwanạng wạnọ-wạnọ ma tạma nuninga."

22 Ma wọ, Hira ọkpa nnạm okhebha Juda, ọkpaakh-ẹ bẹ́, "Amma khẹ nạnsia e. Ottong idik ifa, ajunung p'arukhu abaanga ma akpaakh-m bẹ́, ọsasa-kwanạng wạnọ-wạnọ maa ibyi nnọ tạma núninga."

23 Osenga ma, Juda ubhina bẹ́, "Tte-ẹ ọbọhk kạkha, tte ofona ekpo mbyọ apyẹ, nạn oche ngwọ núdia, anạng m'ase mạna ẹsẹkha e. Ọma oyeni kk'asia bẹ́, kk'ọ uvunwa nnạnga bẹ́, akken-ẹ, khẹ násia."

24 Ukwu ukpira ọttọhk masẹ aphye attaan, Juda n'ọbhaang ọbhaanga, n'ọbhaang bẹ́, Tamar kw'ode ikwanạng kw'nnwa kwẹ n'osenga ẹsasa, osenga ma, kk'ifhạr utima. Ma wọ, Juda n'ọnạngẹ ẹfa bẹ́, abẹ atwạr-ẹ ayin k'iyaan, ọfha abẹ annemi eden akkạm-ẹ ikhikhebhi.

25 Masẹ abẹ atwạr-ẹ ayin k'iyaan bẹ́, abẹ akkạm-ẹ, Tamar ọtọhm ẹkkaabha ọnạng otte-ofhon-udim, ọben bẹ́, "Ujunung kw'ọkhaam ekpo py'ntim ma, wọ oge-m ifhạr nna ma e." Ọbạra ọttạra bẹ, "Kwu ikkeri, de m'akke atin ọnạng kw'ọkhaam ọyagba, ọttạra efhora, ọttạra uchikwura kw'ntim ma khanse."

26 Masẹ Juda ose ekpo mbyọ ma, utin pyẹ, ukwu oben bẹ́, "Ẹma otor-otor ọyọhnga amma e, ukwuru bẹ́, wạra ọbaan bẹ́, ntạkh-ẹ nnạng nnwa kwaam kw'ode Shẹla." Wa, Juda dạkhẹ Tamar abẹ núyima. 27 Masẹ okpe ukpir kw'm'ọmaan, ukwu ode bẹ́, ajunungva afa bọ p'aning-ẹ k'ẹfhạr.

28 Masẹ n'okhonga bẹ́, ọmaan, nnwa wạnọ utima ọbọhk uchi eden, ikwanạng kw'n'utik anạng ọmaan ọtạkha ẹvạra-dikhi ekhora, ọkpẹ-ẹ k'ọbọhk, oben bẹ́, "Oyok nwa wọ uchi eden uyin." 29 Masẹ nnwa nwọ n'ọbạra ọkpa nnạm k'obọhk oge k'ẹtaanga, nwọkka uyin, ikwanạng kw'n'utik anạng ọmaan n'obeni bẹ́, "Kw'uyini bẹ, n'aseng oche ngwama, ayin!" Abẹ asenga ma akpẹ-ẹ Pẹrẹz.

30 Okpe núbhira, nwọkka nwọkha kw'abẹ akpa ẹvạrakpa khora uyin, abẹ akpẹ-ẹ Zẹra.