1 Ma wọ, Jekọb ubin osenga, atọhmọ p'Ubinọkpaabyi ayin abẹ. 2 Masẹ Jekọb ose atọhmọ mbọ p'Ubinọkpaabyi, oben bẹ́, "Ibyi nna ide ibyibhingasẹ s'Ubinọkpaabyi." Osenga ma, oyeri sẹ Mahanayim*.

3 Wa Jekọb ọtọhmọ atọhmnạng pẹ bạnọ bẹ́, abẹ acheden ata ase nnwọkka Ẹsau k'ẹkhạma ch'Seir, k'ukhubha kw'Edom, 4 ọnạngẹ bẹ ẹkkaabha bẹ́, "Abạnga akpaak aro kwaam, Ẹsau bẹ́, ‘Amma ọtọhmnạng kwọ, Jekọb, mbeni bẹ́, ntạm kẹnạma nninga Laban abẹ tạrr ukpira mantọmma. 5 Amma kk'mmaam, ọttạra arạkhạmaan, ọttạra mvu, ọttạra abira p'ajunung, ọttạra p'ipanang nkhaama. Amma ntọhmọ ẹkkaabha nja nkkena aro kwaam, ọfha ntạkha ọphyaam k'akhọ-ọ k'ititikha.’ "

6 Masẹ atọhmnạng p'Jekọb akwun ator-ẹ, abẹ akpaakh-ẹ bẹ́, "Kk'nnwakka Ẹsau anta ansia, ẹma oyeni ukwuma kha eden bẹ́ ukwu usi-ọ. Ẹma ọkhaam anạng enọhna p'atwạnọ abẹ."

7 Wa Jekọb ojor-ẹ, ettem ẹphyaangẹ-ẹ ẹmma. Osenga ma, ọbhaangẹ anạng p'utim k'ikhaana ifa, ọbạra ọbhaangẹ arạkhạmaan, ọttạra mmaam, ọttạra akamẹl. 8 Jekọb nobeni ẹma oyeni bẹ́, "Ode Ẹsau urim ikhaana rạne abẹ, nnọkha s'irikhi m'irạbh innaanga."

9 Wa Jekọb ose njọhm, oben bẹ́, "Ubinokpaabyi kw'otte kwaam Abraham, ọttạra kw'otte kwaam Isaak, Ọvaar Ubinọkpaabyi kw'oben-m bẹ́, ‘Sọhng abhạna k'ẹkhạma chọ, ator anạng pọ, amma m'nsi idik ijibh inạng-ọ.’ 10 Amma ọtọhmnạng kwọ kk'ọphyaam pfọ, ọttạra idạdaakha sọ nạ́mbaana. Wa ntim uchikwura kwaam mạnkkeni njekha ọraanga kw'Jọrdan, mantọmma, kk'ẹkhaama nsia tạrr n'mmaangẹ chẹ k'ibyi ifa. 11 Totokhạn, kkaan-m, arạbh-m k'mbọhk s'nnwọkka kwaam Ẹsau, ukwuru bẹ́, ojora kwaam ode bẹ́, m'ukwu ọfhọ mạna phyibh, oseng k'iva, ọttạra ab'ọkka phyibh. 12 Okhenka, wa kk'echekha atạkha anạng-m bẹ́ m'asi-m nkhaama ẹkhaama, abạra asi iva p'iva paam asaabh masẹ uyiyeng kw'iraanga-khonga, kw'ọnạng nạmókke ubhik."

13 Wa Jekọb ubhingi ma ibyi nnọ ma irungu njọ. Otekha ekpo byạnọ k'ekpo py'ọkhaam, py'm'ọnạng nnwọkka Ẹsau, masẹ ẹtaam. 14 Ubhik kw'ekpo mbyọ ode: avukpokha arạbh jobh, ọttạra afhạmkpẹ ẹrạbh, ọttạra arạkhạmaan-pa arạbh jobh, ọttạra avudim ẹrạbh, 15 ọttạra akamẹl-pa ẹrạbh ukuma jobh, ọttạra iva pabẹ, ọttạra mmaam-papẹ arạbh afa, ọttạra mmaam-dim jobh, ọttạra nnyạnyaang-kwa ẹrạbh, ọttạra nnyạnyaang-dim jobh. 16 Jekọb ọtạkha arạkhạmaan mbọ ochok k'ikhaana, k'ikhaana. Ikhaana sidede ikhaam ọtọhmnạng wạnọ kw'n'okkeri, oben bẹ bẹ́, "Abạnga achi-m eden asọhng, abạnga abạra arik ayok ẹbhaang k'osenga ngwọ."

17 Ukwu ọtwạr ọtọhmnạng kw'uchi eden itọhng bẹ́, "De nnwọkka kwaam, Ẹsau, ọbạbh-ọ bẹ́, ‘Ọma ade kw'anẹ? N'ata mạn maa? Nten s'anẹ rọ n'akkeri?’ 18 M'apọhn-ẹ bẹ, ‘Aro kwaam, ekpo mbya phyibh ede py'ọtọhmnạng kwọ, Jekọb. Apyẹ ede ẹnạnga ch'ọtọhmọ okkena aro kwaam Ẹsau. Ẹma oyeni ukwuma kha eden.’ "

19 Wa Jekọb ọbạra oben ikhaana s'ittong ifa, ọttạra s'ittong itaan, ọttạra ayok mbọkha phyibh p'm'ator itirakpo nnạm bẹ́, "Masẹ abạnga m'akhebha Ẹsau, abạnga akpaakh-ẹ udik ngwọ gwạnọ kw'mkpaakhẹ ochedennạng. 20 Abạnga ajima akpaakh-ẹ bẹ́, ‘Ọtọhmnạng kwọ, Jekọb, n'otor mạna nnạm, ukwuma kha eden e.’ " Ẹma Jekọb kk'ọkka bẹ́, "Amma m'nchi eden ntọhm ẹnạnga nja, ntima ndir-ẹ ettem, nudusi de ose-m, okko-okke ochera bẹ́, ọtakh-m." 21 Ma wọ, atọhmnạng p'Jekọb achi eden atima nnạnga aseng, okhenka, ẹma oyeni n'uyim ma ibyibhingasẹ sẹ ma irungu njọ.

22 Ma irungu njọ, Jekọb ubina, ọtạkha ipanạng pẹ afa, ọttạra atọhmnạng pẹ p'ipanạng afa, ọttạra iva pabẹ p'ajunung, ncho jobhkawạnọ, ọtọhm bẹ akwu igbin-igbin ajekha ọraanga kw'Jabọk. 23 Masẹ kk'anạng mbọ phyibh ọtọhma ajekha ọraanga, ọtọhm adạkhẹ anạng ọttạra ẹkhaama chẹ phyibh. 24 Osenga ma, Jekọb n'uning mạnkkeni. Ujunung wạnọ uyin abẹ, abẹ arima tạrr iwu echobha. 25 Masẹ ujunung nwọ ose bẹ́, Jekọb mókke okhema, n'ọmaam-ẹ ọttọhk k'okpok, usi ọkhạbhọ kw'okpok upyira echo, sabẹ atim arim-urima. 26 Ma wọ, ọnạng nwọ obeni Jekọb bẹ, "Ttem ọbọhk mfona, khiri iwu nạngkha echobha." Jekọb ọpọhn-ẹ bẹ́, "Kọ ọbọhk mạ́ntte, oyonga m'ado-m."

27 Ma wọ, ọnạng nwọ nọbạbh-ẹ bẹ́, "Ọma akpen yạn?" Ọpọhn-ẹ bẹ́, "Mkpen Jekọb."

28 Ujunung nwọ n'oben-ẹ bẹ́, "Tạma chemma, ọma Jekọb dạk mákpena, n'akpen Israẹl, ukwuru bẹ́, kk'irima asia Ubinọkpaabyi abẹ, ọttạra ayokhanạng, abạra akhema."

29 Ma wọ, Jekọb n'obeni ọnạng nwọ bẹ́, "Totokhạn, tekh-m eche chọ." Ọnạng nwọ ọbạbh-ẹ bẹ́, "Asi yạn abạbh-m eche?" Ma wọ ọnạng nwọ odo Jekọb ma ibyi nnọ.

30 Wa Jekọb n'oyeri ibyi nnọ Pẹniẹl*, ọbẹ́, "Amma kk'Ubinọkpaabyi nsia, ititikha ọttạra ititikha, okhenka, nạ́mpua, ntim nnukhu akpen."

31 Masẹ iwu n'ebe k'echo, Jekọb n'okpekhi oseng Pẹniẹl, ukwuru ọkhạbhọ kwẹ kw'okpok kw'upyir echo. 32 Egwọ usi, tạrr ukpira chemma, anạng p'Israẹl ẹnạng ch'ẹvạk k'ọkhạbhọ kw'okpok kạnáchi, ukwuru ọkhạbhọ kw'okpok kw'Jekọb kw'uwa ọnạng uvunu ọttọhk.