1 Ma o, masẹ anạng p'Ishimayẹl kk'Josẹph atima akpira k'Ijip, abẹ akpe-ẹ anạng Pọtipha, kw'ode ocho kw'anạng p'n'akkeri udimpa kw'ọvaar Phero.

2 Masẹ Josẹph urukhu ọttạra aro kwẹ k'Ijip, wa Ọvaar Ubinọkpaabyi uning abẹ, ọbạra udi-ẹ k'idik phyibh. 3 Masẹ aro kwẹ, Pọtipha n'ose bẹ́, Ọvaar Ubinọkpaabyi uning Josẹph abẹ, ọbạra ọse bẹ́, ubinọkpaabyi ọnang-ẹ uwujibh, udi-ẹ k'idik phyibh, 4 Josẹph n'ọdaakh-ẹ idik tạrr n'ọtạkh-ẹ ochok masẹ ọtọhmnạng kwẹ oyeni. Ọtạkha ẹchọhmfhạr chẹ, ọttạra ọttọhk fidede pf'ọkhaam ọnạng-ẹ bẹ, okkeri. 5 Tạma k'okpe kw'Pọtipha otte ẹchọhmfhạr chẹ, ọttạra ekpo pẹ phyibh ọbọhk ọnạng Josẹph bẹ́, okkeri, wa Ubinọkpaabyi oseng Josẹph abẹ odo ẹchọhmfhạr ch'Pọtifa k'idik phyibh. 6 Ma wọ, udik kw'uwa ọbạra ọyọhnọ Pọtipha ettem kode, oyonga uchiattọhk pfẹ m'uchi, s'kk'idik sidede ọbọhk uttia ọnạng Josẹph.

Josẹph wa ujibhi idikkobh, ọbạra ufu k'ifor bẹ, gbạng. 7 K'okpe ma, ikwanạng kw'aro kwẹ ọtạm Josẹph adạdaakha-chen kạkkeri, ukwu oben-ẹ bẹ́, "Kw'ayim-m abẹ kadẹ o!"

8 Josẹph ufhum, oben ikwanạng kw'aro kwẹ bẹ, "Mma e, aro kwaam kk'ẹchọhmfhạr chẹ phyibh ọbọhk uttia ọnạng-m bẹ́, nkkeri. Udik gwạnọ-gwạnọ kw'ọbạra ọkpaakh-m dạk kóde. 9 Ọnạng ọdwạkh-ọdwạk kw'ọkhaam ẹfa ọyọhnga amma ma ọchọhm ngwa kóde. Aro kwaam khaam ọttọhk vunọ-vunọ nọrạma, oyonga ọma, ukwuru bẹ, ade ikwanạng kwẹ. Amma m'nsi yạn nsi igbaan demasẹ nna, mpyibh k'ititikha s'Ubinọkpaabyi o?" 10 Chibhi s'ikwanạng nwa ọphyaangẹ Josẹph ẹmma k'iwu chidede bẹ́, uyim-ẹ abẹ, Josẹph nochera, nọbạra ochera bẹ́, ọgbaara ikwanạng nwọ k'ifor.

11 K'iwu mạnna jạnẹ, Josẹph ofon bẹ́, ọta usi ọtọhm pfẹ k'ọchọhm kw'aro kwẹ. Ma iwu njọ, wa ọtohmnạng ọdwạkh-ọdwạk k'ọchọhm ẹtaanga kode. 12 Ikwanạng kw'Pọtifa ọvạkha Josẹph k'ẹvạrakpa ch'ọpabh, ọbẹ, "Kwu ayima abamẹ!" Okhenka, Josẹph otte ọnọhma kwẹ ọbọhk ọnạng-ẹ, ọrạbh uyin k'iyaan.

13 Masẹ ikwanạng kw'Pọtifa ose bẹ́, Josẹph kk'ọrạbha uyin k'iyaan, urik ọnọhma kwẹ k'akhẹ k'ọbọhk, 14 n'oyeri atọhmnạng pẹ, oben bẹ bẹ́, "Abạnga kk'asia, udim kwaam utim oHiburu-nạng nwa ukwu ma bẹ́, ukwu ọnạng mạna ọkpạrsia-dik. Ọnwa okhebh-m kha ẹmangọ ẹtaanga bẹ́, uyima abamẹ k'ẹfa, nkhenka njẹ egạma. 15 Masẹ njẹ ẹgạma njọ k'ẹrạng-k'ẹrạng o, ma wọ n'ọrạbhọ uyin k'iyaan urik ọnọhma kwẹ ma."

16 Ikwanạng nwọ ọtạkha ọnọhma nwọ ochok, tạrr udim kwẹ ukwuna kw'ọbạra ode aro kw'Josẹph. 17 Ọtạkha udik ngwọ ọkpaakh-ẹ, ọbẹ, "OHiburu-nạng nwọ kw'atim akkena mạna ma, wạra ọnwa okhebh-m kha ẹmangọ ẹtaanga bẹ́, uyima abamẹ k'ẹfa. 18 Masẹ ọbhaang sa n'n'njẹ ẹgạma nnor ẹkkaana, ma wọ ọrạbhọ urik ọnọhma kwẹ kha akhaam k'mbọhk."

19 Masẹ Pọtipha ọbhaang udik ngwọ kw'ikwanạng kwẹ ọkpaakh-ẹ otena k'oche kw'Josẹph usi-ẹ, ettem ipyibh-ẹ. 20 Ma wọ, ọnạngẹ ẹfa bẹ, abẹ age Josẹph mgbakkọhbhọ k'ọgbakkọhbhọ-ter kw'abẹ akpạk agbakkọhbhọ p'ọvaar Phero.

Okhenka, masẹ Josẹph uning ma ọgbakkọhbhọ-ter, 21 wa Ọvaar Ubinọkpaabyi uning Josẹph abẹ, ọkkaan-ẹ, ọnạng-ẹ ọphyaam k'ititikha s'ocho kw'anạng p'n'akkeri agbakkọhbhọ. 22 Osenga ma, usi Josẹph odecho kw'agbakkọhbhọ phyibh, ọbạra ọnạng-ẹ ẹfa otena k'udik kwidede kw'abẹ m'asi ma ọgbakkọhbhọ-ter. 23 Ocho kw'anạng p'n'akkeri agbakkọhbhọ mbọ osenga ma, ọrạbha ichen k'idik s'oge Josẹph k'mbọhk, ukwuru s'Ovaar Ubinọkpaabyi uning Josẹph abẹ, ọbạra usi udik kwidede ọmạm ọnạng-ẹ.