1 Wa Ọvaar Ubinọkpaabyi uyini Abraham abẹ k'okpe kw'uning ẹyạr k'ẹchọhmma ch'ukkira kwẹ, ọbaanga nchi s'ididen s'Mamrẹ, k'ọyakpattem kw'iwu ẹkhạmọ bẹ gbạạng. 2 Masẹ Abraham udir ichen ose s'ajunung attaan abe abaang-ẹ, ubina k'ibyi s'uning, osenga k'ẹbhạr-k'ẹbhạr okhebha bẹ k'ibyi sabẹ abe, ọrạkha usim bẹ k'ikpukpobha. 3 Oben bẹ́, "Aro kwaam, ode kk'ọphyaam nkhaama kakhọ k'ititikha, amma ọtọhmnạng kwọ káseng arik. 4 Tte abẹ atima asi akwu abạnga akpobhu mfhok, ọfha abạnga abạra akwokha ọyọhng ma uchikpok ngwa. 5 Tte ntima uchiattọhk nkwu abạnga achi, ọfha abạnga akhaama ẹfa ch'abạnga m'afona ororo k'osenga kw'abạnga, s'abạnga kk'akpira k'ibyi s'ọtọhmnạng kwabạnga."

Abẹ abhin-ẹ bẹ́, "Ọbaan ma, si oche kw'ettem chọ ẹtọhmọ."

6 Ma wọ, Abraham ubin ẹbhạr-ẹbhạr ọta okhebha Sara k'ukkira ẹtaanga, oben-ẹ bẹ́, "Yoma akpobhu-mbọhk attaan p'abubuma tima si brẹd ẹbhạr-ẹbhạrẹ."

7 Ma wọ, Abraham ọrạbhọ ofona k'uvupa, ọta otekha ọbhaam-nwa ọkkakwẹ, ọnạng ọtọhmnạng kwẹ wạnọ, kw'udwuk-udwukha ọfhọ chẹ, utima usi uchiattọhk. 8 Ukwu ọtạkha abasi ọttạra ọbhaam-nwa nwọ kw'abẹ kk'abhabha, obera bẹ. Masẹ abẹ n'achi uchiattọhk mvọ, ẹma Abraham obe ọbaanga bẹ ma uchikpok kw'abẹ aning n'achi ọttọhk.

9 Anạng mbọ n'abạbhọ Abraham bẹ́, "Ikwanạng kwọ, Sara khẹnwạn?" Ubhin bẹ bẹ́, "Uning ka ukkira ẹtaanga."

10 Ma wọ, ọnạng wạnọ k'ngegha s'anạng mbọ attaan, kw'ode Ubinọkpaabyi, obeni bẹ́, "K'udik ọkka, k'okpe demakwẹ ngwa ode cho, m'mbạra mkpa nnạm nkwu ndibh bạnga ma ibyi nna. Sara kw'ode ikwanạng kwọ, m'ọmaan ujunung-nwa."

Masẹ ọnạng nwọ n'ọkpaak idik nnọ ọnạng Abraham, wa Sara uning k'ẹtaanga, sabẹ akpa nnạm avạra ayok, n'ọkhọhmọ bẹ itọhng. 11 Ma okpe ngwọ, Abraham ọttạra Sara kk'atạma k'idaam k'idaam, Sara dạkhẹ ifor kạnótto. 12 Ma wọ, Sara ọmma asa, oben k'ettem bẹ́, "Masẹ kk'ntạma, aro kwaam ọtạm, s'm'nkhaama idạdaakha s'ujunung m'antwạn anyima-o?"

13 Ma wọ Ọvaar Ubinọkpaabyi ọbạbhọ Abraham bẹ́, "Sara oseng mbạng apfẹ ọmma asa oben k'ettem bẹ́, ‘Amma s'm'mbạra mmaan nnwa ma k'atạm mba dạkhẹ-o?’ 14 Udik uning ka, kw'Ọvaar Ubinọkpaabyi nạn mókke usi? K'okpe demakwẹ ngwa ode cho, amma m'mbạra mkpa nnạm nkwu ndibh bạnga, Sara m'ọmaan ujunung-nwa."

15 Masẹ Sara ọbhaang udik ngwọ, ojor-ẹ. Osenga ma, okhona, oben bẹ́, "Amma asa nạ́mma ro."

Ma wọ, Ọvaar Ubinọkpaabyi oben-ẹ bẹ́, "K'udik ọkka, ọma kk'asa amma."

16 Masẹ anạng mbọ attaan abin bẹ́, abẹ afona, abẹ abina achen akkeri k'ofhon kw'Sodom. Wa Abraham ọtwạn bẹ abẹ, ọta urik bẹ k'eden. 17 Ma wọ, Ọvaar Ubinọkpaabyi obeni ifor sẹ bẹ́, "Udik ngwa kw'n'mben bẹ́, nsi ma, nọ́baana bẹ, ndubh Abraham. 18 K'udik ọkka, iva p'iva p'Abraham m'akwu ade afanạng, ọttạra ẹkhạma chididen, m'osenga ma, idifhon s'iyagbin phyibh ikhaama idia. 19 Amma kk'ẹ ntekha bẹ́, utima iva pẹ, ọttạra ẹchọhmfhạr chẹ phyibh, osenga k'eden ch'Ọvaar Ubinọkpaabyi, ọbạra uruk akpen p'ator-otor, ọfha Ọvaar Ubinọkpaabyi ọnạng ẹyaakha k'echekha ch'kk'usia ọnạng Abraham."

20 Ma wọ, Ọvaar Ubinọkpaabyi obeni bẹ́, "Ẹgạma ch'eten k'idik-tạma s'Sodom ọttạra s'Gọmọra ẹbạr-ọbạr, mpyibha sabẹ kk'ibạra iyong-oyongu. 21 M'nsạkha, ọfha nta nse de mpyibha sabẹ kk'asia ipyibhi ikpira ẹgạma ch'kk'mmaanga. Ode akwẹ nạn oche ngwọ núdia, amma m'nsong-osonga."

22 Ma wọ, ajunung mbọ abhạkhẹ nnạm akkeri ititikha k'ukhubha kw'Sodom. Okhenka, Abraham ofon ororo obe Ọvaar Ubinọkpaabyi k'ititikha. 23 Abraham osenga ofora Ọvaar Ubinọkpaabyi k'ifor, ọbạbh-ẹ bẹ́, "Ma, m'agbama anạng p'ẹmaana ọkkachẹ, attra k'anạng p'ọmmaana-pyibh afhọ o? 24 Ode ase anạng nạbh afa ukuma jobh p'asi ẹmmaana ọkkachẹ ma ofhon ngwọ, sạm'ase anạng mbọ ikwosi, atte ofhon ngwọ ọbọhk? 25 Mạnna móde ro, bẹ́, ọma m'atạkha anạng p'asi ẹmaana ọkkachẹ attra k'ayok p'asi mpyibha, afhọ. Oche ngwọ móde ro! Ka yạn wọ kw'ọkpaar-aponga kw'ọyagbin nạn udik ọkka músi?"

26 Ma wọ, Ọvaar Ubinọkpaabyi ubhin-ẹ bẹ́, "De amma nse anạng nạbh afa ukuma jobh p'asi ẹmaana ọkkachẹ ma ofhon ngwọ, m'nsenga anạng mbọ abẹ, ntte ofhon ngwọ ọbọhk."

27 Ma wọ, Abraham ọbạbhọ dạkhẹ bẹ́, "Totokhạn, Ọvaar Ubinọkpaabyi kwaam, s'ọbạra ọkwọn ode bẹ, k'ọttọhk nạ́mfua, amma m'mbạr ettem mkpaak udik nnạng-ọ, 28 de ase anạng nạbh afa ukuma asen ma ofhon ngwọ, p'asi ẹmmaana ọkkachẹ, m'asenga anạng abẹ akhibhi ofhon ngwọ o?"

Ọvaar Ubinọkpaabyi ubhin-ẹ bẹ́, "Mma e, de nse anạng nạbh afa ukuma asen p'ator-otor, amma m'nse bẹ ikwosi, ntte ofhon ngwọ ọbọhk."

29 Abraham ofona ororo ọbạbh-ẹ bẹ́, "De abạra ase anạng nạbh afa p'asi ẹmmaana ọkkachẹ, sạm akhibhi ofhon ngwọ?" Ọvaar Ubinọkpaabyi ubhin-ẹ bẹ́, "Mma e, de nse anạng nạbh afa, amma m'nse bẹ ikwosi, ntte ofhon ngwọ ọbọhk."

30 Ma wọ, Abraham ubhin-ẹ bẹ́, "Totokhạn aro, nạng-ọ ọdwạkhọ, tte mphyem-ọ dạkhẹ, de wạra ase anạng ẹrạbh ukuma jobh ma ofhon ngwọ mo o?"

Ọvaar Ubinọkpaabyi ubhin-ẹ bẹ́, "Mma e, de nse anạng ẹrạbh ukuma jobh, amma wạra mạnte ofon ngwọ ọbọhk otte."

31 Ma wọ, Abraham obeni bẹ́, "Masẹ amma kk'ettem mbạra bẹ́, mphyem-ọ, tte mbạra mbạbh-ọ, wạra de bẹ́, anạng ẹrạbh mạnkkeni bọ ase ma mo o?"

Ọvaar Ubinọkpaabyi ubhin-ẹ bẹ, "K'udik ọkka, wạra nse ubhik-khira ngwọ, wạra m'nsenga k'ncho s'anạng mbọ ẹrạbh, ntte ofhon ngwọ ọbọhk."

32 Ma wọ, Abraham ọbạra oben bẹ́, "Totokhạn aro, tte nạng-ọ ọdwạkhọ, tte mphyem adạkhẹ eden nja-nja bẹ́, de wạra abẹ ade anạng jobh mạnkkeni mo o?"

Ọbạra ubhin-ẹ bẹ́, "K'udik ọkka, de wạra nse ubhik-khira ngwọ, wạra m'nsenga k'ncho s'anạng mbọ jobh, ntte ofhon ngwọ ọbọhk."

33 Masẹ Ọvaar Ubinọkpaabyi kk'idik ọkpaakha phyibh Abraham abẹ, oseng ofona, Abraham ọbạra ọkpa nnạm k'ukkira kwẹ.