1 Ma wọ, Isaak oyeri Jekọb ọyọbh-ẹ itta, ọbạra ọtwạr-ẹ itọhng, oben-ẹ bẹ́, "Ikwanạng wạnọ-wạnọ kw'ubin k'ẹkhạma ch'Kenaan kátạkha o. 2 Sọhng k'Padan-Aram ata atạkha ikwanạng k'ichimma ch'Bẹtuẹl, kw'ode otte kw'akka, k'ikhaana s'aminava p'nnwọkka kw'akka, kw'ode Laban. 3 Tte Ubinọkpaabyi kw'Ẹfa phyibh udi-ọ, ọbạra ọttr-ọ iva k'ọsaabh, ọbạra usi iva p'iva pọ asaabh tạrr abẹ asi nkhạma s'isaabh-ọsaabh. 4 Tte ọnạng ọma ọttạra iva pọ idia ch'uwa ọnạngẹ Abraham, ọfha asenga ma atạkha okhebh ma isisek nna s'arukhu ma masẹ ukhikhennạng, isisek s'Ubinọkpaabyi ọnạngẹ Abraham." 5 Ma wọ, Isaak ọtọhmọ Jekọb, ofona k'Padan-Aram, ọta okhebha Laban kw'ode nnwa kw'Bẹtuẹl, kw'ubin Aram, kw'ọbạra ode nnwọkka kw'Rẹbẹka, kw'ode ọkka kw'Jekọb ọttạra Ẹsau.

6 Masẹ Ẹsau osong bẹ, otte kwabẹ, Isaak, kk'Jekọb itta ọyọhbha, ọbạra ọtọhm-ẹ bẹ, ọsọhng k'Padan-Aram ọta ọtạkha ikwanạng kạkha, ọbạra ọtwạr-ẹ itọhng bẹ́, "Ikwanạng kw'ubin Kenaan kátạkha o," 7 ọbạra osonga bẹ́, Jekọb kk'idik s'otte ọttạra s'ọkka ọbhaanga, ofona k'Padan-Aram. 8 Wa Ẹsau n'utini bẹ, ipanạng p'Kenaan abẹ otte Isaak idik kádakhẹ; 9 ma wọ, Ẹsau n'ubin ofona k'Ishimayẹl, ọta ọtạkha ikwanạng ọdwạkh-ọdwạk kw'okpen Mahalat, kw'ode nnwọkka kw'ikwanạng kw'Nẹbayọt, kw'ọbạra ode nnwa kw'Ishimayẹl, kw'ode nnwa kw'Abraham.

10 Jekọb ubin k'Beershẹba ofona k'Haran. 11 Ukwu ukpira k'ibyi rạnẹ, ọtạkha ẹta mạma, ochok, uyima ọnạna echo, ọttaabha, s'iwu kk'ipyia. 12 Ukwu ọttaara idachen s'ose s'ọkpantạma ọtạm k'isisek udum tạrr ukpira k'ọrạngkpakpa, ọbạra ose s'atọhmọ p'Ubinọkpaabyi n'asenga ma ọkpantạma nwọ avura, abạra asenga ma asạkha. 13 Ọbạra ose s'Ọvaar Ubinọkpaabyi obe k'ẹrạng-ẹrạng kw'ọkpantạma nwọ oben bẹ́, "Amma wọ nde Ubinọkpaabyi kw'ab'atte, Abraham ọttạra Isaak akpobh. Amma m'nnạng ọma ọttạra iva p'iva pọ isisek nna s'ayim ma. 14 Iva p'iva pọ m'asaabh masẹ uyiyeng, abẹ abạra anyaamẹ k'ibyi sidede, k'ibyi s'ophye n'uyin, ọttạra k'ibyi s'ophye n'udimi, ọttạra ọttạra ibir-ibira, ọttạra k'ẹrạkh-ẹrạkha. Iyagbin phyibh m'isenga ma akhọ, ọttạra iva p'iva pọ itạkha idia. 15 Amma m'nninga abọ, mbạra nkker-ọ k'ibyi sidede s'm'afona, mbạra ntima abọ mkpa nnạm ma isek nna. Amma kọ ọbọhk mạ́ntte tạrr nnạng ẹyaakha ma udik ngwa kw'kk'nchekha nnạng-ọ."

16 Masẹ Jekọb ọphyạb ọda, oben bẹ́, "K'udik ọkka, Ọvaar Ubinọkpaabyi uning ma ibyi nna, amma wạra kạ́nsong." 17 Wa ojor-ẹ, ukwu oben bẹ́, "Asong bẹ, ibyi nna kk'ijora o! Ibyi nna ibyi idwạkh-ọdwạk míde, iyongu ọchọhm kw'Ubinọkpaabyi; maa wọ ode ẹbaakhamma ch'Ọvaarfhon kw'Ubinọkpaabyi."

18 K'ekpekpebha, Jekọb udira ẹta njọ ch'wạra uyim ọnạna echo, offo chẹ obe masẹ ntumu, ọtạkha ana obyenga chẹ k'erạng. 19 Ibyi nnọ wa icheden ikpena Luz, bạra Jekọb n'oyeri efhon-diden njọ Bẹtẹl.

20 Ma wọ, Jekọb ọtạk echekha k'ititikha s'Ubinọkpaabyi, ọbẹ́, "Ma osenga ngwa kw'm'nta ma, de Ubinọkpaabyi uning abamẹ, okker-m, ọnạng-m uchiattọhk f'm'nchi, ọttạra ekpo igiapẹ, 21 tạrr kwạna nsenga nkwuna k'otte kwaam k'ọchọhm k'idira, Ọvaar Ubinọkpaabyi wọ m'ode Ubinọkpaabyi kw'm'mkpobha. 22 Ma wọ, ẹta nja ch'kk'mffua masẹ ntumu, m'ede ọchọhm kw'Ubinọkpaabyi. Fidede f'anạng-m, m'nnạng-ọ ọttọhk vạnọ k'ekpo jobh."