1 Ma okpe ngwọ, wa okwo fididen uning k'ofhon, de akperi mvọ f'uwa otto k'okpe kw'Abraham abhạrẹ. Wa Isaak ubin ofona k'Gẹra, ọta okhebha Abimẹlẹk kw'ode ọvaarnạng kw'aPhilistiya. 2 Ma wọ, Ọvaar Ubinọkpaabyi uyini Isaak abẹ, oben-ẹ bẹ́, "K'Ijip káta o. Ruk ma isek nna s'mben-ọ bẹ, aruk. 3 Ninga ma isek nna k'okpe nwa sạsạkhẹ, amma m'nninga abọ, mbạra ndi-ọ. Amma m'ntạkha isisek nna phyi-phyibh nnạng ọma ọttạra iva p'iva pọ, mbạra nsi idik s'uwa nchekhi nnạng atte kwọ, Abraham. 4 Amma m'nsi iva p'iva pọ asaabh masẹ ndudoru s'ọrạngkpakpa, mbạra nnạng bẹ isisek nna bẹ phyibh. Idifhon phyibh m'isenga k'iva p'iva pọ ikhaama idia, 5 ukwuru bẹ, Abraham ọsạk echo ọnạng-m, usi idik otor k'oche kw'ntọhn-ẹ, ọbạra ochok nnyina saam, ọttạra ekpebha chaam, ọttạra ntọhna saam." 6 Ma wọ, Isaak n'urukhu k'Gẹra.

7 Masẹ ajunung p'ofhon ngwọ n'abạbh-ẹ udik atena k'ikwanạng kwẹ o, n'utim ojora, ubhin bẹ bẹ́, "Mma e, ẹma ode nnwọkka kwaam-e." Wa ojor-ẹ ojora bẹ, oben bẹ, ikwanạng kwẹ wọ. Okkẹ k'ettem bẹ́, "Ajunung p'ofhon ngwa akk-okke afhọ-m, ukwuru ajibhada p'Rẹbẹka."

8 Masẹ Isaak kk'urukha ma k'okpe kw'kk'ubhira, Abimẹlẹk kw'ode ọvaarnạng kw'aPhilistiya obe k'ọmmakhubh, ose s'Isaak n'usi idạdaakha ọttạra ikwanạng kwẹ, Rẹbẹka. 9 Ma wọ, Abimẹlẹk oyeri Isaak oben-ẹ bẹ́, "K'udik ọkka, ikwanạng kwọ wọ ma! Asi yạn aben bẹ, nnwọkka kwọ wọ?"

Isaak ubhin-ẹ bẹ́, "Amma nkkẹ bẹ, abẹ m'asenga kakhẹ echo, afhọ-m e."

10 Ma wọ, Abimẹlẹk ọbạbh-ẹ bẹ́, "Ukwuru yạn kw'asi udik demakwẹ ngwa? Wạra ode bẹ, ujunung wạnọ k'ikhaana s'ajunung p'ofhon ngwa kk'ikwanạng kwọ abẹ uyima, bẹ njanna wạra kk'mạna iponga-pyibha anạna k'echo."

11 Ma wọ, Abimẹlẹk ọnạngẹ inyina ọbaabha ofhon bẹ́, "Ọnạng kwidede kw'ọsẹkhẹ ujunung nwa, ọbạra ode ikwanạng kwẹ ma ofhon ngwa, oyonga m'ope."

12 Ma cho ngwọ gwạnọ, Isaak utubhu owonu ma isisek nnọ, ọphya ekpo py'utubhu k'ọsaabh, ukwuru s'Ọvaar Ubinọkpaabyi udi-ẹ. 13 Wa ukwu ọkhaama ẹkhaama, mạnna wọ ẹkhaama njọ ẹbạrẹ tạrr n'ujibh-ẹ oyong-oyongu. 14 Wa ọkhaam itirakpo ọttạra atọhmnạng k'ọsaabh, tạrr aPhilistiya n'akhaam abẹ ottemma. 15 Ma wọ, asipe p'uwa atọhmnạng p'otte kwẹ, Abraham kk'atuma ma okpe ngwọ, aPhilistiya atim adọhngọ akpa sẹ bẹ phyibh.

16 Ma wọ, Abimẹlẹk obeni Isaak bẹ́, "Bina rik ofhon kwamạna, khiri n'akhaam ẹfa ayọhnga mạna kidaam-kidaam."

17 Ma wọ, Isaak ubin ma ọta uruk k'ẹrạkh-ẹrạkha k'Gẹra. 18 Ọbạra utum asipe mbọ p'aPhilistiya kk'akpa, p'uwa otte Abraham kk'utuma, ọbạra ọnạng pẹ ache mbọ bạnọ p'uwa otte kk'pẹ ọnạnga.

19 Okhenka, masẹ atọhmnạng p'Isaak abạra atum isipe ẹdwạkh-ọdwạk tạrr achẹ iyin asi akkapẹ, 20 akkeri-nten p'ofhon kw'Gẹra, atạma ẹkhọhr sisi ọttạra akkeri-nten p'Isaak, abẹ aben bẹ́, "Asi mbọ ade pamạna e!" Osenga ma, okpe isipe njọ Ẹsẹk, kw'uyini ẹkhọhr, ukwuru sabẹ akkaan isipe njọ ẹma abẹ. 21 Masẹ abẹ atumu adạkhẹ isipe ẹdwạkh-ọdwạk, anạng mbọ ajẹ adạkhẹ ẹkhọhr ma isipe njọ, ma wọ, Isaak okpe chẹ Sitna, kw'uyini ẹkhọhr. 22 Ubina ma, ọta utum isipe ẹdwạkh-ọdwạk, ọnạng dạkhẹ abẹ ẹkhọhr núsia. Ukwu okpe chẹ Rehobot, ọbẹ́, "Ọvaar Ubinọkpaabyi kk'mạna ẹbhaang ọnạnga, ma isisek nna rọ m'anninga ankhaama ujibhada."

23 Isaak n'ubin ma ofona k'ofhon kw'Beershẹba. 24 Ma irungu njọ, Ọvaar Ubinọkpaabyi uyin abẹ, oben-ẹ bẹ́, "Amma wọ nde Ubinọkpaabyi kw'atte kwọ, Abraham. Nạng-ọ ojor khiri m'nning abọ maa, m'ndi-ọ, mbạra nsi iva p'iva pọ asaabh, ukwuru echekha ch'nkhaam ọttạra atte, Abraham, kw'uwa ode ọtọhmnạng kwaam."

25 Ma wọ, Isaak usi ijabyi ma, uninga ma okpobha Ọvaar Ubinọkpaabyi, ọbạra uttima ikkira sẹ ma, atọhmnạng pẹ abạra atum isipe ma.

26 Ma okpe ngwọ, Abimẹlẹk kk'Ahuzat kw'n'ọtọhn-ẹ idik, ọttạra Phikol kw'ode odecho kw'akpongnạng pẹ utima ubina k'Gẹra ukwu. 27 Isaak ọbạbhọ bẹ bẹ́, "Ode yạn kw'abạnga n'aror-m, s'uwa abạnga awun-m tạrr abạnga akhubh-m kabạnga k'ofhon?"

28 Abẹ abhina bẹ́, "Amạna kk'ansia k'udik ọkka bẹ, Ọvaar Ubinọkpaabyi uning abọ. Osenga ma, amben bẹ, ọbaan-ọbaana bẹ, echekha ininga k'ngekha s'ọma ọttạra amạna mba. Tte ankhaama ẹgbạkha ọma abẹ 29 bẹ, ọma mạna ipyibha mási, ator k'oche kw'uwa nạn kọ ipyibha nánsia, ankhenka anjibh abọ idik tạrr antte-ọ ọbọhk abina k'idira. Mantọmma, Ọvaar Ubinọkpaabyi kk'ọ udia."

30 Ma wọ, Isaak usi erobha ọnạng bẹ, abẹ achi, abạra agwo. 31 K'ekpekpebha s'iwu echobh ma, abẹ atạkha echekha ayok abẹ. Ma wọ, Isaak ọta urik bẹ k'eden, abẹ aseng abhạna k'idira.

32 Ma iwu njọ, atọhmnạng p'Isaak akwuna akwu akpaakh-ẹ udik atena k'isipe ch'abẹ kk'atuma. Abẹ akpaakh-ẹ bẹ́, "Kk'asi ansia-e." 33 Ma wọ, Isaak oyeri isipe njọ Shiba, kw'uyini echekha. Tạma ma iwu njọ, ofhon ngwọ n'okpen Beershẹba, kw'uyini isipe ch'echekha, oyongu ma, isipe ch'asenọfa.

34 Masẹ Ẹsau n'ode icho arạbh afa, ọtạk ikwanạng kw'okpen Judit kw'ode uminanwa kw'Beeri kw'ubin Het, ọttạra Basẹmat kw'ode uminanwa kw'Ẹlọn kw'ubin adạkhẹ Het. 35 Ipanạng mbọ afa asi Isaak ọttạra Rẹbẹka aruk k'imạmạna.