Ichedendik 42

Ivotte p’Josẹph ata k’Ijip

1 Masẹ Jekọb ọbhaang bẹ́, uchiattọhk uning kha Ijip, ọbạbh ajunungva pẹ bẹ́, "Ode yạn kw’abạnga atim aning n’akkeri ayok mạnna o? 2 Amma kk’mmaanga bẹ́, uchiattọhk uning kha ẹkhạma ch’Ijip. Abạnga asọhng ata adebh atima akwu amạna anchi, ọfha nạng ampe k’okwo."

3 Ma wọ ivotte p’Josẹph ncho jobh abin afona k’Ijip bẹ́, abẹ ata adebh uchiattọhk. 4 Okhenka, Jekọb wa Bẹnjamin kw’ode nnwọkka kw’Josẹph ọbọhk núttia bẹ́, ọtwạn ivotte abẹ ata adebh uchiattọhk k’Ijip. Wa Jekọb ojor-ẹ bẹ́, ipyibha m’ẹbạra etto ekhebha Bẹnjamin. 5 Ma wọ, wa iva p’Jekọb attạr ma ikhaana s’anạng p’afon k’Ijip bẹ́, ata adebh uchiattọhk, ukwuru s’uwa okwo fididen ọbạra uninga k’ẹkhạma ch’Kenaan.

6 Ma okpe ngwọ, Josẹph n’utim edennạng k’Ijip, ọbạra ode ọnạng kw’n’okpe uchiattọhk ọnạng anạng phyibh. Ma wọ, masẹ ivotte p’Josẹph akpir k’Ijip, abẹ arạkha attima ititikha sabẹ k’isisek k’ikpukpobha. 7 Masẹ Josẹph ose ivotte pẹ bẹ jọọr, utin bẹ. Okhenka, wa usi nkkari bẹ́, bẹ nútina, n’ọbạbhọ bẹ ẹkkaam-ẹkkaam bẹ́, "Abạnga abin mạn akwu maa?"

Abẹ apọhn-ẹ bẹ́, "Amạna ambin k’ẹkhạma ch’Kenaan ankwu bẹ́, ankwu andebh uchiattọhk e."

8 Oseng s’uwa Josẹph kk’ivotte pẹ utina, wa abẹ khẹ nátina. 9 Ma wọ Josẹph ujim adachen p’uwa kk’ọttara otena bẹ, n’obeni bẹ bẹ́, "Abạnga ade abaan-ibyi, abạnga kk’akwua bẹ́, akwu abaana ofhon kwamạna, ọfha abạnga asonga urima-bọhk kwamạna."

10 Abẹ apọhna bẹ́, "Mma e, aro kwamạna, akwẹ oche ngwo núdia e. Atọhmnạng pọ akwu bẹ́, akwu adebh uchiattọhk. 11 Amạna mba phyibh ande ajunung p’otte wạnọ ofhonu e. Atọhmnạng pọ akpaakhẹ udik ọkka e, amạna abaan-ibyi nándia a."

12 Josẹph oben bẹ bẹ́, "Afhạra! Abạnga akwu bẹ, akwu asonga urima-bọhk kwamạna."

13 Abẹ n’abhin bẹ́, "Aro, wa amạna mba atọhmnạng pọ ande anạng jobh-kamfa p’otte wạnọ kw’urukhu kha Kenaan ofhonu. Okpongannạm kwamạna uning kha otte kwamạna abẹ, okhenka, oyok wạnọ k’ikhaana s’amạna mba anạng jobh-kamfa k’akpen dạk kòde."

14 Josẹph ofona ororo oben bẹ́, "Udik ngwa utim ode k’oche ntekhi bạnga bẹ́, abạnga ade abaan-ibyi e! 15 Bạrasẹ ansonga udik ọkka, eyoma chabạnga ede bẹ́, abạnga m’ata atima okpongannạm kwabạnga atima akwu. Amma ntim akpen p’Phero nchekhi bẹ́, de abạnga nạn oche ngwọ násia, abạnga mábhạna e. 16 Abạnga atọhm ọnạng wạnọ k’abạnga k’ngekha ọkpa nnạm, ọta utima okpongannạm nwọ kwabạnga ukwu, ayok mbakha m’aninga k’mgbakkọhbhọ tạrr abẹ akwuna akhebha bạnga maa, ọfha anyoma bạnga anse de abạnga n’akpaak udik ọkka o. De nạn oche ngwọ núdia, ntim akpen p’Phero nchekhi bẹ́, abạnga ade abaan-ibyi!" 17 Ma wọ ọtạk bẹ ọkpạkha k’iwu ittaan.

18 Ottong iwu nnọ ittaan, Josẹph oben bẹ bẹ́, "Amma nkhaam ojora f’Ubinọkpaabyi e. Abạnga asi oche kw’mbeni, ọfha abạnga aruk akpen. 19 De abạnga ade anạng p’n’akpaak udik ọkka, tte ọnạng wạnọ k’abạnga ngekha uninga k’mgbakkọhbhọ maa, ọfha ayok atạkha uchiattọhk f’abạnga kk’adebha akkena anạng pabạnga ichọhmfhạr, p’n’ayima okwo kha. 20 Brasẹ nchera bẹ́, abạnga afhạra násia, ọfha abạnga nạ́ngẹ abạra ape, oyonga abạnga m’atima okpongannạm kwabạnga akken-m." Wa abẹ acher asi oche kw’otekhi bẹ.

21 Abẹ n’abhạkhẹ aben ayok bẹ́, "K’udik ọkka, iponga-pyibha nna s’amạna antạk maa, ibin k’igbaan s’uwa ansi nnwotte kwamạna e. Tte anjima oche kw’uwa udik ngwọ ọmmẹ-ẹ, ọttạra oche kw’uwa n’uchini mạna bẹ́, ankkaan-ẹ. Okhenka, wa ọnạng kw’ọkhọhm-ẹ itọhng kòde, ẹgwọ usi udik okhebha mạna maa e."

22 Reubẹn ubhina bẹ bẹ́, "Wa bạnga itọhng nạ́ntwạra bẹ́, abạnga nạngẹ nnwa nwọ ipyibha asi? Okhenka, ọnạng kw’uwa ọkhọhm-m itọhng kòde. Akkeri ẹngwọ mạma, ọbaan bẹ́ anse irem k’echo ch’nnwa nwọ." 23 Masẹ abẹ n’akpaak idik nnọ phyibh, abẹ kásong bẹ́, Josẹph nạngka ọbhaanga, ukwuru s’uwa n’utima ọnạng usi akkabharikkọ ọnạng bẹ.

24 Wa Josẹph n’ubin urik bẹ ma k’ibyi sabẹ aning, ọta ọgạma ẹmạng, bạra n’ọkpa nnạm okhebha bẹ, ọbạra ọkpaak ọtọhnga ọnạng bẹ. Ọvạkha Simeọn ma ngekha s’ayok, ọdạbh ndikhi ma ititikha sabẹ.

25 Ma wọ, Josẹph ọnạngẹ anạng pẹ ẹfa bẹ́, abẹ ata age anạng mbọ agwu k’mkpa sabẹ atim akwu, abẹ abạra arik akpokha p’ọnạng-ọnạng utim odebh agwu k’akhẹ k’ẹkpa, abẹ abạra attạra uchiattọhk f’anạng mbọ m’achi k’eden. Masẹ abẹ kk’oche ngwọ asia, 26 anạng mbọ atạkha uchiattọhk f’abẹ kk’bẹ anạnga adạbh k’nnyạnyaang sabẹ, abhạna.

27 Masẹ abẹ akpir k’ibyi sabẹ abhingi s’iwu kk’ipyia, oyok wạnọ ọchaarẹ ẹkpa chẹ ọfha ọnạng ẹnyạnyaang chẹ uchiattọhk, n’ose asilva pẹ k’ẹkpa chẹ ẹtaanga. 28 Ọkpaak ayok bẹ́, "Abẹ kk’asilva paam arikha e, khiri ẹmba k’akhaam k’ẹkpa e." Masẹ abẹ abhaang udik kw’oyok ọkpaakhẹ bẹ, nttem iyọhn bẹ, ojora ọvạkha bẹ, abẹ afhạnọ abạbh ayok bẹ, "Ma, bạng udik gwọ kw’Ubinọkpaabyi n’usi mạna ma o?"

29 Masẹ abẹ akwu akpira k’ẹkhạma ch’Kenaan, abẹ akpaak otte kwabẹ Jekọb udik kwidede kw’kk’uttia okhebha bẹ k’osenga kw’abẹ ata, aben bẹ́, 30 "Ujunung kw’ọdạbhẹ ofhon ngwọ otera ọkkaamẹ mạna abẹ ọkkaam, ọbạra ọtạkha mạna masẹ abaan-ibyi, p’akwu ofhon-bạbaana. 31 Okhenka, amkpaakh-ẹ bẹ́, ‘Amạna ande anạng ọkka e, abaan-ibyi nándia. 32 Wa ande ivotte jobh-kamfa p’otte wạnọ ofhonu. Okhenka, oyok wạnọ k’ngekha samạna ncho jobh-kamfa k’akpen dạk kòde. Okpongannạm kwamạna wọ n’uning otte kwamạna abẹ kha Kenaan.’

33 "Ma wọ, ujunung nwọ kw’utim edennạng ch’ofhon ngwọ obeni mạna bẹ́, oche kw’ẹma m’utima osonga bẹ́ ande anạng ọkka ode bẹ́, m’antte ọnạng wạnọ k’ikhaana s’amạna uninga abẹ, ọfha ayok mbọkha atạkha uchiattọhk akkena ichọhmfhạr sabẹ, s’ining k’okwo fididen. 34 Abẹ de oyongu bẹ́ m’antima okpongannạm kwamạna ankken-ẹ, ẹma móchera bẹ́ amạna abaabh-ibyi nándia, mọ́bạra ochera bẹ́ ande anạng ọkka. Abẹ de kk’ansia oche ngwọ, ẹma m’otte nwotte kwamạna ọbọhk otte ọnạng mạna, ọfha ambạra ankke ẹphya ansenga ma ofhon ngwọ."

35 Masẹ abẹ n’awon ekpo py’ining k’mkpa sabẹ atim akwuna, ọnạng-ọnạng n’ose ikwa sẹ s’silva s’wạra utim odebh agwu k’ẹkpa chẹ ẹtaanga. Masẹ abẹma phyibh ọttạra otte kwabẹ n’abạra ase akwa p’silva p’abẹ arengi k’mkpa sabẹ, ojora ọvạkha bẹ phyibh. 36 Ma wọ otte kwabẹ Jekọb obeni bẹ bẹ́, "Abạnga kk’aam iva paam arạma. Josẹph ọttạra Simeọn k’akpen dạk kàde, mantọmma, abạnga kk’adạkhẹ akwua bẹ́ akwu atạkha Bẹnjamin atima afona. Idik nna phyibh itim itto ikhebha amma nwa mạnkkeni!"

37 Ma wọ Reubẹn obeni otte bẹ́, "Tte Bẹnjamin ọbọhk anạng-m, amma m’ntima iva paam ncho mfa ntera echo chẹ, de nạn abẹ nạ́ntima nkwuna nkken-ọ. Ọttọk f’idede f’ọdaakh-ọ bẹ́ asi iva paam, si bẹ."

38 Okhenka, Jekọb ubhin bẹ́, "Kwaam asạng! Nnwa kwaam ọbọhk mạ́ntte nnạng bạnga, ukwuru bẹ́ nnwọkka kwẹ kk’upua, n’urikhi ẹma-ẹma. De ipyibha chidede etto ekhebh-ẹ k’osenga kw’abạnga m’ata, ma wọ ode bẹ́ abạnga m’annọhng-m ma k’atạm mba ọttạra k’ikwosi."