1 K'okpe kw'uwa Isaak kk'ọtạma, dạkhẹ iyaan mororo k'nóse, wa oyeri ocheden-nwa kwẹ, Ẹsau, oben-ẹ bẹ́, "Nnwa kwaam."

Ẹsau ubhin-ẹ bẹ́, "Aro kwaam, kkeri amma ma e."

2 Isaak oben bẹ́, "Amma n'nde ọtạmanạng, ebowu chaam kạ́mbra nsonga. 3 Ma wọ, tạkha ẹgbaji-kpo pyọ, py'ede ọkhọhn-pa, ọttạra uyuk kwọ, atima ayin ẹgbaji, ata afhọ nten akken-m. 4 Si uchiattọhk f'orebh-orebh f'n'ọdaakh-m, kken-m nchi, ọfha nyọhbh-ọ itta brasẹ mpe."

5 Wa Rẹbẹka n'ọkhọhmọ itọhng ọbhaanga idik s'Isaak n'ọkpaak nnwa kwẹ, Ẹsau. Masẹ Ẹsau kk'ẹgbaji uyina bẹ, ọta ọfhọ nten utima ukwuna o, 6 Rẹbẹka n'obeni nnwa kwẹ Jekọb bẹ́, Kker e, mfhu mmaanga s'atte n'oben nnwakka Ẹsau bẹ́, 7 Sọhng ata afhọ nten, atima asi uchiattọhk f'orebh-orebh anạng-m nchi, ọfha nyọhbh-ọ itta k'ititikha s'Ubinọkpaabyi, brasẹ mpe.

8 Rẹbẹka n'obeni Jekọb bẹ́, "Nnwa kwaam, tạkha okpe khọhm-m itọhng, asi oche kw'm'mkpaakh-ọ 9 Sọhng ka ibyi s'mvu ining, atekha avu-va akkapẹ mạnna afa s'ijibhi ifor, akken-m, ọfha ntima nsi uchiattọhk f'orebh-orebh, nnạng atte oche kw'n'ọdaakh-ẹ. 10 Ọma m'atạkha pfẹ akkena atte uchi, ọfha ọyọbh-ọ itta brasẹ ope."

11 Jekọb n'obeni ọkka bẹ́, "Jima bẹ, nnwọkka kwaam, Ẹsau omeni iphyạbha s'isaabh-ọsaabh k'ifor, abhaang, amma ifor saam ikwọhng-ọkwọhnga. 12 De otte kwaam utwu-m mo o? Okher ma, n'mbọhr-ẹ ọbọhra, bạra osenga ma, ọrakh-m ẹmma, uttu kw'm'ọyọhbh-m itta."

13 Ọkka ọpọhn-ẹ bẹ́, "Tte ẹmma ch'atte m'ọraakh-ọ ẹvạkha amma oyeni. Si oche kw'mben-ọ bẹ, asi; sọhng ata atạkha mvu s'ntọhm-ọ, kken-m."

14 Ma wọ, ofon ọta ọtạkha mvu okkena ọkka. Ọkka utima sẹ usi uchiattọhk f'orebh-orebh oche kw'n'ọdaak otte. 15 Rẹbẹka ọtạk ẹnya ch'ijibhi ọtạm ch'ocheden-nwa kwẹ, kw'ode Ẹsau, oge Jekọb kw'ode okponga-nnạm-nwa kwẹ. 16 Ọbạra ọtạkha ẹtwạnọ ch'ivu ububh-ẹ k'mbọhk, ọttạra k'ukhubha gwạnọ k'ẹdwạngọ chẹ, kw'nạn iphyạbha ọkhaam 17 Ma wọ, n'ọtạk uchiattọhk rebhada mvọ ọttạra k'brẹd kw'kk'usia, ọnạng nnwa kwẹ Jekọb.

18 Ma wọ, Jekọb ọtạk okkena otte, oben bẹ́, "Attitte kwaam."

Otte ubhina bẹ́, "Oo! Nnwa kwaam, ọma anẹ wọ?"

19 Jekọb ọpọhn-ẹ bẹ́, "Amma ocheden-nwa kwọ, Ẹsau wọ e, kk'nsia oche kw'aben-m bẹ, nsi e. Totokhạn, bina ninga ẹyạr achi ọttọhk, ọfha ayọhbh-m itta sọ ttạng e."

20 Isaak ọbạbh nnwa kwẹ bẹ́, "Nnwa kwaam, asong bẹ, kk'eten ẹbhạr-ẹbhạrẹ asia o?"

Jekọb ọpọhn-ẹ bẹ́, "Ọvaar Ubinọkpaabyi, kw'ode Ubinọkpaabyi kwọ wọ ọnạng-m uwujibh e."

21 Ma wọ, Isaak obeni Jekọb bẹ́, "Twạkhọ gbaar-m ntwu-ọ ọbọhk, ọfha nsonga k'udik ọkka de ode ọma nnwa kwaam, Ẹsau wọ."

22 Ma wọ, Jekọb ọtwạkhọ ọgbaara otte Isaak, utwu-ẹ, oben bẹ́, "Ọkpaakhadik okher kw'Jekọb, mbọhk ikhenka ikhera s'Ẹsau." 23 Wa Isaak, Jekọb nútina, ukwuru bẹ, wa mbọhk sẹ ide iphyạbha-iphyạbha masẹ nnwọkka, Ẹsau. Osenga ma, Isaak ọyọhbh-ẹ itta. 24 N'ọbạra ọbạbh-ẹ bẹ́, "Ọma nnwa kwaam Ẹsau wọ k'udik ọkka o?"

Jekọb ubhin-ẹ bẹ́, "Uwee, attitte, amma wọ e."

25 Ma wọ, n'obeni bẹ́, "Nnwa kwaam, kken-m uchiattọhk pfọ nchi, ọfha nyọhbh-ọ itta."

Jekọb okken-ẹ uchiattọhk uchi, ọbạra ọnạng-ẹ atwuk, ogwo.

26 Ma wọ, Isaak oben-ẹ bẹ́, "Nnwa kwaam, kwu baakh-m."

27 Ma wọ, Jekọb ọtwạkhọ ọgbaara otte, ọbaakh-ẹ. Masẹ Isaak ọbhaang iruk ch'ekpo py'oge k'ifor o, ma wọ, n'ocher bẹ, Ẹsau wọ, osenga ma, ọyọhbh-ẹ itta, oben bẹ́,

"K'udik ọkka, iruk ch'nnwa kwaam

ede masẹ iruk ch'owonu,

kw'Ọvaar Ubinọkpaabyi kk'udia.

28 Tte Ubinọkpaabyi usi ọrạngkpang otebh

k'agwu p'antubhu,

tte ọnạng-ọ uchiattọhk ọttạra atwuk abhapẹ k'ọsaabh.

29 Tte idifhon phyibh ikpobh-ọ,

tte anạng phyibh asạkha echo anạng-ọ.

Ọma m'ade ọvaarnạng kw'ivakka pọ,

tte ichimma chọ ẹsạkha echo ẹnạng-ọ.

Tte ẹmma ẹbhạkhẹ ẹvạkha anạng p'm'araakh-ọ ẹmma,

tte idia ẹbạra iyima ẹnạng anạng p'm'adi-ọ."

30 Masẹ Isaak kk'Jekọb ita ọyọbha phyibh o, Jekọb ubina ofona. Ubin k'otte k'ititikha bẹẹ, nnwọkka Ẹsau ukwuna ẹgbaji. 31 Wa, Ẹsauọbạra usi uchiattọhk f'orebh-orebh, ọtạkha okkena otte, oben-ẹ bẹ́, "Attitte, totokhạn, bina chi ọttọhk, ọfha ayọhbh-m itta ttạng."

32 Otte Isaak n'ọbạbh-ẹ bẹ́, "Ọma anẹ wọ o?"

Ẹsau ubhin-ẹ bẹ́, "Amma ocheden-nwa kwọ, Ẹsau ttạng asạng."

33 Isaak ọfhạnọ bẹ tikhitikhitikhi, oben bẹ́, "Anẹ wọ wạra n'uyini ẹgbaji ọwọhn uchiattọhk okken-m o? Napra nchi pfẹ ma, mbạra nyọhbh-ẹ ikpongannạm-ta, brasẹ n'akwu ma. Afhạra khọ mạ́nsi, m'ọkhankẹ ujibh-ẹ-ujibh!"

34 Masẹ Ẹsau ọbhaang idik s'otte ọkpaakhẹ, orengi ijunung-mạng ọgạma k'ẹrạng-k'ẹrạng, idwạdwạkhọ asẹ kha ettem, oben otte kwẹ bẹ́, "Attitte kwaam, yọhbh-m itta, totokhạn, gba yọhbh amma itta!"

35 Okhenka, otte ọpọhn-ẹ bẹ́, "Nnwakka kk'ukwua, ukwu ọbọhr-m, ọtạkha itta sọ."

36 Ẹsau n'oben-ẹ bẹ́, "Ọbaan-ọbaana s'akpẹ-ẹ Jekọb. N'ode ikpe mạnna ifa s'kk'aam ọbọhra. K'ochedenkpe, ọtạk edennạng chaam ch'ocheden-nwa, mantọmma, kk'adạkhẹ itta saam ọbạra ọtạkha!" Ma wọ, Ẹsau n'ọbạbhọ otte bẹ́, "N'ode bẹ, khaam itta rạnẹ-rạnẹ nárikha o?"

37 Isaak ubhin Ẹsau bẹ́, "Amma kk'ẹ ita nyọhbha bẹ, idifhon phyibh ọttạra anạng pẹ phyibh, m'aninga isekhisek kwẹ, mbạra ndi-ẹ oseng k'uchiattọhk ọttạra atwuk k'ọsaabh. Nnwa kwaam, bạng udik ọdwạkh-ọdwạk gwọ akkẹ bẹ, m'nsi nnạng-ọ?"

38 Ẹsau ọbạbh otte bẹ́, "Attitte kwaam, n'ode bẹ, itta rạnẹ mạnkkeni rọ s'akhaam o? Attitte kwaam, gba yọhbh-m itta khadẹ o!" Ẹsau orengi ijunungmạng ọgạma k'ẹrạng-k'ẹrạng.

39 Isaak o, n'ubhin-ẹ bẹ́,

"Kker e, ibyirukhasẹ sọ, k'isisek

s'n'ijibh ekpo mífora,

k'ibyi s'ọrạngkpaang n'otebh mífora.

40 Ọma m'aruk k'ekpong k'ekpong,

m'abạra aninga k'isekhisek kw'nnwakka.

Okhenka, m'atima ọmmakkarẹ aruk akpen,

ẹmma nja kọ mẹ́vạkha,

k'isekhisek kw'nwakka máruk."

41 Ẹsau ọkhaam iwawuna k'ettem, ukwuru itta s'otte kk'Jekọb ọyọhbha. N'obeni ẹma oyeni bẹ́, "Ebowu ch'otte kwaam nạnka efora, de kk'upua, ansi-ẹ obo, amma m'nfhọ nnwọkka kwaam, Jekọb."

42 Masẹ Rẹbẹka ọbhaang udik kw'Ẹsau n'ọkhạmọ otena Jekọb, oyeri Jekọb ọkpaakh-ẹ bẹ́, "Kker e, nnwakka Ẹsau ọkhaam ẹkka-pyibha otena abọ, abẹ, m'ọfhọ-ọ. 43 Nnwa kwaam, khọhm-m itọhng, okpe kákhibhi, si oche kw'mkpaakh-ọ, m'ado ifor ẹbhạr-ẹbhạrẹ arạbh afona k'nnwọkka kwaam, Laban, kw'urukhu k'Haran. 44 Ninga abẹ ma tạrr ettem idiri nnwakka. 45 Okpe kw'kwạna nnwakka kk'udik kw'asi-ẹ obona, idwạdwạkhọ ibạra isẹ-ẹ k'ettem, ma wọ, m'ntọhm ẹkkaabha nnạng-ọ akwuna. Ukwuru yạn kw'abạngama anạng afa m'adim-m k'iwu jạnẹ ọ?"

46 Ma wọ, Rẹbẹka ọkpaak Isaak bẹ́, "Amma akpen kk'aam ebenga, ukwuru ipanạng mba p'abin Het. De Jekọb ọbạra ọtạkha ikwanạng k'anạng p'Het, amma kk'mpua e."