1 K'okpe mạnna gwạnọ, Ọvaar Ubinọkpaabyi obeni Abram bẹ́, "Bina rik ẹkhạma chọ, ọttạra anạng pọ, ọttạra ẹchọhmfhạr ch'atte, afona k'ẹkhạma ch'm'ntibh-ọ.

2 "M'nsi-ọ ade otte kw'ẹkhạma chididen.

M'ndi-ọ, mbạra nsi-ọ ayin eche.

M'ade idia ánạng anạng saabhada.

3 M'nsi ọphyaam nnạng ọnạng kw'usi-ọ ọphyaam.

Ọnạng kw'ọsaakh-ọ, wọ m'nsaakhẹ.

Iyagbin bẹ́ wạmm m'isenga k'akhọ-ọ itạkha idia."

4 Osenga ma, Abram ubina osenga oche kw'Ọvaar Ubinọkpaabyi kk'ẹ obena, Lọt ọbạra ọtwạn abẹ. Wa Abram ode icho arạbh attaan ukuma chi, k'okpe kw'ubin k'Haran. 5 Abram utim ikwanạng kwẹ, Sarai, ọttạra Lọt kw'ode nnwa kw'nnwọkka, ọbạra utima ẹkhaama chabẹ phyibh k'Haran ọttạra k'abira pabẹ phyibh, abina osenga afona k'ẹkhạma ch'Kenaan.

6 Wa abAbram aseng akpira k'Kenaan, abẹ abina afona k'Shẹkẹm, k'ibyi s'ichi chididen ebe, k'ibyi sabẹ ayeri Mọrẹ. Ma okpe ngwọ, wa anạng p'Kenaan atim arukhu ma ẹkhạma njọ. 7 Ọvaar Ubinọkpaabyi uyin oben Abram bẹ́, "M'ntte ẹkhạma nja ọbọhk nnạng efonamma chọ."

Osenga ma, Abram usi ijabyi ma s'm'uninga okpobha Ọvaar Ubinọkpaabyi. Ma ibyi nnọ rọ s'uwa Ọvaar Ubinọkpaabyi uyini okhebh-ẹ.

8 Masẹ Abram ubin k'Shẹkẹm ọtwạkhọ ororo, tạrr ukpira k'akpecho p'Bẹtẹl, usi ukkira ma k'ngekha kw'Ayi, k'okpebhadudon, ọttạra k'Bẹtẹl, k'ọchọhkhadudon. Ma wọ Abram usi ijabyi sabẹ n'aninga afọhnọ ẹja anạng Ọvaar Ubinọkpaabyi, ọttạra sa m'ọgba uninga ose njọhm ọnạng Ọvaar Ubinọkpaabyi. 9 Mạnna wọ Abram ubin osenga, ofona ororo okkeri ititikha k'ukhubha kw'Nẹgẹv kw'ofor k'Ijip.

10 Ma okpe ngwọ, wa okwo f'ididen uning ma ukhubha ngwọ. Osenga ma, Abram ubina, ofona k'Ijip ọta uninga ma k'okpe nwa sạsạkhẹ. 11 Masẹ abẹ n'aben bẹ akpira k'Ijip, Abram oben ikwanạng kwẹ bẹ́, "Sarai, amma nsong ma oche kw'ajibhi ikwanạng akpira. 12 Ode anạng p'Ijip asong bẹ́, ọma ade ikwanạng kwaam, masẹ abẹ ase ajibhada pọ, abẹ m'aror bẹ́, abẹ afhọ-m, ọfha abẹ atạkh-ọ k'ọbada. 13 Totokhạn, de amạna amkpir ma, de abẹ abạbh-ọ bẹ́, ade ikwanạng kwaam, kpaak bẹ bẹ́, amma ọttạra ọma ande ivọkka, ọfha nsenga ọma abẹ nninga akpen."

14 Masẹ Abram ukpir k'Ijip, anạng p'Ijip ase bẹ́, k'udik ọkka, Sarai ọkhankẹ ujibh iminava. 15 Masẹ anạng p'ọvaarchọhm kw'Phero kw'ode ọvaarnạng kw'Ijip, abạra ase ikwanạng nwọ ma, abẹ ata atọhnga ajibhada pẹ anạng ọvaarnạng. Abẹ atim-ẹ afona k'ọvaarchọhm. 16 Wa Phero oseng Sarai abẹ, ujibh idik Abram abẹ. Osenga ma, ọnạng Abram nnạnga s'isaabh-ọsaabh masẹ arạkhạmaan, ọttạra mmaam, ọttạra nnyạnyaang-kwa, ọttạra abira p'ajunung, ọttạra p'ipanạng, ọttạra nten s'n'itọhkha ekpo, sabẹ ayeri kamẹl.

17 Ma wọ, Ọvaar Ubinọkpaabyi usi ikhạmana-pyibha inwa k'ẹchọhmfạr ch'Phero, ivạkha ẹma, ọttạra anạng p'ẹchọhmfạr chẹ phyibh, ukwuru ikwanạng kw'Abram Sarai. 18 Ma wọ Phero ọbạbhọ Abram bẹ́, "Bạng udik gwọ asi maa? Asi yạn asi-m igbaan? Oseng yạn nạn khaam nákpaakha bẹ́, Sarai ode ikwanạng kwọ? 19 Aseng mbạng apfẹ akpaakh-m bẹ́, ọma ọttạra ẹma abạnga ade ivọkka, abạra achera bẹ́, ntạkh-ẹ k'ọbada? Kkeri ikwanạng kwọ ma. Tạkh-ẹ, asọhng abẹ!"

20 Phero ọtwạr anạng pẹ itọhng bẹ́, abẹ atạkha Abram ata arik k'nnem s'isisek s'Ijip. Osenga ma, Abram ubina urik Ijip, utima ikwanạng kwẹ ọttạra ekpo pyẹ phyibh ofona.