1 K'okpe mạnna gwạnọ, Ọvaar Ubinọkpaabyi oyom nnạm-phyạphye s'Abraham. Oyer-ẹ bẹ́, "Abraham!"

Abraham ọbẹ́, "Kkeri amma maa."

2 Ma wọ, Ọvaar Ubinọkpaabyi obeni Abraham bẹ́, "Tạkha nnwa kwọ Isaak, nwọ mạnkkeni kw'achokhu ettem, fona k'ẹkhạma ch'Moriya. Tim-ẹ fọhnọ ẹja-ẹkkạmachẹ k'okpecho kw'm'ntibh-ọ."

3 Masẹ iwu echobh ma k'ekpekpebha, Abraham ubin ọttạra ẹnyạnyaang chẹ, ọttạra atọhmnạng pẹ afa, ọttạra nnwa kwẹ Isaak. Masẹ kk'ommeni ọkkọbha f'm'obenga k'ẹja-ẹkkạmachẹ njọ, ubina osenga ofona k'ibyi s'Ubinọkpaabyi kk'ẹ utibha. 4 Ottong iwu ittaan s'osenga ngwọ, Abraham ubina achen, ose ibyi nnọ k'ororo. 5 Osenga ma, Abraham oben atọhmnạng pẹ bẹ́, "Aninga ma ọttạra ẹnyạnyaang nja achẹ, s'amma ọttạra Isaak, m'amfona k'ororo, anta amkpobha Ubinọkpaabyi. Ode kk'ansa, m'amkpa nnạm ankhebha bạnga ma ibyi nna."

6 Abraham ọtạkha ommeni f'abẹ m'atima amuma ekpon ch'ẹja ẹkkạmachẹ, oye nnwa kwẹ Isaak. Ẹma Abraham utima ekpon, ọttạra imaana. Masẹ abẹma anạng afa n'asenga k'eden, 7 Isaak oben otte bẹ́, "Attitte o."

Abraham ochera bẹ́, "Nnwa kwaam."

Isaak ọbẹ́, "Amma n'mben bẹ mbạbh bẹ́, masẹ ommeni uning ma, ekpon ininga, ma, ọrạkhạmaan kw'm'antima anfọhnọ ẹja-ẹkkạmachẹ mo o?"

8 Ma wọ, Abraham ubhin-ẹ bẹ́, "Nnwa kwaam, Ubinọkpaabyi oyeni wọ m'ọnạng mạna ọrạkhạmaan kw'm'antima anfọhnọ ẹja-ẹkkạmachẹ e."

9 Masẹ abẹ akpir k'ibyi s'Ubinọkpaabyi kk'ẹ otekha, Abraham usi ijabyi ma, ọtạkha ommeni otobha k'ukwung. Ukwu ọtạkha nnwa kwẹ Isaak, ọdạbh ndikhi, ọtạkh-ẹ ọnạna k'ommeni mvọ k'ẹrạng. 10 Ma wọ, Abraham onemi ọbọhk ọtạkha imaana bẹ, ọfhọ nnwa kwẹ. 11 Okhenka, itọhmọ s'Ọvaar Ubinọkpaabyi ininga ka ẹrạng iyer-ẹ bẹ́, "Abraham! Abraham o!"

Abraham ọpọhna bẹ́, "Kkeri amma ma e."

12 Itọhmọ nnọ ikwu iben bẹ́, "Nnwa nwọ ọbọhk kátwu, khẹ ọttọhk kási o! Napra wọ kk'nsonga bẹ, akhaam ojora f'Ubinọkpaabyi, ukwuru s'acher bẹ, atima nnwa nwọ kwọ mạnkkeni, afọhnọ ẹja anạng-m."

13 Ma wọ, Abraham udir ichen ose uvudim ch'abhik itim ẹdạma k'ọkpasạn, ofona ọta ọtạkha chẹ utima ọfọhnọ ẹja-ẹkkạmachẹ k'echo ch'nnwa kwẹ. 14 Osenga ma, Abraham oyeri ibyi nnọ bẹ́, "Ọvaar Ubinọkpaabyi m'ọnạng-ọnạng." Tạma ma kpira chemma, anạng n'ayeri ibyi nnọ, "K'okpecho kw'Ọvaar Ubinọkpaabyi wọ m'ọnạng-ọnạng."

15 Itọhmọ s'Ọvaar Ubinọkpaabyi ining ka ẹrạng iyeri Abraham ottong nden mfa, 16 Ọben bẹ́, "Nchekhi k'eche ch'amma Ọvaar Ubinọkpaabyi bẹ́, ukwuru s'acher bẹ́, atima nnwa nwọ kwọ wạnọ mạnkkeni afọhnọ ẹja anạng-m, 17 k'udik ọkka, m'ndi-ọ, mbạra nsi iva p'iva pọ asaabh masẹ ndudoru s'ining k'ọrạngkpakpa, ọttạra masẹ opong kw'uning k'ẹraangapa. Iva p'iva pọ m'abạra atạkha ifhon s'awawunanạng pabẹ, 18 m'ọbạra osenga k'echo ch'iva p'iva pọ, nkhạma s'iyagbin phyibh itạkha idia, ukwuru s'asạk echo anạng ntọhna saam."

19 Ma wọ, Abraham ọkpa nnạm ọta okhebha atọhmnạng pẹ k'ibyi sabẹ aning atikh-ẹ, abẹ abina abhạna k'Beershẹba. Ma wọ Abraham usi uruk kwẹ.

20 K'okpe mạnna gwạnọ, abẹ akpaakhẹ Abraham bẹ́, Milka, kw'ode ikwanạng kw'nnwakka, kw'ode Nahọr, kk'ajunungva ọbạra ọmaana ọnạng-ẹ. Wa iva p'Milka ọmaanẹ ọnạng Nahọr ade:

21 Uz, kw'ode ocheden-nwa,

Wa Uz ọkhaam ivọhkka p'akpen Buz, ọttạra Kẹmuẹl.

Kẹmuẹl ẹma wa ode otte kw'Aram,

22 ọbạra ode otte kw'Kẹsẹd,

ọttạra Hazo,

ọttạra Pildash,

ọttạra Jidlaph

ọttạra Bẹtuẹl. 23 Bẹtuẹl ode otte kw'Rẹbẹka. Milka wa ọmaanẹ ajunungva asenọttaan ọnạng Nahọr kw'ode nnwọkka kw'Abraham.

24 Wa oyok kw'Nahọr kw'okpen Reuma ọbạra ọmaan-ẹ ajunungva p'ade: Tẹba, ọttạra Gaham, ọttạra Tahash, ọttạra Maaka.