1 Masẹ icho ifa kk'isenga, Phero ọttaar idachen s'obe k'iraanga-khonga, k'ọraanga kw'okpen Nile, 2 ose s'mmaam nsenọfa s'ijibh ifor, ibạra ide bẹ bạmabạmabạma ayini k'ọraanga kw'Nile ikwu ichi asạsaarẹ p'ameni ma iraanga-khonga. 3 Ma ngwọ osengi, mmaam nsenọfa idwạkh-ọdwạk s'ikkokh-okkokhu ibạra ipyibh k'ifor iyin k'ọraanga itta ibe ibaanga nnọkha s'ijibhi ifor s'n'ichi asạsaarẹ ma iraanga-khonga. 4 Masẹ mmaam nnọ s'ikkokhu-okkokhu, ibạra ipyibh k'ifor itạma s'ijibh ifor chi-chi, ọvaar Phero ukwu ọphyạbha k'ọda.

5 Wa Phero ọbạra ọtta uyima, ẹkpa nja, n'ọttaar idachen idwạkh-ọdwạk, ose igwu-rin jạnẹ ch'itim agwudwuk asenọfa p'ijibh-ujibh. 6 Ma ngwọ osengi, agwudwuk asenọfa ẹdwạkh-ọdwạk p'nạn nijibha ẹbạra iyin k'igwurin jạnẹ, ufhum kw'ọkpọkh-ọkpọkhọ k'ukhubha kw'okpebha-dudon nuyin uguma pyẹ, apyẹ igwu phyibh. 7 Ma wọ, agwudwuk mbọ asenọfa p'nạn k'ifor nijibha etera imyi mbọkha asenọfa p'ijibhi ifor phyibh. Masẹ Phero ọphyạb ọda, ma wọ n'osong bẹ, idachen rọ s'ọttaar.

8 Masẹ iwu n'echobh, ettem ẹphyaangẹ Phero ẹmma, osenga ma, ọtọhm anạng bẹ́, abẹ ayeri abọhnganạng phyibh, ọttạra anạng p'akhaam esonga k'Ijip phyibh. Masẹ abẹ akwu akpira, otekhi bẹ adachen p'ọttaar. Bạrama, ọnạng mạnna wạnọ kw'okke ẹyaakha nạng-nạng kh'adachen p'Phero ọttaar kode.

9 Osenga ma, ochonạng kw'atọhmnạng p'n'anạng Phero atwuk, oben bẹ́, "Chemma, amma kk'ipina chaam njima-e. 10 Wa ọkhaam okpe kw'Phero ọdwạkhẹ ọttạra atọhmnạng pẹ abẹ, kw'ode amma, ọttạra ochonạng kw'atọhmnạng p'nanạng-ẹ uchiattọhk, p'uwa ọtọhmọ mgbakkọhbhọ, k'ọchọhm kw'odennạng kw'akker-agbakkọhbhọ. 11 Wa k'irunguwu jạnẹ, amạna mba anạng afa p'ọvaar Phero ọtọhmọ mgbakọbhọ, khọnạng-khọnạng, anttaar idachen, idachen s'idede ikhaam ẹyaakha chẹ. 12 Ma wọ, antạk adachen mbọ amkpaakh oHiburu-dikobh wạnọ kw'ode itọhmọ s'odennạng kw'n'okkeri agbakkọhbhọ. Udikobh nwọ wọ wa ọnạngẹ eyaakha ch'adachen mbọ. 13 K'udik ọkka, wa akwẹ ode oche kwa oHibru-dikobh nwọ ọkpaakhẹ. Wa Phero ọkpa nnạm ọnạng-m ininga ch'iwa ochokhạm. Oyok nwọkha abẹ arennẹ idikhi."

14 Ma wọ, Phero ọtọhmọ anạng bẹ, abẹ atima Josẹph k'ọgbakkọhbhọ-ter akwu. Ma ibua-ibua, abẹ ata areng-ẹ. Masẹ Josẹph k'agbaphyạbha pẹ ọwạra, ọbạra ofhona ẹnya ch'oge, ọta ose Phero.

15 Masẹ abẹ akpir, Phero otek Josẹph bẹ́, "Amma nttaar idachen s'ọnạng wạnọ-wạnọ nạn ẹyaakhạ okke ọnạng. Kakha, amma kk'mmaanga bẹ́, ọma nanạng anạng ẹyaakha ch'adachen."

16 Josẹph ọpọhna Phero bẹ́, "Amma ẹfa k'nkhaam ch'mạnạng ọ ẹyaakha ch'adachen e, okhenka ode bẹ́, Ubinọkpaabyi wọ m'ọnạng ẹpọhna ch'm'ẹdaakh-ọ e."

17 Ma o, Phero otekhi Josẹph bẹ́, "Nttaar s'mbe k'iraanga-khonga s'ọraanga kw'abẹ ayeri Nile. 18 Nse mmaam nsenọfa s'ijibhi ifor, ibạra ide bẹ bạmabạmabạma, iyini k'ọraanga ikwu ichi asạsaarẹ ma iraanga-khonga. 19 Ma ngwọ osengi, mmaam nsenọfa idwạkh-ọdwạk s'ikokh-okokhu ibạra ipyibh k'ifor, iyin ma ọraanga dạkhẹ. Amma s'mbebẹ nninga, mmaam s'ikkokhu k'ifor ochengwọ tạma nạnsia ma isisek s'Ijip, 20 Mmaam nnọ s'ikkokh-okkokhu ichi nnọ s'ijibhi ifor. 21 Chibhi sabẹ k'ayok achia phyibh, abẹ k'ifor na jibha, itim ikkokhu ma. Mgbe nphyạbha k'oda.

22 "Mbạra nyima dạkhẹ, nse s'agwudwuk asenọfa p'ijibhi ifor iyini k'irin jạnẹ. 23 Ma ngwọ osengi, agwudwuk asenọfa adwạkh-ọdwạk p'nạn ijibhi abạra ayin k'igwurin jạnẹ, ufhum kw'iyoma kw'ọkpọkh-ọkpọkhọ uguma pyẹ, apyẹ igwu phyibh. 24 Ma wọ, agwudwuk mbọ asenọfa p'nạn k'ifor ijibhi amyi asenọfa p'ajibhi ifor bẹ́ pyibh. Ntạk idik nna pyibh mkpaakh abọhnganạng p'Ijip pyibh, bạrama, ọnạng kw'okke ẹyaakha sisi ọnạng-m kode."

25 Osenga ma, Josẹph ọkpaak Phero bẹ́, "Adachen mbọ afa ade ukhira ngwọ gwạnọ. Ubinọkpaabyi khọ ẹyaakha ọnạnga k'udik kw'n'oben bẹ usi. 26 Adachen mbọ phyibh ẹkhaam ẹyaakha jạnẹ, ẹyaakha njọ ede bẹ: Mmaam nnọ nsenọfa s'ijibhi ifor, iyini icho isenọfa. Agwudwuk mbọ asenọfa p'ijibhi ifor, ibạra iyin icho isenọfa. 27 Mmaam nnọ nsenọfa s'ikokh-okokhu s'ikpong nnạm iyin k'ọraanga, ọttạra agwudwuk mbọ asenọfa pyẹ nạn k'ifor ijibhi, kw'ufum k'ukhubha kw'okpebhadudon k'usia apyẹ igwubẹ khạkhaara, iyini icho isenọfa s'okwo f'ididen."

28 "Attitte, ode mas'mkpaakhẹ nnạng Phero bẹ́, Ubinọkpaabyi kk'ẹyaakha usia ọnạng-ọ k'udik kw'n'oben bẹ, usi. 29 K'icho isenọfa, ofon kw'Ijip m'ọkhaama uchiattọhk k'ọsaabh. 30 Ode okpe ngwọ osengi mạmma, okwo f'ididen m'uninga icho isenọfa, ọbạra ọnyaamẹ k'ofon kw'Ijip phyibh, m'osenga ma okwo mvọ f'ididen, uchiattọhk k'ofon kw'Ijip dạk muninga. 31 Okwo mvọ m'ọkpọkhọ tạrr, abẹ m'abonu okpe kw'uwa idik ijibhi inạng bẹ. 32 Ọttọhk f'usi bạra Phero ọttaar idachen nnọ rạnẹ nden nfa, ode bẹ́, Ubinọkpaabyi kk'kwẹ ọttọhna ochok bẹ́, akwẹ m'ode oche kw'ọkpaakhẹ, eden mibhir.

33 "Mantọhmma, tte Phero oror ujunạng kw'ọkhaam esonga, ọttạra ekkoji, ọfha ọnạng ujunạng nwọ ẹfa ch'm'utima ọdạbh ẹkhạma ch'Ijip. 34 Tte Phero ọbạra otekha atọhmnạng p'm'aninga k'isekhisek kwẹ, p'm'ator-ẹ n'atobha ichiakpo k'icho nnọma isenọfa s'uchiattọhk m'ọsaabh-ọsaabh k'Ijip. Anạng mbọ m'atobha ichiakpo mbọ k'akwung asen, brasẹ abẹ n'atạk ukwung gwạnọ achok. 35 Tte ubina k'ẹfa ch'Phero bẹ́, k'icho isenọfa s'm'ikwu, anạng mbọ atạkha ichiakpo mbọ achok k'ọkhaanga-chọhm ch'efhon-diden njọ, abạra akkeri pẹ. 36 Abạnga aye ichiakpo mbọ, m'ininga ma, ofha abẹ atima k'icho nnọ isenọfa s'okwo f'ididen m'uninga k'ẹkhạma ch'Ijip, ọfha anạng nạng ape k'okwo."

37 Osenga ma, Phero ọttạra atọhmnạng pẹ phyibh achera anạng ntọhna s'Josẹph ọnạng bẹ. 38 Ma wọ, Phero ọbạbh atọhmnạng pẹ bẹ́, "Ma, sạmạna anse ọnạng kw'ode masẹ ujunung nwa, kw'ọkhaam esonga ch'ibin k'Ubinọkpaabyi o?"

39 Osenga ma, Phero oben Josẹph bẹ́, "Masẹ Ubinọkpaabyi khọ ẹyaakha ch'idik nna phyibh ọnạnga, ọnạng ọdwạkh-ọdwạk kw'ọkhaam esonga ọttạra ekkoji ch'ọma akhaam kóde. 40 Ọma wọ m'ade echo k'ọvaarchọhm kwaam, anạng paam phyibh m'aninga isekhisek kwọ. Ikpukpobha s'ẹvaar mạnkeni rọ s'amma m'ntima mbạr nyọng-ọ."

41 Phero ofona ororo oben Josẹph bẹ́, "Amma khọ ọbọhk nnạna k'echo, nnạng-ọ edennạng ch'ẹbaabhẹ Ijip." 42 Osenga ma, Phero ọwạra ẹbaanga ch'oge k'ẹnọhna, oge Josẹph. Ọtạkha imaan s'gol uge-ẹ k'ẹdwạngọ, ọbạra ọtạkha ọvạra ọkkọkka uge-ẹ. 43 Wa Phero khẹ ẹfa ọnạnga bẹ́, abẹ ayaar Josẹph k'ọkpaar kw'ẹnyạnyaang n'ẹtwạr mas'ọvaar kw'onyem-ẹ k'nnạm, bạra anạng p'achiẹ-ẹ eden n'awur ẹmạng bẹ, "Abạnga akhọmọ itọhng e, odennạng ukwuma e, abạnga arikh-ẹ eden oseng o." Mạnna wọ, ọvaar Phero ọnạng Josẹph ẹvaar ch'ofon kw'Ijip phyibh, ọdạbh.

44 Phero ọbạra oben Josẹph bẹ́, "Ọbạra ode bẹ́, Amma wọ nde ọvaarnạng kw'Ijip, k'ẹfa ch'kk'ọnnạnga, udik kwidede kw'ọnạng wạnọ-wạnọ obeni bẹ usi, oche kw'abeni, mạnna wọ akwẹ m'ode." 45 Wa ọvaar Phero ukp-ẹ Zaphenat-Panea, ọbạra ọnạng-ẹ uminanwa kw'okpen Asenat, kw'ode nnwa kw'Potiphera nwọ kw'ode ọfọhnẹja kwa On, k'ọbada. Ma wọ, ẹfa ch'Josẹph ẹnyaamẹ ẹbaabha Ijip.

46 Wa Josẹph ode icho ẹrạbh ukuma jobh k'okpe kw'ọtạm Phero abẹ ọtọhm sisi. Wa ubin urik ọvaar Phero, osenga ose ofon kw'Ijip phyibh. 47 Ma icho nnọ isenọfa s'uchiatọhk ọsaabh-ọsaabh, 48 Josẹph ọttạra atọhmnạng p'aning k'isek-isek kwẹ, atạk ichiakpo k'ọsaabh achok k'ifhon-diden s'Ijip. Ichiakpo p'abẹ achokhu k'efhon-diden kwidede, ede ichiakpo p'abẹ aphya ma ofon ngwọ. 49 Ma wọ, Josẹph ochokhu ichiakpo mbọ k'ọsaabh masẹ opong kw'ọraanga. Ichiakpo mbyọ n'ẹsaabhẹ tạrr abẹ ubhik dạk kasóng.

50 Brasẹ icho s'okwo f'ididen n'ukpir, Josẹph kk'ajunungva afa ofhona k'ikwanạng kwẹ, Asenat, kw'ode nnwa kw'Potiphera, kw'ode ọfọhnẹja kwa On. 51 Wa Josẹph okpe ocheden-nwa kwẹ, Manasẹ, oben bẹ, "Ubinọkpaabyi khaam usia mbonu irem saam phyibh, ọttạra efonamma ch'otte kwaam phyibh." 52 Ọbạra okpe nnwa kw'ottong ẹfa Ephraim, oben bẹ́, "Ubinọkpaabyi khaam usia bẹ́, nde otte kw'iva ma isek na k'irem saam." 53 Ma icho isenọfa nnọ s'ichiakpo ining k'ọsaabh k'Ijip, kk'isenga, 54 icho nnọkha isenọfa s'okwo fididen k'ikwikpira, k'oche kw'uwa Josẹph kk'ẹyaakha ọnạnga. Wa okwo fididen uning ma idifhon nnọ phyibh, bạra, ichiakpo p'ẹsaabh-ọsaabh ininga ma Ijip. 55 Masẹ uchiattọhk ọtạm wu-wor k'efhonfhạr ch'Ijip, anạng n'ata agạma okwo anạng ọvaar Phero, ọfha ọnạng bẹ uchiattọhk. Osenga ma, Phero oben anạng pẹ bẹ, "Abạnga asọhng k'Josẹph, asi udik kwidede kw'obeni bẹ, abạnga asi."

56 Masẹ okwo fididen mvọ k'ọnyaama ọbaabha Ijip, Josẹph obeni atọhmnạng pẹ bẹ, abẹ agwunga ọkhaangachọhm, ọfha abẹ akpe ichiakpo anạng anạ́ng p'Ijip. 57 Ma wọ, wa anạng n'abina k'ibyi-k'ibyi, akwu adebh uchiattọhk k'Ijip k'mbọhk s'Josẹph, ukwuru okwo fididen f'uning ọbaabha ọyagbin.