1 Masẹ Jekọb udir ichen, ose nnwọkka Ẹsau s'n'ukwu ọttạra anạng pẹ ẹnọhna. Ma wọ n'ọtạk iva pẹ okhebh ọnạng ab'ọkka. Ọnạng Lea, ọttạra Rachẹl, ọttạra atọhmnạng p'ipanạng pẹ afa. 2 Wa ọtạk atọhmnạng p'ipanạng pẹ, ọttạra iva pabẹ utima uchi eden, Lea ọttạra iva pẹ ator bẹ nnạm, bạra Rachẹl ọttạra nnwa kwẹ Josẹph n'akpong nnạm. 3 Wa Jekọb ofon ororo otor nnwọkka. Masẹ oseng ofor-ẹ k'ifor, ọrạkha uttima ititikha k'isisek nden nsenọfa, ọnạng Ẹsau ikpukpobha.

4 Okhenka, Ẹsau ọrabhọ ọta orena Jekọb, ọgaar-ẹ mbọhk k'ikhukhora, ọbạra ọbaakh-ẹ ettem. Abẹma anạng afa agạma. 5 Masẹ Ẹsau udir ichen ose ipanạng ọttạra iva, n'ọbạbhọ bẹ́, "Bạng anạng bọ p'abạnga atwạnọ kạkha o?"

Jekọb ọpọhn-ẹ bẹ, "Iva p'Ubinọkpaabyi kk'amma ọtọhmnạng kwọ ọnạnga k'ọphyaam ẹbọ mạma e."

6 Ma wọ atọhmnạng pẹ p'ipanạng, ọttạra iva pabẹ aseng agbaara Ẹsau, abẹ arạkha attima ititikha k'isisek anạng-ẹ ikpukpobha. 7 Ọpọhn kha, Lea ọttạra iva pẹ abạra attima ititikha k'isisek, bạra Rachẹl ọttạra Josẹph n'akpong nnạm akwu attima ititikha k'isisek anạng-ẹ ikpukpobha.

8 Ẹsau n'ọbạbhọ bẹ́, "Anạng mbọ p'wạra nkhebh, ọttạra itirakpo py'abẹ atim akwu, atọhmọ bẹ bẹ́, abẹ akwu asi yạn-o?"

Jekọb ọpọhn-ẹ bẹ́, "Attitte, ntim pyẹ nkwu bẹ́, nkwu ntạkha ọphyaam k'ititikha sọ e."

9 Ẹsau oben bẹ́, "Mma e, nnwọkka kwaam, ọma khaama ekpo pyọ, amma kk'ekpo nkhaama k'ọsaabh apyẹ ebeng-m."

10 Jekọb ọbẹ́, "Mma o, nchin-ọ-uchini. De ọphyaam f'asi anạng-m ubin-ọ k'ettem, tạkha ẹnạnga nja k'akhaam k'ọbọhk. Isia ch'nsi-ọ maa ode masẹ nse ititikha s'Ubinọkpaabyi, s'ammaam mbọhk atạkh-m. 11 Totokhạn, chera bẹ́, atạkha ẹnạnga ch'nnạng-ọ, s'Ubinọkpaabyi kk'aam udia, ọnạng-m fidede f'nnoru." Masẹ Jekọb ofon ororo ọkpạna bẹ́, oyonga nnwọkka m'ọtạkha ẹnạnga ch'ọnạng-ẹ, Ẹsau ukwu ochera, ọtakha.

12 Ma wọ Ẹsau n'obeni bẹ́, "Seng amfona, amma m'nchi-ọ eden."

13 Okhenka, Jekọb oben-ẹ bẹ́, "Attitte, ọma asong ma bẹ́, iva paam atim asạkh-ọsạkha, abẹ ẹfa kákhaam, ọttạra bẹ́, itirakpo pyaam itim irạk ayok. Ode antim bẹ ansenga k'ẹbhạr k'ẹbhạr k'iwu jạnẹ k'ubungu, nten nnọ phyibh m'ipope. 14 Tte aro kwaam uchi amma ọtọhmnạng kwẹ eden, ọfha ntima itirakpo mbya ọttạra iva mba, ngima nsenga, tạrr ankhebha ayok kha Seir."

15 Ma wọ, Ẹsau n'oben-ẹ bẹ́, "Tte ntte anạng paam bạnọ ọbọhk, abẹ atwạn abọ."

Jekọb ọpọhn-ẹ bẹ́, "Sam e, attitte. Ukwuru yạn kw'm'abạra aphyaangẹ ifor sọ ẹmma o? Amma nnoru ọphyaam pfọ mạnkkeni."

16 Ma iwu njọ jạnẹ, Ẹsau ubin osenga ọkpa nnạm k'Seir. 17 Okhenka, Jekọb oten k'Sukọt. Ma wọ kw'uwa usi ọchọhm kw'urukhu, ọbạra usi akkira p'itirakpo pyẹ. Ẹgwọ usi abẹ ayeri ibyi nnọ Sukọt.*

18 Wa k'ekpongannạm-kpe, Jekọb ubin k'Padan-Aram tạrr ukwu ukpira k'efhon-diden ch'Shẹkẹm, k'ẹkhạma ch'Kenaan, usi ibyibhingasẹ ma ọbạanga efhondiden njọ. 19 Wa Jekọb odebhi isisek nnọ s'uttim akkira k'mbọhk s'iva p'Hamọr, kw'ode otte kw'Shẹkẹm, k'asilva arạbh asen. 20 Ma ibyi nnọ rọ s'Jekọb usi ijabyi, ọbạra oyeri ibyi nnọ bẹ́, Ubinọkpaabyi ode Ubinọkpaabyi kw'Israẹl.