1 Wa Rẹhoboạm ofon k'Shẹkẹm, s'anạng p'Israẹl phyibh kk'afona kha bẹ́, abẹ ata anạng-ẹ ẹvaar. 2 Masẹ Jẹroboam kw'ode nnwa kw'Nẹbat ọbhaang udik ngwọ (k'okpe kw'utim uning k'Ijip, s'uwa ọrạbhọ ọvaar Sọlọmọn ọta uninga), ubina kha Ijip ukwuna. 3 Wa abẹ atọhmọ bẹ́ Jẹroboam ukwuna. Ẹma ọttạra ẹkhaan ch'anạng p'Israẹl phyibh afona ata akhebha Rẹhoboam, aben-ẹ bẹ́: 4 "Wa atte oge mạna ọyaak kw'ọdọhbh-ọdọhbh. Ọma m'ayekhi mạna ẹtọhm-kpọhkha nja, ọttạra ọyaak kw'oge mạna, khiri amạna m'ansi ọtọhm usi annạng-ọ."

5 Rẹhoboam ọpọhna bẹ́, "Abạnga asọhng afona, akpa nnạm k'iwu ittaan." Mạnna wọ kw'anạng mbọ afon.

6 Ma wọ ọvaar Rẹhoboam ọta okhebha adennạng p'uwa kk'ọtọhm asia anạng otte Sọlọmọn, k'okpe kw'uwa urukhu akpen. Ọbạbh bẹ bẹ́, "Yạn wọ kw'abạnga akkẹ bẹ́, wạra m'mmina anạng mbọ idik nnọ?"

7 Abẹ abhina bẹ́, "De chemma s'm'akke ade ọtọhmnạng anạng anạng mba, asi ọtọhm anạngẹ bẹ, abạra anạngẹ bẹ ibhina ọkkachẹ, abẹ m'acher-ochera ade atọhmnạng pọ k'okpe kwidede ẹ."

8 Okhenka, Rẹhoboam ufhumu ntọhna s'adennạng mbọ anạng-ẹ, otera ọta ọbạbh ibhagbọ sabẹ atwạnọ abạr, p'n'abạra asi abẹ ọtọhm. 9 Ọbạbh bẹ bẹ́, "Ntọhna sabạnga ide yạn? Yạn wọ m'mmina anạng mba p'akwu aben-m bẹ́, ‘Yekhi mạna ọyaak kw'uwa atte oge mạna’?"

10 Ibhagbọ nnọ sabẹ kk'atwạna abạr, abhin-ẹ bẹ́, "Anạng mba khọ abena bẹ́, ‘Yekhi mạna ọyak kw'uwa atte oge mạna, age mạna kwọ kw'obhekh-obhekhi.’ M'atek bẹ bẹ́, ‘Amma ẹnọhna-kpikperi chaam idini ẹyọhnga irin ch'otte kwaam e. 11 Otte kwaam wa oge bạnga ọyaak kw'ọdọhbhọ-ọdọhbh, amma m'ntera nsi awẹ odo ọdọhbh-ọdọhbh.Wa otte kwaam utim achiva uvun bạnga, amma m'abạra ntima afonukpan mvun bạnga e.’ "

12 Iwu nnọ ittaan ikwu iseng, Jẹroboam ọttạra anạng mbọ phyibh akpa nnạm k'Rẹhoboam, k'oche kw'ọvaarnạng kk'obena bẹ́, "Abạnga akpa nnam k'iwu ittaan." 13 Ọvaarnạng ubhin anạng mbọ udik ngwọ ẹkkam-ẹkkam. Ufhum ntọhna s'adennạng anạng-ẹ, 14 ọtạkha ntọhna s'ibhagbọ, oben bẹ́, "Wa otte kwaam oge bạnga ọyaak kw'ọdọhbhọ-ọdọhbh, amma m'ntera nsi awẹ odo ọdọhbh-ọdọhbh. Wa otte kwaam utim achiva uvun bạnga, amma m'ntima afhonukpan mvun bạnga." 15 Ma o, ọvaarnạng anạng mbọ itọhng nọ́khọhma, ukwuru s'uwa idik nnọ ibin k'Ọvaar Ubinọkpaabyi, ọfha ọtọhnga kw'Ọvaar Ubinọkpaabyi ọkhaama ẹyaakha, kw'kk'Ahija kw'ubin Shilo, utima ọkpaak, ọnạng Jẹroboam kw'ode nnwa kw'Nẹbat.

16 Masẹ anạng p'Israẹl phyibh ase bẹ́, ọvaarnạng ufhum-ufhum bẹ́ ọkhọmọ bẹ itọhng, abẹ n'abhin ọvaarnạng bẹ́:

"Bạng okhebh vọ f'amạna ankhaam k'Devid o,

mbạng vọ ọkpạkhẹ mạna k'nnwa kw'Jẹsẹ?

Anạng p'Israẹl o, akpa nnam kabạnga k'ichọhm!

Devid o, ọma oyeni kkeri ẹchọhmfhạr chọ e!"

Mạnna wọ anạng p'Israẹl asengi abhạna k'abẹ k'ichọhm. 17 Okhenka, Rẹhoboam ofon ororo ọdạbh anạng p'Israẹl p'uwa arukhu k'ifhon s'Juda.

18 Wa ọvaar Rẹhoboam ọtọhmọ Adoniram, kw'ode okkeri-itọhm s'nạ́n akpokha ipe, okhenka, anạng p'Israẹl phyibh atọhbh-ẹ ata, ope. Ma wọ ọvaar Rẹhoboam ọrạbhọ ọta uvura k'ọkpaar kwẹ kw'nnyạnyaang n'itwạr ofona k'Jẹrusalẹm. 19 Tạma ma, anạng p'Israẹl n'awun ẹvaar ch'Devid tạrr ukpira maa.

20 K'okpe kw'anạng p'Israẹl phyibh abhaang bẹ́, Jẹroboam kk'ukwuna, abẹ atọhm anạng ayer-ẹ k'ininga, anạngẹ ẹvaar ch'ọdạbhẹ Israẹl bẹ́ wạmm. Ẹkhạma ch'Juda mạnkkeni jọ wa itwung ẹcho ẹnạng ẹvaar ch'Devid.

21 Masẹ Rẹhoboam ukpir k'Jẹrusalẹm, otobha adikkobh p'akpọhkhọ irima k'Juda ọttạra k'Bẹnjamin, anạng nnọhna ẹnọhna ukuma arạbh afa ukuma jobh, ọfha abẹ ata arima Israẹl abẹ, ọfha abẹ abạra akpa nnạm atạkha efhondiden anạng Rẹhoboam, kw'ode nnwa kw'Sọlọmọn.

22 Okhenka, Shẹmaya kw'ode usi-ẹyaakha kw'Ubinọkpaabyi, ọbhaang ọtọhnga kw'Ubinọkpaabyi bẹ́: 23 "Kpaak Rẹhoboam kw'ode nnwa kw'Sọlọmọn, kw'ọbạra ode ọvaarnạng kw'Juda, ọttạra anạng p'Juda, ọttạra anạng p'Bẹnjamin phyi-phyibh bẹ́: 24 ‘Maa wọ ode udik kw'Ọvaar Ubinọkpaabyi ọkpaakhẹ bẹ: abạnga nạ́ngẹ avur ata arima anạng p'Israẹl p'ade ivotte pabạnga abẹ. Ọnạng-ọnạng osong ọbhạna, khiri udik ngwa ubin k'akhaam.’ " Mạnna wọ abẹ abhaang ọtọhnga kw'Ọvaar Ubinọkpaabyi, akpa nnạm abhạna k'oche kw'Ọvaar Ubinọkpaabyi kk'bẹ ọtọhna.

25 Wa Jẹroboam usi Shẹkẹm k'okpecho kw'Ephraim, uruk ma. Ubina ma ọta usi Pẹniyẹl.

26 Jẹroboam ọkkẹ kha ettem chẹ bẹ́, "Efhondiden bạra ẹbhạkhẹ ẹkpa nnạm k'ẹchọhmfhạr ch'Devid ttạng e. 27 De anạng mba afon k'Jẹrusalẹm bẹ, abẹ ata afọhnọ nja k'ọchọhm kw'Ọvaar Ubinọkpaabyi, abẹ m'abạra asạkha echo anạng aro kwabẹ, Rẹhoboam, kw'ode ọvaarnạng kw'Juda, Abẹ m'afhọ-m, abhạkhẹ akpa nnạm k'ọvaar Rẹhoboam."

28 Masẹ kk'ọbạbha, ọvaarnạng utima gol usi akpatava afa p'ẹbhaam. Oben anạng mbọ bẹ́, "Akwẹ ọmma-ọmma ọnạngẹ bạnga bẹ́, abạnga n'abina afona k'Jẹrusalẹm. Anạng p'Israẹl o, akkeri akha pabạnga mạma, p'atim bạnga abina k'Ijip e." 29 Ọtạkha ọkha vạnọ uttima k'Bẹtẹl, ọtạkha mvọkha uttima k'Dan. 30 Udik ngwọ n'ukwu ode ipyibha; anạng n'akwu akpobha ọkha vạnọ k'Bẹtẹl, abạra akpa nnạm afona k'Dan ata akpobha ọkha mvọkha.

31 Jẹroboam ummunu akhapa k'ikpukpobha-byi k'ọyaankpa, otekha anạng k'ibyi-k'ibyi usi bẹ afọhnẹja, ọbạra abẹ k'ẹnạmma ch'Lẹvi nábina. 32 Jẹroboam orengi ophye kw'ọttong esenọttaan, ochok masẹ erobhawu, masẹ erobha-khira njọ ch'abẹ n'asi k'Juda, n'ọfọhnọ nja k'ijabyi. Wa n'ọfọhnọ nja nnọ ọnạng akpatava p'kk'usia k'Bẹtẹl, ọbạra ochok afọhnẹja k'ikpukpobha-byi s'ọyaankpa s'kk'usia k'Bẹtẹl. 33 K'iwu chi, k'ophye kw'ottong esenọttaan, kw'ode ophye kw'ẹma oyeni otek, ọfọhnọ nja k'ijabyi s'kk'usia k'Bẹtẹl. Ma wọ ochokhu erobhawu ọnạng anạng p'Israẹl, ọbạra uvura ofona k'ijabyi ọta ọnạng nnạnga.