1Avaarnạng 22

Mikaya usi nyaakha otena Ahab

1 K’icho ittaan, anạng p’Aram ọttạra anạng p’Israẹl ekpong nárima. 2 Okhenka, k’icho kw’ottong icho ittaan, Jẹhoshaphat kw’ode ọvaarnạng kw’Juda ofon ọta ose ọvaarnạng kw’Israẹl. 3 Ọvaarnạng kw’Israẹl kk’atọhmnạng pẹ obena bẹ́, "Abạnga kásong bẹ́, amạna mba bọ ankhaam Ramọt-Gilead, okhenka, m’ansenga yạn antạkha kwẹ k’mbọhk s’ọvaarnạng kw’Aram?"

4 Ma wọ nọbạbhọ Jẹhoshaphat bẹ́, "S’m’atwạn-m abẹ anta annima Ramọt-Gilead abẹ?"

Jẹhoshaphat ubhina ọvaarnạng kw’Israẹl bẹ́, "Amma nde oche kw’ọma ade, arim-mkpong paam ade oche kw’pọ ade, nnyạnyaang saam ide masẹ nnọ sọ." 5 Okhenka, Jẹhoshaphat ọbạra oben ọvaarnạng kw’Israẹl bẹ́, "Ochedendik ode bẹ́, m’aror ntọhna s’Ọvaar Ubinọkpaabyi."

6 Ma wọ ọvaarnạng kw’Israẹl oyeri asi-ẹyaakha p’akpir anạng ẹnọhna, ọbạbh bẹ bẹ́, "Anta annima ekpong ọttạra anạng p’Ramọt-Gilead abẹ sa a?"

Abẹ abhina bẹ́ "Sọhng, khiri Ọvaar Ubinọkpaabyi m’otạkha bẹ otạkha oge ọvaarnọng k’mbọhk."

7 Okhenka, Jẹhoshaphat ọbạbh bẹ́, "Usi-ẹyaakha kw’Ọvaar Ubinọkpaabyi dạk ma kóde kw’m’ankke andwạn o?"

8 Ọvaarnạng kw’Israẹl ọpọhna Jẹhoshaphat bẹ́, "Ankhaam usi-ẹyaakha wạnọ kw’okpen Mikaya, kw’ode nnwa kw’Imla, kw’m’ankke-oke ansenga ma akhẹ andwạn Ọvaar Ubinọkpaabyi. Okhenka, khaam idik kọ́daakhẹ, ukwuru bẹ́, ẹyaakha ọkkachẹ otena abaam mókke ọnạng."

Jẹhoshaphat ubhina bẹ́, "Tte ọvaarnạng nạngẹ udik-demakwẹ ngwọ ọkpaakhẹ."

9 Ma wọ ọvaarnạng kw’Israẹl noyeri ọtọhmnạng kwẹ wạnọ, oben bẹ́, "Tima Mikaya kw’ode nnwa kw’Imla, akwu k’okpe-k’okpe."

10 Wa ọvaarnạng kw’Israẹl, ọttạra Jẹhoshaphat kw’ode ọvaarnạng kw’Juda, asi mvaar-nya sabẹ aninga k’mvaar-chi sabẹ, k’ibyi sa bẹ n’aninga akhaan akwumạma, ọbaanga ẹbaakhamma ch’Samariya. Asi-ẹyaakha phyip n’asi nyaakha ma bẹ k’ititikha. 11 Zẹdẹkaya kw’ode nnwa kw’Kenaana utima mbaanga usi abhik, oben bẹ́, "Ma wọ ode udik kw’Ọvaar Ubinọkpaabyi ọkpaakhẹ bẹ́, ‘Abạnga m’atima pẹ arima anọng p’Aram abẹ, tạrr abạnga adimi bẹ phyip.’ "

12 Asi-ẹyaakha mbọkha phyibh n’asi ẹyaakha njọ jạnẹ jạnẹ, abẹ n’abeni bẹ́, "Abạnga arima Ramọt-Gilead abẹ, akhema, kkeri Ọvaar Ubinọkpaabyi m’ọtạkha kwẹ oge ọvaarnọng k’mbọhk."

13 Ọkpaakh-ẹkkaabha kw’kk’ofona bẹ́, ọta oyeri Mikaya, oben-ẹ bẹ́, "Kker e, asi-ẹyaakha mbọkha phyip, n’asi ẹyaakha ch’ekhema anạng ọvaarnạng, ọbaan bẹ́, ọma abạra asi ukhira ngwọ gwạnọ."

14 Okhenka, Mikaya oben bẹ́, "Oche ngwọ kw’Ọvaar Ubinọkpaabyi urukhu akpen, amma m’kpaakh-ẹ udik demakwẹ kw’idede kw’Ọvaar ubinọkpaabyi ọkpaakh-m."

15 Ma ukpir, ọvaarnạng ọbọbh-ẹ bẹ, Mikaya, amạna anta anima Ramọt-Gilead abẹ o?"

Mikaya ubhinẹ bẹ, "Sọhng ata akhem-ẹ, kkeri Ọvaar Ubinọkpaabyi m’ọtạkha kwẹ ugiọ-ọ k’mbọhk."

16 Ọvaarnạng oben-ẹ bẹ, "Ikpe iphyaang s’amma mạnsiọ-ọ achekhi ke che ch’Ọvaar Ubinọkpaabyi bẹ́, akpaakh-m udik-ọkka ọ?"

17 Mikaya ubhin-ẹ bẹ́, "Amma nse s’anạng p’Israẹl phyibh n’araama k’akpecho masẹ arạkhạmaan p’nạn akkeri-arạkhạmaan akhaam. Ọvaar Ubinọkpaabyi oben bẹ́, ‘Anạng mba atim-eden k’akhaam. Tte ọnạng kwidede ọbhạna k’idira.’ "

18 Ọvaarnạng kw’Israẹl oben Jẹhoshaphat bẹ́, "Wạra khọ nạ́ntekha bẹ́, ẹyaakha ẹkkachẹ ch’m’ijibh-m m’usio o?"

19 Mikaya ofona ororo n’ọkpaak bẹ́, bhaanga udik kw’Ọvaar Ubinọkpaabyi: amma nse Ọvaar Ubinọkpaabyi s’uning ẹyạr k’ẹvaar-chi chẹ, ọttạra ọsaabh f’uning k’ẹrọng k’udimbọhk ọttạra k’ọkwabọhk kwẹ. 20 Ọvaar Ubinọkpaabyi oben bẹ́, ‘Anẹ wọ m’ọbọhra Ahab ọta urima Ramọt-Gilead abẹ, osengama ope?’ Ibhina ede nkhạmọ-nkhạmọ.

21 K’ekponga-nnạm, iguguma ikwu ikwe ebe Ọvaar Ubinọkpaabyi k’ititikha eben bẹ́, ‘Amma m’bọhr-ẹ ọbọhra.’

22 Ọvaar Ubinọkpaabyi ọbọbh bẹ́, ‘Masenga yạn?’

" ‘Amma n’nta nde iguguma ch’afhạra k’ẹmma ch’asi-ẹyaakha pẹ phyip.’

Ọvaar Ubinọkpaabyi oben bẹ́, " ‘Makke-okke abọhr-ẹ. Sọhng ata asi ochengwọ.’

23 "Ọvaar Ubinọkpaabyi kk’egwugwuma ch’afhạra ọbọhk utia ẹnwa asi-ẹyaakha pọ phyip. Ọvaar Ubinọkpaabyi kk’ẹyaakha-pyibha ch’m’idim-ọ usia."

24 Mạna wọ Zẹdẹkaya kw’ode nnwa kw’Kenaana ubin ọta ububha Mikaya ọbọhk k’ititikha, ọbọbh bẹ́, "Kha yạn wọ kw’iguguma ch’ibin k’Ọvaar Ubinọkpaabyi n’ette amma ọbọhk, ẹta ẹkpaak udik ẹnạng ọma o?"

25 Mikaya ubhina bẹ́, "Ọma m’asonga-ọsonga ma iwu njọ ch’m’arạbh bẹ́, ata atubha k’ẹmaanggọ ẹtaanga."

26 Ọvaarnạng kw’Israẹl ọnạng ẹfa, ọben bẹ́, "Abạnga atọm Mikaya ọkpa nnạm otor Amọn, kw’ode ọdạbhẹ kw’efon-diden, ọttạrạ Joash kw’ode nnwa kw’ọvaarnạng 27 aben bẹ́, ‘Ọvaarnạng obeni bẹ́: abạnga age ọnạng nwa k’mgbakkọhbhọ, abạnga uchiattọhk khẹ kánạng oyonga brẹd ọttạrạ asi, uninga tạrr nkwuna k’idira.’ "

28 Mikaya oben bẹ́, "Ode ọma akwun k’idira, ma wọ ode bẹ Ọvaar Ubinọkpaabyi kha khaam nósenga ọkpaak kwẹ." Ọbạra ọttạra bẹ́, abạnga mba phyibh abhaanga ọtọhnga kwaam!"

Obo kw’Ahab

29 Ma wọ, ọvaarnạng kw’Israẹl, ọttạra Jẹhoshaphat kw’ode ọvaarnạng kw’Juda, afona ata arima anạng p’Ramọt-Gilead abẹ. 30 Ọvaarnạng kw’Israẹl oben Jẹhoshaphat bẹ́, "Amma m’mfhona ẹnya n’tima nta ekpong njọ, okhenka, ọma ge ẹvaar-nya chọ." Ma wọ kw’ọvaarnạng kw’Israẹl ofhon ẹnya ota ekpong.

31 Ode s’ọvaarnạng kw’Aram kk’adecho pẹ p’ijaar s’nnyạnyaang n’itwạr, anạng ẹrạbh ukuma jobh-kamfa, ẹfa ọnạnga bẹ́, "Abạnga ọnạng ọdwạkh-ọdwạk, ọsạkh-ọsạkha, ọbạra ọbạr-ọbạr o, abẹ kárima, oyonga ọvaarnạng kw’Israẹl." 32 Okpe kw’adecho p’ijaar s’nnyạnyaang n’itwạr n’ase Jẹhoshaphat, abẹ akkẹ bẹ́, "K’udik-ọkka, ọvaaarnạng kw’Israẹl wọ ma." Mạnna wọ abẹ abhạkhẹ bẹ́, arima abẹ. Okhenka, Jẹhoshaphat ọwọmọ ẹmạng. 33 Masẹ adecho p’ijaar s’nnyạnyaang n’itwạr n’atini bẹ́, ọvaarnạng kw’Israẹl sạng, abẹ akum-ẹ khukhubh.

34 Masẹ ọtta-uyuk wạnọ n’ọkhạkh-ẹ ọtta uyuk, kw’osengi k’ẹphaangẹ k’ẹbhaang jạnẹ k’ekpongkpo py’ifọr, ukhum ọvaarnạng kw’Israẹl. Osenga-ma ọvaarnạng oben ọyaar-ijaar kwẹ kw’nnyạnyaang bẹ́, "Bhạkhẹ ọkpaar, atim-m abina ma ekpong kpa, kkeri abẹ khaam ọttọhk asia." 35 Wa ekpong jọ irim k’iwu ibunguchẹ. Abẹ atạkha ọvaarnạng abe idumsẹ ma ọkpaar kw’nnyạnyaang ekkeri ititikha k’Aram. Isẹ iyin k’ebhena ch’abẹ asi-ẹ ibyenga k’ọgbarẹ k’ọkpaar kw' nnyạnyaang n’itwạr, masẹ n’ukpir k’ẹchọkha, ope. 36 Ukwu ukpira k’ọchọkha-dudon, abẹ awon ẹmạng k’ibyibhigasẹ s’arim-nkpong p’Israẹl aben bẹ́, "ujunung kw’idede ọkpa nnạm ọbhạna k’ofon kwẹ. Ujunung kw’idede ọsọng obhạna k’ẹkhạma chẹ ẹ!"

37 Wa ọvaarnạng ope, abẹ atim-ẹ akwuna akwa anọhnga k’Samariya. 38 Abẹ ata akpobhu ọkpaar kw’nnyạnyaang, k’isipe jạnẹ ch’Samariya (k’ibyi sẹ asasa n’akpobha asi), mpfa ibạra ittaakhẹ isẹ sẹ, otor kk’ọtọhga kw’Ọvaar Ubinọkpaabyi kk’ẹyaakha usia.

39 Idik idwạkh-ọdwạk s’ẹvaar ch’Ahab, ọttạrạ idik s’usi bẹ phyip, ọvaarter kw’usi utima ekpo masẹ nnyi-sa odokha, ọtạrạ efhon-diden ch’usi ikpọkhọ, abẹ akkẹrẹ sẹ k’nwẹr s’atạmadik s’itor k’avaarnạng p’Israẹl. 40 Wa Ahab ope otor ab’otte. Ahaziya kw’ode nnwa kwẹ wọ-nukwu ọdabh ẹvaar.

Jẹhoshaphat kw’ode ọvaarnạng kw’Juda

41 Wa Jẹhoshaphat kw’ode nnwa kw’Asa ukwu ode ọvaarnạng kw’Juda, k’icho kw’ottong inebạng kw’Ahab kk’ọvaarnạng kw’Israẹl udia. 42 Wa Jẹhoshaphat ode icho ẹrạbh ukuma chi, k’okpe kw’ode ọvaarnạng, ọdabh Jẹrusalẹm k’icho ẹrạbh ukuma asen.Wa ọkka okpen Azuba, kw’ode nnwa kw’Shilhi. 43 Wa usi idik s’itor-otor k’ititikha s’Ọvaar Ubinọkpaabyi, otor ntwạkhọ s’otte Asa, sẹ n’ọpạna. Osenga-ma, wa ikpukpobhabyi s’ọyaankpa abẹ khẹ navạkha-na, anạng mba afon ororo n’asi njafọna, abạra akạmmọ insẹns ma ibyi nnọ 44 Wa Jẹhoshaphat, obạra uruk k’ẹmẹm ọttạrạ ọvaarnạng kw’Israẹl.

45 Idik idwạkh-ọdwạk k’ẹvaar ch’Jẹhoshaphat, idik s’usi ọttạrạ m’kpong s’urim, abẹ akkẹr-ẹ sẹ k’nnwẹr s’itạm’adik ator k’avaarnạng p’Juda. 46 Wa ukhibhi akhapa p’asasa p’ajunung p’wa arikhi ma ẹkhạma njọ phyip, k’ọkpe kw’ọtte Asa utim urukhu akpen. 47 Ma ọkpe ngwọma, wa ọvaarnạng k’Edom kode. Ọdạbhẹ-ẹkhạma wọ wa ode ọvaarnạng.

48 Wa Jẹhoshaphat usi ijaar s’asi s’Tashish k’ọsaabh, p’n’utima ọta odebh gol k’Phir. Okhenka, wa abẹ ibyi nákke ata, abẹ n’akpong k’Ẹziyọn-Gẹbẹr. 49 Ma okpe ngwọ, Ahaziya kw’ode nnwa kw’ahab oben Jẹhoshaphat bẹ́, "Tte ajunung paam ayaar ijaar saam atwạn attạrạ ajunung pọ." Jẹhoshaphat ufhum.

50 Wa Jẹhoshaphat ope ọtor ab’otte, abẹ anọhng-ẹ k’efhon-diden ch’Devid kw’ode otte. Jẹhoram kw’ode nnwa kwẹ wọ n’ọdabhẹ ẹvaar njọ.

Ahaziya kw’ode ọvaarnạng kw’Israẹl

51 Wa Ahaziya kw’ode nnwa kw’Ahab ukwu ode ọvaarnạng kw’Israẹl k’Samariya k’icho ifa, k’icho kw’ittong icho chi-khamfa s’Jẹhoshaphat kk’ọvaarnạng udia k’Juda. 52 Wa usi ibyibya-dik k’ititikha s’Ọvaar Ubinọkpaabyi, ukwuru bẹ́ otoru ntwạkhọ s’otte ọttạrạ s’okka ọttạrạ ntwạkhọ s’Jẹroboam kw’ode nnwa kw’Nẹbat, kw’usi anạng p’Israẹl asi ipyikha. 53 Wa ọsạk echo ọbạra okpobha Baal, k’oche kw’wa otte kk’usia, kw’ugbikhi idwạdwạkhọ s’Ọvaar Ubinọkpaabyi, kw’ode Ubinọkpaabyi kw’Israẹl.