1 Wa Ahab ukwu ọkpaak Jẹzẹbẹl udik kwidede kw'Elija kk'usia, ọttạra oche kw'utim ọkkangkkang-kkro ọfhọ asi-ẹyaakha phyibh. 2 Osenga ma, Jẹzẹbẹl ọtọhm ọkpaakhẹ-ẹkkaabha ọta oben Elija bẹ́, "Tte akha asi-m ukhira kwidede kw'ọdaakhẹ bẹ, de uphyini k'okpe-demakwẹ ngwa, nạn akpen pọ nạ́ndima masẹ usi-ẹyaakha wạnọ, k'ikhaana s'asi-ẹyaakha mbọ p'afhọ."

3 Wa ojora ọvạk Elija, ọrạbh ọkkaana akpen pẹ. Masẹ ukpir k'Beershẹba, k'ẹkhạma ch'Juda, ubin urik ọtọhmnạng kwẹ ma. 4 Utim iwu jạnẹ usi osenga ukpira k'ibyi s'anạng nạnárukha. Ukwu ukpira k'ofo kw'ichi jạnẹ, uninga ẹyạr ma ose njọhm bẹ́ ope, oben bẹ́, "O Ọvaar Ubinọkpaabyi, amma idik kk'aam igba e, tạkha akpen paam, ọgba amma sạng njibhi nyọhnga abaro paam." 5 Mạnna wọ uyim ma ofo kw'ichi njọ isekhisek, ọttaabha.

Ma ibua-ibua, oseng-eden kw'Ubinọkpaabyi utwu-ẹ, oben bẹ́, " Bina achi ọttọhk." 6 Udira achen okkeri ọbaabha, ose brẹd kw'abẹ abhaabhẹ k'ekpon, kw'uning ọbaang-ẹ ma echo, ọttạra igbạre s'asi. Uchi, ọbạra ogwo, ọbạra uyima.

7 Wa oseng-eden kw'Ubinọkaabyi ọkpa nnạm ottong ifa, ukwu utwu-ẹ, oben bẹ́, "Bina achi ọttọhk khiri osenga kw'm'asi ubhiri oseng eden." 8 Mạnna wọ ubin uchi, ọbạra ogwo. Osenga ma ọkhaama ẹfa ch'utim usi osenga k'iwu arạbh afa, ọttạra nnungu-wu arạbh afa, tạrr ukpira k'Horẹb, kw'ode okpecho kw'Ubinọkpaabyi. 9 Uyima k'ọtakpamma ma irungu njọ.

Wa Ọvaar Ubinọkpaabyi ọkpaakhẹ Elija abẹ, oben bẹ́, "Elija, n'asi mbạng maa?"

10 Elija ubhina bẹ́, " Amma kk'aam obhema k'idik s'Ọvaar Ubinọkpaabyi kw'Ẹfa phyibh. Anạng p'Israẹl kk'echekha chọ afhuma, abẹ avọhkhọ njabyi sọ, abạra atima ọkkangkkang-kkro afhọ asi-ẹyaakha pọ. Amma mạnkkeni wọ n'nnikhi, mạntọmma, abẹ n'akhonga bẹ́ abẹ agba afhọ-m."

11 Ọvaar Ubinọkpaabyi oben bẹ́, "Yin kha iyaan ata abe k'okpehco k'ititikha s'Ọvaar Ubinọkpaabyi, khiri amma Ọvaar Ubinọkpaabyi n'abạra nseng nnyong-ọ."

Ma wọ ufum kw'ọkpọhkhọ-ọkpọhkhọ ugum, ọphyaakhẹ akpecho, ọbạra ọphyaakhẹ atakpa k'ititikha s'Ọvaar Ubinọkpaabyi. Okhenka, wa Ọvaar Ubinọkpaabyi ma ufum nwọ kòde. Masẹ ufum nwọ kk'osenga, ibum ch'isisek isi, okhenka, wa Ọvaar Ubinọkpaabyi ma ibum ch'isisek kòde. 12 Masẹ ibum njọ ch'isisek ikum, ekpon iyin. Okhenka Ọvaar Ubinọkpaabyi ma ekpon njọ kòde. Ayongu ekpon njọ, n'ode idik-kkaabha. 13 Masẹ Elija ọbhaang ẹkkaabha njọ, ọkwạnọ ọnọhma-wuraam kwẹ ububha k'ititikha, uyin k'iyaan ọta obe k'ọtakpamma.

Ma wọ ọtọhnga iyini ọbạbh-ẹ bẹ́, " Elija n'asi mbạng maa?"

14 Ubhina bẹ́, "Amma kk'aam obhema k'idik s'Ọvaar Ubinọkpaabyi kw'Ẹfa phyibh, Anạng p'Israẹl kk'echekha chọ afhuma, abẹ avọhkhọ njabyi sọ, abạra atima ọkkangkkang-kkro afhọ asi-ẹyaakha pọ. Amma mạnkkeni wọ n'nnikhi, kw'abẹ n'akhonga bẹ́, abẹ agba afhọ-m."

15 Ọvaar Ubinọkpaabyi oben-ẹ bẹ́, "Sọhng akpa nnạm, asenga k'eden ch'wạra aseng akwu, afona k'ibyi s'anạng nạnárukha s'Damaskọs. De akpir kha, byenga Hazayẹl ana k'echo, asiẹ-ẹ ọvaarnạng kw'Aram. 16 Abạra abyenga Jẹhu, kw'ode nnwa kw'Nimshi ana k'echo, asiẹ-ẹ ọvaarnạng kw'Israẹl. Abyenga Elisha, kw'ode ujunung-nnwa kw'Shaphat kw'ubin Abẹl-Mẹhola ana k'echo, ọfha otera echo chọ masẹ usi-ẹyaakha. 17 Jẹhu m'ọfhọ ọnạng kwidede kw'ọnnaang ọkkangkkang-kkro kw'Hazayẹl, Elija m'ọbạra ọfhọ ọnạng kwidede kw'ọnnaang ọkkangkkang-kkro kw'Jehu. 18 Okhenka, amma nchokhu anạng nnọhna chikhamfa ukuma arạbh jobh k'Israẹl, p'nạn ndwudwungu tạm nákpikha anạng Baal, abẹ kẹ nábạra abaakha."

19 Wa Elija ubin ma ọta ose Elisha, kw'ode nnwa kw'Shaphat, s'n'utima mmaam ẹrạbh ukuma annebung utubh isisek, ẹma oyeni n'ọyaar mmaam s'ikpong nnạm s'ittong ẹrạbh ukuma annebung. Elija ọta okhebha Elisha, ọwạra ọnọhma-wuram kwẹ, ugiẹ-ẹ. 20 Elisha ubina urik mmaam sẹ, ọrạbh otor Elija nnạm, oben bẹ́, " Tte nta mbaaakha otte kwaam, ọttạra ọkka kwaam, mbạra mben bẹ bẹ́, ‘Abạnga ayima e,’ ọfha nkwu amfona,"

Elija ubhina bẹ́, "Kpa nnạm asọhng, amma kọ eden nạ́mkpa."

21 Mạnna wọ Elisha ubin urikh-ẹ, okpa nnạm. Ọtạkha mmaam sẹ, ọfhọ. Ọtạkha ẹtọhmkpo py'n'utima utubh isisek umuma ekpon ch'utim ọwọhn nten nnọ, bạrasẹ n'ọtạk ọnạng anạng pẹ, abéẹ achi. Mạnna wọ ubin ọtwạn Elija abẹ, ọta ode ọtọhmnạng kwẹ.