1 Wa Bẹn-Hadad, kw'ode ọvaarnạng kw'Aram otobh akpongnạng pẹ phyibh. Avaarnạng ẹrạbh ukuma jobh-kamfa, atim nnyạnyaang sabẹ ọttạra ijaar s'nnyạnyaang ata akhạbha Samariya, arima abẹ. 2 Ọtọhmọ akpaakh-nkkaabha p'efhondiden bẹ́, abẹ ata akhebha Ahab kw'ode ọvaarnạng kw'Israẹl, 3 aben bẹ́, "Maa wọ ode udik kw'Bẹn-Hadad ọkpaakhẹ: ‘Silva ọttạra gol, ọttạra ipanạng pọ p'ajibhi ọtạm akwu attạra k'iva pọ, ade paam.’ "

4 Ọvaarnạng kw'Israẹl ubhina bẹ́, "Tte akwẹ ode oche kw'aro kwaam kw'ode ọvaarnạng, ọkpaakhẹ. Amma ọttạra ọtọhk fidede f'nkhaam ode pfọ."

5 Akpaak-nkkaabha abạra akwu aben bẹ́, "Ma wọ ode udik kw'Bẹn-Hadad ọkpaakhẹ bẹ́, ‘Amma ntọhmọ ẹkkaabha bẹ́, anạng-m silva ọttạra gol ọttạra ipanạng pọ ọttạra iva. 6 Okhenka, uphyini k'okpe demakwẹ ngwa, amma m'ntọhm atọhmnạng paam akwu anwa k'ọvaarter kwọ, ọtạra k'ichọhm s'atọhmnạng pọ. Abẹ m'avạkh-ọ ekpo py'ẹbạr-ọ udik phyibh ana, atima afona.’ "

7 Ọvaarnạng kw'Israẹl oyeri adennạng p'ẹkhạma njọ phyibh, oben bẹ bẹ́, "Abạnga akkeri oche kw'ujunung nwa n'oror ẹkhọr o! Masẹ ọtọhmọ bẹ́, nnạng-ẹ ipanạng paam, ọttạra iva paam, ọttạra silva, ọttạra gol paam, amma khẹ pyẹ nạ́nnạma."

8 Adennạng ọttạra anạng phyibh abhina bẹ́, "Khẹ itọhng kákhọhmọ, bạra tạm nukpir kw'm'asi oche kw'obeni."

9 Osenga ma, ubhina atọhmnạng p'Bẹn-Hadad bẹ́, "Abạnga akpaak aro ọvaar kwaam bẹ́, ‘Ọtọhmnạng kwọ m'usi udik kwidede k'oche kw'wạra achi eden aben bẹ́, usi. De node ngwa, amma kwẹ mạ́nkke nsi e.’ " Abẹ afona ata akpaak Bẹn-Hadad ibhina njọ.

10 Bẹn-Hadad ọtọhm ẹkkaabha ẹdwạkh-ọdwạk ọnạng Ahab, oben bẹ́, "De ububuma kw'ufu ẹbọhkpattem urikhi k'Samariya kw'm'obenga ajunung paam makhebh, tte akha mbọ asi-m oche kw'ọdaakhẹ bẹ."

11 Ọvaarnạng kw'Israẹl ubhina bẹ́, "Abạnga akpaakh-ẹ bẹ́, ‘Ọnạng nwọ kw'oge ekpong-kpo oge, nạ́ng ẹmma usi masẹ ọnạng kw'n'ọwạr-ọwạra ẹ.’ "

12 Wa Bẹn-Hadad ọbhaang ẹkkaabha njọ k'ọkpe kw'ẹma ọttạra ayohk-avaar n'agwo atwuk k'abẹ k'ichọhm: ọnạng ajunung pẹ ẹfa bẹ́, "Abạnga ado ifọr ata arima bẹ abẹ." Mạnna wọ abẹ ado ifor ata arima efhondiden abẹ.

13 Wa usi-ẹyaakha ukwu okhebha Ahab, kw'ode ọvaarnạng kw'Israẹl, ukwu ọnạng ẹyaakha, oben bẹ́, "Maa wọ ode udik kw'Ọvaar Ubinọkpaabyi ọkpaakhẹ, oben bẹ́, ‘Abạnga kk'asia ochẹ kw'akpongnạng mbọ asaabhẹ? Amma m'ntạkha bẹ nge bạnga k'mbọhk chemma. Ma wọ abạnga m'asonga bẹ́, amma wọ nde Ọvaar Ubinọkpaabyi.’ "

14 Ahab ọbạbh bẹ́, "Anẹ wọ m'usi udik ngwa o?"

Usi-ẹyaakha ubhina bẹ́, "Ọvaar Ubinọkpaabyi obeni bẹ́: ‘Akpongnạng p'ade adikkobh p'aning kisekh-isek kw'adecho p'nkhạma, ẹbọ m'asi udik ngwa.’ "

Ahab ọbạbh bẹ́, "Anẹ wọ m'ọtạma irima nja? "

Usi-ẹyaakhẹ ubhina bẹ́, "Ọma wọ m'atạma chẹ."

15 Ma wọ, Ahab oyeri akpongnạng arạbh jobh-kawạnọ ukuma jobh-kamfa p'ade adikkobh p'aning k'isekh-isek kw'adecho p'nkhạma. Okhenka, n'oyeri anạng mbọkha p'Israẹl phyi-phyibh otobha. Phyi-phyibh abẹ ade anạng nnọhna chi-khamfa ukuma arạbh jobh. 16 Abẹ abina k'ẹya, k'okpe kw'Bẹn-Hadad ọttạra ayokh-avaarnạng ẹrạbh ukuma jobh-kamfa, p'atum-ẹ, n'abuma atwuk k'abẹ k'ichọhm. 17 Akpongnạng p'ade adikkobh p'aning k'isekhisek kw'adecho p'nkhạma, bọ achi eden afona.

Wa Bẹn-Hadad kk'abaan-ibyi ọtọhma p'akwu akpaakh-ẹ bẹ́, "Ajunung n'asenga kha Samariya akwuma e."

18 Oben bẹ́, "De abẹ akwu k'ẹmẹm, abạnga avạkha bẹ ikhikhebhi; de abẹ akwu irima, abạnga avạkha bẹ ikhikhebhi."

19 Akpongnạng p'ade adikkobh p'aning k'isekhisek kw'adecho p'nkhạma abina k'efhondiden, n'arima ekpong atọr bẹ nnạm. 20 Ọnạng-ọnạng ọfhọ ọwawunanạng kwẹ. Ma wọ anạng p'Aram arạbhọ, anạng p'Israẹl akhubhu bẹ. Okhenka, wa Bẹn-Hadad kw'ode ọvaarnạng kw'Aram uvur ẹnyạnyaang, utima ayaar-nnyạnyaang bạnọ pẹ ọrạbh, ọnnaanga. 21 Wa ọvaarnạng kw'Israẹl osenga ukwu urima ayaar-nnyạnyaang ọttạra ijaar s'nnyạnyaang n'itwạr tạrr, okhema anạng mbọ p'Aram ipyibha-ipyibha.

22 Ayongu ma, usi-ẹyaahka ukwu okhebha ọvaanạng kw'Israẹl, oben bẹ́, "Do ifor sọ atik, khiri k'okpe kw'iyaabha, ọvaarnạng kw'Aram ukwuma ukwu urima abọ dạkhẹ e."

23 Wa atọhmnạng p'ọvaarnạng kw'Aram anạng-ẹ ntọhna abẹn bẹ́, "Akha pabẹ ade akha p'abẹ achokhu kha akpecho. Ẹgwọ usi, abẹ akhaam ẹfa ch'abẹ akhema mạna. Okhenka, de annim bẹ abẹ k'ẹkpẹmẹ, k'udik-ọkka, m'anna bẹ ẹfa ọna e. 24 Udik gwạnọ kw'm'asi ode bẹ́, m'arengi avaarnạng phyibh k'nninga sabẹ, atima adecho adwạkh-ọdwạk atera ncho sabẹ. 25 Ma abạra atobha arim-ekpong demapẹ mbọ p'kk'adima. Tima nnyạnyaang atera ncho s'nnyạnyaang, atima ijaar s'nnyạnyaang n'itwạr, atera ijaar s'nnyạnyaang n'itwạr, ọfha ankke Israẹl abẹ ririma k'ẹkpẹmẹ. K'udik-ọkka, m'ankpọkh-ọkpọkhọ anyọnga bẹ e." Wa ochera bẹ abẹ, usi oche kwabe atọhn-ẹ.

26 K'ọyaabha-kpe ọdwạkh-ọdwạk, Ben-Hadad otobha anạng p'Aram, abẹ aseng afona k'Aphẹk ata arima anạng p'Israẹl abẹ. 27 Abẹ atọbha anạng p'Israẹl abạra ado bẹ ifor. Abẹ asenga ata akhebha bẹ. Wa anạng p'Israẹl p'akheri akhaana sạsạkhẹ afa p'nvu, aninga k'ibyibhikhasẹ akkeri bẹ ititikha, k'okpe kw'anạng p'Aram anyaamẹ afhu ẹkhạma njọ bẹ́, tạp.

28 Usi-ẹyaakha kw'Ubinọkpaabyi ukwu ọkpaak ọvaarnạng kw'Israẹl bẹ́, " Ma wọ ode udik kw'Ọvaar Ubinọkpaabyi ọkpaakhẹ: Amma m'ntạkha arim-ekpong saabhada mbọma nge-ọ k'mbọhk, ukwuru sẹ anạng p'Aram akkẹ bẹ́, k'akpecho mạnkkeni bọ Ọvaar Ubinọkpaabyi ọkhaam ẹfa, k'mkpẹmẹ kọ́khaam, osenga ma, asonga bẹ́, amma wọ nde Ọvaar Ubinọkpaabyi.’ "

29 Wa abẹ abhingi k'abyi-abhingapẹ akkeri ayok ititikha, k'iwu isenọfa. Ottong iwu isenọfa, ekpong ẹtạma. Anạng p'Israẹl atim iwu jạnẹ afhọ arim-ekpong p'Aram, nnọhna arạbh jobh-kamfa ukuma asen. 30 Anạng p'arikh-urik arạbh afona k'ofhon-diden kw'Aphẹk, kw'udumokpon otto ọkpẹkhẹ anạng nnọhna arạbh attaan ukuma asenọfa ukuma arạbh jobh. Bẹn-Hadad ọrạbh ofona k'ofhon-diden ọta utubha k'ẹmaanggọ jạnẹ.

31 Ajukwa pẹ aben-ẹ bẹ́, " Kk'ammaanga bẹ́, avaarnạng p'Israẹl akhaam ikwosi. Tte ankpa ọvạra-bina k'nnin, ambạra ankpa ndikhi k'ncho, akkẹ ma, ọvaarnạng kw'Israẹl m'ọttọ-ọ ọbọhk otte, aruk akpen."

32 Wa abẹ akpa ọvạra-bina k'nnin, ọttạra ndikhi k'ncho, aseng afona k'ọvaarnạng kw'Israẹl, oben bẹ́, "Ọtọhmnạng kw'Bẹn-Hadad obeni bẹ́, ‘Totokhạn tte-m ọbọhk nnuk akpen.’ "

Ọvaarnạng ubhina bẹ́, "Utim uruk akpen kạkha? Ode masẹ nnwọkka kwaam."

33 Ajunung mbọ okpe nákhibha, abẹ atạk ọtọhnga ngwọ masẹ ẹkhọhkha ẹkkachẹ. Abẹ atọr m'ọtọhnga ngwọ kwẹ, abẹn bẹ́, ‘Uwe e, Bẹn-Hadad kw'ode masẹ nnwakka e!’

Ọvaarnạng oben bẹ́, " Abạnga ata atạkhẹ atim akwu." Masẹ Bẹn-Hadad uyini kha, Ahab oben-ẹ uvura k'ọkpaar kwẹ kw'nnyạnyaang n'itwạr.

34 Bẹn-Hadad oben bẹ́, "M'mmạnga nnạm nnạng-ọ ifhon-diden s'iwa otte kwaam avạk atte kwọ ọna. Akkema asi ọphyabyi fọ k'Damaskọs, oche kw'iwa otte kwaam usi, k'Samariya."

Ahab oben bẹ́, "Bạrasẹ nttọ-ọ ọbọhk abhạna, m'antạkha echekha ayok abẹ." Wa ọtạk echekha Ahab abẹ, uttiẹ-ẹ ọbọhk ọbhạna.

35 Oseng k'ọkpaakha-dik kw'Ọvaar Ubinọkpaabyi, bạra usi-ẹyaakha wạnọ k'ngekha kw'asi-ẹyaakha, oben oyokh-ikhaana bẹ́, "Tima okpong-ttọhk fọ si-m ebhena." Okhenka, oyok ufhum. 36 Ma wọ, usi-ẹyaakha nwọ obeni bẹ́, "De abin arik-m ma bẹẹ ekye m'ẹfhọ-ọ ọfhọ, ukwuru bẹ́, echo násạkha anạng Ọvaar Ubinọkpaabyi. Mạnna wọ ujunung nwọ ubin ofona, ekye ẹsẹ-ẹ k'eden, ẹvạkh-ẹ ẹfhọ."

37 Usi-ẹyaakha ọbạra ose ujunung ọdwạkh-ọdwạk, oben bẹ́, "Totokhạn si-m ebhena." Ujunung nnwọ usi-ẹ ebhena. 38 Usi-ẹyaakha nwọ ofona ọta obe k'eden utik ọvaarnạng. Oge ẹnya ẹdwạkh-ọdwạk, ọkpa ẹvạrakpa ch'echo, ububha achen. 39 Masẹ ọvaanạng m'oseng, usi-ẹyaakha nwa oyer-ẹ oben bẹ́, "Amma ọtọhmnạng kwọ nta k'akpong-chen, ọnạng wạnọ utim ọnạng kw'abẹ avạk k'ekpong ukwu ọben bẹ́, ‘Kkeri ujunung nwa. De udimi, mantima akpen pọ antera pẹ, deja, m'atuk talẹn wạnọ kw'silva.’ 40 Sẹ n'ọyạk ọtọhmnạng kwọ, nseng kha nseng kha, ujunung nwọ ọrạbh."

Ọvaarnạng kw'Israẹl ubhina bẹ́, "Obo kwọ wọ ma, kw'kk'ẹyaakha asia."

41 Mạnna wọ usi-ẹyaakha nwọ n'ọwạr ẹvạrakpa njọ ch'echo k'achen pẹ, ọvaarnạng kw'Israẹl utin-ẹ, masẹ usi-ẹyaakha wạnọ k'ngekha s'asi-ẹyaakha. 42 Oben ọvaarnạng bẹ́, "Ma wọ ode udik kw'Ọvaar Ubinọkpaabyi ọkpaakhẹ, oben bẹ́, ‘Kk'ujunung kw'amma mbeni bẹ́, ope, ọbọhk attia uruk akpen. Ma wọ, m'atima akpen pọ atera pẹ, atima arim-ekpong pọ atera pẹ.’ " 43 Wa ọvaarnạng kw'Israẹl utim ofor-dọhbha, k'idwạdwạkhọ ọbhạna k'ọvaarter kwẹ, k'Samariya.