1 Masẹ Sọlọmọn kk'Ọchọhm kw'Ọvaar Ubinọkpaabyi, ọttạra ọvaarter okkera, ọbạra okkera udik kwidede kw'ọkkẹ bẹ́, usi, 2 Ọvaar Ubinọkpaabyi uyin Sọlọmọn abẹ ottong ikpe ifa, k'oche kw'uwa uyini abẹ kha Gibeọn. 3 Ọvaar Ubinọkpaabyi oben-ẹ bẹ́:

"Amma kk'njọhm sọ, ọttạra ephyema ch'kk'asia k'ititikha saam mmaanga; amma kk'ọchọhm kw'kk'asia ntekha nchok bẹ́, ma wọ kw'anạng m'n'akpobha eche chaam tạrr ipimmanitor. Achen paam m'akkeri ma, ettem chaam m'ẹbạra efona ororo ininga ma.

4 "Node ọma, de atwạn-m abẹ k'nnạm-phyạphye ọttạra ettem jạnẹ ọttạra etora, k'oche kw'uwa atte Devid usi, asi idik phyibh ator k'oche kw'mben-ọ bẹ́ asi, abạra achok akpebhi ọttạra nnyina saam, 5 amma m'nttima ẹvaarchi ch'ẹvaar chọ arạnga k'Israẹl tạrr ipimmanitor, oche kw'uwa nchekhi nnạng atte Devid, k'okpe kw'mbeni bẹ́, ‘Ọma itwuna kède bẹ́, m'akhaama ọnạng ọkhaama kw'm'otera echo chọ masẹ ọvaarnạng kw'Israẹl.’

6 "Okhenka, de abạnga ma, ọbạra ode iva p'iva pabạnga bọ akpa nnạm avạr-m, abạnga akuma nnyina saam, ọttạra akpebhi paam p'kk'bạnga nnạnga chu-chok, abạnga atera ata asạkha ncho, abạra asi idik idwạkh-ọdwạk, 7 amma m'ndimi anạng p'Israẹl k'isek s'amma kk'bẹ nnạnga, mbạra mfhum ọchọhm ngwa kw'kk'ntekha nchok bẹ́, anạng akpobha eche chaam. Anạng p'Israẹl bạra ade ọsammadik ọttạra innukhudik k'ikhaana s'idifhon phyibh. 8 Ọchọhm ngwa bạra ode ọtakwung. M'okkona anạng phyibh p'm'aseng ma, abẹ m'akpaak innukhu aben bẹ́, ‘Ukwuru yạn kw'Ọvaar Ubinọkpaabyi usi udik-demakwẹ ngwa ma isek nna, ọttạra ma ọchọhm ngwa o?’ 9 Anạng bạra abhina bẹ́, ‘Ukwuru sabẹ kk'nnạm akpa avạra Ọvaar Ubinọkpaabyi, kw'ode Ubinọkpaabyi kwabẹ, kw'uwa utim ab'otte pabẹ ubina k'Ijip e. Idik idwạkh-ọdwạk n'ichi bẹ ẹja, abẹ asạkha ncho anạng sẹ, abạra akpobha sẹ. Ẹgwọ usi Ọvaar Ubinọkpaabyi ọnạngẹ bẹ ọkhạmkạmọ nwa phyibh e.’ "

10 Wa k'cho kw'ottong icho ẹrạbh wọ kw'Sọlọmọn usi ibyi nna ifa s'ide: Ọchọhm kw'Ọvaar Ubinọkpaabyi, ọttạra ọvaarter. 11 Wa ọvaar Sọlọmọn ọnạngẹ ọvaar Hiram kw'Taya ifhon ẹrạbh s'Galilee, ukwuru nchi s'sida, ọttạra nchi s'siprẹs, ọttara gol kw'uwa Hiram kk'Sọlọmọn ọnạnga oche kw'ororu. 12 Okhenka, masẹ Hiram ubin kha Taya bẹ́, ọta ose ifhon s'Sọlọmọn kk'ẹ ọnạnga, wa ifhon nnọ khẹ ettem nírebha. 13 Nọbạbh-ọ bẹ́, "Ayi kwaam, bạng ifhon-demasẹ rọ s'anạng-m ma?" Wa oyeri ifhon nnọ Ẹkhạma ch'Kabul*. Mạnna wọ kw'ibyi nnọ ikpen tạrr ukpira chemma. 14 Node s'uwa Hiram kk'atalẹn arạbh asajạnẹ p'gol ọtọhma okkena ọvaar Sọlọmọn.

15 Maa wọ ode itoru s'ọtọhm f'Ọchọhm kw'Ọvaar Ubinọkpaabyi f'uwa Sọlọmọn utim anạng usi, ọttạra ọvaarter kwẹ, ọttạra egbo, ọttạra udimokpon kw'Jẹrusalẹm, ọttạra Hazọr, ọttạra Mẹgido, ọttạra Gẹzẹr. 16 (Node s'uwa Phero, kw'ode ọvaarnạng kw'Ijip kk'ofhon kw'Gẹzẹr akwẹ urima, okhema kwẹ, oge kwẹ ekpon ọkkạmọ. Ọfhọ aKenaan p'arukhu ma, bạrasẹ n'ọtạk ofhon ngwọ masẹ ẹnạnga ch'ọbada, ọnạng uminanwa kwẹ kw'ọba Sọlọmọn. 17 Sọlọmọn ọbạra ọkpa nnạm usi ofhon kw'Gẹzẹr.) Usi ofhon-ẹrạkha kw'Bẹt-Họrọn, 18 ọttạra Baalat, ọttạra Tamar, k'ibyi s'anạng nạnárukha, ma isisek sẹ, 19 ọttạra efhondiden s'ọkhaanga-chọhm, ọttạra ifhon s'akpaar pẹ p'nnyạnyaang n'itwạr, ọttạra ifhon s'nnyạnyaang s'Sọlọmọn. Wa usi udik kwidede kw'ọdaakhẹ bẹ́, usi k'Jẹrusalẹm, ọttạra k'Lebanọn, ọbaabha nkhạma sidede s'uwa ọdạbhẹ.

20 Wa anạng p'Amọr ọttạra p'Het, ọttạra p'Pẹriz, ọttạra p'Hiv, ọttạra p'Jẹbus (p'uwa nạn Israẹl nábina), atim arikhi ma ibyi nnọ. 21 Wa iva p'iva p'anạng mbọ p'uwa arikhi ma isek nnọ, p'anạng p'Israẹl nạnákke akhubh bọ p'uwa Sọlọmọn n'utima usi ibira-tọhm sẹ, oche kw'ode tạrr ukpira chemma. 22 Okhenka, wa ọnạng wạnọ-wạnọ kw'ubin Israẹl kw'Sọlọmọn oge k'ibira kòde; wa utim bẹ usi arim-ekpong pẹ, ọttạra ikhaana s'ẹfa chẹ, ọttạra atim-eden p'ekpong, ọttạra atọhmnạng pẹ, ọttạra ayaar-nnyạnyaang, ọttạra adecho p'ijaar s'nnyạnyaang n'itwạr, ọttạra p'ayaar-nnyạnyaang. 23 Wa Sọlọmọn ọbạra ọkhaama anạng ẹnọhna ukuma arạbh asenọfa ukuma jobh, p'usi adecho p'itọhm p'n'akkeri atọhmnạng.

24 K'okpe kw'uwa uminanwa kw'Phero kk'ubina kha efhondiden ch'Devid ukwu k'ọvaarchọhm kw'Sọlọmọn kk'usia ọnạng-ẹ, Sọlọmọn ukwu usi egbo ọttạra ma.

25 Wa Sọlọmọn n'ọfọhnọ ẹja ch'nnạnga ikkạmasẹ, ọttạra ch'nnạnga s'ẹmẹm ikpe ittaan k'cho, k'ijabyi s'kk'usia, ọnạng Ọvaar Ubinọkpaabyi. Wa n'ọbạra ọkkạmọ insẹns ma ititikha s'Ọvaar Ubinọkpaabyi ma okpe ngwọ gwạnọ ọttạra ẹjafọhna. Ma wọ okker ọchọhm ngwọ usi.

26 Wa ọvaar Sọlọmọn ọbạra usi ijaar sididen s'asi kha Ẹziyọn-Gẹbẹr, kw'ọbaang Ẹlat, k'ẹkhạma ch'Edom, k'ẹraangakha ch'Ẹraanga-khora. 27 Ma wọ Hiram ọtọhmọ ajunung pẹ p'akke ijaar sididen s'asi yạyaar, abẹ ata ator ajunung p'Sọlọmọn p'n'ayaar ijaar sẹ sididen s'asi. 28 Abẹ ayaarẹ afona k'Ophir, ata atima atalẹn p'gol ẹnọhna ukuma ẹrạbh, p'abẹ atim akkena ọvaar Sọlọmọn.