1Avaarnạng 13

Usi-ẹyaakha kw’Ubinọkpaabyi kw’ubin Juda

1 Wa osengi k’ọtọhnga kw’Ọvaar Ubinọkpaabyi, usi-ẹyaakha wạnọ kw’Ubinọkpaabyi ubina kha Juda ofona k’Bẹtẹl, k’okpe kw’Jẹroboam n’obe k’ijabyi bẹ́, ọnạng ẹnạnga. 2 Osengi k’ọtọhnga kw’Ọvaar Ubinọkpaabyi ọkpaak, ọttạbhẹ ijabyi nnọ oben bẹ́: "Ijabyi, ijabyi o! Ọvaar Ubinọkpaabyi obeni bẹ́: ‘Abẹ m’amaan ujunungnwa kw’m’okpena Josiya k’ẹchọhmfhạr ch’Devid. Ẹma m’utima afọhnẹja p’ikpukpobha-byi s’ọyaankpa, p’n’afọhnọ nja mạma, ọfọhnọ nja. Ẹma m’ọbạra ọnnọhnga akhạbhọ p’ayokhanạng ma.’ " 3 Ma iwu njọ-njọ, usi-ẹyaakha kw’Ubinọkpaabyi ọnạngẹ ẹkhọhkha oben bẹ́: ‘Maa wọ ode ẹkhọhkha ch’Ọvaar Ubinọkpaabyi kk’ẹyaakha ọnạnga oben bẹ́: Ijabyi nna m’ibhaangẹ ibyi ifa, itạtọhng sẹ m’inyaanẹ k’isisek."

4 Masẹ ọvaar Jẹroboam ọbhaang itọhnga s’usi-ẹyaakha kw’Ubinọkpaabyi ọkpaakhẹ ọttạbhẹ ijabyi s’Bẹtẹl, uninga k’ijabyi, onemi ọbọhk kwẹ oben bẹ́, "Avạkh-ẹ!" Okhenka, ọbọkh kw’onemi otena usi-ẹyaakha upu-ẹ tạrr akwẹ dạk nókke ọsạkha. 5 Ijabyi nnọ o, n’ibạra ikhebh ibyi ifa tạrr itạtọhng sẹ inyaanẹ k’isisek, otor kẹkhọhkha ch’usi-ẹyaakha kw’Ubinọkpaabyi osengi k’ọtọhnga kw’Ọvaar Ubinọkpaabyi, m’ọnạng.

6 Ma wọ ọvaarnạng obeni usi-ẹyaakha kw’Ubinọkpaabyi bẹ́, "Se njọhm k’akhaam k’echo nạng Ọvaar Ubinọkpaabyi, kw’ode Ubinọkpaabyi kwọ, ọfha ọbọhk kwaam ọkpa nnạm ode oche kw’wạra akwẹ ode." Wa usi-ẹyaakha kw’Ubinọkpaabyi ose njọhm ọnạng Ọvaar Ubinọkpaabyi k’akhẹ k’echo. Ma wọ ọbọhk kw’ọvaarnạng ọkpa nnạm ode oche kw’wạra akwẹ ode.

7 Ọvaarnạng n’obeni usi-ẹyaakha kw’Ubinọkpaabyi bẹ́, "Kwu antwạn amfona kha ọchọhm anta anchi ọttọhk, ọfha mbạra nsi-ọ ẹtaam."

8 Okhenka, usi-ẹyaakha kw’Ubinọkpaabyi ubhina ọvaarnạng bẹ́, "Amma abọ mạ́ntwạn, brẹd ma mạ́nchi, asi ma mạ́mbạra ngwo, ọbạra ode bẹ́, m’anạng-m ibhaakha s’ẹkhaama chọ. 9 S’Ọvaar Ubinọkpaabyi osengi k’ọtọhnga kwẹ ọnạng-m inyina bẹ́, ‘Ọma nọ́baana bẹ́ achi brẹd, nọ́baana bẹ́ agwo asi ma, k’eden ch’asenga afona, kábạra asenga akwuna.’ " 10 Ma wọ n’osengi k’eden ẹdwạkh-ọdwạk ukwuna, ọyaanga njọ ch’wạra osengi ofona k’Bẹtẹl ọjẹ.

11 Wa ọkhaam usi-ẹyaakha wạnọ kw’kk’ọtạma kw’urukhu k’Bẹtẹl, kw’iva pẹ ata akpaak udik kwidede kw’usi-ẹyaakha kw’Ubinọkpaabyi kk’usia ma iwu njọ. Abẹ abạra akpaak otte idik s’usi-ẹyaakha kw’Ubinọkpaabyi kk’ọvaarnạng ọbạra ọkpaakha. 12 Otte n’ọbạbhọ bẹ bẹ́, "Ẹma ukwu njạn?" Iva atibh-ẹ eden ch’usi-ẹyaakha kw’Ubinọkpaabyi, kw’ubin Juda, kk’osenga ofona. 13 Nobeni iva bẹ́, "Abạnga ado ẹnyạnyaang ininga anạng-m." Masẹ abẹ kk’ẹnyạnyaang ininga adia anạng-ẹ, uvura chẹ, 14 ọyaar ukhubh usi-ẹyaakha kw’Ubinọkpaayi k’nnạm. Ọta okhebh-ẹ s’uning ẹyạr k’ichi-rin ch’oak, ọbạbh bẹ́, "Ọma wọ ade usi-ẹyaakha nwọma kw’ubin Juda o?"

Ubhina bẹ́, "Uwe e, amma wọ e."

15 Ma wọ usi-ẹyaakha nwọ oben-ẹ bẹ́, "Kwu antwạn amfona kha ọchọhm anta anchi ọttọhk."

16 Usi-ẹyaakha kw’Ubinọkpaabyi oben bẹ́, "Amma abọ mạ́ntwạn mkpa nnạm, brẹd ọma abẹ mạ́nchi, asi abọ mạ́mbạra ngwo maa ibyi nna. 17 Ọvaar Ubinọkpaabyi kk’osenga k’ọtọhnga kwẹ ọkpaakh-m bẹ́, ‘Ọma nọ́baana bẹ́ achi brẹd, nọ́baana bẹ́ agwo asi ma, k’eden ch’wạra asengi afona, kábạra aseng akwuna.’ "

18 Usi-ẹyaakha kw’kk’ọtạma ubhina bẹ́, "Amma mgba nde usi-ẹyaakha masẹ akhọ. Oseng-eden kw’Ubinọkpaabyi osengi k’ọtọhnga kw’Ọvaar Ubinọkpaabyi oben-m bẹ́: ‘Sọhng ata atim-ẹ akpa nnạm k’akhọ k’ọchọhm, ọfha ukwu uchi brẹd, ọbạra ogwo asi.’ " (Okhenka, wa n’usi afhạra). 19 Mạnna wọ kw’usi-ẹyaakha kw’Ubinọkpaabyi ọtwạnọ abẹ ọkpa nnạm, ọta uchi brẹd ọbạra ogwo asi k’akhẹ k’ọchọhm.

20 Masẹ abẹ atim aning ma okpokkro, Ọvaar Ubinọkpaabyi ọkpaak udik ọnạng usi-ẹyaakha kw’kk’ọtạma, kw’utim-ẹ ọkpa nnạm. 21 Ọkpaakhẹ ọttạbhẹ usi-ẹyaakha kw’Ubinọkpaabyi, kw’kk’ubina kha Juda ukwu, oben bẹ́, "Ọvaar Ubinọkpaabyi obeni bẹ́, ‘Ọma asẹkhẹ ọtọhnga kw’Ọvaar Ubinọkpaabyi, inyina ch’Ọvaar Ubinọkpaabyi, kw’ode Ubinọkpaabyi kwọ ọnạng-ọ, náchokha. 22 Ọma akpa nnạm akwu achi brẹd, abạra agwo asi k’ibyi s’mben-ọ bẹ́, nạngẹ ọttọhk achi, nạngẹ asi agwo. Ma o, apfura pọ k’epekwur ch’ab’atte mánnọhnga.’ "

23 K’ókpe kw’usi-ẹyaakha kw’Ubinọkpaabyi kk’ọttọhk okkera uchi, ọbạra okkera asi ogwo, usi-ẹyaakha nwọ kw’utim-ẹ ọkpa nnạm ukwu odo ẹnyạnyaang chẹ ininga, ọnạng-ẹ. 24 Masẹ n’osenga k’eden, ekke ẹkhebh-ẹ k’eden ẹfhọ. Apfura pẹ ayima ma k’eden ọttạra ẹnyạnyaang, ọttạra ekke p’abe abaanga abe ma. 25 Anạng bạnọ p’asengi ase upfura kw’uyim ma, ọttạra ekke ch’ebe ẹbaanga abẹ, afona ata akpaak anạng kha ẹfhondiden ch’usi-ẹyaakha kw’kk’ọtạma urukhu.

26 Okpe kw’usi-ẹyaakha nwọ kw’wạra utim-ẹ k’eden ọkpa nnạm ọbhaang kwẹ, oben bẹ́, "Usi-ẹyaakha kw’Ubinọkpaabyi, kw’ọsẹkhẹ ọtọhnga kw’Ọvaar Ubinọkpaabyi wọ. Ọvaar Ubinọkpaabyi kk’ẹ ọbọhk uttia ọnạng ekke, ch’kk’ẹ ivuna ẹfhọ, k’oche kw’ọtọhnga kw’Ọvaar Ubinọkpaabyi kk’ẹ ọkpaakha.

27 Usi-ẹyaakha kw’kk’ọtạma oben iva pẹ bẹ́, "Ado ẹnyạnyaang ininga anạng-m," Abẹ asi oche ngwọ. 28 Ma wọ kw’uyini k’iyaan, ọta osẹ upfura kw’uyim kha eden, ọttạra ẹnyạnyaang, ọttạra ekke p’abe abaanga abẹ. Ekke upfura níchia, ẹnyạnyaang nẹ́bạra ivuna. 29 Ma o, usi-ẹyaakha kw’kk’ọtạma udira apfura p’usi-ẹyaakha kw’Ubinọkpaabyi, ọnạna k’ẹnyạnyaang, utima wẹ ukwuna k’ẹfhondiden chẹ, ọfha ọgạm-ẹ, ọbạra ọnnọhng-ẹ. 30 Ọnnọhng upfura nwọ k’epekwur chẹ, abẹ agạm-ẹ aben bẹ́, "Nnwọkka kwaam e!"

31 Masẹ kk’apfura mbọ ọnnọhnga, nobeni iva pẹ bẹ́, "De kwạna mpe, abạnga annọhng-m k’epekwur ch’nnọhng usi-ẹyaakha kw’Ubinọkpaabyi  o, abạnga aruru akhạbhọ paam abaanga akhạbhọ pẹ, 32 khiri ẹkkaabha ch’oseng k’ọtọhnga kw’Ọvaar Ubinọkpaabyi ọkpaak, ọttạbhẹ ijabyi s’Bẹtẹl, ọttạra akhapa pidede p’ikpukpobha-byi s’ọyaankpa phyi-phyibh k’ifhon s’Samariya, kwạna m’iyin-uyin e.

33 Tạrr oseng ma, Jẹroboam efhona nọ́khaama k’ibyibyiadik sẹ. Okhenka, ọbạra ọtekha adạkhẹ afọhn-nja p’ikpukpobha-byi s’ọyaankpa k’anạng-khira pidede. Ọnạng kwidede kw’ọdaakhẹ bẹ́ ode ọfọhnẹja, ọtekh-ẹ ochok k’ikpukpobha-byi s’ọyaankpa. 34 Maa wọ ode ipyibha ch’ẹchọhmfhạr ch’Jẹroboam, ch’itim ttạtto kwẹ, ọttạra idima chẹ ikwu ma ọyagbin.