1 K'okpe ngwọ ma, wa anạng p'Israẹl ọvaanạng kákháam.

K'okpe ngwọ, wa anạng p'ẹkhạma ch'Dan n'aror ibyi s'm'ikpena sabẹ, s'abẹ m'akke aruk, ukwuru s'abẹ nạn ekkema ch'ede okhebh f'abẹ tạm nákhaama k'ikhaana s'nkhạma s'Israẹl. 2 Ma wọ anạng p'Dan atọhmọ akkemkpa pabẹ anạng asen p'abin k'ifhon s'Zora ọttạra Ẹshtaol bẹ́, abẹ ata abana isisek nnọ, abạra asenga abaabha, ase sẹ. Wa ajunung mbọ abe k'ncho s'inạmma s'Dan phyi-phyibh. Abẹ abeni bẹ bẹ́, "Abạnga asọhng ata asenga ase ẹkhạma njọ khanse."

Ma wọ abẹ afon ata anwa k'ukhubha kw'akpecho p'Ephraim, ata asạkha k'ọchọhm kw'Mika, abhing mạma. 3 Masẹ abẹ abaang ọchọhm kw'Mika. abẹ atini udikkobh kw'efonamma ch'Lẹvi kk'ọtọhnga; ma wọ, abẹ ata anwa akhebh-ẹ, abạbh-ẹ bẹ́, "Anẹ wọ utim-ọ ukwu ma? Ọma n'asi mbạng ma k'ibyi nna? Mbạng vọ utim-ọ ukwu ma?

4 Ma wọ ọtạk oche kw'Mika kk'usia ọnạng-ẹ ọkpaak bẹ, oben bẹ́, "Kk'aam ọtạkha ọtạkhha k'ọtọhm e, amma wọ nde ọfọhnẹja kwẹ e."

5 Ma wọ abẹ aben-ẹ bẹ́, "Totokhạn, dwạn Ubinọkpaabyi ọfha ansonga de osenga kw'n'amben bẹ́ amfona ma s'm'ujibh ọnạng mạna."

6 Ọfọhnẹja nwọ ubhina bẹ bẹ́, "Abạnga asọhng k'idira. Ọvaar Ubinọkpaabyi kk'osenga kwabạnga udia."

7 Mạnna wọ kw'ajunung mbọ asen abin atena Laish, ata ase bẹ́ anạng p'arukhu kha, arukhu k'idira, oche kw'anạng p'Sidọn arukhu k'idira, p'nạn ojora ákhaam. Wa ujibhada uning ma ẹkhạma njọ, ọttọhk vạnọ-vạnọ kòde f'oworu bẹ. Abẹ abạra aruk abhir eden k'ẹkạma ch'Sidọn, abẹ oforgbạkha wạnọ-wạnọ nákhaam ọttạra anạng ọdwạkh-ọdwạk.

8 K'ọkpe kw'abẹ kk'akwuna k'ifhon s'Zora, ọttạra Ẹshtaol, ivotte abạbh bẹ bẹ́, "Idik ide yạn bạnga abẹ o?"

9 Abẹ abhina bẹ́, "Abạnga akwu, anta annima bẹ abẹ! Khiri amạna kk'ansia bẹ́ isisek nnọ ijibh-ujibh. Abạnga m'atobha mbọhk oche ngwọ? Abạnga okpe kákhibhi, tte amfona anta antạkha isisek nnọ. 10 Masẹ abạnga m'akpira mạma, abạnga m'akhebha anạng p'arukhu mạma k'isisek nnọ, p'nạn ichen náchokha bẹ́, udik m'uyin-uyin. Ibyi nna ide isisek s'ibạrẹ ẹkpa s'Ubinọkpaabyi kk'ọtạkha oge bạnga k'mbọhk, isisek s'nạn ọttọhk vạnọ-vạnọ níwora."

11 Ma wọ ajunung ẹnọhna ukuma arạbh jobh p'abin k'ẹkhạma ch'Dan ata ado ifor s'ekpong, abina kha Zora ọttạra Ẹshtaol. 12 Masẹ abẹ n'asenga k'ọkkaden, abẹ asi ibyibhingasẹ abạnga Kiriyat-Jẹrim k'Juda. Ẹgwọ usi abẹ ayeri ukhubha kw'ochọhkha-dudon kha Kiriyat-Jẹrim, Mahane-Dan tạrr, ukpira k'iwu ch'chemma. 13 Abẹ abin mạma atena k'ukhubha kw'akpecho p'Ephraim, ata asạkha k'ọchọhm kw'Mika.

14 Ma wọ, ajunung mbọ asen p'kk'ẹkhama ch'Laish ata abana, abạbhọ ivotte pabẹ bẹ́, "Abạnga asong ma bẹ́ ọchọhm gwạnọ k'ngekha kw'ichọhm nna ọkhaam ẹphọd, ọttạra akpatava p'ẹchọhmfhạr, ọttạra akpatava p'abẹ atim silva afhạrọ? Abạnga asong oche ma kw'abạnga m'asi? 15 Ma wọ, abẹ abin mạma atena k'ọchọhm kw'Mika ata asima udikkobh kw'Lẹvi. 16 Ajunung mbọ ẹnọhna ukuma arạbh jobh p'ẹfonamma ch'Dan, p'kk'ekpong-kpo adạbha, ata abe k'ẹbaakhamma ch'ofhon 17 Ajunung mbọ asen p'kk'afona ata abana isisek nnọ, anwa kha ẹtaanga ata atạkha ọkpata-nwa, ọttạra ẹphọd, ọttạra akpata-va p'ẹchọhmfhạr, k'okpe kw'ọfọhnẹja ọttạra ajunung mbọ ẹnọhna ukuma arạbh jobh kk'ekpong-kpo adạbha, abe k'ẹbaakhamma ch'ofhon.

18 Masẹ ajunung mbọ asen anwa k'ọchọhm kw'Mika ata atạkha ọkpata-nnwa, ọttạra ephọd, ọttạra akpata-va p'ẹchọhmfhạr, ọfọhnẹja ọbabhọ bẹ bẹ́, "Abạnga n'asi mbạng?"

19 Bẹ abhin-ẹ bẹ́, "Myi bẹ́ ttọọhng! Udik kákpaak. Tor mạna nnạm, ade mạna otte ọttạra ọfọhnẹja. Nújibha ọyọhnga bẹ́, ade ọfọhnẹja k'ẹkhạma jạnẹ ọttạra k'ẹnạmma jạnẹ ch'Israẹl, ọttạra bẹ́, ade ọfọhnẹja k'ẹchọhmmfạr ch'ujunung wạnọ, yạn wọ ujibhi ọtạm?" 20 Wa ettem erebhi ọfọhnẹja nwọ mororo. Ọtạkha ẹphọd ọttạra akpata-va mbọ p'ẹchọhmfhạr, ọttạra ọkpata-nwa kw'abẹ agwa-ọgwa, otor bẹ nnạm ofona. 21 Wa abẹ abhạkhẹ nnạm afona, iva pabẹ, ọttạra itirakpo pyabẹ, ọttạra ẹkhaama chabẹ, achi bẹ eden.

22 Masẹ abẹ kk'eden-ibhir afona arik ọchọhm kw'Mika, ajunung p'arukhu abaanga Mika ayeri ayok atobha, abẹ akhubh ata akhạbha anạng p'Dan oro. 23 Masẹ abẹ ayaanẹ ẹmạng ayeri bẹ, anạng p'Dan abhạkhẹ, aben Mika bẹ́, "Udi-ọ yạn kw'n'ayeri ajunung pọ bẹ́, abẹ akwu arima irima o?"

24 Mika ubhina bẹ́, "Bẹ́ abạnga atạk akpatava p'ngwa, ọttạra ọfọhnẹja kwaam, atima afona. Bạnga ọttọhk vọ f'nkhaam adạkhẹ ọkhaama? Ukwuru yạn kw'abạnga n'abạbh-m bẹ́, ‘Udi-ọ yạn?’ "

25 Anạng p'Dan abhina bẹ́, Mạna abẹ udik kákhaanga, deja, ajunung bạnọ ma m'atima ottempyibh arima abọ, ọma ọttạra ẹchọhmfhạr chọ m'adimi akpen pabạnga udimi." 26 Ma wọ anạng p'Dan afon bẹ́ bẹẹm. Masẹ Mika ose bẹ́ ajunung mbọ akhaam ẹfa ayọhng-ẹ, ọkpa nnạm ọbhạna.

27 Ma wọ abẹ atạk ekpo py'Mika kk'usia, ọttạra ọfọhnẹja kwẹ atima afona kha Laish, ata arima ekpong ọttạra anạng p'arukhu k'idira,p'nạn ojora nábạra akhaama. Abẹ atima ọkkangkkang-kkro arima anạng mbọ abẹ, abạra akkạmọ efhondiden chabẹ. 28 Wa ọnạng wạnọ-wạnọ kw'mọkkaana bẹ kòde, ukwuru s'ofhon kwabẹ ubhiri eden k'ofhon kw'Sidọn, ọttạra bẹ́, wa abẹ oforgbạkha ọttạra ofhon gwạnọ-gwạnọ n'nákhaama. Wa efhondiden njọ ining k'ipekhuma s'ibaang Bet-Rehob.

Wa anạng p'Dan abạra asi efhondiden njọ aruk mạma. 29 Chibhi s'ode bẹ́, wa ofhon ngwọ okpen Laish, abẹ akpe kwẹ abhina Dan, kw'ode otte kwabẹ kwididen, kw'uwa ode nnwa kw'Jekọb. 30 Wa anạng p'Dan atạk ọkpatanwa attima, anạng abẹma oyeni; Jonatan kw'ode nnwa kw'Gershọm, kw'ode nnwa kw'Mosẹs, ọttạra ajunungva pẹ, ẹbọ p'uwa ade afọhnẹja p'ẹkhạma ch'Dan tạrr, ukpira k'okpe kw'abẹ avạk ẹkhạma njọ k'ẹmmạri. 31 Abẹ afon ororo n'akpobha ọkpatanwa nwọ kw'Mika kk'usia, k'okpe phyibh kw'ọchọhm kw'Ubinọkpaabyi uning kha Shilo.