Nnwẹr s'Akpaar-aponga 15

Samson okhem anạng Philistiya

1 K’okpe ma, k’ọphyakpe kw’wit, wa Samson utim uvu-nwa bẹ́, ọta udibh ikwanạng kwẹ. Obeni bẹ́, "Amma m’nta kha ẹmaanggọ ch’ikwanạng kwaam e." Okhenkha, wa otte kw’ikwa nóchera bẹ́ ọnwa kha ẹmaanggọ ẹtaanga.

2 Wa otte kw’ikwa obeni bẹ́, "Amma wa nkkẹ bẹ́ uminanwa nwọ khọ nọ́daakha, ẹgwọ usi ntạkh-ẹ nnạng oyokh-udikkobh kwọ. Nnwọkka kw’otor-ẹ nnạm sạng kw’otera ujibh ọyọhnga ẹma nwọ? Tạkha oyok nwọ ọ."

3 Wa Samson obeni bẹ bẹ́, "Okpe ngwa, iponga dạk khaam mípyibh k’udik kw’m’nsi aPhilistiya mba; m’nkhaankẹ nsi bẹ udik." 4 Mạnna wọ ofona ọta ọvakha asi arạbh chi, ọtạkha pyẹ ọdạbh k’afa-k’afa, ẹsạra ọttạra ẹsạra. Ọtạkha ikhebh ọdạbh k’nsạra mfa sidede. 5 Ọtạkha okhebh mbọ oyeni, bạrasẹ n’otte asi mbọ ọbọhk inwa k’iwonu s’awit p’anạng p’Philistiya. Ọkkạmọ awit p’abẹ aye-oye, ọttạra p’atim abe k’iwonu s’agrep, ọttạra s’oliv.

6 K’okpe kw’aPhilistiya n’abạbhọ bẹ́, "Anẹ wọ usi udik demankwẹ ngwa?" Abẹ akpaak bẹ bẹ́, "Samson kw’ode ọnyẹ kw’ujunung kw’ubin Timnit ẹwọ usi udik ngwa ma e, ukwuru s’abẹ atạk ikwanạng kwẹ anạng oyokh-udikkobh kwẹ e."

Ma wọ anạng p’Philistiya afon ata akkạmọ umina-nnwa nwọ ọttạra otte, abẹ apẹ. 7 Samson oben bẹ bẹ́, "Masẹ abạnga n’asi oche ngwa, amma nchekhi bẹ́, ọyọhn mạ́nkwokha tạrr, ntera udik ngwa kw’abạnga asi mama 8 Wa utim ottem-pyibh urima bẹ abẹ, ọfhọ bẹ k’ọsaabh. Ubina ọta uninga kha ẹtakpa-ma ch’Etam.

9 Wa anạng p’Pilistiya ata abhing kha Juda, abẹ anyaamẹ akpira kha Lehi. 10 Wa anạng p’Juda n’abạbhọ bẹ bẹ́, "Ukwuru yạn kw’abạnga akwu bẹ́ akwu arima mạna abẹ o?"

Abẹ abhina bẹ́, "Kk’ankwua bẹ́, ankwu avạkha Samson anta ange mgbakkọhbhọ, m’ansiẹ-ẹ oche kw’usi mạna."

11 Ma wọ anạng p’Juda nnọhna nsenọfa ukuma arạbh jobh, asạk k’ẹtakpa-mma kw’Etam ata aben Samson bẹ́, "N’ode bẹ́ ọma kásọng bẹ́, amạna mba aning k’isekh-isek s’anạng p’Philistiya? Bạng udik gwọ kw’asi mạna ma?"

"Ubhina bẹ́, "Amma nkhenka ntera udik kw’abẹ asi-m e."

12 Ma wọ abẹ aben-ẹ bẹ́, "Amạna kk’ankwua bẹ́, ankwu adạbh-ọ, antọhkh-ọ ankkena anạng p’Philistiya."

Samson oben bẹ bẹ́, "Abạnga achekhi anạng-m bẹ́, abạnga khaam máfhọ."

13 Abẹ abhina bẹ́, "Amạna mba kk’anchera. Amạna khọ mámfhọ, m’ankhenkha andạbh-ọ, antọhkh-ọ ankkena bẹ." Ma wọ kw’abẹ atim ndikhi ibhasẹ mfa adạbh-ẹ, atim-ẹ ayin ma k’ẹtakpa njọ. 14 Masẹ abẹ akpir kha Lehi, anạng p’Philistiya n’awur ẹmạng, asenga akhebh-ẹ. Ma wọ ọkpaakpa s’Ọvaar Ubinọkpaabyi ẹsạk ẹnwẹ-ẹ, ẹnạng-ẹ ẹfa. Ndikhi s’abẹ adạbhẹ k’mbọhk, ikpaara masẹ ndikhi-bukhu s’ekpon ẹkkạmọ, ichaar-ẹ kha mbọhk, itto. 15 Ma wọ udwung ọkhạbhọ kw’agba p’ẹnyanyaang kw’ose mạma, utima ọfhọ anạng nnọhna mfa ukuma arạbh jobh.

16 Ma o, Samson ọbẹ́,

"Amma kk’ọkhạbhọ kw’agba p’ẹnyạnyaang

ntima nsi bẹ masẹ nnyạnyaang.

Amma kk’ọkhạbhọ kw’agba p’ẹnyanyaang

ntima mfhọ ajunung nnọhna mfa ukuma arạbh jobh."

17 Masẹ kk’ọkpaakha phyibh, ọtạkha ọkhạbhọ nwọ kw’agba p’ẹnyạnyaang ọbhạrẹ; wa abẹ ayeri ibyi nnọ Ramat-Lehi.

18 Wa asi kk’ẹ daakha mororo, ọgạma oyeri Ọvaar Ubinọkpaabyi, oben bẹ́, "Ọma kk’amma ọtọhmnạng kwọ ekhema chididen anạnga. Ma, n’abạra nsenga isi-dạkha achẹ nta mpe k’mbọhk s’ạnạng p’nạn ọkpọkkrọkkọ asi o?" 19 Ma wọ Ubinọkpaabyi usi asi amaam ayin k’ẹmma ch’eje ch’ining k’isisek s’Lehi. Masẹ Samson ogwo asi mbọ, ifor ikpọkh-ẹ, ọbạra ọkhaama ẹfa. Ma wọ abẹ ayeri efhobh njọ, Ẹn-Hakore, p’itim ining kha Lehi ttạra ukpira chemma.

20 Wa Samson ode ọkpaar-aponga k’Israẹl k’icho ẹrạbh, k’okpe kw’uwa anạng p’Philistiya adạbhẹ bẹ.