1 Wa Abimẹlẹk kw'ode nnwa kw'Jerub-Baal ofon ọtta okhebha ivọkka p'ọkka kha Shẹkẹm, ọttạra uchi f'ọkka phyi-phyibh, oben bẹ bẹ́, 2 "Bạbh ammaana p'Shẹkẹm phyibh bẹ́, ‘Ngwạn gwọ m'ujibh bạnga: bẹ́ iva arạbh attaan ukuma jobh phyibh p'Jerub-Baal adạbh bạnga saa, bẹ́ oyok wạnọ mạnkkeni ọdạbh bạnga?" Abạnga ajima bẹ́ amma nde kwabạnga o."

3 Masẹ ivọkka atạk idik nnọ phyibh akpaak anạng p'Shẹkẹm, anạng mbọ achera bẹ́, abẹ m'atwạn Abimẹlẹk abẹ, aben bẹ́, "Ẹma wọ ode nwọkka kwamạna e." 4 Abẹ atạkha ashẹkẹl p'asilva arạbh attaan ukuma jobh k'ọchọhm kw'Baal-Bẹrit anạng-ẹ, Abimẹlẹk utima pyẹ obher aseng nden-nden bạnọ bẹ́, abẹ ade ayok-ikhaana pẹ. 5 Ubina ofona k'ọchọhm kw'otte k'Ọphra, ọta obe k'ẹtakpa jạnẹ ọfhọ ivotte pẹ anạng-nạbh attaan ukuma jobh, pade iva p'Jerub-Baal. Okhenkha, Jotam kw'ode okponga-nnạm kw'Jerub-Baal, ọrạbh ọta uttubha. 6 Ma wọ anạng p'Shẹkẹm phyibh, ọttạra anạng p'Bet-Milo ata atobha abaanga k'ichi chididen ch'oak, ọfha abẹ anạng Abimẹlẹk ẹvaar.

7 Masẹ abẹ akpaakhẹ Jotam udik ngwa, uvura k'okpecho kw'Gerizim k'ẹrạng-ẹrạng, ọkwọhr bẹ ẹmạng oben bẹ́, "Abạnga akhọhm-m itọhng, abạnga ma anạng p'Shẹkẹm, ọfha Ubinọkpaabyi ọkhọhmọ bạnga itọhng 8 Iwu mạnna jạnẹ, wa nchi ita bẹ́ ita irengi ọvaarnạng kwabẹ. Asẹ ifhon ita iben ichi ch'oliv bẹ́, ‘De ọvaarnạng kwamạna.’

9 "Okhenkha, ichi ch'oliv ipọhn bẹ́, ‘Ma, s'amma n'nkum ana paam yi-yin p'abẹ n'atima anạng ikha ọttạra ayokhanạng ikpukpobha, nta ndạbh ẹvaar ch'nchi?’

10 "Oyongu ma, nchi nnọ n'ibeni ichi ch'fig bẹ́, ‘Kwu ade mạna ọvaarnạng.’

11 "Okhenkha, ichi ch'fig ipọhn bẹ́, ‘Ma, s'amma n'nkum achi-dwuk paam yạ-yạm, p'ajibh-ujibh, abạra arebh, nkwu ndạbh ẹvaar ch'nchi?’

12 "Ma wọ nchi nnọ ibeni ichi ch'grep bẹ́, ‘Kwu ade mạna ọvaarnạng.’

13 "Okhenkha, ichi ch'grep ipọhn bẹ́, ‘Ma, n'tte ọbọhk k'atwuk-rebhada paam, p'n'anạng ayokhanạng ọttạra ikha ottennebh yiyin, nta ndạbh ẹvaar ch'nchi?’

14 "K'ekponga-nnạm, nchi nnọ phyibh n'ibeni ọkkaangẹ bé, ‘Kwu ade mạna ọvaarnạng.’

15 "Ọkkaangẹ oben nchi bẹ́, ‘De ode bẹ́ k'udik-ọkka, abạnga m'abyenga amma ana k'echo nde ọvaarnạng kwabạnga, abạnga akwu akwokha ọyọng k'akhaam k'ofho. Okhenkha, ode nạn oche ngwọ núdia, tte ekpon iyin k'ọkkaangẹ, ẹkkạmọ cedars kw'Lebanọn!’

16 "Abạnga kk'abạrada atạkha, abạra asi udik kw'ujibh-ujibh bẹ́ abạnga anạng Abimẹlẹk ẹvaar?Abạnga kk'oche kw'ọbaan asia, anạng Jerub-Baal ọttạra ẹchọhmfhạr chẹ? Abạnga kk'asia anạng-ẹ k'oche kw'ọbaan bẹ́ abạnga asi o? 17 Abạnga ajima bẹ́, wa otte kwaam urim nnima k'abạnga k'echo, oge akpen pẹ k'dạma-dạma, ọfha ọrạbha bạnga k'irem s'anạng p'ẹkhạma ch'Midiyan. 18 Okhenkha, k'iwu ch'chemma, abạnga kk'abhạkha arima ẹchọhmfhạr ch'otte kwaam abẹ. Abạnga kk'ajunungva pẹ, anạng-nạbh attaan ukuma jobh afha k'ẹtakpa jạnẹ. Abạnga atạkha Abimẹlẹk, kw'ode nnwa kw'ubira-kwanạng kwẹ, asi ọvaarnạng kw'anạng p'Shẹkẹm, ukwuru s'ode nwọkka kwabạnga. 19 Ma, abạnga kk'abạrada atạkha, abạra asi udik kw'ujibh-ujibh anạng Jerub-Baal ọttạra ẹchọhmfhạr chẹ chemma o? De ode mạnna, tte Abimẹlẹk ode otennebh kw'abạnga, tte abạnga ma abạra ade otennebh kwẹ! " 20 Okhenkha, de abạnga nạn oche ngwọ násia, tte ekpon ch'ibin k'Abimẹlẹk ichi abạnga ma anạng p'Shẹkẹm, ọttạra anạng p'Bet-Milo. Tte ekpon ibina k'abạnga ma anạng p'Shẹkẹm ọttạra Bet-Milo, ichi Abimẹlẹk!"

21 Ma wọ Jotam ọrạbhọ ofona k'ofhon kw'Beer ọta uruk kha, ukwuru ojora f'nwotte Abimẹlẹk.

22 Masẹ Abimẹlẹk kk'Israẹl ọdạbha k'icho ittaan, 23 Ubinọkpaabyi otte akpakpa-pyibha ọbọhk, anwa Abimẹlẹk ọttạra ammaana p'Shẹkẹm, kw'usi bẹ abẹ akpọhkhọ Abimẹlẹk abẹ echo. 24 Wa Ubinọkpaabyi usi akwẹ ode oche ngwọ, ọfha utima ottera udik kw'Abimẹlẹk ọttạra ammaana p'Shẹkẹm asi, p'ator-ẹ afhọ ajunungva arạbh attaan ukuma jobh p'Jerub-Baal, abạra abyenga isẹ sabẹ. 25 Wa anạng p'Shẹkẹm abhạkh-ẹ abẹ, abẹ atọhm ajunung p'afon ata attubha k'akkaden p'akpecho, n'avạkha anạng p'n'asenga ma ekpo ana. Wa abẹ atạk udik ngwa akpaak Abimẹlẹk.

26 Ma o, Gaal kw'ode nnwa kw'Ebed utim ẹnạmma chẹ ubina otena kha Shẹkẹm. Wa ammaana p'ẹnạmma njọ akhaam ochen-chokha k'Gaal. 27 Masẹ abẹ kk'abina ayin k'iwonu ata aphya agrep atima asi atwuk o, abẹ n'akpong ma, asi erobha k'ọkha-pa k'ọkha fabẹ. Abẹ achi, abạra agwo, n'asaakhẹ Abimẹlẹk. 28 Osenga ma, Gaal kw'ode nnwa kw'Ebed, oben bẹ́, "Abimẹlẹk oyeni ode bạng ọnạng che o, kw'amạna mba anạng p'Shẹkẹm m'anninga k'isek-isek kwẹ o? Ẹma sạng ode nnwa kw'Jerub-Baal, kw'Zebul onyem-ẹ k'edenạng? Mbẹ, n'oseng yạn kw'n'anning k'isekh-isek kw'Abimẹlẹk o? M'antera ansạkha echo annạng attitte Hamọr, kw'ode otte kw'Shẹkẹm. 29 Wạra anạng mba n'aning k'isekh-isek kwaam o! Wạra m'ndim-ẹ. Wạra m'mben Abimẹlẹk bẹ́, ‘Tima akpong-nạng pọ phyibh yin kha iyaan!’ "

30 Masẹ Zebul kw'ọdạbhẹ ẹkhạma ch'efhondiden, ọbhaang udik kw'Gaal kw'ode nnwa kw'Ebed ọkpaakhẹ, ettem ẹkhạm-ẹ ipyibha-ipyibha. 31 Osenga idubh-idubha ọtọhm akpaakh-nkkaabha okkena Abimẹlẹk oben bẹ́, "Gaal kw'ode nnwa kw'Ebed, ọttạra ivọkka pẹ kk'akwua kha Shẹkẹm, akwu achọhma anạng p'efhondiden asi abọ ẹkhọhr e. 32 Ma wọ, m'abina ajunung pọ abẹ ma irungu, abạnga akwu ayima k'iwonu, atik bẹ. 33 K'ekpebha s'ududon m'uyin, abạnga abina ata arima efhondiden njọ abẹ. K'okpe kw'Gaal ọttạra ajunung pẹ ayini bẹ́, akwu arima bạnga abẹ o, abạnga bạra atima eden njọ, arima bẹ abẹ. "

34 Ma wọ Abimẹlẹk ọttạra akpongnạng pẹ phyi-phyibh abin osenga ma irungu, abẹ abhaangẹ abẹma oyeni k'ikhaana innebung, ata attubha k'ibyi-k'ibyi abaanga Shẹkẹm. 35 Mạnna wọ Gaal, kw'ode nnwa kw'Ebed ofon ọta obe k'ẹbaakhamma ch'efhondiden utik, otor k'okpe kw'Abimẹlẹk, ọttạra akpongnạng pẹ m'abina kha ibyi sabẹ attubh ayin k'iyaan.

36 Masẹ Gaal ose bẹ, oben Zebul bẹ́, "Kkeri oche kw'anạng n'abina kha okpecho asạkha e!"

Zebul ubhina bẹ́, "Akpakpa p'akpecho, ẹbọ n'ase mạma e, akkẹ bẹ́ ayokhanạng bọ sa?"

37 Okhenkha, Gaal ọbạra oben bẹ́, "Kkeri oche kw'anạng n'abina kha okpecho asạkha e, ikhaana rạnẹ ikwuma kha ọkkaden kw'ichi ch'abọnganạng e."

38 Ma wọ, Zebul oben-ẹ bẹ́, "Kkeri ẹmma mạma, ọma sạng kw'iwu njọ abeni bẹ́, ‘Abimẹlẹk oyeni ode bạng ọnạng chẹ, kw'amạna mba m'anninga k'isekh-isek kwẹ?’ Ajunung mba sạng p'iwu njọkha n'anukhu o? Yin kha iyaan ata arima bẹ abẹ ẹ!"

39 Ma wọ kw'Gaal utim ammaana p'Shẹkẹm eden, ọta urima Abimẹlẹk abẹ. 40 Abimẹlẹk ukhubh-ẹ tạrr, ukpira k'ẹbaakhamma ch'efhondiden, abẹ afhọ anạng sabhaada ma eden, s'abẹ n'arạbh. 41 Wa Abimẹlẹk ọta uninga k'ofhon kw'Aruma. Zebul o, n'ukhubhu Gaal ọttạra ẹnạmma chẹ abina k'Shẹkẹm.

42 Iwu echobh ma, anạng p'Shẹkẹm abina ayin k'iwonu sabẹ, abẹ atạkha udik ngwọ akpaak Abimẹlẹk. 43 Ma wọ ọtạk ajunung pẹ obhaangẹ ikhaana ittaan, abẹ afona ata attubha k'iwonu atik. Masẹ ose s'anạng mbọ n'abina k'efhondiden ayin k'iyaan, ubina ọta urima bẹ abẹ. 44 Ma wọ kw'Abimẹlẹk ọttạra ikhaana sẹ enemi eden arạbh ata abe k'ororo kw'ẹbaakhamma ch'maseng anwa k'efhondiden. Ikhaana ifa ibin ita irima ayok p'aning kha iwonu, afhọ bẹ. 45 Ma iwu njọ kubungu, Abimẹlẹk urim efhondiden njọ abẹ tạrr, okhema chẹ, ọbạra ọfhọ anạng p'ofhon ngwọ. Ma wọ udimi efhondiden njọ, ọbạra ọtạkha unung ọnyaanẹ ọbaabha kwẹ.

46 Masẹ ammaana p'n'akkeri ibyi s'Shẹkẹm abhaang udik ngwa, abẹ arạbh ata attubha k'ọchọhm kw'ẸI-Bẹrit. 47 K'okpe kw'Abimẹlẹk ọbhaang bẹ́ abẹ kk'atobha kha, 48 ẹma ọttạra ajunung pẹ phyibh avura afona k'okpecho kw'Zalmọn. Abimẹlẹk ọtạkha ẹbạr ọkpaara achi-bọhkha bạnọ, ọtạkha ọnạna k'nkkang. Ọnạng ajunung p'aning abẹ ẹfa bẹ́, "K'ẹbhạr-k'ẹbhạr! Abạnga asi oche kw'abạnga ase-m s'n'nsi ma!" 49 Mạnna wọ kw'ajunung mbọ phyibh abạra akpaara achi-bọhkha, atima ator Abimẹlẹk nnạm. Abẹ atạkha pyẹ atobha k'ibyittubhasẹ, abẹ atạkha ekpon age akpora anạng p'aning k'ibyittubhasẹ nnọ ẹttaanga. Ma wọ anạng phyi-phyibh p'aning k'ibyittubhasẹ s'Shẹkẹm, ajunung ọttạra ipanạng p'akpir nnọhna mfa ukuma jobh, abạra ape.

50 Abimẹlẹk ubina mạma ọta ọbaabha ofhon kw'Tẹbẹz oge ngekha, okhema kwẹ. 51 Ma ẹfhondiden ẹttaanga, ọkhaam ittọhrọ s'ikpọhkhọ-ọkpọhkhọ s'ajunung ọttạra ipanạng ọttạra anạng p'efhondiden phyi-phyibh kk'arạbha ata attubha. Abẹ akpạkha akpora abẹma oyeni k'ẹttaanga, avura ata abe k'ẹrạng-ẹrạng kw'ittọhrọ nnọ. 52 Abimẹlẹk ofona k'ittọhrọ bẹ́, ọta urima anạng mbọ abẹ. Okhenkha, masẹ ukpir k'ẹbaakhamma ch'ibyi nnọ bẹ́, oge sẹ ẹkpon, 53 ma wọ ikwanạng otte ẹtakpa jạnẹ ọbọhk, achẹ ẹvọhkhọ Abimẹlẹk echo.

54 Ma wọ Abimẹlẹk oyeri utim-ekpongkpo kwẹ k'ẹbhạr-k'ẹbhạr oben-ẹ bẹ́, "Twạr ọkkangkkang-kkro kwọ fhọ-m, ọfha nạngẹ ache asi bẹ́, ‘Ikwanạng wọ ọfhẹ-ẹ e’ " Oche ngwọ gwọ kw'ọtọhmnạng kwẹ ọtwạrọ ọkkangkkang-kkro ukhum-ẹ, ope. 55 Masẹ anạng p'Israẹl ase bẹ́ Abimẹlẹk kk'upua, abẹ akpa nnạm abhạna.

56 Oche ngwọ gwọ kw'Ubinọkpaabyi oseng utwukha igbaan s'Abimẹlẹk kk'otte kwẹ usia, s'ọfhọ iv'otte pẹ anạng-nạbh attaan ukuma jobh. 57 Wa Ubinọkpaabyi ọbạra usi ajunung p'Shẹkẹm ape k'ọgbaan phyibh f'abẹ asi. Wa ẹmma ch'Jotam kw'ode nnwa kw'Jerub-Baal ọraakhẹ bẹ, ẹjọ ch'ẹvạkha bẹ.