1 Wa Jẹphta kw'ubin Gilead ode okkemkpa kwididen kw'ekpong. Wa otte okpen Gilead; ọkka kwẹ ode ọsaasa. 2 Wa ikwanạng kw'Gilead ọgba ọmaan-ẹ ajunungva. Masẹ iva mbọ abạrẹ, abẹ akhubhu Jẹphta abhạrẹ k'iyaan aben bẹ́, "Ọma okhebh vạnọ-vạnọ k'ẹchọhmfhạr chamạna kákhaam, ukwuru bẹ́, ọma ade nnwa kw'ikwanạng ọdwạkh-ọdwạk." 3 Ma wọ Jẹphta ọrạbhọ ubina urik ivotte pẹ, ọta uruk k'isisek s'Tob, s'uwa anạng-gbaarẹ bạnọ atwạnọ abẹ, abạra aninga abẹ.

4 K'okpe kw'uwa, anạng p'Ammọn arim ekpong anạng p'Israẹl abẹ, 5 adecho p'Gilead abin ata atạkha Jẹphta kha ẹkhạma ch'Tob. 6 Wa abẹ ayeri Jẹphta aben-ẹ bẹ́, "Kwu ide mạna utim-eden kw'ekpong, ọfha annima anạng p'Ammọn abẹ."

7 Jẹphta ọpọhna bẹ bẹ́, "Wa abạnga khaam náwuna tạrr, abạnga akhubh-m k'ẹchọhmfhạr ch'otte kwaam o? Ode yạn kw'abạnga n'arạbhọ akwu aror-m s'abạnga n'aning k'ọmmaphyaangẹ?"

8 Adecho p'Gilead abeni Jẹphta bẹ́, "Oseng s'ode mạna, amạna kk'ankwua ankhebh-ọ mantọhmma; kwu atwạn mạna abẹ amfona, anta annima anạng p'Ammọn abẹ, khiri ọma wọ m'ade ocho kwamạna phyibh p'annukhu k'Gilead."

9 Jẹphta ubhina anạng p'Gilead bẹ́, "Ode abạnga atim-m mkpa nnạm nta nnima anạng p'Ammọn abẹ, Ọvaar Ubinọkpaabyi utim-m nkhema bẹ, s'amma m'nde bạnga ocho k'udik-ọkka o?"

10 Wa achonạng mbọ p'Gilead abhin Jẹphta bẹ́, "Ọvaar Ubinọkpaabyi wọ ode mạna nttẹnsẹ; amạna m'ansi-usi k'oche kw'abeni." 11 Ma wọ Jẹphta ọtwạnọ adennạng p'Gilead abẹ, abẹ asi-ẹ udecho kw'abẹ, ọttạra odecho kw'akpongnạng. Mạna wọ kw'Jẹphta ọkpaakhẹ adạkhẹ itọhnga s'wạra ọkpaakhẹ k'ititikha s'Ọvaar Ubinọkpaabyi kha Mizpa.

12 Osenga ma, Jẹphta ọtọhm akpaakh-nkkaabha p'ata abạbh ọvaarnạng kw'anạng p'Ammọn bẹ́, "Ipina chaam ede yạn kw'n'arima ẹkhạma chaam abẹ o?"

13 Wa Ọvaarnạng kw'anạng p'Ammọn ubhin akpaakh-nkkaabha mbọ p'Jẹphta bẹ́, "Masẹ wa anạng p'Israẹl abin kha Ijip akwu, abẹ atạk isisek saam tạma k'ọraanga kw'Arnọn tạrr, akpira k'ọraanga kw'Jabọk tạrr, oseng ukpira k'ọraanga kw'Jọrdan. Abạnga atte sẹ ọbọhk anạng-m k'ẹmẹm mantọhmma."

14 Wa Jẹphta ọtọhmọ akpaakh-nkkaabha akpa nnạm k'ọvaarnạng kw'anạng p'Ammọn, 15 oben bẹ́:

" Mama wọ ode udik kw'amma Jẹphta mkpaakhẹ bẹ́: anạng p'Israẹl isisek s'Moab, ọbạra ode isisek s'anạng p'Ammọn nátạkha. 16 Okhenkha, okpe kw'uwa abẹ abin k'Ijip, abẹ asengi k'ukhubha kw'anạng nạn narukha akpira k'Ẹraanga-khora, aseng afona kha Kadẹsh. 17 Wa anạng p'Israẹl atọhmọ akpaakh-nkkaabha k'ọvaarnạng kw'Edom, aben-ẹ bẹ́, ‘Gbe mạna ẹmma anseng k'ẹkhạma chọ amfona,’ okhenka, ọvaarnạng kw'Edom bẹ itọhng nọ́khọhma. Wa abẹ agba atọhm ẹkkaabha anạng ọvaarnạng kw'Moab, ọvaarnạng kw'Moab ufhum. Osenga ma, anạng p'Israẹl n'akpong ma aninga kha Kadẹsh.

18 Wa s'abẹ abin ma, abẹ asengi k'uminkpa, k'ọkhaan-ọkhaan kw'Edom, ọttạra Moab. Abẹ asenga udumudum k'ukhubha kw'okpebha-dudon k'ẹkhạma ch'Moab, ata abhing k'ọraanga-ukhubha kw'Arnọn. Wa abẹ k'ẹkhạma ch'Moab nánwa, s'uwa Arnọn ode erem chabẹ.

19 "Ma wọ anạng p'Israẹl atọhmọ akpaakh-nkkaabha kha Sihon kw'ode ọvaarnạng k'ẹkhạma ch'Amọr, kw'ọdạbhẹ ẹvaar kha Hẹshbọn, aben-ẹ bẹ́, ‘Gbe mạna ẹmma anseng k'ẹkhạma chọ amfona k'amạna k'ofhon." 20 Wa Sihon ọkhaam ojora k'anạng p'Israẹl, ẹgwọ n'nóchera abẹ aseng k'ẹkhạma chẹ. Wa ọtọhmọ akpongnạng pẹ ata abhing kha Jahaz, arima anạng p'Israẹl abẹ.

21 "Osenga ma, Ọvaar Ubinọkpaabyi, kw'ode Ubinọkpaabyi kw'Israẹl, ọtạkha Sihon ọttạra akpongnạng pẹ phyibh oge anạng p'Israẹl k'mbọhk, abẹ akhema bẹ. Wa anạng p'Israẹl atạk isisek phyibh s'anạng p'Amọr p'uwa arukhu ma k'ẹkhạma njọ. 22 Wa abẹ atạm mạma k'Arnọn, atạkha isisek phyibh s'anạng p'Amọr tạrr, akpira kha Jabọk, ọttạra k'uminkpa tạrr, aseng akpira kha Jọrdan.

23 "Masẹ Ọvaar Ubinọkpaabyi, kw'ode Ubinọkpaabyi kw'Israẹl, kk'anạng p'Amọr ubukha k'ititikha s'anạng pẹ Israẹl, bạng ẹfa jọ ch'ọma akhaam bẹ́, abạra akpa nnạm atạkha sẹ o? 24 De Kẹmọsh kw'ode ọkha fabạnga, ọnạngẹ bạnga ọttọhk, abạnga matạkha? Mạnna wọ akwẹ ode oseng k'amạna bẹ́, ọttọhk fidede f'Ọvaar Ubinọkpaabyi, kw'ode Ubinọkpaabyi kwamạna ọnạngẹ mạna, m'antạkha-ọtạkha. 25 Ọma ajibhi ayọhnga Balak kw'ode nnwa kw'Zipọr, kw'ode ọvaarnạng kw'Moab? S'akwẹ obobe ode, kk'ẹkhọhr ọkhaama anạng p'Israẹl abẹ, bạrasẹ n'ukpir kw'm'urima bẹ abẹ? 26 K'icho arạbh chi ẹwọ kw'anạng p'Israẹl arukhu kha Hẹshbọn ọttạra kha Aroa, ọttạra kha ifhon s'ining ibaabha bẹ, ọttạra kha ifhon-va phyibh s'ining k'ọkkaden udumudum s'n'atena k'Arnọn. Bạng ọttọhk vọ ọkpa bạra abạnga nạn sẹ nátạkha ma okpe ngwọ. 27 Amma kọ ipyibha nạ́nsia. Okhenkha, ọma wọ n'atera asi ipyibha bẹ́ arima abamẹ. Tte Ọvaar Ubinọkpaabyi kw'ode Ọkpaar-aponga, ọkpaara iponga s'anạng p'Israẹl ọttạra anạng p'Ammọn chemma."

28 Ọvaarnạng kw'Ammọn itọhng nọ́khọma k'ẹkkaabha njọ ch'Jẹphta ọtọhmọ ọnạng-ẹ.

29 Ma wọ, wa ọkpaakpa s'Ọvaar Ubinọkpaabyi ch'ẹfa inwa Jẹphta. Ojekha ofona kha ẹkhạma ch'Gilead ọttạra kha Manasẹ, oseng kha Mizpa kw'Gilead, ọta urima anạng p'Ammọn abẹ. 30 Wa Jẹphta ọtạk ẹchekha ọnạng Ọvaar Ubinọkpaabyi oben bẹ́, "Ode atte anạng p'Ammọn ọbọhk anạng-m, 31 masẹ m'mmạna s'nkhem anạng p'Ammọn, ọttọhk fidede f'uchi eden ubina kha ọchọhm kwaam ukwu orobh-m, apfẹ m'ode f'Ọvaar Ubinọkpaabyi, m'bạra ntima pfẹ mfọhnọ ẹja ẹkkạmachẹ."

32 Masẹ Jẹphta ofon ọta urima anạng p'Ammọn abẹ, wa Ọvaar Ubinọkpaabyi otte anạng mbọ ọbọhk ọnạng-ẹ. 33 Wa Jẹphta udimi ifhon ẹrạbh tạma k'Aroar kpira k'ukhubha kw'Minit tạrr, akpira k'Abẹl-Keramim. Oche ngwọ wọ kw'Israẹl utim okhema anạng p'Ammọn.

34 Masẹ Jẹphta ukpir k'ọchọhm kwẹ k'Mizpa, wa ọnạng kw'uyini k'iyaan kòde, oyonga uminanwa kwẹ kw'ode nnwa mạnkkeni kw'ọkhaam, kw'utubhu ibin otor k'ukhira kw'achang-kpakpa. Nnwa ọdwạkh-ọdwạk kw'ujunung ọbạra ode kw'ikwanạng kọ́khaam. 35 Masẹ otte usiẹ-ẹ, ọyaakhẹ ekpo py'oge k'ifor, ọgạma oben bẹ́, "Chakhokho o, nnwa kwaam! Kk'aam afha e! Amma kk'echekha ntạkha k'ititikha s'Ọvaar Ubinọkpaabyi ch'nạn adạkhẹ mạ́nkke mvọhkhọ."

36 Nnwa nwọ ọpọhna bẹ́, "Otte kwaam o, ọma kk'echekha atạkha anạng Ọvaar Ubinọkpaabyi. Tim-m si k'oche kw'kk'echekha atạkha, masẹ Ọvaar Ubinọkpaabyi kk'anạng p'Ammọn, p'ade awawunanạng pọ, okhema ọnạng-ọ. 37 Okhenkha uchini otte bẹ́, "Totokhạn nạng-m aphye afa, ọfha ntwạn ọttạra ayok-mina paam ansenga angạma ambaabha akpechọ, ukwuru samma m'mpe ndimi, udim f'n'mba."

38 Otte ochera, oben-ẹ bẹ́, "Ọma sọhng." Uttiẹ-ẹ ọbọhk ofona k'aphye afa. Ẹma ọttạra ayok-mina pẹ afona ata agạma k'akpechọ, ukwuru s'm'ope udimi, s'n'udim n'ọba. 39 Masẹ aphye mbọ afa kk'agba, uminanwa nwọ ukwuna otor otte, otte o usiẹ-ẹ k'oche kw'ọtạk echekha. Wa uminanwa nwọ ujunung k'osong.

Akwẹ ọtạma mạma, ode masẹ ẹmaana ch'anạng p'Israẹl, 40 k'cho kw'idede, aminava p'Israẹl n'afona k'iwu innẹbung atima imạmạnna s'uminanwa kw'Jẹphta, kw'ubin Gilead.