Atos 13

Baranaba ehe Sawolo

1 Mï kutë vïdï 'ba kanisa 'ba Atiyɔkɔ nëbï maakowe ehe vo komoyandiye ëdïnnï. Zë ra Baranaba, Simiyɔno ako’jo kpa Nigara, Lusiyɔsi tëmï Sirënë, Manani mo aboka 'ba yere Heroda ma kara, ehe Sawolo. 2 Mati zë ëdïnnï Yere yeto ehe ha koro, Lawo Laka iya henye, "Inziye Baranaba ehe Sawolo zi lɔɔ mati minzi zë zi ko’dɔ." 3 Here tapëtï ha koro ehe mötu, zë ï’dïnnï kala nnï dë zë, ehe utunnï zë da gërï 'bënnï.

Baranaba ehe Sawolo mï Seyipurusu

4 Lawo Laka utu Baranaba ehe Sawolo zi Selesiya, ehe ta ani zë ï’bënnï da rutu 'ba Seyipurusu. 5 Zë ɔkɔnnï Salamisi, ayetonnï kö’du kise 'ba Wïrï yëtï mï bi 'ba mötuwë 'ba Yude. Yowani Marako ëdï zë aba kaa vo wakɔnyi. 6 Baranaba ehe Sawolo umunnï da rutu zi Papahɔsi. Ani zë i’jannï kora maako tëmï Yude, ru mo wisi 'ba Yësu. Mo vo mörï ehe nëbï vo ndɔndɔ. 7 Mo o’dɔ lɔɔ kpa zi Serigisu Pawolosi, yere 'ba rutu ne.

Serigisu Pawolosi, vo kö’du yɔlɔ, omba zi kowo kö’du kise 'ba Wïrï, ehe mo utu lïtu kö’du Baranaba ehe Sawolo. 8 Mora Barayësu vo mörï, ru mo maako Elimasi, awasa kö’du 'bëzë ne. Mo ayɔnzɔ zi yere sesi kazi koma mï Yësu. 9 Here Sawolo, ru mo maako kpa Pawolo, oso ndɔ Lawo Laka aba, mo ongɔ bi mbïyï da Elimasi 10 ehe iya henye, "Yï wisi 'ba Satani! Yï vo ndɔndɔ ehe vo wehe 'ba kö’du laka. Ndala aba, atɔrɔ ta bi me’do kyënyë kiya ra gërï tïnyö 'ba Yere? 11 Yere omba tï’bë riti kï’dï zi yï, yï ko’dɔ yaa na vo komoköndu. Ɔ’bɔ dekpe zi bikanyi 'ba kadra kongɔ."

Kandi komo kora ne ayöfu matutu köndu aba, ehe mo ï’bë toko vïdï maako koma zi nï gaga kala aba. 12 Mati yere ongɔ kö’du mati o’dɔ rë nï ne, mo rakaga aba mï kö’du yandi ga kö’du 'ba Yere ne. Here mo oma mï Yere.

Pawolo ehe Baranaba mï Atiyɔkɔ Pisidiya

13 Pawolo ehe oka maakowe ëtï ilannï Papahɔsi ehe ï’bënnï zi Paga mï Pambaliya, mora Yowani Marako ila zë ï’bë hulëhu mï Yerusalema. 14 Kɔsɔ zë ne ï’bënnï dagba kazi Paga zi Atiyɔkɔ mï Pisidiya. Here mï ko’do 'ba ralawo aba zë ï’bënnï mï bi 'ba mötu ehe alimannï akaŋo. 15 Tapëtï kö’du ko’jo tëmï kö’du kï’dï ehe wayöruwë 'ba nëbïyë, vo dagbe utunnï vïdï maako zi yada zi Pawolo ehe Baranaba henye, "Aboka me, ëzë ëdïyë kö’du maako aba zi kiya mati akakɔnyi vïdï, iye."

16 Pawolo ënyï rïyë. Mo o’dɔ kala nï, ehe ame’do, iya henye, "Vïdï 'ba Yiserele, ehe vïdï maako 'ba tu’dëë kpa mati ëdïnnï mötu Wïrï, oze mbili ye. 17 Wïrï 'ba Yiserele inzi zutu 'bezee, ehe mo ila vïdï 'beze kaa vo leze mati ëdï alimannï Ezipeto. Ani mo o’dɔ zë na kyigɔ. Here kyigɔ gärä 'bënï aba, mo ayasi zë yaga. 18 Kɔɔ 'butësowɔ mo ongɔ gë zë mï da lïpï. 19 Tapëtï mo ayaŋa tu’dë madɔmorïyö mï Kanana, mo ï’dï dakaŋo 'bëzë zi vïdï 'bënïyë kaa drïvu. 20 Nenye o’dɔ rë nï ïrï kɔɔ lamisowɔ 'butëmuyï."

"Tapëtï kadra nani, Wïrï ï’dï vïdï 'bezee na vo vurëë le mï kadra 'ba nëbï Samowele. 21 Here vïdï ombannï yere. Wïrï ï’dï zi zë Yere Sawolo, wisi 'ba Kisi ta daliŋɔ 'ba Benyïmona. Mo ïrï kɔɔ 'butësowɔ. 22 Tapëtï Wïrï ïrï Sawolo, ï’dï Dawidi na yere pëtï mo. Wïrï iya ga kö’du mo henye, ‘Dawidi wisi 'ba Jese ëdï kyïnë 'ba vïdï ma o’dɔ ma ndra na rakyenyi. Mo o’dɔ wa biya, mati momba mo zi ko’dɔ.’ 23 Tëmï kozo 'ba kora nenye, Wïrï ika vo wayɔmɔ Yësu zi Yiserele, kaa alömu."

24 "Mora gba kazi Yësu ayi dë, Yowani ëdï ayada zi vïdï biya mï Yiserele zi dë nnï kotɔ hulëhu zi Wïrï ehe bapatisi kïrï. 25 Mati lɔɔ 'ba Yowani ëdï ku kara zi rë nï kinde, mo iya henye, ‘Asösu 'be ma ëyï ra? Manza dë vïdï mati ëdïyë bi mo kisi. Owowe mo ëdï tayi. Mo atayi 'da, ehe manza dë laka zi kamoka ɔmo kinga.’"

26 "Öndu me, kozowe 'ba Abarayama, tu’dëë biya mati ëdïnnï kinye Wïrï mötu, kö’du kise 'ba wayɔmɔ nenye utu zi ze. 27 Vïdï 'ba Yerusalema ehe vo dagba 'bëzëë ayɔlɔnnï dë ëyï ra Yësu. Mandere zë ayɔlɔnnï kpa dë mï me’do 'ba nëbïyë mati ëdï ako’jonnï mï ko’do 'ba ralawo biya. Zë o’dɔnnï me’do 'ba nëbïyë ayi ku tïnyö vurë kikye aba ra Yësu. 28 Gbï le ëzë i’ja kö’du maako dë le zi Yësu kï’dï zi kofo, zë nduwë ha Pilato ko’jo zi mo kofo. 29 Tapëtï o’dɔnnï wa mati nëbïyë ayörunnï kö’du Yësu, oba mo akaŋo ta da taka ehe ï’dï mï ogo."

30 "Mora Wïrï ïnjë mo tëmï koli. 31 Ko’do lakyi aba Yësu alaya zi vïdï mati ï’bënnï mo aba tëmï Galilaya zi Yerusalema. Yaanya aba ëdïnnï kö’du mo yada zi vïdï 'bezee. 32 Ze kinye zi yada zi ye kö’du yöyö. Wa mati Wïrï alömu zi zutu 'bezee, 33 na ko’dɔ, yaanya aba mo o’dɔ ku zi ze Yësu kïnjë aba zi dïdï. Ëdï kaa Wayeto 'ba Dawidi ma rïyö iya henye,

‘Yï wisi ama ra,

ndenye mayi ku na 'Bu yï.’"

34 "Wïrï ïnjë Yësu tëmï koli ehe ila ida rɔ mo dë zi teŋe. Ëdï kaa Wïrï iya,

‘Ma kï’dï zi yï wa laka mati ma lömu zi Dawidi.’

35 Ehe mï Wayeto 'ba Dawidi maako iya henye,

‘Ila vïdï laka 'bëyï ne dë zi teŋe mï ogo.’

36 Mati Dawidi ëdï gba na dïdï, mo oro Wïrï. Here tapëtï mo oli, usu mo mï ogo 'ba zutu 'bɔmowe, ehe ida rɔ mo eŋe. 37 Mora vïdï mati Wïrï ïnjë tëmï koli, ida rɔ mo eŋe dë."

38 "Aboka me, kö’du kise ne ëdï henye, Yësu akila kö’du kyënyë 'be! 39 Kö’du kï’dï 'ba Mosa ɔ’bɔ dë e ko’dɔ tïnyö tëmï kö’du kyënyë 'be biya. Mora vïdï ma ëdï koma aba mï Yësu, Wïrï ako’dɔ mo tïnyö. 40 Ëdïyë komokandi aba kazi, kö’du ma nëbï iyannï ne mo’dɔ rë nï dë zi ye. Zë iyannï henye,

41 ‘E vïdï ma o’de lasa ra Wïrï,

ëdï rakaga aba ehe akoli.

Ma ko’dɔ wa maako mï kadra 'be,

ɔ’be dë zi koma,

ëzë vïdï maako ayada le zi ye.’"

42 Mati Pawolo ehe Baranaba ëdïnnï ku bi 'ba mötu 'ba Yude kila, vïdï alenzennï zë zi kiya kyɔ kö’du kölö nenyee ko’do 'ba ralawo vere aba. 43 Tapëtï mötu, Yuda kayo ehe tu’dë kayo ma ëdïnnï Wïrï mötu ne, ï’bënnï zë ëtï. Pawolo ehe Baranaba alenze zë biya zi lima mï rakyëyï 'ba Wïrï.

44 Mï ko’do 'ba ralawo vere, vïdï biya 'ba mï gawo ayinnï zi kö’du kise 'ba Yere kowo. 45 Mati Yude ongɔnnï vïdï kayo nee, zë na mïkumbë. Zë alidinnï Pawolo ehe ame’donnï na kyënyë ra kö’du biya mati mo iya ne. 46 Mora Pawolo ehe Baranaba kazi tere iyannï henye, "Domba zi yada kö’du kise 'ba Wïrï zi ye, gba kazi yada zi vïdï maakowe. Mora ombe kö’du kise ne dë! Nenye ayada henye, ombe dïdï ma ŋburu ŋburu ne dë. Yaanya aba dëdï tï’bë zi tu’dëë. 47 Yere ï’dï kö’du zi ze henye, ‘Mï’dï yï kinye kaa bikanyi zi tu’dëë, zi koba wayɔmɔ 'ba Wïrï zi vïdï mï dakaŋo biya.’"

48 Kö’du kise nenye o’dɔ tu’dëë na rakyenyi, ehe zë ayetonnï me’do 'ba Yere. Vïdï biya ma inzi ku kö’du dïdï ma ŋburu ŋburu, here omannï mï Yere. 49 Kö’du kise ga kö’du 'ba Yere apere rë nï biya mï dakaŋo nenye. 50 Mora Yude ï’bënnï zi mbara kyigɔ ma erennï Wïrï, ehe kora vo dagbe 'ba gawo. Zë ofɔnnï zë na kyënyë ra Pawolo ehe Baranaba, ehe ayetonnï zë yaza. Zë orennï zë yaga tëmï kapa 'ba dakaŋo nenye. 51 Pawolo ehe Baranaba akyitɔ durufu 'ba ga bi nani ta ndï nnï, ehe ï’bënnï dagba zi Yikɔnïyömu. 52 Mora vo lö’böwë 'ba ga ndï Yësu biya na rakyenyi, ehe osonnï ndɔ Lawo Laka aba.