Lɔɔ 'ba vo Lïtuwë 21

Pawolo ï’bë Yerusalema

1 Tapëtï kiya alime gbɔ, dï’bë mbïyï zi Kosi baburu aba. Mï damïndö mo aba dɔkɔ Rudasiya ehe ta karani, dï’bë zɔ Patara. 2 Di’ja baburu ëdï tï’bë Ponisiya, dödu ze mï mo dï’bë gbɔ. 3 Dayi ze bi mati dongɔ ze Seyipurusu ehe dï’bë zɔ daaba 'bɔmo, bitɔrɔ 'ba baburu 'ba Tiyere mï Siriya, ani baburu omba ku zi wakïnjë yasi tëmï nï. 4 Di’ja ze vo lö’böwë 'ba Yere ehe da lima zë ëtï gima kölö. Here Lawo Laka ayada zi zë, zi yada zi Pawolo mï’bë dë Yerusalema. 5 Mora mati Gima inde rë nï ku, da yeto tï’bë dagba da gërï 'beze löhu. Vïdï kora biya mbara 'bënnï ëtï ehe gisisi alasinnï ze aba tëmï gawo zi ha ranga kyedre. Dodrɔ domo ze akaŋo dagötï, damötu. 6 Tapëtï kiya alime gbɔ zi oka kölö maako, dëkyï mï baburu ehe zë ï’bënnï hulëhu liŋɔ.

7 Dï’bë ze ta Tiyere zi Potemasi, ani da mëtë ze önduwë ehe da lima zë ëtï ko’do kölö aba. 8 Mï ko’do ma vere dï’bë zi Kasariya ehe da lima ze liŋɔ 'ba Pilipo vo kö’du yëtï. Mo kölö tëmï vïdï kora madɔmorïyö mati akɔnyinnï vo lö’böwë. 9 Mo ëdï gisi mïnzö kazi koze aba sowɔ. Zë na vo kumë kö’du.

10 Dëdï ze mï Kasariya ko’do kayo aba, mati nëbï ru mo Agabusu ayi zi ze ta Yudiya. 11 Mo ïrï kɔ’di ga Pawolo, ehe mo ida kala nï ehe ndï nï mo aba. Here mo ayada zi ze, iya nenye, "Lawo Laka iya henye, Yude mï Yerusalema akidannï kora vo kyeti 'ba kɔ’di nenye. Zë akï’dïnnï mo kpa zi tu’dë maakowe."

12 Tapëtï Agabusu iya nenye, ze ehe vïdï ma ëdïnnï lima ani, alenzennï Pawolo zi tï’bë dë zi Yerusalema. 13 Mora Pawolo aya’ba da me’do iya henye, "Kö’du a’di, ëdïyë kudu ehe di’di ma kowe? Manza dë nje nzɔ zi kida, mora mëdï kpa nzɔ zi koli ga kö’du 'ba Yere Yësu mï Yerusalema."

14 Kyere dɔ’bɔ dë zi Pawolo ko’dɔ zi dë nï kopi, dila mo ehe damötu, "Akɔ Yere, o’dɔ zi ze wa mati omba zi rë nï ko’dɔ."

15 Here ze nzɔ zi tï’bë Yerusalema. 16 Kya 'ba vo lö’bö maakowe tëmï Kasariya, ï’bënnï ze aba ehe obannï ze zi lima liŋɔ 'ba Manasɔno. Mo ta Seyipurusu ehe vo lö’bö ra biyeto aba.

Pawolo ehe Yemisi

17 Mati dɔkɔ mï Yerusalema, önduwë na rakyenyi ïrïnnï ze kalakyedre aba. 18 Pawolo ï’bë ze aba zi Yemisi kongɔ ko’do vere aba, ehe kyedree 'ba kanisa ëdïnnï biya ga bi mo. 19 Pawolo amëtë zë ehe ayada hala Wïrï o’dɔ nï zi kɔnyi tu’dë maakowe. 20 Vïdï biya mati owonnï nenye ayetonnï Wïrï, ehe iyannï zi Pawolo henye, "Öndu ze, atɔ’bɔ kongɔ hala kpuluku 'ba vïdï 'beze Yude ayinnï ku na vo lö’böwë! Ehe zë biya nzɔ zi koro kö’du kï’dï 'ba Mosa. 21 Mora ayada zi zë henye, ëdï ayandi Yude mati ëdïnnï alima mï kutë tu’dë maakowe, kazi koro kö’du kï’dï 'ba Mosa. Zë iyannï henye, ayada zi nnï ŋbete gisi kora 'bënnï dë mandere lö’bö ga dalëtï 'beze. 22 A’di ra da ko’dɔ yaanya aba, vïdï owonnï ku ëdï kinye? 23 Akɔ, o’dɔ wa ma da ko’jo kö’du mo. Vïdï kora sowɔ 'beze maakowe o’dɔnnï lömu ku zi Wïrï. 24 Oba kora nenyee o’dɔ rë yï ŋbala zë ëtï na kö’du kï’dï 'ba Mosa, ehe opi wakï’dï 'bëzë here zë mohi dë nnï. Here zi vïdï biya yɔlɔ henye, kö’du ako anza dë mï kö’du yada 'bëzë ne. Zë akayɔlɔnnï orowe kö’du kï’dï 'ba Mosa. 25 Kadra ma alaga nani aba, da yada zi vo lö’böwë 'ba tu’dë maakowe, mati da sösu zi zë ko’dɔ. Diya zi zë, monyonnï wa mati ï’dï zi wïrï ma mbiya ne dë. Ayada zi zë, monyonnï yama dë, mandere ida 'ba ngötu mati urï gu mo. Ayada kpa zi zë, mo’dɔnnï kö’du kyënyë 'ba ndoro dë."

26 Mï ko’do vere aba, Pawolo oba kora sowɔ nï aba ehe akɔ’jɔ rë nnï nzɔ mï kadra kölö. Here mo ï’bë mï yëkëlu ehe ayada ndala aba kadra 'ba ra ko’dɔ ŋbala ne akinde rë nï ehe ndala aba akï’dï wakumu zi ma kölö tëmï zë.

Ïrï Pawolo mï yëkëlu

27 Mati kadra 'ba ra ko’dɔ ŋbala ku kara zi rë nï kinde, kya 'ba Yuda maakowe tëmï Asiya ongɔnnï Pawolo mï yëkëlu. Zë o’dɔnnï vïdï kayo na kamo Pawolo aba, ehe zë ïrïnnï mo. 28 Vïdï kayo hë nnï gbögbö aba, iyannï henye, "Kora 'ba Yuda akɔnyi ye ze! Kora nenye ï’bë ta bi ne toko, kö’du kyënyë kiya aba ra vïdï 'ba Yiserele, ehe kö’du kï’dï 'ba Mosa, ehe yëkëlu nenye. Mo ika komokaya kpa zi yëkëlu laka nenye, tu’dë maakowe kika mï mo." 29 Kya zë maakowe asösunnï henye Pawolo ika Trɔhimusu ta Efeso mï yëkëlu, ga kö’du zë ongɔnnï zë 'dö rïyö mï gawo kyedre ne.

30 Mï gawo kyedre ne biya kpɔrɔ aba, ehe vïdï ayinnï taho aba. Zë ïrïnnï Pawolo ehe otɔnnï mo yaga tëmï yëkëlu. Here ha loko biya isi rë nï. 31 Vïdï ombannï ku kara zi Pawolo kofo, mati kyedre 'ba turu anjiya mï turu 'ba Roma owo henye biya Yerusalema ayeto ku zi kamo ko’dɔ. 32 Kandi mo oba kya vo kanya maakowe ehe vo da kanye, ehe ahonnï bi mati vïdï kayo atɔtɔ rë nnï zi mo. Kandi mati vïdï kayo ne ongɔnnï vo kyëlu ne, ehe vo hu kanye, zë ɔrɔnnï ta bi Pawolo ku’bö.

33 Kyedre 'ba vo kyëlu ne ï’bë ehe ïrï mo, ehe ida mo nyɔri rïyö aba. Here mo ayɔnzɔ zi yɔlɔ, ëyï ra Pawolo ehe a’di ra mo o’dɔ. 34 Kya 'ba vïdï kayo maakowe agbögbö hë nnï kö’du wa maako, ehe maakowe agbögbö hë nnï kö’du wa maako 'beri. Mora ëdïnnï ku ko’dɔ kpɔrɔ kyɔ kyedre 'ba vo kyëlu ɔ’bɔ dë zi wa maako ki’ja. Here mo ï’dï kö’du zi Pawolo koba bi 'ba vo kanye. 35 Mati zë ɔkɔnnï ani, vïdï kayo ayinnï na kamo, here vo kanya ïrïnnï Pawolo rïyë ehe ïnjënnï mo. 36 Vïdï kayo alö’bönnï ga ndï zë ehe nduwë hë nnï gbögbö aba henye, "Ofo mo! Ofo mo!"

Pawolo ame’do zi vïdï kayo

37 Mati ombannï ku zi Pawolo koba mï bi 'ba vo kanye, mo ako’jo ha kyedre 'ba vo kyëlu ne, iya henye, "Ma tɔ’bɔ dë kiya kö’du maako zi yï?" Kyedre 'ba vo kyëlu ne ako’jo hɔ mo iya henye, "Hala ayɔlɔ ha 'ba Gïrïgï? 38 Anza dë vïdï 'ba Ezipeto mati ayeto kamo anza na kɔwɔ ehe alëpï dagba zi vo wehe ko’dɔ kpulukusowɔ yaga mï da lïpï?"

39 Pawolo aya’ba dɔ mo iya henye, "E e. Ma Yuda ra, ta Tasisi gawo kyedre laka mï Silisiya. Akɔ ila ma, ma me’do zi vïdï kayo nee."

40 Kyedre 'ba vo kyëlu ayada zi mo, mo atɔ’bɔ me’do. Here Pawolo ɔrɔ rïyë ame’do kala nï aba zi vïdï. Mati dë zë ku liwo, mo ame’do zi zë ha 'ba Hïbïru aba.