Lɔɔ 'ba vo Lïtuwë 4

Petero Yowani aba ika komo magalesi

1 Mati Petero Yowani aba ëdïnnï gba ame’do zi vïdïyë, vo kyëlu 'ba vo ga yëkëlu kongɔ, ehe Sadekee ɔkɔnnï. 2 Kora nenyee na kamo ga kö’du vo lïtuwë ëdïnnï vïdïyë yandi henye, yöku atënyï tëmï koli, kaa Yësu ënyï tëmï koli. 3 Tapëtï kadra kutë, zë ïrïnnï Petero, Yowani aba ï’dïnnï zë mï kamba yɔndɔ aba. 4 Mora vïdï kayo mati owonnï kö’du kise ne, omannï. Yaanya aba watiti 'ba vo lö’bö ga Yere ëdï kpulukumuyï.

5 Mï damïndö vere vo dagbe, kyedree, ehe vo komoyandi 'ba kö’du kï’dï 'ba Mosa atɔtɔ rë nnï mï Yerusalema. 6 Kyedre 'ba vo karase Anasi ëdï ani, Kayafa, Yowani, Alekazende, ehe maakowe ta dakota 'ba vo da karasa. 7 Zë ikannï Petero Yowani aba loko, o’dɔnnï zë atɔrɔ kutë, ako’jonnï hë zë, iyannï henye, "Kyigɔ 'ba a’di aba, ehe mï ru 'bëyï o’de kö’du nenye?"

8 Petero oso ndɔ Lawo Laka aba, iya henye, "Vo dagba 'ba vo dakaŋowe ehe kyedree, 9 ëzë ako’jowe he ze ndenye ga kö’du laka mati o’dɔ rë nï, ga kö’du vïdï ma akɔ’jɔ, 10 mëdï na yɔlɔ zi ye ehe zi vïdï biya 'ba Yiserele, kora nenye ëdï tɔrɔ kinye na laka ga kö’du kyigɔ 'ba Yësu Korisitɔ 'ba Nazereta, mati ï’dïyë koli da taka, mati Wïrï ïnjë tëmï koli. 11 Yësu ra yïtö mati vo wa kuvöwë ombannï dë, mora yaanya aba mo ra yïtö ma dagba na laka ndra. 12 Yësu ra nje ëdï kyigɔ aba zi wayɔmɔ. Ru mo ra nje kölö mï damöku ne akatɔ’bɔ yɔmɔ vïdï biya."

13 Vïdï kyedree na rakaga mati ongɔnnï Petero Yowani aba erennï dë, ehe zë ayɔlɔnnï vo lïtu rïyö nenyee zë öŋbö kora mbiya ayandi zë dë. Vïdï kyedree ayɔlɔnnï, zë ëdïnnï kyere Yësu aba. 14 Mora ɔ’bɔnnï dë tandi ga kö’du kora mati akɔ’jɔ ne ëdï tɔrɔ ani. 15 Kyedree utunnï zë yaga tëmï magalesi. Here zë iyannï zi oka ma kölö maako, 16 "A’di ra da ko’dɔ zi kora nenyee? Vïdï biya mï Yerusalema ayɔlɔnnï kö’du koro nenye mati vo lïtuwë o’dɔnnï, ehe dɔ’bɔ dë kiya o’dɔ rë nï dë. 17 Zi kö’du nenye sesi mo kazi apere rë nï, diya zi zë, ma me’donnï dë zi vïdï maako löhu mï ru 'ba Yësu."

18 Here zë ako’jonnï vo lïtu rïyö ne hulëhu loko, ehe ayadannï zi zë, ma yandinnï wa maako dë mï ru 'ba Yësu. 19 Petero Yowani aba aya’bannï dɔ mo zi zë iyannï henye, "Asösuwë Wïrï omba ze, zi ye ra koro, mandere zi mo ra koro? 20 Dɔ’bɔ dë lima ti, ga kö’du wa ma dongɔ ehe dowo." 21 Kyedree i’jannï kö’du maako dë na kyënyë zi riti kï’dï zi Petero ehe Yowani, here zë ilannï zë na dangölö. Vïdï biya Wïrï yeto aba ga kö’du ma o’dɔ rë nï. 22 Kora mati akɔ’jɔ kö’du koro nenye aba, kɔɔ 'bɔmo ndra ta da 'butësowɔ.

Mötu 'ba vo kome

23 Kandi mati ila Petero ehe Yowani aba na dangölö, zë a’bannï hulëhu ehe ayadannï zi okannïyë kö’du mati kyedree 'ba vo karase ehe vo dagbe iyannï zi zë. 24 Mati kɔsɔ vo lö’böwë 'ba Yere owonnï kö’du nenye, zë amötunnï zi Wïrï na radrɔko ehe iyannï henye, "Yere, o’dɔ komorïyë, dakaŋo, ranga, wasisi biya mï zë, 25 mï kyigɔ 'ba Lawo Laka, ame’do zi zutu 'beze Dawidi, vo lïtu 'ba Wïrï, iya henye,

‘Kö’du a’di tu’dëë biya na kamo?

Kö’du a’di vïdï ëdïnnï kö’du sösu ma lumë ne ko’dɔ?

26 Yere 'ba dakaŋo akɔ’jɔ rë nnï kö’du wehe,

ehe vo daliŋe adrɔko rë nnï da Yere ehe Masiya 'bɔmo.’"

27 "Kinye mï Yerusalema, Heroda ehe Ponitisi Pilato atɔtɔ rë nnï tu’dëë ëtï ehe vïdï 'ba Yiserele. Here zë ofɔ rë nnï ra vo lïtu laka 'bëyï Yësu, Masiya kinzi 'bëyï. 28 Zë o’dɔnnï wa mati omba zi ko’dɔ na kyigɔ. 29 Yere, owo me’do tere 'bëzë. Akɔnyi vo lïtu 'bëyïyë, here o’dɔ ze na kyigɔ zi me’do kö’du kise 'bëyï. 30 Ayada kyigɔ kyedre 'bëyï, kaa ëdï vïdï kɔ’jɔ ehe kö’du koro ko’dɔ, rakaga aba mï ru laka 'ba vo lïtu 'bëyï Yësu." 31 Tapëtï amötunnï ku, bi 'ba ratɔtɔ akɔhɔ rë nï. Zë osonnï ndɔ Lawo Laka aba, ayetonnï me’do mï kö’du kise a Wïrï ne kazi tere.

Mï wa yanya

32 Gboko 'ba vo lö’böwë kö’du sösu 'bëzë biya kölö. Vïdï maako iya dë wa biya mati ëdïnnï mo aba ne 'bënï ra, mora zë ayanyannï mï wa oka ma kölö maako aba. 33 Kyigɔ aba vo lïtuwë ayadannï zi vïdï biya henye, Yësu ëdï yaanya aba na dïdï. Wïrï ï’dï ya’da zi vo lö’bö 'bënïyë. 34 Vïdï maako ï’bë dë kö’du sösu aba ga kö’du wa, ga kö’du vïdï ma ëdï kaŋo aba mandere lokowe, akogo zë yaga ehe ika kɔhi mo ne zi 35 vo lïtuwë. Here zë ï’dïnnï kɔhi mo ne zi vïdï ma omba. 36 Yosepa mo kozo 'ba Lëvï, ta Seyipurusu, mati vo lïtuwë ako’jonnï mo Baranaba, kö’du ya’ba aba vïdï 'ba kö’du laka kiya zi oka, 37 mo ogo yaka 'bënï yaga, ehe ika kɔhi mo zi vo lïtuwë.