1 Vïdï kora maakowe ayinnï ta Yudiya zi Atiyɔkɔ ehe ayetonnï yandi önduwë 'ba Korisitɔ, iyannï henye, "Ayɔmɔ zë dë nje ëzë aŋbete zë ku kaa Mosa ayandi." 2 Pawolo ehe Baranaba awasa hë nnï zë ëtï. Here kanisa omba zi kutu Pawolo ehe Baranaba ehe vïdï maakowe zi tï’bë Yerusalema zi me’do mï kö’du nenye zi vo lïtuwë ehe kyedree mï Yerusalema. 3 Here kanisa utu zë. Mati zë ëdïnnï atï’bë, zë ï’bënnï kpuru Ponisiya ehe Samariya, ehe ayadannï hala tu’dëë otɔ dë nnï ku zi Wïrï. Kö’du yöyö nenye o’dɔ önduwë biya na rakyenyi.

4 Mati kora ne ɔkɔnnï mï Yerusalema, kanisa ïrï zë kalakyedre aba, ehe vo lïtuwë kyedree ëtï. Pawolo, Baranaba ehe vïdï ma ayinnï zë ëtï, ayadannï biya zi zë wa ma Wïrï o’dɔ kpuru kazi zë. 5 Here kya 'ba vo koma maakowe mati zë kpa Farasiye, zë ɔrɔnnï rïyë iyannï henye, "Tu’dëë ma ŋbete zë, ehe moronnï kö’du kï’dï 'ba Mosa."

6 Vo lïtuwë ehe kyedree atɔtɔ rë nnï me’do mï kö’du nenye. 7 Ame’donnï kadra konda aba. Here Petero ënyï rïyë ehe iya henye, "Önduwë, ayɔle ku henye, kyere mï kadra ma alaga, Wïrï inzi ma tëmï kutëë henye tu’dë akowonnï ta dami’di ha ma kö’du yöyö laka ehe koma. 8 Wïrï mati ayɔlɔ a’di ra ëdï mï di’di vïdï biya, mo ayada mo omba zë ku, Lawo Laka kï’dï aba zi zë, kaa mo ï’dï zi ze. 9 Wïrï o’dɔ zë dë kutu ta re ze. Mo o’dɔ di’di zë ŋbala koma aba. 10 Yaanya aba, kö’du a’di ëdïyë yɔnzɔ Wïrï, wa yeto kï’dï gu vo lö’bö nenyee? Wakïnjë nenye ayeto ndra le ze ehe zutu 'bezee ɔ’bɔ dë kïnjë. 11 Mora doma henye, akayɔmɔ ze wakï’dï 'ba rakyëyï aba kazi Yere Yësu, kpa kaa tu’dëë."

12 Vïdï biya alimannï liwo mati owonnï Baranaba ehe Pawolo ayadannï hala Wïrï o’dɔ kö’du koro, kyïnë kyigɔ 'bënï, ehe rakaga zi tu’dëë kpuru kazi zë. 13 Tapëtï zë indennï me’do ku, Yemisi iya henye, "Önduwë, oze mbili ye zi ma! 14 Simona ayada henye hala Wïrï ayi mï kadra ma dagba zi tu’dëë, ehe o’dɔ kya maakowe na vïdï ënï. 15 Me’do 'ba nëbïyë ida rë nï ku kö’du kiya 'bama aba. Ëdï na yöru,

16 ‘Ma kata’ba ehe kuvö löhu loko 'ba Dawidi ma alëpï.

Ma kuvö tëmï rayaŋa 'bɔmo ehe kɔ’jɔ mo rïyë löhu,

17 here vïdï ma ɔsɔnnï ehe tu’dëë,

mati ma ko’jo zi tëdïnnï vïdï 'bama,

akomannï Yere.

Ma Yere ra, miya wa nenyee.

18 Ma ayada zë mï kadra ma alagannï kyere.’"

19 Here ma sösu dë da kï’dï wakïnjë yeto da tu’dëë, ma ëdïnnï ku dë nnï kopi zi Wïrï. 20 Da yöru ehe nje yada zi zë, anza dë zi konyo wa maako ma ï’dï ku zi wïrï mbiye, anza dë zi ndoro ko’dɔ, anza dë zi konyo ida 'ba ngötu maakowe mati urï gu mo, ehe anza dë zi konyo yama. 21 Ga kö’du kï’dï 'ba Mosa ayëtï ku mï gawo biya mï kɔɔ lakyi, ehe ta ga ko’do 'ba ralawo biya ëdï ako’jo mï bi 'ba mötu 'beze.

22 Vo lïtuwë ehe kyedree, ehe biya vïdï 'ba kanisa ombannï zi kutu kya kora 'bënnï maakowe zi Atiyɔkɔ zi tï’bënnï Pawolo ehe Baranaba ëtï. Zë inzinnï Sila ehe Yudasi, mati ako’jo kpa Barasaba, zë ra na vo dagbe 'ba önduwë. 23 Zë ayörunnï waraga iya henye, "Ze vo lïtuwë, ehe kyedree, ze önduwë dutu wamëtë zi ye biya tu’dë mati vo lö’böwë 'ba Yere mï Atiyɔkɔ, Siriya ehe Silisiya."

24 "Dowo ze henye, vïdï maakowe ta kinye, o’dɔnnï yë rasösu aba, ga kö’du ma zë iyannï, mora dutu zë dë. 25 Here da tɔtɔ re ze ehe domba ku zi kinzi kya kora maakowe kutu zë zi ye, nï aboka laka 'beze Baranaba ehe Pawolo ëtï. 26 Kora nenyee ï’dï dïdï nnï ku kö’du 'ba Yere Yësu Korisitɔ. 27 Dëdï kpa kutu zi ye Yudasi ehe Sila, zë ra akayadannï zi ye hë nnï aba, kpa kaa da yöru. 28 Lawo Laka ayada zi ze henye, dï’dï ze kya wakïnjë maako dë ndra zi ye ta da ma nenyee: 29 anza dë zi konyo wa maako ma ï’dï ku zi wïrï mbiye, anza dë zi konyo yama, anza dë zi konyo ida 'ba ngötu maakowe mati urï gu mo, ehe anza dë zi ndoro ko’dɔ. Ëzë o’de kö’du nenyee, ako’de na laka. Dutu wamëtë 'beze zi ye."

30 Kora sowɔ ne ilannï Yerusalema ehe ï’bënnï Atiyɔkɔ. Here zë ako’jonnï vïdï 'ba kanisa bi kölö ehe ï’dï waraga ne zi zë. 31 Mati waraga ne ako’jo, ï’dï rakyigɔ ehe rakyenyi kyedre zi zë. 32 Yudasi ehe Sila zë ku nëbïyë, zë iyannï kö’du kayo mati ï’dï kyigɔ zi önduwë. 33 Kora mati zë ta Yerusalema, tapëtï alimannï kadra maako aba mï Atiyɔkɔ, zë ënyïnnï ta’ba zi vïdï mati utunnï zë. Önduwë iyannï zi zë henye, "Ï’bëë na rakyëyï." 35 Mora Pawolo ehe Baranaba alimannï nduwë mï Atiyɔkɔ. Ani zë ayandinnï kö’du ehe ayëtïnnï me’do 'ba Yere, vïdï kayo maakowe ëtï.

36 Kadra maako aba yaa, Pawolo iya zi Baranaba henye, "Dï’bë ze hulëhu ehe tï’bë kongɔ önduwë mï Korisitɔ mï gawo biya mati da yëtï me’do 'ba Yere mï zë. Here da kayɔlɔ ze hala zë ëdïnnï ako’dɔ." 37 Baranaba omba zi Yowani koba, ru mo vere Marako. 38 Mora Pawolo omba dë, ga kö’du mo ila zë mï Pambaliya ehe mo ɔrɔ ku ta bi lɔɔ ko’dɔ zë ëtï. 39 Pawolo ehe Baranaba awasa hë nnï, ehe vïdï kölö tëmï zë ï’bë gërï 'bënï kutu. Baranaba oba Marako ehe ï’bënnï Seyipurusu, 40 mora Pawolo inzi Sila ehe ï’bënnï gërï ma kutu. Önduwë mï Korisitɔ ï’dïnnï zë ku da kala Wïrï. 41 Pawolo ï’bë kpuru Siriya ehe Silisiya vïdï 'ba kanisa ko’dɔ zi kyigɔ.