1 Tapëtï zë ï’bënnï kpuru Ambahipolisi ehe Apoloniya, zë ï’bënnï dagba zi Tasalanika. Bi 'ba mötu 'ba Yude ëdï mï gawo kyedre nani. 2 Here ëdï kaa 'duwï, Pawolo ï’bë ani zi bi 'ba mötu, ehe mï ko’do 'ba ralawo wota mo ame’do zi vïdïyë. Mo ame’do tëmï wayöruwë 3 zi yada zi zë henye, ëdï laka zi Korisitɔ ki’ja riti, ehe ëdï laka mo ënyï tëmï koli. Pawolo ayada kpa zi zë henye, "Yësu mati mëdï kö’du mo kiya, Korisitɔ ra." 4 Kya maakowe tëmï zë omannï mï kö’du ma Pawolo iya, ehe ayinnï na vo lö’bö kaa Pawolo ehe Sila. Tu’dë maakowe ehe mbara kayo mati vïdï ayɔlɔnnï zë ndra omannï kpa mï kö’du kise ne.

5 Yuda maakowe, na mïkumbë ehe zë omannï vïdï 'ba kö’du kyënyë ko’dɔ maakowe mati alimannï toko ra bi 'ba wakogo zi yeto wehe ko’dɔ mï gawo kyedre ne. Zë ombannï zi Pawolo kïrï ehe Sila kika yaga zi vïdï kayo ne, ehe zë ï’bënnï zɔ mbïyï liŋɔ 'ba Jasɔno. 6 Mora mati zë i’jannï zë dë ani, zë ïrïnnï Jasɔno ehe öndu maakowe ëtï. Zë obannï zë zi vo kalakonda 'ba gawo kyedre ehe hë nnï gbögbö aba henye, "Pawolo ehe Sila o’dɔnnï kö’du kyënyë ku ta bi ne biya. Yaanya aba, ayinnï ku kinye 7 ehe Jasɔno ïrï zë kalakyedre aba liŋɔ 'bënï. Zë biya owennï kö’du kï’dï 'ba Yere 'ba Roma ku, iyannï henye, vere maako ru mo Yësu, Yere ra." 8 Vo mï turu nenyee na rasösu, mati owonnï nenye. 9 Here zë o’dɔnnï Jasɔno ehe maakowe ëtï zi kɔhi kopi dagba atehe 'da zë kila atï’bë.

10 Mï yɔndɔ kölö ne, önduwë utunnï Pawolo ehe Sila zi Beriya, ehe tapëtï zë ɔkɔnnï, ï’bënnï mï bi 'ba mötu 'ba Yude. 11 Vïdï 'ba Beriya ndra na laka ta da vïdï 'ba Tasalanika, ga kö’du zë rakyenyi aba zi kö’du kise ne kïrï, ehe ko’do ta ga ko’do, zë ayandinnï wayöruwë, zi kongɔ ëzë kö’du nenyee tïnyö. 12 Kayo tëmï zë ï’dï koma 'bënnï mï Yere, vïdï mbara Gïrïgï mati vïdï ayɔlɔnnï zë ndra ehe vïdï kora kayo, 13 mora mati Yude mï Tasalanika owonnï Pawolo ëdï kö’du kise 'ba Wïrï ne yëtï mï Beriya, zë ï’bënnï ani ehe o’dɔnnï vïdï kayo ne zi tëdïnnï na vo wehe 'ba Pawolo. 14 Kandi önduwë utunnï Pawolo akaŋo ha ranga, mora Sila ehe Timotiyɔ alima 'bënnï mï Beriya. 15 Vïdï kora maakowe ï’bënnï na kɔwɔ Pawolo aba le kaa Atenisi, ehe a’bannï kö’du aba zi Sila ehe Timotiyɔ zi tayinnï kandi zi nï.

16 Mati Pawolo ëdï bi Sila ehe Timotiyɔ kisi mï Atenisi, mo rasösu kyedre aba zi kongɔ wïrï mbiya mï gawo kyedre ne. 17 Mo ï’bë mï bi 'ba mötu 'ba Yude zi me’do zi Yude ehe zi vïdï 'ba Gïrïgïyë ma erennï Wïrï. Ko’do ta ga ko’do mo ame’do kpa zi vïdï mati mo i’ja bi 'ba wakogo. 18 Kya vo komoyandi Epikuriyɔno maakowe ehe vo komoyandi Isitɔwïkï maakowe awasa hë nnï kpa mo aba. Vïdï ako’jonnï kö’du henye, "A’di ra vo lumë nenye ayɔnzɔ zi kiya?"

Maakowe iyannï henye, "Pawolo ëdï kö’du wïrï 'ba vo leze ra yëtï!" Zë iyannï here ga kö’du mo ëdï ame’do kö’du 'ba Yësu ehe tënyï 'ba vïdï tëmï koli. 19 Zë ikannï Pawolo bi 'ba ratɔtɔ ako’jo Aropagusi, ehe iya henye, "Ayada zi ze, a’di ra kö’du yandi kyïyï 'bëyï ne biya ëdï? 20 Dowo ze ika kö’du rakaga maakowe da yɔlɔ zë dë mï me’do 'bëyï ne a’di ra?" 21 Kpa ndra ta da wa maako, vïdï 'ba Atenisi ehe vo leze mati ëdï alimannï ani, ɔwɔ zi kowo ehe zi me’do kö’du wakyïyï maako.

22 Here Pawolo ɔrɔ mï kutë bi 'ba Aropagusi iya henye, "Vïdï 'ba Atenisi, monge vïdï 'ba yënï ndra. 23 Mati mëdï tï’bë kpuru bi kongɔ aba da wa mötuwë, mi’ja me’do da karasa: Zi wïrï ma kazi yɔlɔ. Amötuwë wïrï nenye, mora tïnyö ayɔle mo dë. Here momba zi yada kö’du mo zi ye."

24 Wïrï nenye ra o’dɔ damöku ehe wa biya mï mo. Mo Yere 'ba komorïyë ehe dakaŋo ehe mo alima dë mï yëkëlu mati uvö kala vïdï köndu aba. 25 Mo omba wakɔnyi dë kazi vïdï maako. Mo ï’dï dïdï, lawo, ehe wa kpa biya zi vïdï. 26 Tëmï vïdï kölö, Wïrï o’dɔ vïdï mati alimannï dakaŋo, ehe mo o’dɔ kadra ehe bi zi vïdï limannï 'dɔmo. 27 Wïrï o’dɔ nenye biya, here zi ze nï koma, ehe tɔkɔ yaga, ehe nï ki’ja. Mora mo anza dë na kɔwɔ ta re ze, 28 ehe mo ï’dï kyigɔ zi ze, zi lima, zi tehe, ehe zi tëdï ëyï 'bënï ze. "Ze gisi ɔmo," kaa vo ngala ya’bi 'be maakowe iyannï. 29 Kyere ze gisi 'ba Wïrï, da sösuwë dë henye, mo ëdï kaa wïrï mbiya o’dɔ yaga tëmï dahabo mandere manzede mandere yïtö. Mo anza dë kaa wa mati vïdï köndu akasösu ehe ko’dɔ. 30 Kɔɔ mati alaga kyere naniye, Wïrï ila nenye biya ga kö’du vïdï ayɔlɔnnï dë a’di ra nëdïnnï ko’dɔ. Mora yaanya aba mo iya henye, vïdï biya ta bi ne motɔ dë nnï zi mo. 31 Mo akɔ’jɔ ko’do mo ku mati ako’dɔ vurë vïdï 'ba damöku na laka. Ehe mo inzi kora ne, Yësu zi ko’dɔ vurë. Wïrï ï’dï yɔlɔ mo nenye zi ze biya Yësu kïnjë aba tëmï koli.

32 Kandi mati vïdï owonnï Pawolo iya, kora ïnjë tëmï koli, kya zë maakowe ayetonnï kogo. Maakowe iyannï henye, "Da kowo ze yï ame’do ga kö’du nenye kadra maako aba löhu." 33 Mati Pawolo ila bi 'ba ratɔtɔ ne ku, 34 kya kora maakowe ï’dïnnï koma 'bënnï mï Yere ehe ï’bënnï Pawolo aba. Ma kölö tëmï vïdï 'ba ratɔte ru mo Danasiyösi, ehe mbara maako ru mo Damari ehe maakowe kpa kayo ï’dï koma 'bënnï mï Yere.