Lɔɔ 'ba vo Lïtuwë 18

Pawolo mï Koriti

1 Pawolo ila Atenisi ï’bë Koriti, 2 ani mo i’ja Akuwila, kora maako Yuda ra tëmï Poniyitusu. Anza na konda ta ga ma nenye, Akuwila ayi ta Italiya mbara 'bënï Pirisila aba, ga kö’du Yere Kulidasi ï’dï kö’du Yude biya zi Roma kila. Pawolo ï’bë zi kongɔ Akuwila ehe Pirisila 3 ehe i’ja zë vo loko da’börö kuvöwë ra. Pawolo kpa vo loko da’börö kuvö ra, here mo alima zë ëtï ehe o’dɔnnï lɔɔ ga bi kölö. 4 Mï ko’do 'ba ralawo biya, Pawolo ï’bë bi 'ba mötu 'ba Yude. Mo ame’do zi Yude ehe tu’dë maakowe ehe ayɔnzɔ zi zë kopi.

5 Mora tapëtï Sila ehe Timotiyɔ ɔkɔnnï ta Mesedɔniya, mo ayaŋa kadra 'bënï biya zi yëtï kö’du zi Yude Yësu mo Korisitɔ ra. 6 Ndundu mo, zë ofɔ rë nnï dɔ mo alidinnï mo. Here mo akɔhɔ durufu ta ra bɔngɔ 'bënï ehe iya zi zë henye, "Wa mati o’dɔ rë nï zi ye, atëdï kö’du lïtë 'be ra! Ayaŋe ru ma dë. Yaanya aba ehe dagba ani mëdï tï’bë yëtï zi tu’dë maakowe." 7 Pawolo idra rë nï liŋɔ 'ba kora maako ru Tito Jusitusu mo vo mötu zi Wïrï, ehe liŋɔ 'bɔmo kara dakapa bi 'ba mötu. 8 Kurusipo ra vo dagba 'ba bi 'ba mötu ne. Mo ehe vïdï biya mï dakota 'bɔmo ï’dï koma 'bënnï mï Yere. Ma kayo maakowe mï Koriti owonnï kö’du kise ne kpa, ehe vïdï biya mati koma aba mï Yere abapatisi zë.

9 Yɔndɔ kölö maako aba, Yere ame’do zi Pawolo tëmï rayada iya henye, "Ere dë, zi sesi kö’du yëtï nduwë dagba. Ɔrɔ dë! 10 Ma yï aba, ehe vïdï o’dɔnnï wa maakowe dë zi yï. Vïdï kayo mï gawo kyedre nenye, 'bama ra." 11 Pawolo alima mï Koriti kɔɔ kölö ehe yehe modaka, vïdï yandi me’do 'ba Wïrï aba.

12 Mati Galikö Yere 'ba Akasiya, kya Yuda maakowe ayinnï bi kölö ehe ïrïnnï Pawolo. Zë ikannï mo bi 'ba vurë 13 ehe iyannï henye, "Kora nenye ëdï yɔnzɔ zi vïdï 'beze ko’dɔ zi mötu Wïrï mï gërï mati kö’du kï’dï 'beze omba dë." 14 Gba kazi Pawolo me’do, Galikö iya henye, "Ëzë ëdï vurë kiya ra kora nenye, na vo kö’du kyënyë ko’dɔ mandere wa maako eme dë, ma kowo me’do 'bëyï ne. 15 Mora kyere nje me’do 'ba ha, ru ehe kö’du kï’dï 'be, onge gɔ mo na bi de. Momba dë zi vurë ma here ne, kiya." 16 Here mo utu zë yaga ta bi 'ba vurë. 17 Vïdï ne ïrïnnï Sositenisi, vo dagba bi 'ba mötu 'ba Yude, u’bönnï mo komo bi 'ba vurë. Mora du kö’du ne ɔgɔ dë da Galikö.

Pawolo a’ba Atiyɔkɔ 'ba Siriya

18 Tapëtï lima 'ba Pawolo yaa vo lö’bö 'ba Yere ëtï mï Koriti, mo iya zi zë alime gbɔ ehe ï’bë Siriya, Akuwila aba ehe Pirisila. Mora gba mo ï’bë dë, mo atëtë dë nï bi 'ba Senesiriya ga kö’du mo o’dɔ lömu zi Wïrï. 19 Mati zë ɔkɔnnï Efeso, Pawolo ila Pirisila ehe Akuwila. Mo ï’bë bi 'ba mötu zi me’do zi Yude ani. 20 Zë ako’jonnï hɔ mo zi lima ani na konda, mora mo omba dë. 21 Mo ayada zi zë alime gbɔ, ehe iya henye, "Ëzë Wïrï ila ma, ma tayi hulëhu." Here mo ila Efeso.

22 Pawolo ï’bë zi Kasariya, bi mati mo amëtë kanisa. Here mo ï’bë dagba Atiyɔkɔ. 23 Tapëtï lima 'bɔmo tisi ani, mo ila ehe ï’bë zi bi kayo mï Galatiya ehe Paragiya. Mo akɔnyi vo lö’böwë ani zi tayinnï na kyigɔ mï koma 'bënnï.

Apolo mï Efeso

24 Yuda maako ru mo Apolo ayi zi Efeso. Apolo o’jo mo mï gawo kyedre 'ba Alikazenderiya. Mo vo kö’du yɔlɔ 'ba wayöruwë 'ba Wïrï kayo. 25 Mo ayɔlɔ kö’du 'ba gërï 'ba Yere kpa kayo, ehe mo ëdï ame’do mï mo, da kö’du komba kyedre aba. Wa mati mo ayandi kö’du Yësu ëdï tïnyö, mora mo ayɔlɔ nje bapatisi 'ba Yowani. 26 Apolo ayeto me’do kazi tere bi 'ba mötu. Mati Pirisila ehe Akuwila owonnï mo, zë obannï mo liŋɔ 'bënnï ehe akɔnyinnï mo zi yɔlɔ kö’du 'ba Wïrï na laka.

27 Apolo omba zi tï’bë zi Akasiya. Here önduwë ayörunnï waraga ayada zi vo lö’böwë mati ëdïnnï ani ne, zi mo kïrï kalakyedre aba. Tapëtï Apolo ɔkɔ mï Akasiya, mo na wakɔnyi kyedre zi vïdï biya mati ï’dï koma 'bënnï mï Yere Yësu ga kö’du wakï’dï 'ba rakyëyï 'ba Wïrï. 28 Mo alëpï mï ha wasa Yude ëtï, ehe ta da komo vïdï kayo. Mo oba tëmï wayöruwë zi yada henye, Yësu mo Korisitɔ ra.