1 Tapëtï ha gbögbö inde rë nï ku, Pawolo ise kö’du zi vo lö’böwë ehe ame’do me’do 'ba rakyigɔ zi zë. Mo ila zë, ehe ï’bë zi Mesedɔniya. 2 Kaa mati mo ï’bë ta bi maako zi agamo, mo ame’do me’do 'ba rakyigɔ zi vo lö’böwë kö’du kise kayo aba. Ndundu mo, mo ï’bë Gïrïgï 3 ehe alima ani yehe wota. Pawolo omba ku zi tï’bë Siriya. Mora Yude o’dɔnnï yeṛe rɔ mo, here mo omba zi tï’bë hulëhu ta gërï 'ba Mesedɔniya. 4 Mo oba Sapatere wisi 'ba Piyasi ta Beriya, Arisitarisi, Sekandusu ta Tasalanika, Gayisu ta Dëbë, Timotiyɔ, ehe vïdï rïyö 'ba Asiya ru zë Tayihikasi ehe Trɔhimusu nï aba. 5 Zë ï’bënnï dagba zi Trowasi, ehe isinnï bi ze ani. 6 Tapëtï karama 'ba mangɔlɔ’bɔ konyo kazi langa, dayi ze ta Filipi. Yaa ko’do da muyï aba, di’ja zë mï Trowasi, ehe da lima ani ko’do 'ba gima kölö.

7 Mï dagba ko’do 'ba gima, da tɔtɔ re ze wakonyo bi kölö. Pawolo ame’do zi vïdï le mï kutë yɔndɔ, ga kö’du mo omba tï’bë mïndö aba. 8 Rïyë mï lokotɔrɔ bi ma dëdï re ze tɔtɔ, ani lamba kayo ëdï. 9 Kora ɔbi maako ru mo Yuteyusi ëdï alima mï bïngö 'ba loko. Mati Pawolo ame’do, ame’do na konda, Yuteyusi anano. Ndundu mo aba, mo ï’bë ko’do ehe alëpï tëmï lokotɔrɔ ma wota 'ba rïyë le dakaŋo. Mati ïnjënnï mo rïyë, mo oli wënï ku. 10 Pawolo ï’bë akaŋo ehe ïdë rë nï da Yuteyusi. Mo ïrï mo mï kanza nï ehe iya henye, "Asösuwë dë! Mo ëdï na dïdï." 11 Tapëtï Pawolo ï’bë hulëhu rïyë mï lokotɔrɔ, mo owe mangɔlɔ’bɔ ehe onyo. Mo ame’do le ra bi kezi ehe ï’bë. 12 Here zë obannï kora ɔbi ne liŋɔ na dïdï, ehe zë rakyenyi aba.

13 Dï’bë ze dagba zi baburu ehe dï’bë baburu aba zi Asoso, ehe domba tï’bë zi Pawolo koba mï baburu. Mo akɔ’jɔ nenye ga kö’du mo ëdï tï’bë ani ndï aba. 14 Mati mo i’ja ze mï Asoso, mo ayi mï baburu ehe dï’bë zɔ dagba zi Mitiyilina. 15 Mï ko’do vere, dayi zi bi maako kara ra Kiyɔsi ehe mï ko’do vere dɔkɔ Samoso. Tapëtï ko’do ma nani, dï’bë ze Meletusu. 16 Pawolo omba zi tï’bë dagba Efeso kopi, ga kö’du mo omba dë zi kadra yaŋa mï Asiya. Mo na kɔrɔkɔrɔ ehe omba zi tëdï mï Yerusalema mï ko’do karama 'ba wakumu ta yaka.

17 Ta Meletusu Pawolo utu kö’du kise zi kyedree 'ba kanisa 'ba Efeso zi tayinnï zi nï. 18 Mati zë ɔkɔnnï ani, mo iya henye, "Ayɔle wa mati mo’dɔ ku biya mï kadra mëdï ëtï, mati mayi dagba zi Asiya. 19 Yuda maakowe o’dɔnnï mala ra ma ehe o’dɔ ma na rasösu ehe riti. Mora mëdï lɔɔ 'ba Yere ko’dɔ komo tɔlɔ aba ehe kazi rakïsï. 20 Mati ma yëtï kö’du mï vïdï kayo, mandere yandi kö’du mï liŋɔ 'be, mïrï wa maako dë hulëhu ta bi yada wa mati akakɔnyiye. 21 Ma yada zi Yude ehe tu’dë maakowe zi dë nnï kotɔ zi Wïrï tëmï kö’du kyënyë ko’dɔ 'bënnï ehe zi koma mï Yere 'beze Yësu. 22 Ma yɔlɔ dë, a’di ra ako’dɔ rë nï zi ma mï Yerusalema, mora ma koro Lawo Laka 'ba Wïrï ehe tï’bë ani. 23 Mï gawo kyedre biya mï’bë, Lawo Laka ayada zi ma henye, akï’dï ma mï kamba ehe ma tëdï mï riti. 24 Mora ma sösu wa ma ako’dɔ rë nï zi ma dë, momba nje zi taho zi kinde lɔɔ mati Yere Yësu ï’dï zi ma ko’dɔ. Lɔɔ nenye zi yada kö’du yöyö laka 'ba Wïrï, wakï’dï 'ba rakyëyï."

25 "Mï’bë tëmï bi maako, zi bi maako, yëtï zi ye kö’du 'ba damöku 'ba Wïrï, mora yaanya aba ma yɔlɔ ku, vïdï maako tëmï yë ongɔ ma dekpe löhu. 26 Ma yada zi ye ndenye, mo’dɔ wa kyënyë maako dë zi ye. 27 Ma yada wa mati Wïrï omba zi ye yɔlɔ ne, ku biya. 28 Ongɔ ga re, ehe vïdï biya Lawo Laka ï’dï ku kale ze zi gë zë kongɔ. Ëdïyë na vo yako 'ba kanisa 'ba Wïrï, kanisa mati Wïrï ogo yama 'ba wisi 'bënï aba. 29 Ma yɔlɔ ku, tapëtï tï’bë 'bama, maakowe atayinnï kaa wölïwölï kyënyë lëpï de kamo aba. 30 Kya 'ba vïdï 'be maakowe, akigannï mbërë zi vo lö’bö 'ba Yere ta’da. 31 Ëdïyë bi kida aba! Asösuwë hala kadra ehe yɔndɔ aba kɔɔ wota ma sesi yandi ye tɔlɔ aba komo ma.

32 Yaanya aba, mï’dï yë ku da kala Wïrï. Asösuwë kö’du kise 'ba wakï’dï 'bɔmo 'ba rakyëyï. Kö’du kise nenye, atɔ’bɔ kɔnyi ye, ehe akï’dï zi ye drïvu mï kutë zë biya mati o’dɔ zë ŋbala. 33 Momba kɔhi 'ba vïdï maako dë, mandere bɔngɔ. 34 Ayɔle ku hala mo’dɔ lɔɔ kala 'bama aba zi ko’dɔ ma na dïdï ehe aboka me. 35 Mora wa biya mati mo’dɔ, yada hala ako’de zi kɔnyi vo leriye. Asösuwë, Yere 'beze Yësu iya henye, ‘Ya’da ayi kayo ta bi wakï’dï ndra ta da wakïrï.’"

36 Tapëtï Pawolo inde me’do kiya ku, mo alɔmvɔ akaŋo zë ëtï biya ehe amotunnï. 37 Vïdï biya udunnï ehe onzonnï mo ehe unzunnï hɔ mo. 38 Zë na rasösu ga kö’du Pawolo ayada zi zë henye, "Onge ma dekpe löhu." Here zë ï’bënnï mo aba zi baburu.