Lɔɔ 'ba vo Lïtuwë 22

1 "Önduwë ehe 'buwë, owowe kaa miya wa mati o’dɔ rë nï." 2 Mati vïdï kayo ne owonnï Pawolo ame’do zi nnï mï ha 'ba Hïbïru, zë ayinnï ndra liwo. Here Pawolo iya henye, 3 "Ma Yuda ra, o’jo ma mï gawo kyedre 'ba Tasisi mï Silisiya. Mora mövu kinye mï Yerusalema na vo kö’du ko’jo 'ba Gamalili, ehe ayandi ma zi kusu ga ndï kö’du kï’dï 'ba zutu 'beze biya. Tïnyö, ma kpa momba zi Wïrï koro, kaa e biya mati ndenye."

4 "Ma yaza vïdï mati usu Gërï 'ba Yere, ehe mofo kya maakowe. Mïrï maakowe ehe mï’dï mï kamba. Ma sösu dë, ëzë zë kora mandere mbara. 5 Kyedre 'ba vo karase, ehe biya vïdï mï magalesi akatɔ’bɔ yadannï zi yï nenye ëdï tïnyö. Mïrï waraga kazi zë, zi öndu ze mï Damasika, here zi ma kïrï vïdï ehe zi kika zë mï Yerusalema zi yaza."

Pawolo ayada kö’du ra kopi 'bënï

6 "Ko’do kölö maako aba, kaa kadra kutë, mëdï ku zi tɔkɔ kara Damasika, bikanyi ta komorïyë, kandi ayanyi bi toko ra ma. 7 Ma lëpï dakaŋo ehe mowo gu ëdï ko’jo wa, ‘Sawolo, Sawolo, kö’du a’di ëdï yaza ma?’"

8 "Ma ya’ba dɔ mo henye, ‘Yï 'bënï ëyï, Yere?’ Yere aya’ba dɔ mo iya henye, ‘Ma Yësu 'ba Nazereta! Ma ra, ëdï ayaza ne.’ 9 Vïdï ma ëdïnnï tï’bë ma aba, ongɔnnï bikanyi ne, mora owonnï gu dë."

10 "Ma ko’jo kö’du henye, ‘Yere, omba a’di zi ma ko’dɔ?’ Here mo ayada zi ma iya henye, ‘Ënyï rïyë ehe ï’bë mï Damasika. Ëzë ɔkɔ ani, a’di akayada zi yï ko’dɔ.’ 11 Bikanyi kyedre ne ku ndra here mɔ’bɔ dë zi bi kongɔ. Oke ra ïrïnnï ma kala aba kika mï Damasika."

12 "Mï gawo kyedre nani, kora maako ëdï ru mo Ananiya, mo koma aba mï kö’du kï’dï 'ba Mosa, ehe Yude biya mati alimannï ani, ombannï mo laka. 13 Mo ayi zi ma, ehe iya henye, ‘Sawolo, öndu ma, yaanya aba akongɔ bi löhu!’ Kandi mɔ’bɔ bi kongɔ. 14 Here Ananiyasi ayada zi ma iya henye, ‘Wïrï mati zutu 'beze amötunnï, inzi yï ku zi yɔlɔ wa mati mo omba o’dɔ rë nï ku. Mo inzi yï zi kongɔ Mo Mati Tïnyö, ehe zi gu mo kowo, 15 ga kö’du zi tëdï na vo kiya 'ba wa mati ongɔ ehe owo. 16 A’di ra ëdï bi mo kisi? Ënyï rïyë! Ïrï bapatisi zi kö’du kyënyë 'bëyï kaka, mötu aba zi Yere.’"

Ako’jo Pawolo zi kö’du yëtï zi tu’dë maakowe

17 "Tapëtï ma nenye ma’ba Yerusalema ehe mï’bë mï yëkëlu zi mötu. Ani mongɔ rayada 18 'ba Yere. Mo iya zi ma henye, ‘Kandi, ila Yerusalema! Vïdï ombannï dë kowo, wa mati ëdï akiya ga kö’du ma.’ 19 Ma ya’ba dɔ mo henye, ‘Yere, zë ayɔlɔnnï henye mï bi 'ba mötu kayo 'beze mïrï, ehe mu’bö vïdï mati ëdïnnï koma aba mï yï. 20 Ofo Setifano ga kö’du mo ame’do kö’du yï. Mɔrɔ ani, ehe hu kö’du kï’dï nduwë. Here mongɔ ga bɔngɔ 'ba kora mati ofonnï mo.’ 21 Mora Yere ayada zi ma tï’bë, ehe mo alömu zi kutu ma kɔwɔ zi tu’dë maakowe."

22 Vïdï kayo ne owonnï le Pawolo iya nenye. Here zë ayetonnï hë nnï gbögbö. "Ofowe kora nenye! Mo ɔ’bɔ dë zi lima." 23 Zë nduwë hë nnï gbögbö. Zë akɔhɔnnï bɔngɔ 'bënnï toko ehe u’dunnï durufu mï buluku. 24 Kyedre 'ba vo kyëlu mï turu 'ba Roma, ï’dï kö’du zi Pawolo koba bi 'ba vo kanye, ehe ku’bö so’da aba. Mo o’dɔ nenye zi yɔlɔ kö’du a’di vïdï ëdï hë nnï gbögbö da Pawolo. 25 Mati vo kanya ëdïnnï ku Pawolo kida zi ku’bö, mo ako’jo ha vo da kanye ma ëdï tɔrɔ ani, "Ëdï na dangölö zi ku’bö vïdï 'ba Roma dagba ayɔnzɔ mo dë komo vurë?" 26 Mati vo da kanye owo nenye, mo ï’bë zi kyedre vo dë nï iya henye, "Ëdï a’di ko’dɔ? Kora nenye vïdï 'ba Roma ra!"

27 Here, kyedre 'ba vo kyëlu ne ï’bë zi Pawolo ehe ako’jo hɔ mo, iya henye, "Ayada zi ma, yï vïdï 'ba Roma ra?" Pawolo aya’ba dɔ mo lëzë aba iya henye, "Ɔɔ."

28 Kyedre 'ba vo da kyëlu iya henye, "Mopi kɔhi kyɔ zi tayi vïdï 'ba Roma." Mora Pawolo aya’ba dɔ mo iya henye, "O’jo ma vïdï 'ba Roma." 29 Zë mati ombannï zi hɔ mo ko’jo, ina rë nnï kɔwɔ kandi ta rɔ mo. Kyedre 'ba vo da kyëlu na bi dë nï na rakaga mati mo ayɔlɔ henye nï’dï Pawolo, nida vïdï 'ba Roma ku nyɔri aba.

Pawolo komo magalesi 'ba Yude

30 Ko’do vere aba, kyedre 'ba da vo kyëlu omba ku zi yɔlɔ kö’du ma tïnyö, kö’du a’di Yude asusunnï Pawolo gɔ mo. Here mo inga nyɔri 'ba Pawolo 'de, ehe mo ï’dï kö’du zi kyedree 'ba vo karase ehe vo dagbe 'ba Yude biya zi rë nnï tɔtɔ. Here mo ika Pawolo loko ehe o’dɔ mo tɔrɔ komo zë.