Lɔɔ 'ba vo Lïtuwë 5

Ananiya mbara 'bënï Safira aba

1 Kora maako ru mo Ananiya, mbara 'bënï Safira aba, ogonnï kaŋo 'bënnï yaga. 2 Mora idannï da kö’du zi sesi kya 'ba kɔhi ne, na 'bënnï. Here mati Ananiya oba kɔsɔ kɔhi ne zi vo lïtuwë, 3 Petero iya zi mo henye, "Ananiya, kö’du a’di ï’dï Satani yï ko’ba, zi sesi kya 'ba kɔhi mati i’ja ta da kaŋo ma ogo ne? Kö’du a’di iga ndɔndɔ zi Lawo Laka? 4 Wa ne 'bëyï ra mati gba ogo dë, ehe kpa tapëtï kogo mo, kɔhi mo gba zɔ na 'bëyï. A’di ra o’dɔ yï zi kö’du ma here ne ko’dɔ? Iga ndɔndɔ ne dë zi vïdï, iga ndɔndɔ ne zi Wïrï."

5 Kandi mati Ananiya owo kö’du ne, mo alëpï akaŋo brua na yöku. Vïdï biya mati owonnï ne, biya na tere. 6 Gisi kora ɔbi ayinnï loko, ehe olonnï ida rɔ mo. Here zë ïnjënnï yaga, usunnï. 7 Kadra wota aba yaa, mbara 'bɔmo Safira ayi loko, mora ayɔlɔ kö’du mati o’dɔ rë nï zi kora 'bënï ne dë. 8 Petero ako’jo hɔ mo iya henye, "Ayada zi ma, ogowe kaŋo ne da kɔhi nenye?" Mo alëzë iya henye, "Ɔɔ, kɔhi ne mo ra biya ne." 9 Petero iya zi mo henye, "Kö’du a’di yï kora 'bëyï aba rïyö, ide me’do zi yɔnzɔ Lawo Laka? Kora mati usunnï Ananiya, ëdïnnï ha loko, ehe akumbënnï yï yaga." 10 Kandi mo alëpï burutu Petero oli. Mati gisi kora ɔbi nee, ayinnï hulëhu loko, i’jannï Safira ako’do ani na yöku. Here zë ïnjënnï mo yaga ehe usunnï mo dakapa kora 'bɔmo. 11 Kanisa na tere, ehe vïdï biya mati owonnï kö’du ma o’dɔ rë nï ne.

Kö’du koro rakaga aba

12 Vo lïtuwë o’dɔnnï kö’du koro rakaga aba kyɔ mï kutë vïdï. Vo kusu ga Yere biya 'duwï rë nnï tɔtɔ mï kapa 'ba yëkëlu ako’jo loko sënjë 'ba Solomono. 13 Vïdï maakowe yaga tëmï gboko 'bëzë omba dë zi rë nï drɔko zë aba, mora vïdï biya ombannï zë le ndra. 14 Vïdï kora kyɔ ehe mbara ayetonnï koma mï Yere. 15 Here vïdï rakɔe ika zë yaga da gërï o’ba da agburuku. Asösunnï ëzë Petero alasi ta dakapa, ehe galïlï mo akalëpï dë zë, akakɔ’jɔ zë. 16 Vïdï kayo ma ëdïnnï alima mï gawowe kara Yerusalema, ikannï zë mati rakɔɔ aba mandere zë mati dakyikyi aba mï nnï, akɔ’jɔ zë biya.

Yaza 'ba vo lïtuwë

17 Kyedre 'ba vo karase ehe Sadeke biya osonnï ndɔ na mïkumbë. 18 Zë ïrïnnï vo lïtuwë, ï’dïnnï zë mï kamba ta da komo vïdï biya. 19 Mora mï yɔndɔ nani malayika kazi Yere ayëhu ha loko 'ba kamba, ayasi vo lïtuwë yaga. Malayika iya henye, 20 "Ï’bëë mï yëkëlu, ehe ayade zi vïdï me’do 'ba dïdï nenye biya." 21 Here zë ï’bënnï kadra asi ku nzere, ehe ayetonnï kö’du yandi mï yëkëlu.

Kyedre 'ba vo karase vïdï 'bënï ëtï ako’jonnï ga bi kölö magalesi mati zë kyedree 'ba Yiserele. Ï’dïnnï kö’du zi vo lïtuwë kika zi nnï tëmï kamba. 22 Vo kanya 'ba yëkëlu mati utu zë mï kamba, i’jannï vo lïtuwë dë. Zë a’bannï, iyannï henye, 23 "Di’ja ze kamba na kisi ŋbïrï, ehe vo kanye ëdï tɔrɔnnï ha loko. Mora mati da yëhu ha loko, ehe dödu mï mo, di’ja vïdï maako dë ani." 24 Kyedre vo kanye 'ba yëkëlu ehe kyedree 'ba vo karase owonnï kö’du kiya 'bëzë ne, mora ayɔlɔnnï dë a’di ra sösunnï atëdï. 25 Vïdï maako ayi ödu loko iya henye, "Yaanya aba kora naniye, mati ï’dïyë mï kamba ëdïnnï mï yëkëlu vïdï yandi." 26 Kyedre vo kanya 'ba yëkëlu ï’bënnï vo kanye ëtï ehe ikannï vo lïtuwë hulëhu, mora o’dɔnnï zë dë na kamo, ga kö’du zë na tere kazi vïdï ayetonnï zë ku’du yïtö aba.

27 Mati ika vo lïtuwë ku komo magalesi, kyedre 'ba vo karase iya henye, 28 "Da yada ku huwë zi ye, ayandiye kö’du dë mï ru 'ba Yësu. Mora onge wa mati o’de ne te. Ëdï yandiye vïdï biya mï Yerusalema, ehe ëdï ayɔnze zi kö’du koli 'bɔmo ya’ba gu ze." 29 Petero vo lïtu maakowe ëtï aya’bannï dɔ mo iyannï henye, "Doro ze Wïrï ndra ta da vïdï. 30 Ofowe Yësu mo tötö aba da taka, mora Wïrï 'ba zutu 'beze ïnjë mo na dïdï. 31 Wïrï o’dɔ mo na vo dagba 'beze ehe na vo wayɔmɔ. Wïrï ï’dï bi zi mo da kala nï ma tïrï, ehe vïdï 'ba Yiserelee ata’bannï hulëhu zi mo ehe akila kö’du kyënyë 'bëzë. 32 Ze kinye zi yada kö’du nenye biya zi ye, ehe Lawo Laka zi yada kpa zi ye, mo wakï’dï 'ba Wïrï zi vïdï biya ma oro Wïrï."

33 Mati vïdï 'ba vurëë owonnï kö’du nenye, zë ayinnï na kamo, ombannï zi kofo vo lïtuwë. 34 Mora ma kölö maako tëmï zë, Farasi ru mo Gamalili, mo vo komoyandi 'ba kö’du kï’dï ma oro mo ndra. Mo ï’dï kö’du zi vo lïtuwë koba dero tisi yaa yaga. 35 Here mo iya zi vïdïyë 'ba mï vurëë henye, "Kora 'ba Yiserele, komowe mandi re kö’du wa mati ëdï ko’de zi kora nenyee. 36 Tadura alaya kadra ma alaga nani aba, o’dɔ rë nï na vïdï kyedre maako, ehe vïdï kora kaa lamisowɔ adrɔko rë nnï mo aba. Mora mati ofo mo, vo ga ndï mo apere rë nnï biya, kö’du 'bɔmo ne inde rë nï. 37 Yaa mati iti ga vïdï 'ba dakaŋo 'beze, Yudasi tëmï Galilaya alaya kpa. Vïdï kayo alö’bönnï ga ndï mo, mora ofo mo, ehe vo lö’bö ga ndï mo apere rë nnï biya. 38 Here miya zi ye tëdïyë na kɔwɔ ta ra kora nenyee. Ile zë na bi dë nnï. Ëzë kö’du ko’dɔ 'bëzë ne 'ba vïdï köndu, akinde rë nï. 39 Mora ëzë ayi kazi Wïrï, ɔ’be dë yata, nje ëzë ombe zi wehe ko’dɔ Wïrï aba." Vo vurëë ombannï da me’do 'bɔmo. 40 Zë ako’jonnï vo lïtuwë hulëhu loko, u’bönnï zë, ehe ï’dï kö’du zi zë, ma me’donnï dekpe löhu mï ru 'ba Yësu. Ilannï zë tï’bë.

41 Vo lïtuwë ilannï magalesi rakyenyi aba, ga kö’du Wïrï o’dɔ zë zi riti ki’ja ga kö’du 'ba Yësu. 42 'Duwï ayaŋa kadra 'bënnï mï yëkëlu, ehe mï liŋɔ kölö maako ta ga agamo ɔrɔnnï dë ta bi kö’du yandi, ehe yada kö’du yöyö laka Yësu ra Korisitɔ.